[1] Sa angil barkadaan mga bodang Diyos sa Sardis kaimo solaten keyen, Anda in piyagsabi in apo pito ka angil Diyos, apo din pito ka magirem. Ako katawan in kaimo mga panawen. Kamayba kao keyen kao agkaboway, kamay yewed, kao ngani matay.
[2] Amba, mipolaw wa, paeyaten wakay in mga baywi kayte sa kaimo matang yewed toloy wa gayed matay. Angkataw kangay ngiitan in kaimo mga panawen yewed kay gayed maal sa pangkit kangay Diyos.
[3] Na benglayen wa in kaimo mga daet. Kaimo wakay remremen in mga tiyaboy sa kaimo tangona, in mga piyatoldo sa kaimo, ina kaimo pangwaten wakay. No kao yewed mipolaw na ako batay asin kataw agpanakaw, idbatay kaimo atawanan in kabetek ako agrateng.
[4] Kamay in amat asin sa Sardis apo kay agingat ikkay lebagen in kansiro mga lambong. Na siro maal wa kangay batay sarig agpaypanlambong maboksi.
[5] In mga agpandaeg batay din piyakan lambong maboksi. Osai in kansiyo ngaran idbatay biyeleg sa aklat listaan in mga agkaboway. Osai siyo batay din kangay piyagpabelag sa pangkit kangay Amang osai sa kansiyo mga angil.
[6] In apo talinga, na mamarengey sa piyagsabi in Abyan Diyos sa mga barkadaan kansiyo mga bodang.
[7] Sa angil barkadaan mga bodang Diyos sa Piladilpiya kaimo solaten keyen, Anda in piyagsabi in Betek, in maalno pasandigan, siyo in agatang in kay Dabid sosi. In kansiyo wa biyolwat, idapo wa batay kakopot, in kansiyo wa kiyopot, idapo wa batay kabolwat.
[8] Ako katawan in kaimo mga panawen, ako katawan in kaimo kabaloyan kalakoyte, kamay kao agpaniwala sa kangay piyatoldo. Kao yewed atorayan sa kangay. Matang kangay wa biyolwat osai ka sakbawan sa kaimo, idapono batay kakopot.
[9] Amba mamarengey kao. In barkadaan mga sakop Katanas, in mga agpakagwali Odyo, mga agpansabi baribid, siro kangay batay piyagpasabangen sa kaimo, piyagpatalegeb sa kaimo adap, matang siro katawan kao kangay piyagpakayawte.
[10] Kao maniwala sa kangay otos keyen ayaw aglimbang, na kao kangay batay piyagalapet sa kabetek piyagtepeng wa in boo mangyan sa boo kobat.
[11] Idwa dogay ako batay asin rateng. Alapeten gayed in sa kaimo, matang kao batay mandaeg. Na kao batay kabel in sarikaw, idbatay tiyaboy sa roma.
[12] In agpandaeg kangay batay piyagpangwat arigi sa balay kangay Diyos. Siyo idbatay wa panaw asin kamayba nangkadogay. Kangay batay siyolatan siyo in ngaran kangay Diyos, osai in ngaran in bayan Diyos. Ina in bayo wakay pag Irosalim in batay aglompot batang sa langit, batang sa Diyos. Kangay din batay piyagsolat sa kansiyo in kangay bayo wakay pag ngaran.
[13] In apo talinga, na mamarengey sa piyagsabi in Abyan Diyos sa mga barkadaan kansiyo mga bodang.
[14] Sa angil barkadaan mga bodang Diyos sa Laodisya kaimo solaten keyen, Anda in piyagsabi in piyagawit Ina wa ngani. Siyo in yewed aglimbang, agsabi boo betek. Siyo in riyakayan in boo piyangwat Diyos.
[15] Ako katawan in kaimo mga panawen. Ako katawan kao yewed maibeng, idwakay din madimla. Dayem nges kao maibeng, no yewed madimla.
[16] Na angkataw kao matabang, yewed maibeng, idwakay din madimla, na kao kangay wa batay piyagongo.
[17] Kaimo remrem kao mayaman, idbatay akorangan in boote. Kamay yewed kaimo ngiitan kao maidap wano, makapakayawte, korang wano, idapo damit, osai beleg kayno.
[18] Amba ngani, in kangay piyagsabi sa kaimo, matang kao yomaman ngani, na kao agbili sa kangay ginto, ginto liinis wa. Osai matang idwa piyagngitan in kaimo makarikoy pag bilog, na kao bomili din lambong maboksi, kao agdamit. Osai bomili gamot mata matang kao kangitan.
[19] In kangay mga piyagpakayawte kangay piyagpangelel, piyagparosa. Amba ngani, kao agpilit wa, benglayen wa in kaimo daet.
[20] Maanda, ako agitaydek sa awak sakbawan, agberya. No siyo mamarengey sa kangay agiplaong, agbolwat in sakbawan, na ako batay misoroy sa kansiyo. Kalbas ako batay kansiyo kalanglang sa agkoman.
[21] In mga agpandaeg kitam batay malpanokkaw sa kangay lakoy pagpanokkawan. Kataw ako mandaeg, kalbas ngona kami malsitokkaw osai kangay Amang sa kansiyo lakoy pagpanokkawan.
[22] In apo talinga, na mamarengey sa piyagsabi in Abyan Diyos sa mga barkadaan kansiyo mga bodang.