[1] ᐁᑯᐢᐱ ᒫᑲ ᒋᓴᐢ ᑳ ᐃᑐᑕᐦᐃᑯᐟ ᐊᐦᒑᐦᑲᐧ ᐱᑲᐧᑕᐢᑲᒥᑳᕽ, ᑭᑕ ᑲᑫᐧᒋᐦᐃᑯᐟ ᒪᒋ ᐊᐦᒑᐦᑲᐧ.
[2] ᐃᐢᐱ ᒫᑲ ᓀᒥᑕᓇᐤ ᑭᓯᑳᐊᐧ ᒥᓇ ᓀᒥᑕᓇᐤ ᑎᐱᐢᑳᐊᐧ ᐁᑳ ᑳ ᒥᒋᓱᐟ, ᐁᑯᐢᐱ ᒣᐧᐢᑕᐢ ᑳ ᓄᑌᑲᑌᐟ.
[3] ᐃᐢᐱ ᒫᑲ ᐅᑲᑫᐧᒋᐦᐃᐁᐧᐊᐧ ᑳ ᐅᑎᐦᑎᑯᐟ, ᐅᒥᓯ ᑭ ᐃᑎᐠ, ᑭᐢᐱᐣ ᑭᔭ ᑭᓭᒪᓂᑐᐃᐧ ᑯᓯᓵᓂᐃᐧᐊᐧᓀ, ᐃᓯᐠ ᐅᑭ ᐊᓯᓂᔭᐠ ᑭᑕ ᐸᑫᐧᓯᑲᓂᐦᐃᒋᐠ.
[4] ᒫᑲ ᑭ ᓇᐢᑫᐧᐊᐧᓯᒣᐤ ᐁ ᑭ ᐃᑖᐟ, ᐃᑕᓯᓇᐦᐃᑳᑌᐤ, ᐊᔨᓯᔨᓂᐤ ᓇᒪᐃᐧᔭ ᐱᑯ ᐸᑫᐧᓯᑲᓇ ᑭᑕ ᐅᐦᒋ ᐱᒫᑎᓯᐟ, ᒫᑲ ᑳ ᐃᑕᑎᕽ ᐃᑌᐧᐃᐧᐣ ᑳ ᐅᐦᒋᐸᔨᔨᐠ ᑭᓭᒪᓂᑐ ᐅᑐᓂᕽ.
[5] ᐁᑲᐧ ᒫᑲ ᒪᒋ ᐊᐦᒑᕽ ᑭ ᐅᑎᓀᐤ ᐁ ᑭ ᐃᑐᐦᑕᐦᐋᐟ ᐊᓂᑕ ᑲᓈᒋ ᐅᑌᓈᕽ, ᐁ ᑭ ᓇᐦᐊᐱᐦᐋᐟ ᐁ ᐊᐧᓇᐢᑯᐊᐧᕽ ᑭᐦᒋ ᐊᔭᒥᐦᐁᐃᐧᑲᒥᐠ.
[6] ᐅᒥᓯ ᒫᑲ ᐃᑌᐤ, ᑭᐢᐱᐣ ᑭᔭ ᑭᓭᒪᓂᑐᐃᐧ ᑯᓯᓵᓂᐃᐧᐊᐧᓀ, ᓂᐦᒋᐸᔨᐦᐅ; ᒋᑫᒫ ᐃᑕᓯᓇᐦᐃᑳᑌᐤ, ᑭᑕ ᓯᑭᒣᐤ ᐅᑭᓯᑯᒪ ᑭᑕ ᑲᓇᐁᐧᔨᒥᐢᑭᐠ; ᐅ ᒋᐦᒋᐋᐧᕽ ᑭᑕ ᒥᒋᒥᓂᐢᑭᐠ ᑭᑕ ᐁᑳ ᓴᐢᑳᐱᐢᑭᓯᑌᓯᒧᔭᐣ.
[7] ᒋᓴᐢ ᑭ ᐃᑌᐤ, ᒥᓇ ᐃᓴ ᐃᑕᓯᓇᐦᐃᑳᑌᐤ, ᐁᑳᐃᐧᔭᐧ ᑲᑫᐧᒋ ᑳ ᑎᐯᔨᐦᒋᑫᐟ ᑭ ᑭᓭᒪᓂᑐᑦ.
[8] ᑫᔮᐱᐨ ᒪᒋ ᐊᐦᒑᕽ ᑭᑎᓀᐤ ᐁ ᑭ ᑯᐢᐹᒪᒋᐁᐧᑕᐋᐟ ᐊᓂᒪ ᐊᔨᐋᐧᐠ ᐁ ᐃᐢᐹᔨᐠ ᐊᐧᒋ, ᐁᑯᓯ ᐁ ᑭ ᐋᐧᐸᐦᑕᐋᐟ ᑲᐦᑭᔭᐤ ᐅᑌᓇᐃᐧᐃᐧᓇ ᐅᑕ ᐊᐢᑭᕽ, ᒥᓇ ᐁ ᐃᓯ ᑭᐦᒉᔨᐦᑖᑲᐧᓂᔨᑭ.
[9] ᐆᒥᓯ ᒫᑲ ᐃᑌᐤ, ᑲᐦᑭᔭᐤ ᐆᐦᐃ ᑭ ᑲ ᒥᔨᑎᐣ, ᑭᐢᐱᐣ ᐸᐦᑭᓯᓂᔭᓂ ᒥᓇ ᐅᒋᐦᒋᐦᑲᐧᓇᐱᐢᑕᐃᐧᔭᓂ.
[10] ᐁᑲᐧ ᒋᓴᐢ ᑳ ᐃᑖᐟ, ᐊᐊᐧᓯᑌ ᑭᔭ, ᓭᑕᐣ; ᒋᑫᒫ ᐃᑕᓯᓇᐦᐃᑳᑌᐤ, ᑭ ᑲ ᐅᒋᐦᒋᐦᑲᐧᓇᐱᐢᑕᐋᐧᐤ ᑳ ᑎᐯᔨᐦᒋᑫᐟ ᑭ ᑭᓭᒪᓂᑐᑦ, ᐁᐊᐧᑯ ᐱᑯ ᑫ ᐊᑐᐢᑲᐊᐧᐟ.
[11] ᐁᑲᐧ ᒫᑲ ᒪᒋ ᐊᐦᒑᕽ ᓇᑲᑌᐤ, ᒋᐢᐟ ᒫᑲ, ᐅᑭᓯᑯᐊᐧ ᑭ ᐯ ᓈᑎᐠ ᐁ ᐯ ᐸᒥᐦᐃᑯᐟ.
[12] ᐁᑲᐧ ᐃᐢᐱ ᒋᓴᐢ ᑳ ᐯᐦᑕᕽ ᐁ ᑭ ᑭᐸᐦᐅᒥᐦᐟ ᒑᓇ, ᑳᓬᐊᓬᐃᕽ ᑭ ᐃᑐᐦᑌᐤ:
[13] ᐁ ᓇᑲᑕᕽ ᒫᑲ ᓈᓴᕒᐁᐟ, ᑭ ᐯ ᐃᑐᐦᑌᐤ ᒥᓇ ᑭ ᐯ ᐊᔮᐤ ᑫᐸᕒᓀᐊᒥᕽ, ᐊᓂᒪ ᒋᑭ ᓵᑲᐦᐃᑲᓂᕽ ᑳ ᐃᐦᑕᑲᐧᕽ, ᑭᓯᐋᐧᐠ ᐊᓂᑕ ᓭᑊᔪᓬᐊᐣ ᒥᓇ ᓈᑊᑌᓬᐃᑦ:
[14] ᑭᑕ ᑎᐱᐸᔨᐠ ᑳ ᑭ ᐃᑌᐧᐟ ᐊᐩᓵᔭ ᐅᑭᐢᑭᐁᐧᐦᐃᑫᐤ, ᐁ ᐃᑌᐧᐟ, ᐅᐟ ᐊᐢᑭ
[15] ᓭᑊᔪᓬᐊᐣ, ᒥᓇ ᐅᐟ ᐊᐢᑭ ᓈᑊᑌᓬᐃᑦ, ᒋᑭ ᑭᐦᒋᑲᒥᕽ ᐊᑳᒥᕽ ᐃᑌᑫᑳᑦ ᒑᕒᑕᐣ ᐅ ᑳᓬᐊᓬᐃᒥᐋᐧᕽ ᐊᓂᑭ ᒉᐣᑕᐃᓬᐊᐠ;
[16] ᐊᓂᑭ ᐊᔨᓯᔨᓂᐊᐧᐠ ᑳ ᐊᐱᒋᐠ ᐊᐧᓂᑎᐱᐢᑳᕽ, ᑭ ᐋᐧᐸᐦᑕᒪᐧᐠ ᑭᐦᒋ ᐋᐧᐢᑌᐤ; ᒥᓇ ᐊᓂᑭ ᓂᐳᐃᐧᓂᓈᕽ ᑳ ᐊᐱᒋᐠ, ᒥᓇ ᐁ ᐋᑲᐋᐧᐢᑌᐢᑳᑫᐠ ᓂᐳᐃᐧᐣ, ᐋᐧᐢᑌᐤ ᐅᑎᐦᑎᑲᐧᐠ.
[17] ᐁᑯᐢᐱ ᒫᑲ ᐅᐦᒋ ᒋᓴᐢ ᑳ ᑲᑫᐢᑭᒥᐁᐧᐟ, ᐅᒥᓯ ᐁ ᐃᑌᐧᐟ, ᑫᐧᐢᑳᑎᓯᐠ; ᒋᑫᒫ ᓵᓴᐩ ᐯᓭᐧᔨᐦᑖᑲᐧᐣ ᑭᐦᒋ ᑭᓯᑯᐃᐧ ᐅᑌᓇᐃᐧᐃᐧᐣ.
[18] ᒋᓴᐢ ᒫᑲ ᐁ ᐱᒧᐦᑌᐟ ᓯᓱᓀ ᑳᓬᐊᓬᐃ ᓵᑲᐦᐃᑲᓂᕽ, ᑭ ᐋᐧᐸᒣᐤ ᓂᓱ ᐁ ᐅᒋᐋᐧᒥᑐᔨᐟ, ᓵᐃᒪᐣ, ᐱᑕᕒ ᐁᓯᔨᐦᑳᓱᔨᐟ, ᒥᓇ ᐅᒋᐋᐧᒥᔨᐊᐧ ᐋᐣᑕᕒᐅᐊᐧ, ᐁ ᐸᑲᐢᑕᐁᐧᐋᐧᒋᐠ ᐊᔭᐱᔭ ᓵᑲᐦᐃᑲᓂᕽ: ᒋᑫᒫ ᑭ ᓄᒋ ᑭᓄᓭᐁᐧᐃᐧᔨᓂᐃᐧᐊᐧᐠ.
[19] ᐅᒥᓯ ᒫᑲ ᐃᑌᐤ, ᐱᒥᑎᓴᐦᐅᐠ, ᑭ ᑲ ᐃᓯᐃᑎᓈᐋᐧᐤ ᑭᑕ ᓄᒋ ᑭᓄᓭᐋᐧᑖᔦᑯᐠ ᐊᔨᓯᔨᓂᐊᐧᐠ.
[20] ᐁᑯᓯ ᒫᑲ ᓭᒫᐠ ᑭ ᓇᑲᑌᐊᐧᐠ ᐊᔭᐱᔭ, ᐁ ᑭ ᐱᒥᑎᓴᐋᐧᒋᐠ.
[21] ᐁ ᐊᑎ ᓯᐯᐧᑌᐟ ᒫᑲ ᐁᑯᑕ ᐅᐦᒋ, ᑭ ᐋᐧᐸᒣᐤ ᑯᑕᑲ ᓂᓱ ᐁ ᐅᒋᐋᐧᒥᑐᔨᐟ, ᒉᒥᐢ ᐅ ᑯᓯᓴ ᓭᐱᑎ, ᒥᓇ ᐅᒋᐋᐧᒪ ᒑᓇ, ᐅᓯᕽ ᐁ ᐃᐧᒉᐋᐧᔨᐟ ᐅᑖᐃᐧᔨᐊᐧ ᓭᐱᑎᐊᐧ, ᐁ ᒪᒥᓴᐋᐧᔨᐟ ᐅᐟ ᐊᔭᐱᐋᐧᐊᐧ; ᑭ ᓇᑐᒣᐤ ᒫᑲ.
[22] ᐁᑯᓯ ᒫᑲ ᓭᒫᐠ ᑭ ᓇᑲᑕᒪᐧᐠ ᐅᓯ ᒥᓇ ᐅᑖᐃᐧᐋᐧᐊᐧ, ᐁ ᑭ ᐱᒥᑎᓴᐋᐧᒋᐠ ᒫᑲ.
[23] ᒋᓴᐢ ᒫᑲ ᑭ ᐸᐹᒧᑌᐤ ᒥᓯᐁᐧ ᑳᓬᐊᓬᐃᕽ, ᐁ ᑭᐢᑭᓄᐦᐊᒫᑫᐟ ᐅᐟ ᐊᔭᒥᐦᐁᐃᐧᑲᒥᑯᔨᕽ, ᒥᓇ ᐁ ᑲᑫᐢᑭᒥᐁᐧᐟ ᐁ ᐃᓯ ᒥᐋᐧᑐᑖᑲᐧᕽ ᐊᓂᒪ ᐅᑌᓇᐃᐧᐃᐧᐣ, ᒥᓇ ᐁ ᑭ ᐃᔨᓂᑲᑖᐟ ᒥᓯᐁᐧ ᐃᓯ ᐋᑯᓯᐃᐧᐣ, ᒥᓇ ᑲᐦᑭᔭᐤ ᓇᓈᑐᕽ ᐃᑖᐢᐱᓀᐃᐧᐣ ᐃᑕ ᐁ ᐊᔮᔨᐟ ᐊᔨᓯᔨᓂᐊᐧ.
[24] ᑭ ᐸᐹ ᐋᒋᒫᐤ ᒫᑲ ᒥᓯᐁᐧ ᓯᕒᐃᔭᐃᕽ; ᑭ ᐯᑕᒪᐁᐧᐊᐧᐠ ᒫᑲ ᑲᐦᑭᔭᐤ ᑳ ᐋᑯᓯᔨᐟ ᐊᔨᓯᔨᓂᐊᐧ ᓇᓈᑐᕽ ᑳ ᐃᓯ ᑭᑭᐢᑳᑯᔨᐟ ᐋᑯᓯᐃᐧᓇ ᒥᓇ ᑲᑳᐧᑕᑫᔨᒧᐃᐧᓇ, ᒥᓇ ᐊᓂᐦᐃ ᑳ ᐅᐃᐧᔭᐃᐧᐢᑳᑯᔨᐟ ᒪᒋ ᐊᐦᒑᐦᑲᐧ, ᒥᓇ ᐊᓂᐦᐃ ᑳ ᐋᐧᐅᒋᐱᑎᑯᔨᐟ, ᒥᓇ ᐊᓂᐦᐃ ᑳ ᓈᓂᐳᐃᐧᔨᐟ; ᑭ ᐃᔨᓂᑲᐦᐁᐤ ᒫᑲ.
[25] ᑭ ᐅᓵᒣᔭᑎᔨᐊᐧ ᒫᑲ ᐊᓂᐦᐃ ᐊᔨᓯᔨᓂᐊᐧ ᑳ ᑭ ᐱᒥᑎᓴᐦᐅᑯᐟ ᑳᓬᐊᓬᐃᕽ ᐅᐦᒋ, ᒥᓇ ᑎᑳᐳᓬᐃᓯᕽ ᐅᐦᒋ, ᒥᓇ ᒉᕒᐅᓴᓬᐊᒥᕽ ᐅᐦᒋ, ᒥᓇ ᒍᑎᐊᐃᕽ ᐅᐦᒋ, ᒥᓇ ᐊᑳᒥᕽ ᒑᕒᑕᓂᕽ ᐅᐦᒋ.