[1] Paka kalbas ina, ako apo ngiitan opat ka angil agitaydek sa opat ka sokol kobat. Kansiro piyageleg in opat ka kowaya matang ayaw kay mangkowaya sa kobat, osai sa mga yangaw, kamayba din sa dagat.
[2] Kadogay ako kangitan osai kay ka angil agonaik ista agbangen sa paglowasan ibeng. Ina pag angil apo piyagatang batay pananda batang sa agkaboway pag Diyos. Siyo mango sa opat ka angil in piyakan kabaloyan agsida sa kobat osai sa dagat
[3] keyen, Ayaw kay kanyo agsidaen in kobat, osai in mga yangaw, kamayba in dagat, anggan yewed kay matandaan sa kiray in mga sogowan kantam Diyos.
[4] Kalbas siyabi sa kangay in bilang in mga tiyandaan. Siro osai ka daan apatnapot apat ka libo (144,000), batang sa boo mga tiribo Israil.
[5] labing dowai ka libo (12,000) sa tiribo Oda, labing dowai ka libo (12,000) sa tiribo Robin, labing dowai ka libo (12,000) sa tiribo Gad,
[6] labing dowai ka libo (12,000) sa tiribo Asir, labing dowai ka libo (12,000) sa tiribo Niptali, labing dowai ka libo (12,000) sa tiribo Manasis,
[7] labing dowai ka libo (12,000) sa tiribo Simyon, labing dowai ka libo (12,000) sa tiribo Libi, labing dowai ka libo (12,000) sa tiribo Isakar,
[8] labing dowai ka libo (12,000) sa tiribo Sabolon, labing dowai ka libo (12,000) sa tiribo Osi, labing dowai ka libo (12,000) sa tiribo Binamin.
[9] Paka kalbas ina, ako kangitan aronaw mga mangyan, yewed abilang kamayba nakay, siro batang sa baatte kobat, baatte tiribo, baatte bayan, baatte agiplaong. Siro agtaydek sa adap in pagpanokkawan lakoy osai sa adap in Bodang Topa. Siro agpaypanlambong maboksi, apo piyagatang mga daon.
[10] Siro miplaong maksen keyen, In Bodang Topa in agpamaboway, osai in kantam Diyos in agitokkaw sa pagpanokkawan lakoy.
[11] Tomaydek in boo mga angil sa bangen in pagpanokkawan lakoy osai in mga koyay, osai in opat ka agkaboway. Siro agpatalegeb sa adap in pagpanokkawan lakoy, agsamba sa Diyos.
[12] Siro keyen, Ina wa ngani. Kantam Diyos lakonaw. Kailangan in boo agsabi siyo in maal, siyo in mabwat, siyo in katawanan, siyo in piyagkaanggayan, siyo in koyay, siyo in apo kabaloyan, osai in maeyat, anggan idapo kalobosan. Ina wa ngani.
[13] Ako tiyanong in osai ka koyay keyen, Nakay pag mga mangyan in agpaypanlambong maboksi? Sa nakay batang siro?
[14] Ako keyen, Laki koyay, ako yewed katawan, kao in katawan. Kalbas in koyay keyen, Siro in mga batang domalan sa kaidapan lakoy, liinis in kansiro mga lambong, piyaboksi sa daya in Bodang Topa.
[15] Ina in dailan kaya siro asin sa adap in pagpanokkawan lakoy Diyos. Kadayo ibeng kadayo yabi siro pagsogowan daan in Diyos sa kansiyo balay. In agitokkaw sa pagpanokkawan lakoy in batay agalapet sa kansiro.
[16] Siro idbatay wa agkayawes, idbatay wa agkainem, siro idbatay wa din aibengan, idbatay wa din apasi kamayba nakay pag maibeng wano.
[17] Angkataw in Bodang Topa sa kagwaraan pagpanokkawan lakoy in batay agalapet sa kansiro. Siro kansiyo piyagpaanggat sa mga bokal sapa agpamaboway. Batay piyonas in Diyos in lowa sa kansiro mga mata.