[1] In galem anda pag aklat agsabi in mga batay rateng. Ina pag mga batay rateng tokaw piyapangkit Diyos kay Kiristo Isos matang kansiyo wakay piyapangkit sa kansiyo mga iidang. Isos agsogo angil matang agpapangkit sa osai ka iidang Diyos in ngaran Owan.
[2] Anda wa in solat Owan in kansiyo mga ngiitan, in piyapangkit Diyos, piyatoldo wakay Kiristo Isos.
[3] Agkaanggay in agbasa anda pag aklat, osai agkaanggay in mga agparengey asin sa mga batay rateng, kalbas maniwala. Angkataw ina boo bangen wa batay mibaloy.
[4] -
[5] Ako Owan in agsolat sa pito ka barkadaan mga bodang Diyos sa Asya. Kangay pandalangin kamo pakaanggayen osai pakapyaen Diyos osai IsoKiristo, osai in pito ka angil sa adap pagpanokkawan lakoy Diyos. Siyo in Diyos tangona, Diyos din ngona, Diyos daan din anggan idapo kalobosan. IsoKiristo in betek pag agsabi, in tokaw abowayan sa mga matay, siyo in Poon Lakoy sa boo mga poon atai sa kobat. Kiristo Isos in agpakayawte sa kantam, siyo matay matang kitam piyalpas sa kantam mga daet.
[6] Kitam kansiyo piyangwat osai ka barkadaan mga sasirdoti matang mga sogowan Diyos kansiyo Amang. Kiristo Isos pagpalakonawen osai pagpakoyayen anggan idapo kalobosan. Siyo wa ngani.
[7] Baati, siyo agrateng wa, sa mga libo wa. Siyo batay piyagngitan in boo, kadayo in mga somaldak sa kansiyo. Batay malpanangis in boo tiribo atai sa kobat panawen sa kansiyo. Batay wa daan kataw ina, ina wa ngani.
[8] Keyen in Diyos in Kapwan, Ako in parakayan, ako in kalobosan. Keyen in apo kabaloyan sa boo, siyo in Diyos tangona, Diyos din ngona, Diyos daan din anggan idapo kalobosan.
[9] Ako Owan, in kanyo belag, kataw daan kamo agtiis sa kaidapan, angkataw kitam sakop kay Isos. Ako biilanggo sa kagwaraan dagat sa porote piyagawit Patmos, angkataw ako agpatoldo in agiplaong Diyos, osai in boo siyabi Isos, ina boo totoo.
[10] Ina pag betek ibeng Linggo, ibeng Kapwan, ako piyaanggat in Abyan Diyos. Kalbas toloy ako karengey agpango sa kangay paoriyan kagwali lakoy bodyong agaleng,
[11] keyen, Solaten sa aklat in kaimo mga piyagngitan, kalbas pababaen sa pito ka barkadaan mga bodang Diyos, sa Ipiso, sa Ismirna, sa Pirgamo, sa Tiyatira, sa Sardis, sa Piladilpiya, osai sa Laodisya.
[12] Kalbas ako papeles sa paori matang kangay ngiitan in agiplaong. Kangay ngani ngiitan in pito ka tinglaw ginto.
[13] Sa kagwaraan mga tinglaw apo agtaydek kagwali lakoy mangyan. Siyo aglambong lakoy anggan sa darapa, agsalabiyan ginto.
[14] In abok maboksi wano kataw boybol pilak, kataw posilag. In kansiyo mga mata kagwali baya agigang.
[15] In kansiyo bitis agkilat, kataw tanso siyogbo sa baya, yaasa anggan agkilat. In kansiyo agiplaong kaksen tagbongan sapa aglabo.
[16] In kansiyo pamalang apo piyagatang pito ka magirem. Sa kansiyo bibi apo aglowas pisaw idapo sikil, tanan apo tarem. In kansiyo panrosayan makasolap kataw ibeng betek wano tangali.
[17] In ako kangitan sa kansiyo ako mameypey kagwali matay sa kansiyo adap. Kamay ako yaatang kansiyo pamalang. Miplaong keyen, Ayaw agkalimo. Ako in parakayan, ako in kalobosan,
[18] ako in agkaboway, ako batang wa matay, kamay maanda, ngona ako agkaboway wa palagi anggan idapo kalobosan. Ako apo kabaloyan sa katayan, kadayo sa balayan mga matay wa.
[19] Amba, solaten wa in kaimo piyagngitan, in agpangipangwat ngona, osai in batay kay agrateng.
[20] Kangay wa piyagpaliwanag in kaimo ngiitan pito ka magirem kangay piyagatang sa pamalang, osai in pito ka tinglaw ginto. In pito ka magirem, na ina in mga angil sa pito ka barkadaan mga bodang Diyos. Kalbas in pito ka tinglaw, na ina in pito ka barkadaan mga bodang Diyos.