[1] Kalbas kangay ngiitan in osai ka angil aglompot batang sa langit, apo piyagatang kadina lakoy, osai in sosi in langa idapo potok.
[2] Kansiyo diyakep in daragon, in olay tangona, ina in diyablo, Katanas. Biyakos osai ka libo ka dagon.
[3] Ina biyenglay sa langa idapo potok. Biyengbeng in sakbawan, kiyandado, matang idwa kapadaya sa mga mangyan, anggan ikkay kalbas in osai ka libo ka dagon. No kalbas wa ina, na kailangan siyo piyagpalpas kadogayte waget.
[4] Ako kangitan mga pagpanokkawan. In mga asin agitokkaw piyangwat wa tanongan. Kangay din ngiitan in abyan in mga piyogot panawen siro agbarita panawen kay Isos osai agpatoldo in agiplaong Diyos. Siro yewed agmaal sa ayop lakoy osai sa rarawan ina. Kansiro din piyagayaw tiyandaan in ayop lakoy kansiro ki ray osai bakwaw. Siro piyaboway wakay, kalbas agpoon lakoy sarig Kiristo osai ka libo ka dagon.
[5] Ina in tokaw pag agpaboway wakay. In amat kay din pag mga matay, batay wakay din piyagpaboway, no kalbas in osai ka libo ka dagon.
[6] Agkaanggay, apyaan gayed in mga piyaboway sa tokaw pag agpaboway wakay. In kadowai ka katayan idapo kabaloyan sa kansiro. Siro batay mga sasirdoti in Diyos osai in Kiristo. Siro kansiyo batay sarig agpoon lakoy osai ka libo ka dagon.
[7] Paka kalbas in osai ka libo ka dagon, Katanas batay wakay piyagpalpas.
[8] Siyo batay panaw matang agpadaya sa mga mangyan sa boo kobat, Gog osai Magog. Siro batay piyagtipon Katanas, batay piyagpaanggat sa gira, in karowen karo in bowangin sa balabaan dagat.
[9] Siro panaw omarabang sa boo kobat. Kansiro riibok in kampo in mga iidang Diyos, osai in bayan kansiyo piyagmaal. Kamay apo baya lomabo batang sa langit, siro tiyebed.
[10] In diyablo in agpadaya sa kansiro biyenglay din sa baya kasopri kaslang dagat, pagbenglayan din in ayop lakoy osai in agpadaya pag poropita. Siro batay piyagpakaskitan ibeng kadayo yabi anggan idapo kalobosan.
[11] Kalbas kangay ngiitan in osai ka pagpanokkawan lakoy maboksi, osai in asin agitokkaw. Mapasaw in kobat osai in langit sa kansiyo adap, idwa ngiitan tagoli.
[12] In mga matay kamayba lakonaw, kamayba kalakoyte, kangay ngiitan sa adap in pagpanokkawan lakoy. Biyoswang in mga aklat. Osai kay ka aklat biyolwat din, in aklat listaan in mga agkaboway. In mga matay piyagidang, no nakay in kansiro mga piyangwat, no nakay in agisolat sa mga aklat.
[13] In mga matay sa dagat piyalowas. Piyalowas wakay din Katayan osai Pagbalayan in mga matay in mga sakop sa kansiro. In boo piyagidang no nakay in kansiro mga piyangwat.
[14] Kalbas biyenglay sa baya kaslang dagat in Katayan osai in Pagbalayan mga matay. Ina pag baya in kadowai ka katayan.
[15] Kamayba nakay in mga yewed liista kansiro ngaran sa aklat in mga agkaboway, na siyo biyenglay sa baya kaslang dagat.