[1] Paka kalbas ina, ako karengey kagwali miplaong lakoy mayraesan aronaw wano mangyan sa langit, agawit keyen, Pagmaalen in Diyos, in kantam Diyos agpamaboway. Siyo in lakonaw, in apo kabaloyan.
[2] Totoo betek in kansiyo mga parosa. Kansiyo piyarosa in inang mga agpanggaraw, in agdaet sa kobat. Siyo piyarosaan in Diyos panawen sa agbono sa mga sogowan in Kapwan.
[3] Tagoli wakay siro omawit keyen, Pagmaalen in Diyos, angkataw in sonog sa bayan lakoy Babilonya, in elep agtaydek lakoy anggan idapo kalobosan.
[4] In dalwampo opat ka koyay osai in opat ka agkaboway agpatalegeb agmaal sa Diyos in agtokkaw sa pagpanokkawan lakoy keyen, Ina wa ngani. Pagmaalen in Diyos.
[5] Apo miplaong sa pagpanokkawan lakoy keyen, Kanyo pagmaalen in kantam Diyos, kamo in boo kansiyo mga sogowan, kamayba lakonaw, kamayba din kalakoyte, kamo in mga agkalimo sa kansiyo.
[6] Kalbas ako karengey kagwali miplaong lakoy aronaw wano mangyan mayraesan, kagwali agaleng lakoy tagbongan, osai agdalegdeg lakoy, keyen, Pagmaalen in Diyos, angkataw agpoon lakoy in kantam Diyos in Kapwan, in apo kabaloyan sa boo.
[7] Kitam wa agkaanggay. Kantam pagmaalen in kansiyo kalakoyen, angkataw agkabangen wa in kasalan in Bodang Topa. Sandata wa in batay babai.
[8] Siyo piyakan lambong maboksi wano pag lino agrawa. In beet siyabi in lino in mga maal pag panawen in mga iidang Diyos.
[9] Siyabi sa kangay in angil keyen, Kaimo solaten keyen, Agkaanggay in mga biyerya sa kasalan in Bodang Topa. Siyo keyen kay, Ina totoo mga agiplaong Diyos.
[10] Ako agpatalegeb sa kansiyo adap matang agmaal sa kansiyo. Kamay siyo keyen, Ayaw agmaal sa kangay, ako din dayem sogowan waget kataw kao, osai kataw in kaimo mga belag agbaba in betek pag barita in piyatoldo Isos. In Diyos in kaimo pagmaalen. In betek pag barita in piyatoldo Isos in piyagbaba in boo mga poropita.
[11] Kalbas maboswang in langit. Kangay ngiitan osai ka kabayo maboksi, in agsakay piyagawit Betek, Maal pag Pasandigan, angkataw betek in siyo agparosa, osai aglaban.
[12] In kansiyo mata kagwali igang baya. Siyo aronaw sarikaw. Kansiyo ngaran agisolat sa kansiyo bilog, siyo waget in katawan in beet siyabi ina.
[13] In kansiyo lambong batang siyogbo sa daya. Siyo piyagawit Agiplaong Diyos.
[14] Agyanggat sa kansiyo in mga sondalo sa langit, aglambong maboksi pag lino agrawa. Siro din agsakay sa mga kabayo maboksi.
[15] Apo aglowas sa kansiyo bibi pisaw matarem, kansiyo batay pandaeg sa mga mangyan. Siyo batay agpoon lakoy, in pamogbog bakal. Kansiyo batay piyaglaed in pesaan obas piyagpaagos in maloba pag galit Diyos in apo kabaloyan sa boo.
[16] Sa kansiyo lambong, osai sa kansiyo panobo apo solat ngaran keyen Poon lakoy mga poon, osai Kapwan in mga kapwan.
[17] Kangay wakay ngiitan in osai ka angil agtaydek sa ibeng. Piyangowan siyo in boo mga bantog sa kiwang keyen, Aywawa kamo, matipon wa, malpamangan sa siyandata Diyos.
[18] Aywawa, mamangan in galem mga poon lakoy, mga kapitan, mga sondalo, mga kabayo, osai in mga agsakay. Komanen wa in mga galem boo mangyan, kamayba sogowan kamayba yewed, kalakoyte osai lakonaw.
[19] Kangay ngiitan in ayop lakoy, in mga poon lakoy sa kobat, osai in kansiro mga sondalo agkatipon matang aggira sa agsakay sa kabayo, osai sa kansiyo mga sondalo.
[20] Abel in ayop lakoy, kadayo in agpadaya pag poropita, in agpangwat mga makasoyo sa adap in ayop lakoy. Ina wa in agpadaya sa mga mangyan apo tanda in ayop lakoy, osai agmaal sa kansiyo rarawan. Siyo abel din. Ina pag dowai agkaboway daan biyenglay wa sa baya kasopri kaslang dagat.
[21] In kansiro mga sondalo biyono in pisaw aglowas sa bibi in agsakay sa kabayo. Siyawaan wa in boo mga bantog agkoman sa kansiro galem.