[1] ᐁ ᐳᓂ ᐊᔭᒥᐦᐁᑭᓯᑲᐠ, ᒣᑳᐧᐨ ᐁ ᐯᑕᐸᕽ ᐊᓂᒪ ᓂᐢᑕᑦ ᐁ ᑭᓯᑳᐠ ᐁᐊᐧᑯ ᐁ ᐃᐢᐸᔨᐠ, ᑭ ᐯ ᑕᑯᓯᐣ ᒣᕒᐃ ᒪᐠᑎᓬᐃᐣ, ᒥᓇ ᑯᑕᐠ ᒣᕒᐃ, ᑭᑕ ᐋᐧᐸᐦᑕᐦᑭᐠ ᔨᑲᐧᐦᐊᐢᑳᐣ.
[2] ᒋᐢᐟ ᒫᑲ ᑭ ᑭᐦᒋ ᑭᐦᑲᐧᐣ; ᒋᑫᒪ ᐅ ᑭᓯᑯᒪ ᑳ ᑎᐯᔨᐦᒋᑫᐟ ᑭᐦᒋ ᑭᓯᑯᕽ ᑭ ᐯ ᐅᐦᒋ ᔭᓯᔨᐊᐧ, ᐃᐢᑲᐧᑌᒥᕽ ᒫᑲ ᐁ ᑭ ᐅᐦᒋ ᐊᓭ ᑎᐦᑎᐱᓇᐟ ᐊᓯᓂᔭ, ᐁᑯᓯ ᒫᑲ ᐁ ᑭ ᑌᐦᑕᐱᐟ.
[3] ᐅ ᑎᓯᓇᑯᓯᐃᐧᐣ ᒫᑲ ᑖᐱᐢᑯᐨ ᐁ ᐊᐧᐢᑌᐸᔨᐠ, ᒥᓇ ᐅᐟ ᐊᔪᐃᐧᓂᓴ ᑖᐱᐢᑯᐨ ᑯᓇ ᑭ ᐃᓯ ᐊᐧᐱᐢᑲᔨᐊᐧ;
[4] ᑳ ᐃᐢᐱᒋ ᓭᑭᓯᒋᐠ ᒫᑲ ᐊᓂᑭ ᐅᑕᓴᐊᐧᐱᐊᐧᐠ, ᑭ ᓇᓇᒥᐸᔨᐊᐧᐠ, ᒥᓇ ᑖᐱᐢᑯᐨ ᐁ ᓂᐱᒋᐠ ᐊᔨᓯᔨᓂᐊᐧᐠ ᑭ ᐃᓯᓈᑯᓯᐊᐧᐠ.
[5] ᐊᓇ ᒫᑲ ᐅᑭᓯᑯ ᑭ ᓇᐢᑫᐧᐊᐧᓯᒣᐤ ᐅᒥᓯ ᐁ ᑭ ᐃᑕᐟ ᐃᐢᑫᐧᐊᐧᐠ, ᐁᑳᐃᐧᔭ ᓭᑭᓯᐠ; ᒋᑫᒪ ᓂ ᑭᐢᑫᔨᐦᑌᐣ ᐁ ᓇᓇᑐᓇᐋᐧᔦᐠ ᒋᓴᐢ, ᑳ ᑭ ᒋᐢᑕᐢᑲᐧᑎᐦᐟ.
[6] ᓇᒪᐃᐧᔭ ᐅᑕ ᐊᔮᐤ; ᒋᑫᒪ ᑭ ᐊᐧᓂᐢᑳᐤ, ᒣᐧᐦᒋ ᑳ ᑭ ᐃᑌᐧᐟ. ᐋᐢᑕᒥᑎᐠ, ᐯ ᐋᐧᐸᐦᑕᒧᐠ ᐃᑕ ᑳ ᑎᐯᔨᐦᒋᑫᐟ ᑳ ᑭ ᐱᒥᓯᕽ.
[7] ᐃᑐᐦᑌᐠ ᒫᑲ ᑭᔨᐸ, ᐃᐧᐦᑕᒪᑯᐠ ᐅ ᑭᐢᑭᓄᐦᐊᒪᐋᐧᑲᓇ ᓵᓴᐩ ᓂᐳᐃᐧᓂᕽ ᐁ ᑭ ᐅᐦᒋ ᐊᐧᓂᐢᑳᐟ; ᒋᐢᐟ ᒫᑲ, ᑭ ᓂᑕᐃᐧ ᐯᐃᑯᐋᐧᐤ ᑲᓬᐊᓬᐃᕽ; ᐁᑯᑌ ᒫᑲ ᑫ ᐋᐧᐸᒫᔦᐠ; ᒋᐢᐟ, ᑭ ᑭ ᐃᐧᐦᑕᒫᑎᓈᐋᐧᐤ.
[8] ᐁᑯᓯ ᒫᑲ ᑭᔨᐸ ᔨᑲᐧᐦᐊᐢᑳᓂᕽ ᑭ ᐊᑎ ᐅᐦᒋ ᓯᐯᐧᑌᐊᐧᐠ, ᑯᐢᑕᒋᐃᐧᓂᕽ, ᒥᓇ ᑭᐦᒋ ᒥᔭᐊᐧᑕᒧᐃᐧᓂᕽ, ᒥᓇ ᐁ ᑭ ᐱᒥᐸᑕᒋᐠ ᑭᑕ ᐃᐧᐦᑕᒪᐊᐧᒋᐠ ᐅ ᑭᐢᑭᓄᐦᐊᒪᐋᐧᑲᓂᔨᐊᐧ.
[9] ᒣᑳᐧᐨ ᒫᑲ ᐁ ᐊᑎ ᐃᑐᐦᑌᒋᐠ ᑭᑕ ᐃᐧᐦᑕᒪᐊᐧᒋᐠ ᐅ ᑭᐢᑭᓄᐦᐊᒪᐋᐧᑲᓂᔨᐊᐧ, ᒋᐢᐟ, ᒋᓴᐢ ᑭ ᓇᑭᐢᑲᐁᐧᐤ, ᐅᒥᓯ ᐁ ᐃᑌᐧᐟ, ᑭᐟ ᐊᑕᒥᐢᑳᑎᓈᐋᐧᐤ. ᑭ ᐯ ᐃᑐᐦᑌᐊᐧᐠ ᒫᑲ ᐁ ᑭ ᓴᑭᓯᑌᓈᒋᐠ, ᐁᑯᓯ ᐁ ᑭ ᐅᒋᐦᒋᐦᑲᐧᓇᐱᐢᑕᐋᐧᒋᐠ.
[10] ᐁᑲᐧ ᒫᑲ ᒋᓴᐢ ᐅᒥᓯ ᑭ ᐃᑌᐤ, ᐁᑳᐃᐧᔭ ᓭᑭᓯᐠ; ᓇᑕᐃᐧ ᐃᐧᐦᑕᒪᑯᐠ ᓂᒋᐋᐧᒪᐠ, ᑭᑕ ᐃᑐᐦᑌᒋᐠ ᑲᓬᐊᓬᐃᕽ, ᐁᑯᑌ ᒫᑲ ᑫ ᐋᐧᐸᒥᒋᐠ.
[11] ᐃᐢᐱ ᒫᑲ ᑳ ᐊᑎ ᓯᐯᐧᑌᒋᐠ, ᒋᐢᐟ, ᐊᑎᐟ ᐅᑕᓴᐊᐧᐱᐊᐧᐠ ᑭ ᑕᑯᓯᓇᐧᐠ ᐅᑌᓈᕽ, ᐁ ᑭ ᐋᐧᐸᐦᑕᐋᒋᐠ ᒫᑲ ᑭᐦᒋ ᐊᔭᒥᐦᐁᐃᐧᔨᓂᐊᐧ ᑲᐦᑭᔭᐤ ᑳ ᑭ ᐊᔨᑭᓂᔨᐠ.
[12] ᐃᐢᐱ ᒫᑲ ᑳ ᒫᐊᐧᒋᐃᑐᒋᐠ ᐊᓯᒋ ᑳ ᓂᑳᓀᔨᑖᑯᓯᒋᐠ, ᒥᓇ ᑳ ᐅᔭᓱᐁᐧᒋᐠ, ᒥᐢᑕᐦᐃ ᓱᓂᔮᐊᐧ ᑭ ᒥᔦᐊᐧᐠ ᓯᒫᑲᓂᓴ,
[13] ᐅᒥᓯ ᐁ ᐃᑕᒋᐠ, ᐃᑌᐧᐠ, ᐅ ᑭᐢᑭᓄᐦᐊᒪᐋᐧᑲᓇ ᑭ ᐯ ᓂᐸ ᐃᑐᐦᑌᔨᐊᐧ, ᐁ ᑭ ᑭᒧᑎᔨᐟ ᐃᐧᔭᐤ ᒣᑳᐧᐨ ᐁ ᓂᐸᔮᕽ.
[14] ᑭᐢᐱᐣ ᒫᑲ ᐅᒪ ᐯᐦᑕᐦᑭ ᐅᔭᓱᐁᐧᐃᐧᑭᒫᐤ, ᓂ ᑲ ᓴᑯᒋᒪᓇᐣ, ᐁᑯᓯ ᓇᒪᐃᐧᔭ ᑭ ᑲ ᐊᐢᑖᓯᓈᐋᐧᐤ.
[15] ᑭ ᐅᑎᓀᐊᐧᐠ ᒫᑲ ᓱᓂᔮᐊᐧ, ᐁ ᑭ ᑐᑕᐦᑭᐠ ᒫᑲ ᑳ ᑭ ᐃᓯ ᑭᐢᑭᓄᐦᐊᒫᒋᐠ; ᐅᒪ ᒫᑲ ᐃᑌᐧᐃᐧᐣ ᒥᓯᐁᐧ ᐊᑐᒋᑲᑌᐤ ᐃᑕ ᐁ ᐊᔮᒋᐠ ᒍᐊᐧᐠ ᐱᔨᐢ ᐊᓄᐦᐨ ᑳ ᑭᓯᑳᐠ.
[16] ᐁᑯᐢᐱ ᒫᑲ ᐊᓂᑭ ᒥᑖᑕᐦᐟ ᐯᔭᑯᓴᑊ ᑭ ᐃᑐᐦᑌᐊᐧᐠ ᑲᓬᐊᓬᐃᕽ, ᐊᓂᑌ ᐊᐧᒋᕽ ᐊᓂᒪ ᒋᓴᐢ ᑳ ᑭ ᐃᐧᐦᑕᒪᐊᐧᐟ.
[17] ᐃᐢᐱ ᒫᑲ ᐊᐧᔭᐸᒪᒋᐠ, ᑭ ᐅᒋᐦᒋᐦᑲᐧᓇᐱᐢᑕᐁᐧᐊᐧᐠ; ᒫᑲ ᐊᑎᐟ ᑭ ᐊᐧᐊᐧᓀᔨᑕᒪᐧᐠ.
[18] ᒋᓴᐢ ᒫᑲ ᑭ ᐯ ᐃᑐᐦᑌᐤ ᐁ ᑭ ᐊᔭᒥᐊᐟ, ᐅᒥᓯ ᐁ ᐃᑌᐧᐟ, ᑲᐦᑭᔭᐤ ᑲᐢᑭᐦᐁᐃᐧᓯᐃᐧᐣ ᓂ ᒥᔨᑲᐃᐧᐣ ᑭᐦᒋ ᑭᓯᑯᕽ ᒥᓇ ᐅᑕ ᐊᐢᑭᕽ.
[19] ᐃᑐᐦᑌᐠ ᐃᓴ ᒫᑲ, ᑭᐢᑭᓄᐦᐊᒫᑯᐠ ᑲᐦᑭᔭᐤ ᑳ ᑕᐦᑐᐢᑳᓀᓯᒋᐠ ᐊᔨᓯᔨᓂᐊᐧᐠ, ᐁ ᐹᑊᑖᐧᓯᐃᐧᐁᑯᐠ ᐅ ᐃᐧᔪᐃᐧᓂᕽ ᐊᓇ ᐁᐧᔪᑖᐃᐧᕽ, ᒥᓇ ᐁᐧᑯᓯᓯᕽ, ᒥᓇ ᑳ ᑲᓈᑎᓯᐟ ᐊᐦᒑᕽ;
[20] ᑭᑕ ᑭᐢᑭᓄᐦᐊᒪᐋᐧᔦᑯᐠ ᑭᑕ ᑐᑕᐦᑭᐠ ᑲᐦᑭᔭᐤ ᐊᓂᐦᐃ ᑳ ᐃᓯ ᑲᑫᐢᑭᒥᑕᑯᐠ; ᒋᐢᐟ ᒫᑲ, ᑲᑭᑫ ᑭ ᑲ ᐃᐧᒉᐃᐧᑎᓈᐋᐧᐤ, ᐱᔨᐢ ᑭᑕ ᐳᓂ ᐊᐢᑭᐊᐧᕽ. ᐁᒣᐣ.