[1] Kalbas kangay ngiitan in bayo wakay pag langit, bayo wakay din pag kobat. Mapasaw wa in datiyan langit, osai kobat, mapasaw wa din in dagat.
[2] Kangay ngiitan in Maal wano pag Bayan, bayo wakay pag Irosalim, aglompot batang sa langit, batang kay sa Diyos. Siyo kataw in kagbaiyan sandata batay pakasal, agpadaraga wa labi sa kansiyo batay lalaki.
[3] Ako karengey maksen pag agiplaong batang sa pagpanokkawan lakoy keyen, Maanda in pagpamatawan Diyos sarig wa mga mangyan. Siyo kansiro wa kamalay. Siro kansiyo wa mga mangyan. In Diyos palagi din sa kansiro. Siyo kansiro Diyos.
[4] Kansiyo wa batay piyonas in kansiro mga lowa. Idapo wa katayan, idapo wa agrongkot, idapo wa agpanangis, kamayba in mga maskit, angkataw in mga datiyan idapo wa.
[5] Kadogay in agitokkaw sa pagpanokkawan lakoy keyen, Maanda, kangay piyagalis in boote. Keyen kay, Kaimo solaten keyen, Anda pag mga agiplaong boo betek, maal piyaniwalaan.
[6] Siyabi kay sa kangay keyen, Mibaloy wa. Ako in Alpa osai in Omiga, in parakayan osai in kalobosan. No siyo agkainem na batay kangay piyakan sapa idapo bayad batang sa bokal agpamaboway.
[7] No siyo in mandaeg, na anda in batay piyangwat sa kansiyo. Ako batay kansiyo Diyos, siyo wakay batay kangay bodang.
[8] Kamay in mga agkalimo, in mga yewed agpaniwala, in mga bakla, in mga agpamono mangyan, mga agpanggaraw, mga balaonan, mga agmaal sa mga yewed Diyos, mga agpansabi baribid, na siro boo piyagbenglay sa baya kasopri kaslang dagat. Ina in kadowai ka katayan.
[9] Pasabangen wakay sa kangay in osai sa pito ka angil apo pito ka tasa makno in pito ka kalobosan pag mga kaidapan keyen, Aywawa, kangay piyagpapangkit sa kaimo in kagbaiyan batay babai in Bodang Topa.
[10] Ako piyaanggat in Betek pag Abyan, ako biyaba in angil sa osai ka latayan mabwat wano. Piyapangkit sa kangay in Irosalim, in Maal wano pag Bayan aglompot batang sa langit, sogod kayno sa Diyos.
[11] Ina agrawa panawen sa kabaloyan in Diyos, agbalawas kataw in makaamag pag bato aspi, agpaylangit kataw salmin.
[12] Apo lakoy alabat bato matekba osai mabwat, apo labing dowai ka sakbawan, in baatte osai apo agdamay osai ka angil. Sa mga ogbos sakbawan apo solat in mga ngaran in labing dowai ka tiribo Israil.
[13] Sa paglowasan ibeng agbangen tolo ka sakbawan, sa paglabowan ibeng tolo din, sa katolo ka agbangen tolo, sa kaopat tolo din ka sakbawan.
[14] In alabat in bayan lakoy tiyadyok sa labing dowai ka bato lakoy. Agisolat sa mga bato in ngaran in labing dowai ka katiwala in Bodang Topa.
[15] In angil in agpanggisodan sa kangay apo piyagatang pansokat ginto, matang piyagsokat in bayan, in mga sakbawan osai in mga alabat.
[16] In bayan tikkabaan osai in kaabaen, osai in kaslangen. Siyokat in angil in bayan, in kaabaen, osai in kaslangen, anggan din in kabwaten dalwampot opat ka libo (24,000) ka kilomitro.
[17] Kansiyo din siyokat in alabat, in katekbaen apatnapo ka depa sa sokat in angil.
[18] In alabat bato piyagawit aspi. In bayan ginto liinis wano gayed, agpaylangit kataw salmin.
[19] In mga bato pagtadyokan in alabat piyaiskapetan mga makaamag pag bato. In tokaw aspi, in kadowai sapiro, in katolo kalsidonya, in kaopat ismiralda,
[20] in kalima onisi, in kaenem kornalina, in kapito kirisolito, in kawalo birilo, in kasiyam topasyo, in kasampo kirisopraso, in kalabing osai asinto, in kalabing dowai amatista.
[21] Pirlas in labing dowai ka kopot sakbawan, baatte osai piyangwat osai waget ka pirlas. In bayan lakoy, in karsada ginto liinis wano gayed, agpaylangit kataw salmin.
[22] Ako yewed kangitan balay lakoy Diyos asin pag bayan, angkataw in Diyos Kapwan in apo kabaloyan sa boo, osai in Bodang Topa, ina pag bayan boo kansiro balay.
[23] In bayan idwa kailangan in rawa ibeng, osai bolan, angkataw in kalakoyen Diyos in agrawa asin. In Bodang Topa in tinglaw.
[24] Asina pag rawa batay agipanawan in boo mangyan. Batay piyagbaba ista in mga poon lakoy sa kobat in kansiro mga kayamanan.
[25] Palagi agiboswang in mga sakbawan, angkataw asin idapo batay yabi.
[26] In kalakoyen yaman in boo mangyan batay piyagbaba asin pag bayan.
[27] Kamay idapo kaisoroy asin kamayba nakay pag marames sa pangkit Diyos, kamayba nakay pag bakla, osai mga agpansabi baribid. In mga waget agisolat in ngaran sa aklat in Bodang Topa, kansiyo listaan in mga agkaboway, na ina in kaisoroy asin pag bayan.