[1] Kangay ngiitan in agitokkaw sa pagpanokkawan lakoy, in kansiyo pamalang apo piyagatang aklat agibaroron, maykabila apo solat. Ina piyagkandado pito ka kandado.
[2] Kalbas kangay ngiitan osai ka angil maeyat wano, maksen wano in agiplaong agsabi keyen, Nakay in mayadi agsida in mga kandado, agbolwat in aklat?
[3] Kamayba sa langit, kamayba sa diya, kamayba sa galem diya, idapo ngiitan kabaloy agbolwat sa aklat, osai idapo karoris sa agisolat ista.
[4] Asina ako manangis wano maloba angkataw idapo ngiitan mayadi agbolwat sa aklat, agroris sa agisolat asin.
[5] Kamay keyen in osai ka koyay, Ayaw agpanangis. Baati, in liyon sa tiribo Oda, in kasokponan Dabid, siyo mandaeg wa, siyo wa in mayadi agsida in mga kandado, agbolwat in aklat.
[6] Kalbas sa kagwaraan in pagpanokkawan lakoy, in piyagribok in opat ka agkaboway, osai in mga koyay, sa kagwaraan ina ako kangitan osai ka Bodang Topa agitaydek. Kagwali siyo batang wa biyono. Siyo apo pito ka songay, osai apo pito ka mata. Ina in pito ka angil Diyos in siyogo sa boo kobat.
[7] Kalbas pasabangen in Bodang Topa, kiyowa in aklat sa pamalang in agitokkaw sa pagpanokkawan lakoy.
[8] Paka ina kansiyo kiyowa, in opat ka agkaboway agpatalegeb sa adap in Bodang Topa, kadayo in dalwampot opat ka mga koyay. Baatte osai apo piyagatang kagwali gitara. Apo din tasa ginto makno mala masadap. Ina in mga pandalangin in mga iidang Diyos.
[9] Siro agawit bayo wakay pag awit keyen, Kao in maal sa boo, maal komwa in aklat, Maal kao in agsida in mga kandado, angkataw kao batang biyono. In Diyos kaimo biiliyan mga mangyan, kaimo daya in pambili. In mga mangyan biili batang sa baatte tiribo, baatte agiplaong, baatte bayan, baatte kobat.
[10] Siro kaimo piyangwat osai ka barkadaan mga sasirdoti matang mga sogowan kantam Diyos, siro batay agpoon sa kobat.
[11] Kalbas ako manriwaan wakay, ako karengey in agiplaong libolibo, karowan mga angil idwa abilang. Siro agribok sa pagpanokkawan lakoy, sa opat ka agkaboway, osai sa mga koyay.
[12] Siro agawit wa lakoy maksen keyen, In Bodang Topa lakonaw, in batang biyono. In maal in boo agsabi keyen siyo in kabaloy sa boo, siyo in mayaman sa boo, siyo katawan sa boo, siyo in maeyat sa boo. In maal siyo pagmaalen, pagpakalakoyen, pagpakabwaten.
[13] Kalbas ako karengey in boo mga piyangwat sa langit, osai sa kobat, kadayo sa galem diya, anggan din in sa dagat. Ina pag boo agpalpangawitan keyen, In agitokkaw sa pagpanokkawan lakoy osai in Bodang Topa, siro pagpakabwaten, pagmaalen, pagpakalakoyen, pagpakoyayen, anggan idapo kalobosan.
[14] In opat ka agkaboway keyen, Ina wa ngani. In mga koyay agpatalegeb, agsamba.