[1] In sapa agpamaboway piyapangkit din in angil sa kangay. In sapa kalinaw salmin aglowas sa pagpanokkawan lakoy in Diyos, osai in Bodang Topa.
[2] In sapa agdalan sa karsada sa kagwaraan in bayan. In tanan balabaan sapa apo poon yangaw agpamaboway, baatte bolan osai wakay ka raweg in galem. in mga daon pangoraw maskit sa mga mangyan.
[3] Idapo batay asin makabais sa Diyos. Asin pag bayan in pagpanokkawan lakoy Diyos osai in Bodang Topa. Siyo batay piyagmaal in kansiyo mga sogowan.
[4] Kansiro batay piyagngitan in kansiyo panrosayan. In kansiyo ngaran piyagsolat sa kansiro kiray.
[5] Ista idapo yabi. Siro idwa kailangan in rawa mga tinglaw, kamayba rawa ibeng, angkataw in Diyos daan in Kapwan in batay kansiro tinglaw. Siro batay agpoon lakoy anggan idapo kalobosan.
[6] Siyabi sa kangay in angil keyen, Anda pag mga agiplaong boo betek, maal piyaniwalaan. In Diyos Kapwan in agtaboy kansiyo Abyan sa kansiyo mga poropita, siyo in agsogo kansiyo angil matang piyapangkit sa kansiyo mga sogowan in mga idwa dogay batay wa mibaloy.
[7] Keyen Isos, Mamarengey kamo. Ako agrateng wa. Agkaanggay in mga agpaniwala sa siyolat atai pag aklat.
[8] Ako Owan in karengey, osai kangitan ina boo. Paka boo wa kangay arengeyan, kangay din ngiitan, ako patalegeb sa adap in angil in agpapangkit sa kangay, matang agmaal sa kansiyo.
[9] Kamay siyo keyen, Ayaw agmaal sa kangay, ako din dayem sogowan waget kataw kao, osai kataw in kaimo mga belag poropita, kadayo in boo mga agpaniwala sa mga siyabi atai pag aklat. In Diyos in kaimo pagmaalen.
[10] Kansiyo din siyabi keyen, Ayaw kaimo agbetangen in mga siyabi atai pag aklat mga batay rateng, angkataw bangen wa mibaloy ina.
[11] In daet, na agaway kay agpakadaet. In marames, na agaway kay agpakarames, kamay in maal, na agaway kay agpakamaal, in makaanggay sa Diyos, na agaway kay agpakaanggay sa Diyos.
[12] Keyen Isos, Kamo agparengey. Ako agrateng wa, kangay piyagbaba in mga batay piyagtaboy sa baatte osai, panawen sa kansiyo piyangwat.
[13] Ako in Alpa osai in Omiga, in tokaw osai in paori, in parakayan osai in kalobosan.
[14] Agkaanggay in aglaba kansiro mga damit, matang maal wa siro kaisoroy sa bayan, mamangan in raweg yangaw agpamaboway.
[15] Kamay in mga bakla piyagayaw misoroy sa bayan, kadayo in mga balaonan, kadayo mga agpanggaraw, kadayo mga agpamono mangyan, kadayo mga agmaal sa yewed Diyos, osai in mga agpansabi osai agpamangwat bari bid.
[16] Ako Isos in agsogo kangay angil matang ina piyapangkit sa kanyo sa mga barkadaan kangay mga bodang, ako kay Dabid kasokponan, ako in tagorabas.
[17] Siyabi in Abyan, osai in batay babai keyen, Aywawa. In boo karengey anda keyen din, Aywawa. No siyo agkainem na pasabangen wa. No agkabeet, na komwa in sapa agpamaboway. Ina idapo bayad.
[18] Ako Owan totoo wano agsabi sa baatte karengey, in piyagsabi atai pag aklat batay ngani rateng. No siyo agdagdag kay sa siyabi atai pag aklat na in mga kaidapan agkasolat atai batay piyagdagdag in Diyos sa kansiyo parosa.
[19] Osai no siyo agkowa kamayba nakay sa mga siyabi atai, na batay din piyagkowa Diyos sa kansiyo in kansiyo nges bagiyan raweg yangaw agpamaboway, osai sa Maal wano pag Bayan, in piyagsabi atai pag aklat.
[20] In agpapangkit anda pag boo agsabi keyen, Tiyak wa ngani, ako agrateng wa. Dali wa ngani, Isos, Kapwan, aywawa.
[21] Kangay pandalangin kamo boo alapeten Isos in Kapwan. Ina wa ngani.