[1] Paka kalbas ina, kangay ngiitan in osai ka angil apo lakoy kabaloyan. Siyo aglompot batang sa langit. In boo kobat romawa panawen sa kansiyo kalakoyen.
[2] Siyo mango maksen keyen, Masida wa, masida wa in Babilonya lakoy. Ina ngona pagpamatawan waget in mga makageet, kolongan in mga marames pag mamaw, balay din marames pag mga bantog makasoka.
[3] Angkataw kansiyo piyainem alak in boo mga mangyan, kansiyo daet agpanggaraw. In mga poon lakoy sa kobat agpanggaraw sa kansiyo. In mga aglako yomaman sa kansiyo marames pag panawen.
[4] Ako karengey kay miplaong batang sa langit keyen, Kangay mga mangyan, kamo panaw wa sa kansiyo, ayaw kamo agkaakayan sa kansiyo daet, matang kamo yewed piyarosa sarig siyo.
[5] Angkataw in langit siyawaan wa in kansiyo mga daet, in Diyos idbatay agkalibangaw sa mga daet Babilonya.
[6] Kanyo pangwaten sa kansiyo kataw in kansiyo mga piyangwat. Kanyo pakaknowen in kansiyo lisap labi kay mapait kaysa kansiyo piyainem sa amat.
[7] No nangkalakoy in kansiyo agpakabwat remrem osai agpanggaraw, na kalakoy daan ina siyo paidapanen osai parongkoten. Angkataw palagi kansiyo piyagpanremrem keyen siyo sa pagpanokkawan lakoy agpoon. Keyen siyo yewed balo, siyo idbatay agrongkot kamayba nangkadogay.
[8] Kamay batay rateng sa kansiyo sa osai waget ka ibeng, in boo kaidapan, maskit, agrongkot, agkayawes. Siyo batay tiyebed sa baya, angkataw apo kabaloyan in Diyos Kapwan in agparosa sa kansiyo.
[9] In mga poon lakoy sa kobat, siro in mga agpanggaraw sa kansiyo, osai kansiyo sarig agkabibel agpanawen, sa betek siro agpangkit sa elep batang sa bayan piyagsonog siro batay malpanangis, malpanggoong.
[10] Siro batay tomaydek waget sa adayonaw, angkataw siro agkalimo sa kansiyo kaidapan. Siro keyen, Yaay, in kalobaen. Osai waget ka oras mibaloy wa in parosa sa lakonaw pag bayan Babilonya.
[11] In mga agpanlako sa kobat manangis panawen sa kansiyo, maypanremrem, angkataw idapo wa batay bomili in kansiro piyagtinda.
[12] Idapo wa batay bomili kansiro ginto, pilak, mga bato makaamag, osai pirlas, damit lino, damit silko, agkapolaen osai mapola daan, yangaw mala masadap, mga pangil ilipanti piyangwat sangkap, mga yangaw makaamag, tanso, bakal, bato pongol,
[13] mga pampasadap pamangnen, osai mga mala masadap kataw kamanyan, mira, osai insinso, alak osai langis, arina osai tirigo, mga baka osai topa, kabayo osai kalisa, in mga din piyagtinda in mga bilog mangyan, mga sogowan.
[14] In mga agpanlako agsabi sa kansiyo keyen, Maidapo wa in boo mga maalen kaimo piyagkaamag, idbatay wa tagoli kaimo ngiitan in boo kaimo mga kasangkapan, kadayo in kaimo kamaalnowen.
[15] Idbatay agpasabangen in mga agpanlako, in mga yomaman asin pag bayan, angkataw siro agkalimo sa parosa sa kansiyo. Batay agpanangis siro, osai agpanremrem keyen,
[16] Yaay, in kalobaen in mibaloy asin pag bayan lakoy. Tangona siro aglambongan lino, agkapolaen osai mapola wa daan. Osai tangona aronaw yaman sa bilog ginto, mga makaamag pag bato, osai pirlas.
[17] Osai waget ka oras toloy maidapo ina pag boo. Osai in boo mga kapitan mapor, osai in mga agsakay, osai in mga agpamangka, in boo mga agpanlako sa dagat, sa adayonaw
[18] agriwa sa elep batang sa bayan piyagsonog. Siro malpanangis keyen, Idapo bayan kataw ina pag bayan lakoy.
[19] In siro agpalpanggoong kansiro olo piyagborisan. siro agpanangis keyen, Yaay, in kalobaen in mibaloy sa bayan lakoy. Asina yomaman in boo kapwan mapor, kamay osai waget ka oras toloy maidapo in boo kansiyo kayamanan.
[20] Maal wa agkaanggay in mga taga langit sa mibaloy sa kansiyo. Kamo in mga iidang Diyos, in mga katiwala Isos, osai in mga poropita, kamo agkaanggay wa. Angkataw siyo piyarosa wa in Diyos panawen sa kansiyo mga piyangwat sa kanyo.
[21] Kalbas osai ka angil maeyat in komwa osai lakoy ka bato kagwali gilingan, biyenglay sa dagat, keyen, Kataw ina batay piyagsida in bayan lakoy Babilonya. Idbatay wa tagoli ngiitan,
[22] idbatay arengeyan asin in mga agana gitara agtogtog, in agana bangsi, osai bodyong, idapo wa batay ngiitan asin in agpamangwat kamayba nakay pag sangkap, idbatay wa arengeyan in mga agaleng gilingan.
[23] Idbatay wa tagoli apo tinglaw asin kamayba osai waget, idbatay wa din arengeyan in kaanggayan sa kasalan. In mga agpanlako asin apo kabaloyan sa boo kobat, in mga asin salimangkaan agpadaya sa boo mangyan.
[24] Kaya in Babilonya piyarosa, angkataw siyo in agbono sa mga poropita, osai sa mga iidang Diyos, kadayo sa boo mga biyono sa kobat.