[1] Kalbas lomwas wa sa langit osai ka makasoyo lakoy. Osai ka kagbaiyan aglambong ibeng, aglaed sa bolan. In kansiyo olo apo sarikaw labing dowai ka magirem.
[2] Siyo bonting, agkabangen wa agboslot, kalbas siyo agpango agkaskitan.
[3] Osai kay ka makasoyo in lomwas sa langit, osai ka daragon mapola, kagwali bayawak, lakonaw lakoy. Apo pito ka olo, sampo in songay. In baatte olo apo sarikaw.
[4] Yoopyas in kansiyo ikoy in katolo ka bilang mga magirem sa langit biyenglay sa kobat. Kalbas pataboy sa adap in kagbaiyan agkaboslotan, matang no lomwas wa na in bodang batay piyagtelen.
[5] Kalbas lomwas wa in bodang, kaliyakiyante. Kamay apo komwa sa bodang, biyaba wa sa Diyos sa kansiyo pagpanokkawan lakoy. Ina pag bodang piyagsandata batay agpoon lakoy sa boo mga mangyan. Siyo maeyat wano, in pamogbog bakal.
[6] In kagbaiyan wakay dayem domalagan wa pataboy sa moyod, sa osai ka kobat siyandata in Diyos sa kansiyo, matang ista siyo yaalapet osai ka libo, dowai ka daan, animnapo (1,260) ka ibeng.
[7] Kadogay apo gira sa langit. In poon sa mga angil piyagawit Migil, osai in kansiyo mga kabelagan angil aglaban sa daragon osai in kansiyo mga kabelagan.
[8] Diyaeg wa in daragon osai in kansiyo mga kabelagan. Siro biyoyaw wa sa langit.
[9] Biyenglay wa in lakonaw wano pag daragon, in olay tangona, piyagawit diyablo, no yewed Katanas, in agpadaya sa boo mangyan. Siyo biyenglay wa sa kobat, kadayo in kansiyo mga kabelagan.
[10] Kalbas ako karengey osai ka agiplaong maksen wano batang sa langit keyen, Ngona wa in Diyos agpamaboway. Piyapangkit wa in kansiyo kabaloyan, matang agpoon lakoy. Piyapangkit wa din in kabaloyan kansiyo Kiristo, angkataw biyoyaw wa sa langit in agpanombong sa kantam mga belag, in agpanombong sa kansiro kadayo ibeng kadayo yabi sa adap Diyos.
[11] Siro mandaeg sa diyablo panawen in daya in Bodang Topa, osai panawen in agsabi betek. Osai siro yewed mangalwasi kansiro boway.
[12] Na, laki mga taga langit, kamo malkaanggayan wa, in boo asin agbalay. Kamay maidap in batay piyagdalan kamo sa kobat osai sa dagat. Angkataw in diyablo lomabo wa sa kanyo, agkagalit wano, angkataw in kansiyo atawanan kadogayte wa in kansiyo betek.
[13] Paka atawanan in daragon siyo biyenglay wa sa kobat, kansiyo piyangagak in agboslot in bodang kaliyakiyan.
[14] Kamay in kagbaiyan piyakan dowai ka lagay kataw lawin lakoy, matang kailayog pataboy sa kansiyo kobat sa moyod. Ista siyo batay piyagalapet tolo ka dagon kalaati, matang idbatay abel in daragon.
[15] Panawen ina in olay agparangtoy sapa sa kansiyo bibi, sapa lakoy agiros, matang in kagbaiyan malimes.
[16] Kamay in kobat minganga, tiyelen in sapa piyarangtoy in daragon, matang boway daan in kagbaiyan.
[17] In daragon agkagalit sa kagbaiyan. Siyo panaw wa matang aggira sa kansiyo mga kasokponan agkaboway kay. Ina in mga mangyan agpaniwala sa mga otos Diyos, in mga yewed aglimbang agpaniwala sa mga piyatoldo Isos.
[18] Kalbas in daragon tomaydek sa balabaan dagat.