[1] Ako mangkit, ista in Bodang Topa agtaydek sa boksor Siyon, sarig in osai ka daan apatnapot apat ka libo (144,000) ka mangyan. Siro apo solat sa kansiro kiray ngaran in Bodang Topa, osai ngaran in kansiyo Amang.
[2] Kalbas ako karengey osai ka miplaong batang sa langit kagwali agaleng tagbongan lakoy, osai agaleng dalegdeg. In agiplaong kangay arengeyan kagwali din togtog gitara.
[3] Siro agawit bayo wakay pag awit sa adap in pagpanokkawan lakoy, osai sa opat ka agkaboway, anggan din sa dalwampot opat ka mga koyay. Idapo batay katawan ina pag awit no yewed in osai ka daan, apatnapot apat ka libo (144,000), in biili sa kobat.
[4] Ina pag mga kaliyakiyan idbatang apo babai, siro begle daan, siro agyanggat sa Bodang Topa kamayba sa nakay pataboy. Siro biili ibat sa boo mga mangyan matang siro in tokawan tiyaboy sa Diyos osai sa Bodang Topa.
[5] Siro yewed agsabi baribid kamayba nangkadogay. Siro idapo wano daet.
[6] Kangay wakay ngiitan in osai ka angil agilayogan sa ogbos, agbaba in Maalno pag Barita idapo kalobosan, matang piyagpaalam sa boo mga mangyan sa boo kobat, baatte tiribo, agiplaong, osai bayan.
[7] Siyo maksen agsabi keyen, Kamo agkalimo sa Diyos, pagmaalen in kansiyo kalakoyen. Angkataw rateng wa in kabetek siyo agparosa. Kanyo sambaen in Diyos in agpangwat langit, osai in kobat, dagat, osai mga bokal sapa.
[8] Kadogay in kadowai ka angil agsabi keyen, Maregnas wa, maregnas wa in bayan lakoy Babilonya. Kansiyo piyakan alak in boo mangyan, in agpanggaraw kataw alak matapang. Siro kansiyo piilit piyainem.
[9] Kadogay somonod sa dowai in katolo ka angil. Siyo agsabi maksen keyen, No siyo somamba sa ayop lakoy osai sa kansiyo rarawan, osai no siyo apo in tanda sa kansiyo bakwaw, no yewed sa kiray,
[10] na siyo batay aginem in galit Diyos kataw alak idapo palagem, biyobo in Diyos sa lisap kansiyo galit. Siro batay maloba piyagpakaskitan baya osai kasopri sa adap in Bodang Topa, osai maal wano pag mga angil.
[11] In baya in agpakaskit sa kansiro, in elep batay agitaydek anggan idapo kalobosan. Kamayba ibeng, kamayba yabi idapo agpainga in mga somamba sa ayop lakoy, osai sa kansiyo rarawan, kamayba nakay in apo in tanda kansiyo ngaran.
[12] Na kailangan agpakarigen in mga iidang Diyos, in agpaniwala sa kansiyo mga otos, osai agaway agpasandig kay Isos.
[13] Kalbas ako karengey agiplaong batang sa langit keyen, Kaimo solaten keyen, Sogod ngona agkaanggay in mga agpaniwala sa Kapwan anggan matay. Siyabi in Abyan keyen, Totoo ngani. Siro batay wa agpainga sa kansiro mga mabyat pag panawen, angkataw batay piyagngitan in raweg kansiro mga panawen.
[14] Ako mangkit, kalbas kangay ngiitan maboksi pag libo. Asin agtokkaw osai ka agkaboway kagwali mangyan, apo sarikaw ginto, osai apo piyagatang karit matarem.
[15] Osai kay ka angil in lomwas batang sa balay lakoy Diyos, agsabi maksen sa agitokkaw sa libo keyen, Dali wa, kao aggapas wa, angkataw kabetek wa, layes wa in aniyen sa kobat.
[16] Aggapas wa ngani in agitokkaw sa libo, maani wa in aniyen sa kobat.
[17] Osai kay ka angil in kangay ngiitan lomwas batang sa balay lakoy Diyos sa langit. Apo din piyagatang karit matarem.
[18] Lomwas batang sa pagpangandogan in osai kay ka angil, in agalapet baya. Maksen kansiyo siyabi sa angil apo karit matarem keyen, Manggapas wa, aniyen wa in mga obas sa boo obasan sa kobat, angkataw layes wa.
[19] Agkarit wa in angil, yaani in mga obas, kadogay siyoroy sa pesaan. Ina in maloba pag galit Diyos.
[20] In mga obas piyesa sa idwa bayan. Kadogay lomwas batang sa pesaan in daya kagwali bongkalos, tolo ka daan ka kilomitro in kadayowen, in kalayemen kalayem mangyan.