[1] ᐁᐊᐧᑯ ᒫᑲ ᐁ ᑭᓯᑳᔨᐠ ᒋᓴᐢ ᑭ ᐊᐧᔭᐃᐧᐤ ᐊᐧᐢᑲᐦᐃᑲᓂᕽ ᐅᐦᒋ, ᐁ ᑭ ᐊᐱᐟ ᒫᑲ ᐊᓂᑕ ᒋᑭ ᓵᑲᐦᐃᑲᓂᕽ.
[2] ᒥᐦᒉᐟ ᒫᑲ ᑳ ᒫᒪᐁᐧᔭᑎᔨᐟ ᐊᔨᓯᔨᓂᐊᐧ ᑭ ᒫᐊᐧᒋᐃᑐᔨᐊᐧ ᐁ ᐯᒋ ᓇᑎᑯᐟ, ᐁᑯᓯ ᒫᑲ ᐁ ᑭ ᐳᓯᐟ ᐅᓯᕽ, ᐁᑯᑕ ᐁ ᐊᐱᐟ; ᑲᐦᑭᔭᐤ ᒫᑲ ᑳ ᒫᒪᐁᐧᔭᑎᒋᐠ ᐊᔨᓯᔨᓂᐊᐧᐠ ᑭ ᓂᐸᐃᐧᐊᐧᐠ ᒋᑭᐯᐠ.
[3] ᒥᐦᒉᐟ ᒫᑲ ᑫᑲᐧᔭ ᑭ ᐊᔨᑌᐧᐤ ᐊᐁᐧᒋᑲᓂᕽ, ᐅᒥᓯ ᐁ ᐃᑌᐧᐟ, ᒫᑎᑲ, ᐅᑭᐢᑎᑫᐤ ᓯᐯᐧᑌᐤ ᑭᑕ ᑭᐢᑎᑫᐟ:
[4] ᐃᐢᐱ ᒫᑲ ᑫᐢᑎᑫᐟ, ᐊᑎᐦᐟ ᑭᐢᑎᑲᒋᑲᓇ ᐸᑭᑎᓇᐧ ᓯᓱᓀ ᒣᐢᑲᓇᕽ, ᐱᔦᓯᓴᐠ ᒫᑲ ᑭ ᐯ ᐃᐢᐱᔭᐊᐧᐠ, ᐁ ᑭ ᐯ ᑭᑕᒋᐠ.
[5] ᐊᑎᐦᐟ ᒫᑲ ᐸᑭᑎᓇᐧ ᐁ ᐊᓯᓂᐊᐧᐢᑲᒥᑲᐠ, ᐃᑕ ᐁᑳ ᒥᐢᑕᐦᐃ ᐁ ᐊᓯᐢᑭᐊᐧᕽ; ᐁᑯᑕ ᒫᑲ ᑭ ᐅᐦᒋ ᓴᑲᐢᑭᐊᐧ, ᒋᑫᒪ ᓇᒪᐃᐧᔭ ᐅᐦᒋ ᑭᐢᐸᑲᐢᑲᒥᑲᐤ;
[6] ᐃᐢᐱ ᒫᑲ ᐱᓯᑦ ᑳ ᐊᑎ ᐃᐢᐸᐊᕽ, ᑭ ᐃᐢᑲᐧᑌᐊᐧᐠ; ᒋᑫᒪ ᓇᒪᐃᐧᔭ ᐅᒉᐱᑭᐊᐧᓇᐧ, ᐁᑯᓯ ᒫᑲ ᑭ ᓂᐳᒪᑲᓇᐧ.
[7] ᐊᑎᐦᐟ ᒫᑲ ᐅᑲᐃᐧᒥᓇᑲᓯᕽ ᑭ ᐸᑭᑎᓇᐧ; ᐊᓂᑭ ᒫᑲ ᐅᑲᐃᐧᒥᓇᑲᓯᔭᐠ ᑭ ᓂᐦᑖᐃᐧᑭᐊᐧᐠ, ᐁᑯᓯ ᒫᑲ ᑭ ᐊᔨᑯᑭᐢᑕᒪᐧᐠ.
[8] ᒫᑲ ᑯᑕᑲ ᑭ ᐸᑭᑎᓇᐧ ᐁ ᒥᐊᐧᐢᑲᒥᑲᐠ, ᐁᑯᓯ ᒫᑲ ᒥᓂᓯᐊᐧᓇᐧ, ᐊᑎᐦᐟ ᒥᑖᑐᒥᑕᓇᐤ ᑕᐦᑖᐧᐤ ᐊᔨᐊᐧᐠ, ᒥᓇ ᐊᑎᐦᐟ ᓂᑯᑖᐧᓱᒥᑕᓇᐤ, ᐊᑎᐦᐟ ᓂᐢᑐᒥᑕᓇᐤ.
[9] ᐊᐁᐧᓇ ᐁᐧᑕᐊᐧᑲᐟ ᑭᑕ ᐯᐦᑕᕽ, ᑭᔮᑦ ᑭᑕ ᐯᑕᑦ.
[10] ᑭᐢᑭᓄᐦᐊᒪᐋᐧᑲᓇᐠ ᒫᑲ ᑭ ᐯ ᐃᑐᐦᑌᐊᐧᐠ, ᐅᒥᓯ ᒫᑲ ᐁ ᑭ ᐃᑕᒋᐠ, ᑖᓀᑭ ᐊᐁᐧᒋᑲᓂᕽ ᑳ ᐅᐦᒋ ᐊᔭᒥᐊᒋᐠ?
[11] ᑭ ᓇᐢᑫᐧᐊᐧᓯᒣᐤ ᒫᑲ ᐅᒥᓯ ᐁ ᑭ ᐃᑖᐟ, ᒋᑫᒪ ᑭᔭᐋᐧᐤ ᑭ ᒥᔨᑲᐃᐧᓈᐋᐧᐤ ᑭᑕ ᑭᐢᑫᔨᑕᒣᐠ ᐁᓯ ᑭᒧᑕᐢᑌᑭ ᑭᐦᒋ ᑭᓯᑯᐃᐧ ᐅᑌᓇᐃᐧᐃᓂᕽ, ᒫᑲ ᐃᐧᔭᐋᐧᐤ ᓇᒪᐃᐧᔭ ᒥᔭᐊᐧᐠ.
[12] ᒋᑫᒪ ᑕᐦᑐ ᐊᐃᐧᔭᐠ ᑳ ᐊᔭᐟ, ᐁᐊᐧᑯ ᑫ ᒥᔨᐦᐟ, ᐁᑯᓯ ᒫᑲ ᐊᐊᐧᓯᒣ ᒥᐢᑕᐦᐃ ᑭᑕ ᐊᔮᐤ: ᒫᑲ ᑕᐦᑐ ᐊᐃᐧᔭᐠ ᐁᑳ ᑳ ᐊᔮᐟ, ᐁᐊᐧᑯ ᑫᒪᐢᑲᒥᐦᐟ, ᐊᐦᐳ ᐊᓂᒪ ᑳ ᐊᔭᐟ.
[13] ᐁᐊᐧᑯ ᒫᑲ ᑳ ᐅᐦᒋ ᐊᔭᒥᐊᑭᐠ ᐊᐁᐧᒋᑲᓂᕽ: ᒋᑫᒪ ᐁ ᐋᐧᐱᒋᐠ ᓇᒪᐃᐧᔭ ᐊᐧᐱᐊᐧᐠ: ᒥᓇ ᐁ ᐯᐦᑕᐦᑭᐠ, ᓇᒪᐃᐧᔭ ᐯᑕᒪᐧᐠ, ᐊᐦᐳ ᓇᒪᐃᐧᔭ ᓂᓯᑐᐦᑕᒪᐧᐠ.
[14] ᐃᐧᔭᐋᐧᐤ ᒫᑲ ᑭᑕ ᐅᐦᒋ ᑎᐱᐸᔨᐠ ᐊᓂᒪ ᑳ ᑭ ᐃᓯ ᑭᐢᑭᐁᐧᐦᐃᑫᐟ ᐊᐩᓵᔭ, ᐅᒥᓯ ᑳ ᑭ ᐃᑌᐧᐟ, ᐯᐦᑕᒧᐃᐧᓂᕽ ᑭ ᑲ ᐅᐦᒋ ᐯᐦᑌᓈᐋᐧᐤ, ᐁᑯᓯ ᒫᑲ ᓇᒪᐃᐧᔭ ᑭ ᑲ ᓂᓯᑐᐦᑌᓈᐋᐧᐤ; ᒥᓇ ᐋᐧᐱᐃᐧᓂᕽ ᑭ ᑲ ᐋᐧᐸᐦᑌᓈᐋᐧᐤ, ᓇᒪ ᒫᑲ ᑭ ᑲ ᑭᐢᑫᔨᑌᓈᐋᐧᐤ:
[15] ᒋᑫᒪ ᐅᑯ ᐊᔨᓯᔨᓂᐊᐧᐠ ᐅᑌᐦᐃᐋᐧᐊᐧ ᐊᒋ ᐱᑯ ᐊᑎ ᒪᐢᑲᐊᐧᔨᐊᐧ, ᒥᓇ ᐅᐦᑕᐊᐧᑲᐊᐧᐊᐧ ᓴᓯᐱᑕᒧᒪᑲᓂᔨᐊᐧ, ᒥᓇ ᐅᐢᑭᓯᑯᐊᐧᐊᐧ ᑭ ᑭᐸᐦᐊᒪᐧᐠ; ᓈᐣᑕᐤ ᐃᓯ ᑭᑕ ᐊᐧᐸᒋᑲᑫᒋᐠ ᐅᐢᑭᓯᑯᐊᐧᐊᐧ, ᒥᓇ ᑭᑕ ᐯᒋᑲᑫᒋᐠ ᐅᐦᑕᐊᐧᑲᐊᐧᐊᐧ, ᒥᓇ ᑭᑕ ᓂᓯᑐᒋᑲᑫᒋᐠ ᐅᑌᐦᐃᐋᐧᐊᐧ, ᐁᑯᓯ ᒫᑲ ᑭᑕ ᑫᐧᐢᑭᐱᒪᑎᓯᐊᐧᐸᐣ ᒥᓇ ᑭᑕ ᐃᔨᓂᑲᐊᑲᐧᐸᐣ.
[16] ᒫᑲ ᓴᐁᐧᔨᑕᑲᐧᓇᐧ ᑭᔭᐋᐧᐤ ᑭᐢᑭᓯᑯᐊᐧᐊᐧ, ᒋᑫᒪ ᐊᐧᐱᒪᑲᓇᐧ; ᒥᓇ ᑭᑕᐊᐧᑲᐊᐧᐊᐧ, ᒋᑫᒪ ᐯᑕᒧᒪᑲᓇᐧ.
[17] ᒋᑫᒪ ᑖᐯᐧ ᐅᒪ ᑭᐟ ᐃᑎᓈᐋᐧᐤ, ᒥᐦᒉᐟ ᐅᑭᐢᑭᐁᐧᐦᐃᑫᐊᐧᐠ ᒥᓇ ᑲᐧᔭᐢᐠ ᑳ ᐃᑖᑎᓯᒋᐠ ᐊᔨᓯᔨᓂᐊᐧᐠ ᑭ ᐸᑯᓭᔨᒧᐊᐧᐠ ᑭᑕ ᐋᐧᐸᐦᑕᐦᑭᐠ ᐊᓂᐦᐃ ᑭᔭᐋᐧᐤ ᑳ ᐋᐧᐸᐦᑕᒣᐠ, ᐁᑳ ᒫᑲ ᐁ ᑭ ᐋᐧᐸᐦᑕᐦᑭᐠ; ᒥᓇ ᑭᑕ ᐯᐦᑕᐦᑭᐠ ᐊᓂᐦᐃ ᑭᔭᐋᐧᐤ ᑳ ᐯᐦᑕᒣᐠ, ᐁᑳ ᒫᑲ ᐁ ᑭ ᐅᐦᒋ ᐯᐦᑕᐦᑭᐠ.
[18] ᓇᑐᐦᑕᒧᐠ ᐃᓴ ᐁ ᐊᐁᐧᐃᐦᐟ ᐅᐸᑭᑎᓂᑫᐤ.
[19] ᐃᐢᐱ ᐊᐃᐧᔭᐠ ᐱᔦᑕᑭ ᐅᑌᓇᐃᐧ ᐃᑌᐧᐃᐧᐣ, ᐁᑳ ᒫᑲ ᓀᓯᑐᐦᑕᐦᑭ, ᐁᑲᐧ ᐯ ᐃᑐᐦᑌᐤ ᑳ ᒪᒑᔨᐃᐧᐟ, ᐁ ᒪᐢᑲᑌᐧᐟ ᐊᓂᒪ ᑳ ᑭ ᑭᐢᑎᑲᑕᒧᐦᐟ ᐅ ᑌᐃᔨᕽ. ᐁᐊᐧᑯ ᐊᐊᐧ ᑳ ᑭ ᐊᑭᑎᓂᐦᐟ ᓯᓱᓀ ᒣᐢᑲᓇᕽ.
[20] ᒫᑲ ᐃᐧᔭ ᑳ ᑭ ᐸᑭᑎᓂᐦᐟ ᐊᓂᑕ ᐊᓯᓂᐊᐧᐢᑲᒥᑲᕽ, ᐁᐊᐧᑯ ᑳ ᐯᐦᑕᕽ ᐃᑌᐧᐃᐧᐣ, ᒥᓇ ᑭᔨᐱ ᒥᔭᐊᐧᑕᒧᐃᐧᓂᕽ ᑳ ᐅᑎᓇᕽ;
[21] ᒫᑲ ᑫᔮᐱᐨ ᓇᒪᐃᐧᔭ ᑭ ᐅᒉᐱᑭᐃᐧᐤ, ᐊᒋᔭᐤ ᐱᑯ ᐊᔭᑲᐧᒥᓯᐤ; ᒫᑲ ᐃᐢᐱ ᐊᔨᒥᓯᐃᐧᐣ ᐊᐦᐳ ᑲᑲᐧᑕᑭᑖᐃᐧᐣ ᐯᓯᑯᒪᑲᓂᔨᑭ ᐃᑌᐧᐃᐧᐣ ᐅᐦᒋ, ᓭᒫᐠ ᐊᑎ ᓇᔦᐁᐧᔨᑕᑦ.
[22] ᒫᑲ ᐊᓇ ᑳ ᐊᑭᑎᓂᐦᐟ ᐅᑲᐃᐧᒥᓇᑳᓯᐢᑳᕽ, ᐁᐊᐧᑯ ᑳ ᐯᐦᑕᕽ ᐃᑌᐧᐃᐧᐣ; ᐸᐸᒣᔨᑕᒧᐃᐧᐣ ᒫᑲ ᐅᑕ ᐊᐢᑭᕽ, ᒥᓇ ᐁᓯ ᐊᐧᔦᓯᐃᐁᐧᒪᑲᕽ ᐁᐧᔪᑎᓯᐃᐧᐣ, ᑭᐱᐢᑲᒧᒪᑲᐣ ᐃᑌᐧᐃᐧᐣ, ᐁᑯᓯ ᒫᑲ ᓇᒪᐃᐧᔭ ᒥᓂᓯᐃᐧᐤ.
[23] ᒫᑲ ᐃᐧᔭ ᑳ ᐸᑭᑎᓂᐦᐟ ᐊᓂᑕ ᐁ ᒥᐊᐧᐢᑲᒥᑲᐠ, ᐁᐊᐧᑯ ᑳ ᐯᐦᑕᕽ ᐃᑌᐧᐃᐧᐣ, ᒥᓇ ᑳ ᓂᓯᑐᐦᑕᕽ; ᒥᓇ ᑳ ᓴᑭᑭᐦᑕᐟ, ᒥᓇ ᑳ ᒥᓂᓯᐃᐧᐟ, ᐊᑎᐦᐟ ᒥᑖᑐᒥᑕᓇᐤ ᐊᔨᐊᐧᐠ, ᒥᓇ ᐊᑎᐦᐟ ᓂᑯᑖᐧᓱᒥᑕᓇᐤ, ᐊᑎᐦᐟ ᓂᐢᑐᒥᑕᓇᐤ.
[24] ᑯᑕᐠ ᒫᑲ ᒥᓇ ᐊᐁᐧᒋᑲᐣ ᑭ ᐸᑭᑎᓇᒪᐁᐧᐤ, ᐅᒥᓯ ᐁ ᐃᑌᐧᐟ, ᑭᐦᒋ ᑭᓯᑯᐃᐧ ᐅᑌᓇᐃᐧᐃᐧᐣ ᐃᑌᔨᑕᑲᐧᐣ ᑖᐱᐢᑯᐨ ᐊᔨᓯᔨᓂᐤ ᑳ ᑭᐢᑎᑲᑕᕽ ᐁ ᒥᐋᐧᓯᓂᔨᐠ ᑭᐢᑎᑲᒋᑲᓂᔨᐤ ᐅ ᑭᐢᑎᑲᓂᕽ:
[25] ᒣᑳᐧᐨ ᒫᑲ ᐊᔨᓯᔨᓂᐊᐧᐠ ᐁ ᓂᐸᒋᐠ, ᐊᓂᐦᐃ ᑳ ᐸᑲᐧᑎᑯᐟ ᑭ ᐯ ᑕᑯᓯᓂᔨᐊᐧ ᐁ ᑭᐢᑎᑲᑕᒥᔨᐟ ᒪᒋ ᑭᐢᑎᑲᒋᑲᐣ ᒣᑳᐧᐨ ᐸᑫᐧᓯᑲᓂᕽ, ᐁᑯᓯ ᐁ ᓯᐯᐧᑌᔨᐟ.
[26] ᒫᑲ ᐃᐢᐱ ᐸᑫᐧᓯᑲᐣ ᑳ ᐯ ᓴᑲᐢᑭᐟ, ᒥᓇ ᐁᑎ ᒥᓂᓯᐃᐧᐟ, ᐁᑯᓯ ᒥᓇ ᒪᒋ ᑭᐢᑎᑲᒋᑲᐣ ᑭ ᐯ ᐊᓯᒋ ᓄᑯᓯᐤ.
[27] ᐁᑯᓯ ᒫᑲ ᐅᐟ ᐊᑐᐢᑫᔮᑲᓇ ᑳ ᑎᐯᔨᑕᕽ ᐊᐧᐢᑲᐦᐃᑲᐣ, ᑭ ᐯ ᐃᑐᐦᑌᔨᐊᐧ, ᐅᒥᓯ ᐁ ᑭ ᐃᑎᑯᐟ, ᐅᑭᒫᐤ, ᓇᒪ ᒋ ᑯᐦᒋ ᑭᐢᑎᑲᑌᐣ ᑳ ᒥᐋᐧᓯᐠ ᑭᐢᑎᑲᒋᑲᐣ ᑭ ᑭᐢᑎᑲᓂᕽ, ᑕᓂᑌ ᒫᑲ ᐁᐧᒋᐸᔨᐟ ᒪᒋ ᑭᐢᑎᑲᒋᑲᐣ?
[28] ᐅᒥᓯ ᒫᑲ ᑭ ᐃᑌᐤ, ᑳ ᐸᑳᐧᓯᐟ ᐅᒪ ᑳ ᑭ ᑐᑕᕽ. ᐊᑐᐢᑫᔮᑲᓇ ᐅᒥᓯ ᑭ ᐃᑎᐠ ᑭᐟ ᐃᑌᔨᑌᐣ ᒋ ᒫᑲ ᑭᑕ ᓇᑕᐃᐧ ᒧᓴᑭᓇᒪᕽ?
[29] ᒫᑲ ᐅᒥᓯ ᑭ ᐃᑌᐧᐤ, ᓇᒪᐃᐧᔭ; ᒫᐢᑯᐨ ᐁᑐᑫᐧ ᒣᑳᐧᐨ ᐁ ᒧᓴᑭᓈᔦᐠ ᒪᒋ ᑭᐢᑎᑲᒋᑲᐣ, ᑭ ᑲ ᐊᓯᒋ ᒪᓂᐱᑕᐋᐧᐤ ᐸᑫᐧᓯᑲᐣ.
[30] ᑭᔮᑦ ᐁᑯᓯ ᑖᐱᐢᑯᐨ ᑭᑕ ᓂᐦᑖᐃᐧᑭᓇᐧ ᐃᔨᑯᕽ ᑭᑕ ᒫᐊᐧᒋᒋᑲᓂᐃᐧᐠ: ᐃᐢᐱ ᒫᑲ ᐅᑎᒋᐸᔨᑭ ᑭᑕ ᒫᐊᐧᒋᒋᑫᕽ, ᐅᒥᓯ ᓂ ᑲ ᐃᑕᐊᐧᐠ ᐅᒪᐊᐧᒋᒋᑫᐊᐧᐠ, ᒫᐊᐧᒋᑕᐠ ᓂᐢᑕᑦ ᒪᒋ ᑭᐢᑎᑲᒋᑲᓇ, ᐁᑯᓯ ᒫᑲ ᐊᔭᓴᐱᑕᒧᐠ ᑭᑕ ᐃᐢᑲᐧᓴᒣᐠ: ᒫᑲ ᐃᐧᔭ ᐸᑫᐧᓯᑲᐣ ᒫᐊᐧᒋᐃᐠ ᓂᐟ ᐊᐢᑕᓱᐃᐧᑲᒥᑯᕽ.
[31] ᑯᑕᐠ ᒫᑲ ᒥᓇ ᐊᐁᐧᒋᑲᐣ ᑭ ᐸᑭᑎᓇᒪᐁᐧᐤ, ᐅᒥᓯ ᐁ ᐃᑌᐧᐟ, ᑭᐦᒋ ᑭᓯᑯᐃᐧ ᐅᑌᓇᐃᐧᐃᐧᐣ ᐃᑌᔨᑕᑲᐧᐣ ᑖᐱᐢᑯᐨ ᐊᐢᐸᒋᑲᓂ ᑭᐢᑎᑲᒋᑲᐣ, ᐊᔨᓯᔨᓂᐤ ᑳ ᐅᑎᓇᕽ, ᐁᑯᓯ ᐁ ᑭᐢᑎᑲᑕᕽ ᐅ ᑭᐢᑎᑲᓂᕽ:
[32] ᐁᐊᐧᑯ ᑖᐯᐧ ᒪᐊᐧᐨ ᐁ ᐊᐱᓵᓯᐠ ᑳ ᐃᑕᑎᐦᑭ ᑭᐢᑎᑲᒋᑲᓇ; ᒫᑲ ᐃᐢᐱ ᑭᔨᓯᓂᑕᐃᐧᑭᑭ, ᒫᐊᐧᒋ ᒥᓴᐤ ᑳ ᐃᑕᑎᐦᑭ ᑳ ᓴᑲᐢᑭᑭ, ᒥᓇ ᒥᐢᑎᑯᐃᐤ, ᐁᑯᓯ ᒫᑲ ᐱᔦᓯᓴᐠ ᑳ ᐸᐸᒥᔭᒋᐠ ᐯ ᐃᐢᐱᔭᐊᐧᐠ ᐁᑯᑕ ᐁ ᐊᔮᒋᐠ ᐊᐧᑎᑲᐧᓂᕽ.
[33] ᒥᓇ ᒫᑲ ᑯᑕᐠ ᐊᐁᐧᒋᑲᐣ ᑭ ᐊᔨᑌᐤ; ᐊᓂᒪ ᑭᐦᒋ ᑭᓯᑯᐃᐧ ᐅᑌᓇᐃᐧᐃᐧᐣ ᐃᑌᔨᑕᑲᐧᐣ ᑖᐱᐢᑯᐨ ᐅᐱᐦᒋᒋᑲᐣ, ᐃᐢᑫᐧᐤ ᑳ ᐅᑎᓇᕽ, ᐁᑯᓯ ᓂᐢᑐ ᑲᐧᐸᐃᑲᐣ ᐃᔨᑯᕽ ᐸᑫᐧᓯᑲᓇ ᐁ ᐊᔭᐟ, ᐹᑎᒪ ᐃᔨᑯᕽ ᑲᐦᑭᔭᐤ ᐁ ᐅᐦᐱᓱᐟ.
[34] ᑲᐦᑭᔭᐤ ᐅᐦᐃ ᐊᐁᐧᒋᑲᓇ ᒋ ᐊᔨᑌᐤ ᒋᓴᐢ ᑳ ᒫᒪᐁᐧᔭᑎᔨᐟ ᐊᔨᓯᔨᓂᐊᐧ; ᒫᑲ ᐁᑳ ᐊᐁᐧᒋᑲᐣ ᐅᐦᒋ ᓇᒪᐃᐧᔭ ᑭ ᐊᔭᒥᐁᐤ;
[35] ᑭᑕ ᑎᐱᐸᔨᐠ ᐊᓂᒪ ᑳ ᑭ ᐃᑌᐧᐟ ᐅᑭᐢᑭᐁᐧᐦᐃᑫᐤ, ᐅᒥᓯ ᐁ ᐃᑌᐧᐟ, ᓂ ᑲ ᐸᐢᑭᑌᓀᐣ ᓂᑐᐣ ᐊᐁᐧᒋᑲᓂᕽ; ᒥᓇ ᓂ ᑲ ᐃᐧᐦᑌᐣ ᐊᓂᐦᐃ ᑭᒧᐨ ᑳ ᑭ ᐯ ᑲᓇᐁᐧᔨᒋᑲᑌᑭ ᐊᐢᐱᐣ ᑳ ᐯ ᐃᐦᑕᑲᐧᕽ ᐊᐢᑭ.
[36] ᐁᑯᓯ ᒫᑲ ᒋᓴᐢ ᑭ ᓯᐯᐧᑎᓴᐁᐧᐤ ᑳ ᒫᒪᐁᐧᔭᑎᔨᐟ ᐊᔨᓯᔨᓂᐊᐧ, ᐁ ᑭ ᐱᐦᑐᑫᐟ ᒫᑲ ᐊᐧᐢᑲᐦᐃᑲᓂᕽ; ᐅ ᑭᐢᑭᓄᐦᐊᒪᐋᐧᑲᓇ ᒫᑲ ᑭ ᐯ ᓈᑎᐠ, ᐅᒥᓯ ᐁ ᐃᑎᑯᐟ, ᐃᐧᐦᑕᒪᐃᐧᓈᐣ ᒥᑐᓂ ᐊᓂᒪ ᐊᐁᐧᒋᑲᐣ ᐁ ᐊᐁᐧᒋᑲᑌᑭ ᒪᒋ ᑭᐢᑎᑲᒋᑲᓇ ᑭᐢᑎᑳᓂᕽ.
[37] ᑭ ᓇᐢᑫᐧᐊᐧᓯᒣᐤ ᒫᑲ ᐅᒥᓯ ᐁ ᑭ ᐃᑖᐟ, ᐊᓇ ᑳ ᑭᐢᑎᑲᑕᐠ ᒥᔪ ᑭᐢᑎᑲᒋᑲᐣ ᐁᐊᐧᑯ ᐃᔨᓂᐃᐧᑯᓯᓵᐣ:
[38] ᑭᐢᑎᑲᐣ ᐁᐊᐧᑯ ᐊᐢᑭ; ᒥᔪ ᑭᐢᑎᑲᒋᑲᐣ ᐁᐅᑯᓂᐠ ᑳ ᐅᐟ ᐊᐋᐧᓯᒥᓯᒥᑯᒋᐠ ᐅᑌᓇᐃᐧᐃᐧᐣ; ᒫᑲ ᒪᒋ ᑭᐢᑎᑳᒋᑲᓇ ᐁᐅᑯᓂᐠ ᐊᓂᑭ ᑳ ᐅᐟ ᐊᐋᐧᓯᒥᓯᒥᑯᒋᐠ ᒪᒐᔭ;
[39] ᐅᐸᑲᐧᓯᐁᐧᐤ ᑳ ᑭᐢᑎᑲᑕᕽ ᐁᐊᐧᑯ ᒪᒋ ᐊᐦᒐᕽ: ᒫᐊᐧᒋᒋᑫᐃᐧᐣ ᐁᐊᐧᑯ ᑭᑕ ᐳᓂ ᐊᐢᑭᐊᐧᕽ; ᐅ ᒫᐊᐧᒋᒋᑫᐊᐧᐠ ᐁᐅᑯᓂᐠ ᐅᑭᓯᑯᐊᐧᐠ.
[40] ᑖᐱᐢᑯᐨ ᒪᒋ ᑭᐢᑎᑲᒋᑲᐧᓇ ᐁ ᐃᓯ ᒫᐊᐧᒋᑕᕽ ᒥᓇ ᐁ ᐃᐢᑲᐧᓯᑲᑌᑭ ᐃᐢᑯᑌᕽ; ᐁᑯᓯ ᒣᐧᐦᒋ ᑫ ᐃᑭᕽ ᐳᓂ ᐊᐢᑭᐊᐧᑭ.
[41] ᐃᔨᓂᐃᐧᑯᓯᓵᐣ ᑭᑕ ᐯ ᐃᓯᑎᓴᐁᐧᐤ ᐅᑭᓯᑯᒪ ᑭᑕ ᒧᓴᑭᓇᒥᔨᐟ ᑲᐦᑭᔭᐤ ᐊᓂᒪ ᑳ ᓇᔦᑕᐃᐧᓇᑲᐧᓂᔨᐠ ᐅᐟ ᐅᑌᓇᐃᐧᐃᐧᓂᕽ ᐅᐦᒋ, ᒥᓇ ᑲᐦᑭᔭᐤ ᐊᓂᐦᐃ ᑳ ᒪᒋ ᑐᑕᒥᔨᐟ;
[42] ᐁᑯᓯ ᒫᑲ ᑭᑕ ᐃᓯ ᐁᐧᐱᓀᐤ ᑳ ᑲᐧᑯᑌᔨᐠ ᐃᐢᑯᑌᐤ: ᐁᑯᑕ ᑭᑕ ᒪᒪᑐᒋᐠ ᒥᓇ ᑭᑕ ᑲᑭᒋᐢᑲᐱᑌᒋᐠ.
[43] ᐁᑯᓯ ᒫᑲ ᐊᓂᑭ ᑲᐧᔭᐢᐠ ᑳ ᐃᓯᐁᐧᐱᓯᒋᐠ ᑭᑕ ᐊᐧᓯᓱᐊᐧᐠ ᑖᐱᐢᑯᐨ ᐱᓯᑦ ᐅᐟ ᐅᑌᓇᐃᐧᐃᐧᓂᔨᕽ ᐅᑕᐃᐧᐊᐧᐊᐧ. ᐊᐁᐧᓇ ᐁᐧᑕᐊᐧᑲᐟ ᑭᑕ ᐯᐦᑕᕽ, ᑭᔮᑦ ᑭᑕ ᐯᑕᑦ.
[44] ᒥᓇ ᒫᑲ, ᑭᐦᒋ ᑭᓯᑯᐃᐧ ᐅᑌᓇᐃᐧᐃᐧᐣ ᐃᑌᔨᑕᑲᐧᐣ ᑖᐱᐢᑯᐨ ᓱᓂᔮᐤ ᐁ ᑭ ᑳᑎᐟ ᑭᐢᑎᑲᓂᕽ; ᐊᓂᒪ ᐃᐢᐱ ᐊᔨᓯᔨᓂᐤ ᑳ ᒥᐢᑲᐋᐧᐟ, ᑲᑌᐤ, ᐁᑯᓯ ᒫᑲ ᐁᐢᐱᒋ ᒥᐁᐧᔨᑕᕽ ᓯᐯᐧᑌᐤ ᐁ ᐊᑕᐊᐧᑫᐟ ᑲᐦᑭᔭᐤ ᑳ ᐊᔮᐟ, ᒥᓇ ᐁ ᐊᑕᐁᐧᐟ ᐁᐊᐧᑯ ᑭᐢᑎᑲᐣ.
[45] ᒥᓇ ᒫᑲ, ᑭᐦᒋ ᑭᓯᑯᐃᐧ ᐅᑌᓇᐃᐧᐃᐧᐣ ᐃᑌᔨᑕᑲᐧᐣ ᑕᐱᐢᑯᐨ ᐅᑕᑕᐁᐧᐃᐧᔨᓂᐤ, ᑳ ᓇᓈᑐᓇᐋᐧᐟ ᐁ ᒥᔪᓯᔨᐟ ᐁᓴ;
[46] ᐁ ᒥᐢᑲᐊᐧᐟ ᒫᑲ ᐯᔭᐠ ᐁᓴ ᒥᐢᑕᐦᐃ ᐁ ᐃᑕᑭᒋᑳᓱᔨᐟ, ᑭ ᓇᑕᐃᐧ ᐊᑕᐊᐧᑫᐤ ᑲᐦᑭᔭᐤ ᑳ ᐊᔮᐟ, ᒥᓇ ᐁ ᑭ ᐊᑕᐁᐧᐟ.
[47] ᒥᓇ ᒫᑲ, ᑭᐦᒋ ᑭᓯᑯᐃᐧ ᐅᑌᓇᐃᐧᐃᐧᐣ ᐃᑌᔨᑖᑲᐧᐣ ᑖᐱᐢᑯᐨ ᐊᔭᐱ, ᑳ ᑭ ᐸᑲᐢᑕᐁᐧᐅᐦᐟ ᑭᐦᒋᑲᒥᕽ, ᑲᐦᑭᔭᐤ ᓇᓇᑐᕽ ᑳ ᐃᓯ ᐃᑐᐋᐧᐠ.
[48] ᐁᐊᐧᑯ, ᐃᐢᐱ ᐁ ᒧᐢᑭᓀᐟ, ᑭ ᓇᑕᑲᒣᐱᑌᐊᐧᐠ, ᐁᑯᓯ ᐁ ᑭ ᓇᐦᐊᐱᒋᐠ, ᐁ ᑭ ᒧᓴᑭᓈᒋᐠ ᒫᑲ ᐁ ᒥᔪᓯᔨᐟ ᐊᓯᐊᐧᒋᑲᓂᕽ, ᒫᑲ ᐁ ᒪᔭᑎᓯᔨᐟ ᑭ ᐁᐧᐱᓀᐊᐧᐠ.
[49] ᐁᑯᓯ ᒫᑲ ᒣᐧᐦᒋ ᑫ ᐃᑭᕽ ᐳᓂ ᐊᐢᑭᐊᐧᑭ; ᐅᑭᓯᑯᐊᐧᐠ ᑭᑕ ᐯ ᐃᑐᐦᑌᐊᐧᐠ ᑭᑕ ᐹᑳᓇᔮᒋᐠ ᐅᒪᒐᑎᓴ, ᐊᓂᑕ ᐅᐦᒋ ᑳ ᐊᔭᔨᐟ ᐅᒥᐊᐧᑎᓴ;
[50] ᐁᑯᓯ ᒫᑲ ᑭᑕ ᐃᓯ ᐁᐧᐱᓀᐊᐧᐠ ᐃᐢᑯᑌᐃᐧᑲᒥᑯᕽ; ᐁᑯᑕ ᑫ ᑕᓯ ᒪᒪᑐᒋᐠ ᒥᓇ ᑫ ᑲᑭᒋᐢᑲᐱᑌᒋᐠ.
[51] ᒋᓴᐢ ᒫᑲ ᐅᒥᓯ ᑭ ᐃᑌᐤ, ᑭ ᑭ ᓂᓯᑐᐦᑌᓈᐋᐧᐤ ᒋ ᑲᐦᑭᔭᐤ ᐅᐦᐃ ᑫᑲᐧᔭ? ᐅᒥᓯ ᒫᑲ ᐃᑌᐊᐧᐠ, ᐁᐦᐁ ᑌᐯᔨᐦᒋᑫᔭᐣ.
[52] ᐁᑯᓯ ᒫᑲ ᐅᒥᓯ ᑭ ᐃᑌᐤ, ᐁᐊᐧᑯ ᐅᐦᒋ ᑳ ᐃᑕᓯᐟ ᐅᒪᓯᓇᐃᑫᐃᐧᔨᓂᐤ ᑳ ᐃᓯ ᑭᐢᑭᓄᐦᐊᒫᐟ ᑭᐦᒋ ᑭᓯᑯᐃᐧ ᐅᑌᓇᐃᐧᐃᐧᐣ, ᐃᑌᔨᑕᑯᓯᐤ ᑖᐱᐢᑯᐨ ᐊᔨᓯᔨᓂᐤ ᑳ ᑎᐯᔨᑕᕽ ᐊᐧᐢᑲᐦᐃᑲᐣ ᐊᓂᑕ ᐅ ᐁᐧᔪᑎᓯᐃᐧᓂᕽ ᑳ ᐯ ᐅᐦᒋ ᐊᐧᔭᐃᐧᑕᑕᐟ ᐁᐧᐢᑲᔨᐊᐧᐦᑭ ᒥᓇ ᑫᔭᓴᔨᐊᐧᐦᑭ.
[53] ᑭ ᐅᑎᐦᒋᐸᔨᐤ ᒫᑲ, ᐃᐢᐱ ᒋᓴᐢ ᑳ ᑭᓯᑕᐟ ᐅᐦᐃ ᐊᐁᐧᒋᑲᓇ, ᑭ ᐊᑎ ᓯᐯᐧᑌᐤ.
[54] ᐃᐢᐱ ᒫᑲ ᑳ ᑕᑯᓯᕽ ᑎᐱᔭᐁᐧ ᐅᐟ ᐊᐢᑭᕽ, ᑭ ᑭᐢᑭᓄᐦᐊᒫᐁᐧᐤ ᐅᐟ ᐊᔭᒥᐦᐁᐃᐧᑲᒥᑯᔨᕽ, ᐁᐊᐧᑯ ᐅᐦᒋ ᓇᐢᐱᐨ ᑭ ᒫᒪᐢᑳᑕᒪᐧᐠ, ᐅᒥᓯ ᐁ ᐃᑌᐧᒋᐠ, ᑕᓂᑌ ᐁᐧᑎᓇᕽ ᐊᐊᐧ ᐊᔨᓯᔨᓂᐤ ᐅᒪ ᐃᔨᓂᓯᐃᐧᐣ? ᒥᓇ ᐅᐦᐃ ᑭᐦᒋ ᐊᑐᐢᑫᐃᐧᓇ?
[55] ᓇᒪ ᒋ ᐁᐊᐧᑯ ᐊᐊᐧ ᐅᑯᓯᓴ ᒥᐢᑎᑯ ᓈᐯᐤ? ᓇᒪ ᒋ ᐅᑳᐃᐧᔭ ᒣᕒᐃ ᐃᓯᔨᐦᑳᓱᔨᐊᐧ? ᒥᓇ ᐅᒋᐋᐧᒪ ᒉᒥᐢ, ᒥᓇ ᒍᓯᐢ, ᒥᓇ ᓴᐃᒪᐣ, ᒥᓇ ᒍᑕᐢ?
[56] ᒥᓇ ᐅᑕᐁᐧᒪᐊᐧ, ᓇᒪᒋ ᑲᐦᑭᔭᐤ ᑭ ᐃᐧᒉᐃᐧᑯᓇᐊᐧ? ᑕᓂᑌ ᒫᑲ ᐁᐧᑎᓇᕽ ᐊᐊᐧ ᐊᔨᓯᔨᓂᐤ ᑲᐦᑭᔭᐤ ᐅᐦᐃ ᑫᑲᐧᔭ?
[57] ᐁᑯᓯ ᒫᑲ ᑭ ᓇᔦᑕᐁᐧᔨᒣᐊᐧᐠ ᒫᑲ ᒋᓴᐢ ᐅᒥᓯ ᐃᑌᐤ, ᐅᑭᐢᑭᐁᐧᐦᐃᑫᐤ ᓇᒪᐃᐧᔭ ᐁᑳ ᑭᑕ ᑭᐢᑌᔨᑖᑯᓯᐟ, ᐱᑯ ᓇᒪᐃᐧᔭ ᐅᐟ ᐊᐢᑭᕽ, ᒥᓇ ᐃᐧᑭᕽ.
[58] ᓇᒪᐃᐧᔭ ᒫᑲ ᒥᐦᒉᐟ ᑭᐦᒋ ᐊᑐᐢᑫᐃᐧᓇ ᐁᑯᑕ ᑭ ᑐᑕᑦ, ᒋᑫᒪ ᐁᑳ ᐁ ᑖᐯᐧᑕᒥᔨᐟ.