[1] ᒋᓴᐢ ᒫᑲ ᑭ ᐊᐧᔭᐃᐧᐤ, ᑭᐦᒋ ᐊᔭᒥᐦᐁᐃᐧᑲᒥᑯᕽ ᐁ ᑭ ᐊᑎ ᐅᐦᒋ ᓯᐯᐧᑌᐟ; ᐅ ᑭᐢᑭᓄᐦᐊᒪᐋᐧᑲᓇ ᒫᑲ ᑭ ᐯ ᓈᑎᐠ ᑭᑕ ᐋᐧᐸᐦᑕᐦᐃᑯᐟ ᐁ ᐃᓯ ᐅᓯᒋᑳᑌᔨᐠ ᑭᐦᒋ ᐊᔭᒥᐦᐁᐃᐧᑲᒥᐠ.
[2] ᐅᒥᓯ ᒫᑲ ᑭ ᐃᑌᐤ, ᓇᒪ ᒋ ᑲᐦᑭᔭᐤ ᐆᐦᐃ ᑭ ᐋᐧᐸᑌᓈᐋᐧᐤ? ᑖᐯᐧ ᑭᐟ ᐃᑎᓈᐋᐧᐤ, ᓇᒫᐋᐧᐨ ᐯᔭᐠ ᐊᓯᓂ ᐅᑕ ᑭᑕ ᐃᐢᑯᓈᐤ ᑭᑕ ᐊᔮᑭᐧᑕᐋᐧᐱᐢᑭᓯᕽ, ᐁᑳ ᑭᑕ ᓂᒋ ᐁᐧᐱᓂᐦᐟ.
[3] ᒣᑳᐧᐨ ᒫᑲ ᐁ ᐊᐱᐟ ᐅᓬᐃᑊᐢ ᐊᐧᒋᕽ, ᑭᐢᑭᓄᐦᐊᒪᐋᐧᑲᓇᐠ ᓂᓯᕽ ᑭ ᐯᒋ ᓈᑌᐊᐧᐠ, ᐅᒥᓯ ᐁ ᐃᑖᒋᐠ, ᐃᐧᐦᑕᒪᐃᐧᓈᐣ, ᑖᓂᐢᐱ ᐆᐦᐃ ᑫ ᐃᑭᐦᑭ? ᒥᓇ ᑫ ᐃᓯ ᑭᐢᑭᓇᐋᐧᒋᓈᑲᐧᕽ ᐯ ᑕᑯᓯᓂᔭᓂ, ᒥᓇ ᑭᑕ ᐳᓂ ᐊᐢᑭᐊᐧᕽ?
[4] ᒋᓴᐢ ᒫᑲ ᑭ ᓇᐢᑫᐧᐊᐧᓯᒣᐤ, ᐅᒥᓯ ᐁ ᑭ ᐃᑖᐟ, ᐊᔮᑳᐧᒥᓯᐠ ᐁᑳ ᐊᐃᐧᔭᐠ ᐊᔨᓯᔨᓂᐤ ᑭᑕ ᐊᐧᔦᓯᐃᑯᔦᐠ.
[5] ᒋᑫᒫ ᒥᐦᒉᐟ ᑭᑕ ᐯ ᐃᑐᑌᐊᐧ ᓂᐟ ᐃᓯᔨᐦᑳᓱᐃᐧᓂᕽ ᑭᑕ ᐃᑌᐧᒋᐠ, ᓂᔭ ᐅᒪ ᙭; ᐁᑯᓯ ᒫᑲ ᒥᐦᒉᐟ ᑭᑕ ᐊᐧᓂᓯᒣᐊᐧᐠ.
[6] ᐁᑯᓯ ᒫᑲ ᑭ ᑲ ᐯᐦᑌᓈᐋᐧᐤ ᓄᑎᓂᑐᐃᐧᓇ, ᒥᓇ ᑭᑕ ᐋᑐᑕᒥᕽ ᐁ ᓄᑎᓂᑐᓈᓂᐃᐧᐠ; ᐁᑳᐃᐧᔭ ᒫᑲ ᒥᑯᐢᑳᑌᔨᑕᒧᐠ; ᒋᑫᒫ ᐆᐦᐃ ᑲᐦᑭᔭᐤ ᑫᒋᓇᐨ ᑭᑕ ᐅᑎᐦᒋᐸᔨᐊᐧ, ᒫᑲ ᓇᒪᐃᐧᔭ ᒉᐢᑲᐧ ᑭᑕ ᑭᓯᐱᐸᔨᐤ.
[7] ᒋᑫᒫ ᑳ ᑕᐦᑐᐢᑳᓀᓯᒋᐠ ᐊᔨᓯᔨᓂᐊᐧᐠ ᑭᑕ ᐸᓯᑯᐢᑖᑐᐊᐧᐠ, ᒥᓇ ᐅᑌᓇᐃᐧᐃᐧᓇ ᑭᑕ ᐸᓯᑯᐢᑖᑐᒪᑲᓇᐧ: ᐁᑯᓯ ᑭᑕ ᐃᔨᐊᐧᓂᓯᓈᓂᐊᐧᐣ ᒥᓇ ᑭᑕ ᑭᐦᑲᐧᐣ ᓇᓈᑐᕽ ᐃᑕ.
[8] ᒫᑲ ᑲᐦᑭᔭᐤ ᐅᐦᐃ ᐁᐊᐧᑲᐧᓂ ᐁ ᒫᒋᐸᔨᑭ ᑲᑳᐧᑕᑭᑖᐃᐧᓇ.
[9] ᐁᑯᓯ ᒫᑲ ᑭ ᑲ ᐅᑎᓂᑯᐋᐧᐊᐧᐠ ᑭᑕ ᑲᑳᐧᑕᑭᐃᑲᐃᐧᔦᐠ, ᒥᓇ ᑭ ᑲ ᓂᐸᐃᑯᐋᐧᐊᐧᐠ; ᑲᐦᑭᔭᐤ ᒫᑲ ᑳ ᑕᐦᑐᐢᑳᓀᓯᒋᐠ ᐊᔨᓯᔨᓂᐊᐧᐠ ᑭ ᑲ ᐹᑳᐧᑎᑯᐋᐧᐊᐧᐠ ᓂᐟ ᐃᓯᔨᐦᑳᓱᐃᐧᐣ ᐅᐦᒋ.
[10] ᐁᑯᐢᐱ ᒫᑲ ᒥᐦᒉᐟ ᑭᑕ ᐸᐦᑭᓯᓇᐧᐠ, ᒥᓇ ᑭᑕ ᒪᒥᓯᐃᑐᐊᐧᐠ, ᒥᓇ ᑭᑕ ᐸᑳᐧᑎᑐᐊᐧᐠ.
[11] ᒥᐦᒉᐟ ᒫᑲ ᑭᔮᐢᑭᐃᐧ ᐅᑭᐢᑭᐁᐧᐦᐃᑫᐊᐧᐠ ᑭᑕ ᐸᓯᑯᐊᐧᐠ, ᒥᐦᒉᐟ ᒫᑲ ᑭᑕ ᐊᐧᔦᓯᒣᐊᐧᐠ.
[12] ᑫ ᐃᐢᐱᒋ ᒪᐢᑲᐊᐧᐢᑌᐠ ᒫᑲ ᒪᒑᔨᐃᐧᐣ, ᐅ ᓵᑭᐦᐃᐁᐧᐃᐧᓂᐋᐧᐤ ᒥᐦᒉᐟ ᑭᑕ ᐊᑎ ᑕᐦᑳᔨᐤ.
[13] ᒫᑲ ᐃᐧᔭ ᐊᓇ ᑫ ᑭ ᐊᔭᑳᐧᒥᓯᐟ ᒥᓭᑲᒣ, ᐁᐊᐧᑯ ᑫ ᐱᒫᒋᐦᐅᐟ.
[14] ᐅᒪ ᒫᑲ ᐁᓯ ᒥᐋᐧᑐᑖᑲᐧᕽ ᐅᑌᓇᐃᐧᐃᐧᐣ ᑭᑕ ᑲᑫᐢᑭᒥᐋᐧᓂᐊᐧᐣ ᒥᓯᐁᐧ ᐊᐢᑭᕽ ᑭᑕ ᐅᐦᒋ ᐋᒋᒧᐢᑖᒋᐠ ᑲᐦᑭᔭᐤ ᑳ ᑕᐦᑐᐢᑳᓀᓯᒋᐠ ᐊᔨᓯᔨᓂᐊᐧᐠ; ᐁᑳᐧ ᒫᑲ ᑫ ᑭᓯᐱᐸᔨᐠ.
[15] ᐃᐢᐱ ᒫᑲ ᐋᐧᐸᐦᑕᒣᑯ ᐊᓂᒪ ᑳ ᐊᑲᐧᑎᑲᐧᕽ ᓂᓯᐊᐧᓈᒋᒋᑫᐃᐧᐣ, ᑳ ᑭ ᐊᔨᒧᑕᕽ ᑖᓂᐁᓬ ᐅᑭᐢᑭᐁᐧᐦᐃᑫᐤ, ᐁ ᐅᔭᐢᑭᑌᐠ ᐃᑕ ᐁ ᑲᓈᑕᕽ (ᐊᐃᐧᔭᐠ ᐁᔭᒥᑖᐟ ᑭᔮᑦ ᑭᑕ ᓂᓯᑐᐦᑕᑦ;)
[16] ᐁᑲᐧ ᑭᔮᑦ ᐊᓂᑭ ᒍᑎᔭᐃᕽ ᑳ ᐊᔮᒋᐠ ᐊᐧᒋᕽ ᑭᑕ ᐃᑖᒧᐊᐧᐠ;
[17] ᑭᔮᑦ ᐊᓇ ᑕᑯᒋ ᐋᐧᐢᑳᐦᐃᑲᓂᐠ ᑳ ᐊᔮᐟ, ᐁᑳᐃᐧᔭ ᑭᑕ ᐯ ᓂᓵᑕᐃᐧᐤ ᑫᑲᐧᐩ ᑭᑕ ᐅᑎᓇᕽ ᐅ ᐋᐧᐢᑳᐦᐃᑲᓂᕽ ᐅᐦᒋ;
[18] ᐊᐦᐳ ᒥᓇ ᑭᐢᑎᑳᓂᕽ ᑳ ᐊᔮᐟ ᐁᑳᐃᐧᔭ ᑭᑕ ᑭᐁᐧᐤ ᑭᑕ ᐅᑎᓇᕽ ᐅᐟ ᐊᔪᐃᐧᓂᓴ.
[19] ᑲᑳᐧᑕᑭᓯᐊᐧᐠ ᒫᑲ ᐊᓂᑭ ᑳ ᐅᐟ ᐊᐋᐧᓯᒥᓯᒋᐠ, ᒥᓇ ᐊᓂᑭ ᑳ ᓄᐊᐊᐧᓱᒋᐠ ᐁᐊᐧᑯ ᑭᓯᑳᑭ!
[20] ᒫᑲ ᐊᔭᒥᐦᐋᐠ ᑭᔭᐋᐧᐤ ᐁᑳ ᑭᑕ ᑕᐸᓭᔦᐠ ᐁ ᐱᐳᕽ ᐊᐦᐳ ᐁ ᐊᔭᒥᐦᐁᑭᓯᑳᐠ;
[21] ᒋᑫᒫ ᐁᑯᐢᐱ ᑫ ᑭᐦᒋ ᐋᔨᒥᓯᓇᓂᐃᐧᐠ, ᐁᑳ ᑳ ᑭ ᐯ ᐊᔨᑭᕽ ᐊᐢᐱᐣ ᐁ ᐯ ᐊᐢᑭᐊᐧᕽ, ᐱᔨᐢ ᐊᓄᐦᐨ, ᓇᒪ, ᓇᒪᐃᐧᔭ ᒥᓇ ᐹᑎᒫ ᑫ ᐃᑭᕽ.
[22] ᑭᐢᐱᐣ ᒫᑲ ᐁᑳ ᐁᐅᑯᓂ ᑭᓯᑳᐊᐧ ᒋᒫᓯᑖᓂᐃᐧᑭ ᓇᒪᐃᐧᔭ ᐊᐃᐧᔭᐠ ᐅ ᑲ ᐱᒫᑎᓯ; ᒫᑲ ᑳ ᑭ ᐊᐧᐁᐧᔦᔨᒥᐦᒋᐠ ᐅᐦᒋ ᐊᓂᐦᐃ ᑭᓯᑳᐊᐧ ᑭᑕ ᒋᒫᓯᑖᓂᐊᐧᓇᐧ.
[23] ᐁᑯᐢᐱ ᒫᑲ ᑭᐢᐱᐣ ᐊᐃᐧᔭᐠ ᐊᔨᓯᔨᓂᐤ ᐃᑎᑯᔦᑯ, ᒋᐢᐟ, ᐊᐊᐧ ᐃᑕ ᙭, ᐊᐦᐳ ᐊᓂᑌ; ᐁᑳᐃᐧᔭ ᑖᐯᐧᑕᒧᐠ.
[24] ᒋᑫᒫ ᐁᑯᑕ ᑭᑕ ᐸᓯᑯᐊᐧᐠ ᑭᔮᐢᑭᐃᐧ ᙭ᐊᐠ, ᒥᓇ ᑭᔮᐢᑭᐃᐧ ᐅᑭᐢᑭᐁᐧᐦᐃᑫᐊᐧᐠ ᐁᑯᓯ ᒫᑲ ᑭᑕ ᐋᐧᐸᑎᔨᐁᐧᐊᐧᐠ ᑭᐦᒋ ᑭᐢᑭᓇᐋᐧᒋᒋᑲᓇ ᒥᓇ ᒪᒫᑖᐃᐧ ᐃᓯᐦᒋᑫᐃᐧᓇ; ᐁᐊᐧᑯ ᒫᑲ ᐅᐦᒋ ᑭᐢᐱᐣ ᑭᑕ ᑭ ᐃᐦᑭᐣ ᑭᑕ ᐊᐧᔦᓯᐁᐊᐧᐠ ᐊᓂᐦᐃ ᑳ ᑭᐦᒋ ᐊᐧᐁᐧᔦᔨᒥᒥᐦᐟ.
[25] ᐋᐧᐸᐦᑕᒧᐠ ᒫᑲ, ᑭ ᑭ ᑭᓵᒋ ᐃᐧᐦᑕᒫᑎᓈᐋᐧᐤ.
[26] ᐁᑯᓯ ᒫᑲ ᑭᐢᐱᐣ ᐃᑌᑯᔦᑳᐧᐃᐧ, ᒋᐢᐟ ᐱᑲᐧᑕᐢᑲᒥᑲᕽ ᐊᔮᐤ; ᐁᑳᐃᐧᔭ ᐃᑐᐦᑌᐠ; ᒋᐢᐟ, ᐱᐢᑭᒋᐋᐧᐢᑳᐃᑲᓂᓯᕽ ᐊᔮᐤ; ᐁᑳᐃᐧᔭ ᑖᐯᐧᑕᒧᐠ.
[27] ᒋᑫᒫ ᑖᐱᐢᑰᐨ ᑳ ᐋᐧᐢᑌᐸᔨᐠ ᐋᐧᐸᓄᑖᕽ ᐅᐦᒋ, ᐁᑯᓯ ᒫᑲ ᑳ ᑌᐹᐢᑌᐸᔨᐠ ᓀᑳᐯᐊᓄᕽ; ᐁᑯᓯ ᒣᐧᐦᒋ ᑫ ᐃᑭᕽ ᐯ ᑕᑯᓯᑭ ᐃᔨᓂᐃᐧᑯᓯᓵᐣ.
[28] ᒋᑫᒪ ᐃᑌ ᒥᔭᐤ ᑳ ᓂᐱᒪᑲᕽ ᐁᔮᐠ, ᐁᑯᑕ ᑫ ᒫᒪᐃᐧ ᒫᐊᐧᒋᐃᑐᒋᐠ ᒥᑭᓯᐊᐧᐠ.
[29] ᓭᒫᐠ ᒫᑲ ᑭ ᐳᓂᐸᔨᑲᐧᐃᐧ ᐅᐦᐃ ᐊᔨᒥᓯᐃᐧᓇ, ᐱᓯᑦ ᑭᑕ ᐊᐧᓂᑎᐱᐢᑭᐸᔨᐤ, ᒥᓇ ᑎᐱᐢᑲᐃᐧ ᐱᓯᑦ ᓇᒪᐃᐧᔭ ᑭᑕ ᒣᑭᐤ ᐅ ᐊᐧᓯᓱᐃᐧᐣ, ᒥᓇ ᐊᒐᐦᑯᓴᐠ ᑭᓯᑯᕽ ᑭᑕ ᐅᐦᒋ ᐸᐦᑭᓯᓇᐧᐠ, ᒥᓇ ᐊᓂᐦᐃ ᑳ ᑭᐦᒑᔨᐊᐧᑭ ᑭᓯᑯᕽ ᑭᑕ ᓇᓇᒥᐸᔨᐊᐧ:
[30] ᐁᑯᓯ ᒫᑲ ᑭᑕ ᓄᑲᐧᐣ ᐊᓂᒪ ᐅ ᑭᐢᑭᓇᐋᐧᒋᒋᑲᐣ ᐃᔨᓂᐃᐧᑯᓯᓵᐣ ᑭᓯᑯᕽ; ᑲᐦᑭᔭᐤ ᒫᑲ ᑳ ᑕᐦᑐᐢᑳᓀᓯᒋᐠ ᐊᔨᓯᔨᓂᐊᐧᐠ ᐅᑕ ᐊᐢᑭᕽ ᑭᑕ ᒪᑐᐊᐧᐠ, ᐁᑯᓯ ᒫᑲ ᑭᑕ ᐊᐧᐸᒣᐊᐧᐠ ᐃᔨᓂᐃᐧᑯᓯᓵᓇ ᑭᑕ ᐯ ᐃᑐᐦᑌᔨᐟ ᑭᐦᒋ ᑭᓯᑯᐃᐧ ᐊᐧᐢᑯᕽ ᑭᑭ ᑭᐦᒑᔨᐃᐧᐃᐧᐣ ᒥᓇ ᑭᐦᒋ ᑭᐢᑌᔨᑖᑯᓯᐃᐧᐣ.
[31] ᐁᑯᓯ ᒫᑲ ᑭᑕ ᐃᓯᑎᓴᐁᐧᐤ ᐅ ᑭᓯᑯᒪ ᑭᑭ ᐁ ᑭᐦᒋ ᑭᓯᐁᐧᐠ ᐱᐱᑲᐧᐣ: ᑭᑕ ᒫᒪᐃᐧ ᒫᐊᐧᒋᐁᔨᐊᐧ ᒫᑲ ᐊᓂᐦᐃ ᑳ ᑭ ᐊᐧᐁᐧᔦᔨᒪᐟ ᓀᐊᐧᔭᐠ ᔪᑎᓄᕽ ᐅᐦᒋ, ᐊᔨᑕᐤ ᐁ ᑲᑭᓯᐸᐠ ᑭᓯᑯᕽ ᐅᐦᒋ,
[32] ᐁᑲᐧ ᒫᑲ ᑭᐢᑫᔨᑕᒧᐠ ᐁ ᐃᓯ ᐊᐁᐧᒋᑲᓂᐃᐧᐟ ᐊᓂ ᓱᒥᓇᑎᐠ; ᐃᐢᐱ ᐊᐧᑎᑲᐧᐣ ᑫᔮᐱᐨ ᐁᐢᑲᑎᑯᐊᐧᑭ, ᒥᓇ ᐁᑎ ᓂᐱᐊᐧᑭ, ᑭ ᑭᐢᑫᔨᑌᓈᐋᐧᐤ ᓵᓴᐩ ᑫᑳᐟ ᐁ ᓂᐱᕽ:
[33] ᐁᑯᓯ ᒫᑲ ᒣᐧᐦᒋ ᐃᐢᐱ ᑲᐦᑭᔭᐤ ᐅᐦᐃ ᐋᐧᐸᐦᑕᒣᑯ, ᑭᐢᑫᔨᑕᒧᐠ ᑭᓯᐊᐧᐠ ᐁ ᐊᔮᐟ, ᐊᐦᐳ ᐃᐢᑲᐧᑌᒥᕽ.
[34] ᑖᐯᐧ ᑭᐟ ᐃᑎᓈᐋᐧᐤ, ᐅᑯ ᑳ ᐊᓂᐢᑫ ᐱᒫᑎᓯᒋᐠ ᓇᒪᐃᐧᔭ ᑭᑕ ᒣᒋᐸᔨᐊᐧᐠ ᐃᔨᑯᕽ ᑲᐦᑭᔭᐤ ᐅᐦᐃ ᑭᑕ ᑎᐱᐸᔨᑭ.
[35] ᑭᐦᒋ ᑭᓯᐠ ᒥᓇ ᐊᐢᑭ ᑭᑕ ᐁᐧᐱᐸᔨᐊᐧ, ᒫᑲ ᐃᐧᔭ ᓂᐟ ᐃᑌᐧᐃᐧᓇ ᓇᒪᐃᐧᔭ ᑭᑕ ᐁᐧᐱᐸᔨᐊᐧ.
[36] ᒫᑲ ᐊᓂᒪ ᑭᓯᑳᐤ ᒥᓇ ᐁ ᐃᐢᐸᔨᐠ ᑎᐸᐃᐱᓯᒫᐧᐣ ᓇᒫᐃᐧᔭ ᐊᐃᐧᔭᐠ ᐊᔨᓯᔨᓂᐤ ᑭᐢᑫᔨᑕᑦ, ᓇᒪ, ᓇᒪᐃᐧᔭ ᐅᑭᓯᑯᐊᐧᐠ ᑭᐦᒋ ᑭᓯᑯᕽ ᑳ ᐊᔮᒋᐠ, ᐱᑯ ᓄᑖᐃᐧ.
[37] ᒫᑲ ᑖᐱᐢᑰᐨ ᑳ ᑭ ᐃᑭᕽ ᒣᑳᐧᐨ ᐁ ᐅ ᑭᓯᑳᒥᐟ ᓄᐊ, ᐁᑯᓯ ᒣᐧᐦᒋ ᑫ ᐃᑭᕽ ᐯ ᑕᑯᓯᑭ ᐃᔨᓂᐃᐧᑯᓯᓵᐣ.
[38] ᒋᑫᒪ ᑕᐱᐢᑰᐨ ᐁ ᑲᑭᓯᑲᐠ ᑳ ᑭ ᐃᑭᕽ ᐁ ᒪᐧᔦ ᔨᐢᑭᐯᐠ, ᑭ ᒪᒥᒋᓱᐊᐧᐠ ᒥᓇ ᑭ ᒪᒥᓂᑫᐧᐊᐧᐠ, ᑭ ᐊᐧᐃᐧᑭᑐᐊᐧᐠ, ᒥᓇ ᑭ ᑲᑭᐦᒋ ᐃᐧᑭᑕᐃᑐᐊᐧᐠ, ᐱᔨᐢ ᐊᓂᒪ ᐁ ᑭᓯᑳᐠ ᓄᐊ ᑳ ᑭ ᐳᓯᐟ ᓇᐱᑲᐧᓂᕽ,
[39] ᐁᑳ ᒫᑲ ᐁ ᑭᐢᑫᔨᑕᐦᑭᐠ ᐹᑎᒪ ᐱᑯ ᐃᔨᑯᕽ ᐁ ᔨᐢᑭᐯᐠ, ᑲᐦᑭᔭᐤ ᐁ ᑭ ᐅᑎᓂᑯᒋᐠ; ᐁᑯᓯ ᒫᑲ ᒣᐧᐦᒋ ᑫ ᐃᑭᕽ ᐯ ᑕᑯᓯᑭ ᐃᔨᓂᐃᐧᑯᓯᓵᐣ.
[40] ᐁᑯᐢᐱ ᒫᑲ ᓂᓱ ᑭᐢᑎᑲᓂᕽ ᑭᑕ ᐊᔭᐊᐧᐠ ᐯᔭᐠ ᑭᑕ ᐅᑎᓈᐤ, ᒫᑲ ᑯᑕᐠ ᑭᑕ ᓇᑲᑕᐤ.
[41] ᓂᓱ ᐃᐢᑫᐧᐊᐧᐠ ᑭᑕ ᐱᓂᐳᒋᑫᐊᐧᐠ ᐱᓂᐳᒋᑲᓂᕽ, ᐯᔭᐠ ᑭᑕ ᐅᑎᓇᐤ, ᒫᑲ ᑯᑕᐠ ᑭᑕ ᓇᑲᑕᐤ.
[42] ᐁᐊᐧᑯ ᒫᑲ ᐅᐦᒋ ᐊᓴᐋᐧᐱᐠ; ᒋᑫᒪ ᓇᒪᐃᐧᔭ ᑭ ᑭᐢᑫᔨᑌᓈᐋᐧᐤ ᑕᓂᒪ ᐁ ᐃᐢᐸᔨᐠ ᑎᐸᐃᐱᓯᒫᐧᐣ ᑭ ᑎᐯᔨᐦᒋᑫᒥᐋᐧᐤ ᑫ ᑕᑯᓯᕽ.
[43] ᒫᑲ ᑭᐢᑫᔨᑕᒧᐠ ᐅᒪ, ᑭᐢᐱᐣ ᐊᔨᓯᔨᓂᐤ ᑳ ᑲᓇᐃᐧᐊᐧᐢᑲᐃᑲᓀᐟ ᑭ ᑭᐢᑫᔨᑕᒧᑯᐸᓀ ᑕᓂᒪ ᐁ ᐃᐢᐸᔨᔨᐠ ᑭᒧᑎᐢᑲ ᑫ ᑕᑯᓯᓂᔨᐟ, ᐅ ᑲ ᐊᓴᐊᐧᐱᑕ, ᓇᒪᐃᐧᔭ ᒫᑲ ᐅ ᑲ ᐃᑌᔨᑌ ᑭᑕ ᐱᑯᓇᒧᐟ ᐃᐧᑭ.
[44] ᐁᐊᐧᑯ ᒫᑲ ᐅᐦᒋ ᑭᐢᑕᐋᐧᐤ ᐊᐧᐁᐧᔨᐠ; ᒋᑫᒫ ᐊᓂᒪ ᐃᐢᐸᔨᑭ ᑎᐸᐦᐃᐱᓯᒫᐧᐣ ᐁᑳ ᐊᔨᑌᔨᒫᔦᑯ ᐃᔨᓂᐃᐧᑯᓯᓵᐣ ᑭᑕ ᑕᑯᓯᐣ.
[45] ᐊᐁᐧᓇ ᒫᑲ ᐁᔮᑲᐧᒥᓯᐟ, ᒥᓇ ᐁ ᐃᔨᓂᓯᐟ ᐊᑐᐢᑫᔮᑲᐣ, ᐊᓇ ᐅᐟ ᐅᑭᒫᒪ ᑳ ᑭ ᑎᐯᔨᑕᒧᐃᑯᐟ ᑳ ᑕᓯᔨᐟ ᐅ ᐊᐧᐢᑲᐦᐃᑲᓂᕽ ᑭᑕ ᐊᓴᒫᐟ ᐁᐧᑎᒋᐸᔨᔨᑭ?
[46] ᓴᐁᐧᔨᑖᑯᓯᐤ ᐁᐊᐧᑯ ᐊᑐᐢᑫᔮᑲᐣ, ᐃᐢᐱ ᐅᐟ ᐅᑭᒫᒪ ᐯ ᑕᑯᓯᓂᔨᒋ ᐅᒥᓯ ᑫ ᐃᓯ ᒥᐢᑳᑯᐟ ᐁ ᐃᑐᑕᕽ.
[47] ᑖᐯᐧ ᑭᐟ ᐃᑎᓈᐋᐧᐤ, ᑭᑕ ᐃᑕᓱᐊᐧᑎᐠ ᑭᑕ ᑎᐯᔨᑕᕽ ᑲᐦᑭᔭᐤ ᐅᐟ ᐊᔭᓂᔨᐊᐧ.
[48] ᒫᑲ ᐃᐧᔭ ᑭᐢᐱᐣ ᑳ ᒪᒑᑎᓯᐟ ᐊᑐᐢᑫᔮᑲᐣ ᑫ ᐃᑌᐧᑫᐧ ᐅᑌᐃᕽ, ᓂᐟ ᐅᑭᒫᑦ ᓇᒪ ᒪᔮᐤ ᐯ ᑕᑯᓯᐣ;
[49] ᐁᑯᓯ ᒫᑲ ᑭᑕ ᐸᐸᑲᒪᐁᐧᐤ ᐃᐧᒋ ᐊᑐᐢᑫᔮᑲᓇ, ᒥᓇ ᑭᑕ ᒪᒥᒋᓱᐟ, ᒥᓇ ᑭᑕ ᐃᐧᒋ ᑭᐢᑫᐧᐯᒪᐟ ᐅ ᑭᐢᑫᐧᐯᐢᑲ:
[50] ᐊᓂᐦᐃ ᐅᐟ ᐅᑭᒫᒪ ᐊᓇ ᐊᑐᐢᑫᔮᑲᐣ ᑭᑕ ᐯ ᑕᑯᓯᓂᔨᐊᐧ ᐁ ᑭᓯᑲᔨ ᐃᐢᐱ ᐁᑳ ᐁ ᐊᓴᐊᐧᐸᒫᐟ ᒥᓇ ᐊᓂᒪ ᐁ ᐃᐢᐸᔨᐠ ᑎᐸᐦᐃᐱᓯᒫᐧᐣ ᐁᑳ ᐁ ᐸᐱᓯᐢᑫᔨᒫᐟ,
[51] ᐁᑯᓯ ᒫᑲ ᑭᑕ ᑭᐢᑭᑲᐦᐅᐠ ᒥᓇ ᑭᑕ ᐸᑭᑎᓂᐠ ᑭᑕ ᐃᐧᒉᐋᐧᐟ ᐅᑕᔭᒥᐦᐁᑳᓱᐢᑲ: ᐁᑯᑌ ᑫ ᑕᓯ ᒪᒫᑐᕽ ᒥᓇ ᑫ ᑲᑭᒋᐢᑲᐱᑌᕽ.