[1] ᒋᓴᐢ ᒫᑲ ᑭ ᓇᐢᑫᐧᐊᐧᓯᒣᐤ, ᒥᓇ ᐊᐁᐧᒋᑲᓂᕽ ᐁ ᑭ ᐅᐦᒋ ᐊᔭᒥᐊᐟ, ᐅᒥᓯ ᐁ ᑭ ᐃᑖᐟ.
[2] ᑭᐦᒋ ᑭᓯᑯᐃᐧ ᐅᑌᓇᐃᐧᐃᐧᐣ ᐃᑌᔨᑕᑲᐧᐣ ᑖᐱᐢᑯᐨ ᐯᔭᐠ ᑭᐦᒋ ᐅᑭᒫᐤ, ᑳ ᐃᐧᑭᑐᐋᐟ ᐅᑯᓯᓴ,
[3] ᐁ ᑭ ᐃᓯᑎᓴᐋᐧᐟ ᒫᑲ ᐅᐟ ᐊᑐᐢᑫᔮᑲᓇ ᑭᑕ ᓇᑐᒫᔨᐟ ᐊᓂᐦᐃ ᑳ ᑭ ᓇᑐᒥᒥᐟ ᐃᐧᑭᑐᐃᐧᓂᕽ; ᐁᑯᓯ ᒫᑲ ᓇᒪᐃᐧᔭ ᐃᐧ ᐯ ᐃᑐᐦᑌᔨᐊᐧ.
[4] ᒥᓇ ᒫᑲ, ᑯᑕᑲ ᐊᑐᐢᑫᔮᑲᓇ ᑭ ᐃᓯᑎᓴᐁᐧᐤ, ᐅᒥᓯ ᐁ ᐃᑌᐧᐟ, ᐃᐧᐦᑕᒫᑯᐠ ᐊᓂᑭ ᐃᐧᑯᒪᑲᓇᐠ ᒋᐢᐟ, ᓂ ᑭ ᑲᐧᔭᑕᐢᑕᐣ ᓂᐟ ᐋᐱᑕᑭᓯᑲᓂᓀᑫᐧᐃᐧᐣ; ᓂ ᔮᐯᒧᐢᑐᓱᒪᐠ, ᒥᓇ ᐊᓂᑭ ᑳ ᑭ ᑕᒋᐳᐊᑭᐠ ᑭ ᓂᐸᐊᐊᐧᐠ, ᒥᓇ ᑲᐦᑭᔭᐤ ᑫᑲᐧᐩ ᑲᐧᔭᑕᐢᑌᐤ; ᐯ ᐃᑐᐦᑌᐠ ᐃᐧᑭᑐᐃᐧᓂᕽ.
[5] ᒫᑲ ᑭ ᐋᑕᐁᐧᔨᑕᒪᐧᐠ, ᐁᑯᓯ ᒫᑲ ᐁ ᑭ ᓴᓯᐯᐧᑌᒋᐠ, ᐯᔭᐠ ᐅ ᑭᐢᑎᑲᓂᕽ, ᒥᓇ ᑯᑕᐠ ᐅᐟ ᐊᑕᐁᐧᐃᐧᓂᕽ;
[6] ᒫᑲ ᐃᐧᔭ ᑯᑕᑲᐠ ᑭ ᐅᑎᓂᒣᐊᐧᐠ ᐅᐟ ᐊᑐᐢᑫᔮᑲᓂᔨᐊᐧ, ᓇᐢᐱᐨ ᓇᓀᐯᐃᐧ ᑐᑕᐁᐧᐊᐧᐠ, ᒥᓇ ᐁ ᑭ ᓂᐸᐊᒋᐠ.
[7] ᒫᑲ ᐃᐢᐱ ᑭᐦᒋ ᐅᑭᒫᐤ ᑳ ᐯᐦᑕᕽ, ᑭ ᑭᐦᒋ ᑭᓯᐊᐧᓯᐤ: ᐁᑯᓯ ᒫᑲ ᑭ ᐃᓯᑎᓴᐁᐧᐤ ᐅ ᓯᒫᑲᓂᓯᒪ, ᑭᑕ ᓂᓯᐊᐧᓈᒋᐊᔨᐟ ᐊᓂᐦᐃ ᓂᐸᑕᑫᐢᑲ, ᒥᓇ ᐁ ᑭ ᓴᐢᑲᐦᐊᒪᐧᒋᐠ ᐅᐟ ᐅᑌᓈᔨᐤ.
[8] ᐁᑯᓯ ᒫᑲ ᐅᒥᓯ ᐃᑌᐤ ᐅᐟ ᐊᑐᐢᑫᔮᑲᓇ ᐃᐧᑭᑐᐃᐧᐣ ᑲᐧᔮᑕᐢᑌᐤ, ᒫᑲ ᐊᓂᑭ ᑳ ᑭ ᓇᑐᒥᒋᐠ ᓇᒪᐃᐧᔭ ᑌᐱᐃᐢᐱᑌᔨᑖᑯᓯᐊᐧᐠ.
[9] ᐃᑐᐦᑌᐠ ᒫᑲ ᑭᐦᒋ ᒣᐢᑲᓇᕽ, ᐱᑯ ᒫᑲ ᑕᐦᑐ ᑫ ᒥᐢᑲᐊᐧᔦᑲᐧᐤ, ᓇᑐᒥᑯᐠ ᐃᐧᑭᑐᐃᐧᓂᕽ.
[10] ᐁᑯᓯ ᒫᑲ ᐊᓂᑭ ᐊᑐᐢᑫᔮᑲᓇᐠ ᑭ ᐊᐧᔭᐃᐧᐊᐧᐠ ᐁ ᑭ ᐃᑐᐦᑌᒋᐠ ᑭᐦᒋ ᒣᐢᑲᓇᕽ, ᐁ ᑭ ᒫᒧᐃᐧᒫᐊᐧᒋᐊᒋᐠ ᒫᑲ ᐊᓂᐦᐃ ᑕᐦᑐ ᑳ ᑭ ᒥᐢᑲᐊᐧᒋᐠ, ᐁ ᒪᒑᑎᓯᔨᐟ ᒥᓇ ᐁ ᒥᔮᐧᑎᓯᔨᐟ; ᐃᐧᑭᑐᐃᐧᐣ ᒫᑲ ᑭ ᓵᑲᐢᑭᓀᐤ ᐃᐧᑯᒪᑲᓇᐠ ᐅᐦᒋ.
[11] ᐃᐢᐱ ᒫᑲ ᑭᐦᒋ ᐅᑭᒫᐤ ᑳ ᐱᐦᑐᑫᐟ ᑭᑕ ᐋᐧᐸᒫᐟ ᐊᓂᐦᐃ ᑳ ᐃᐧᑯᒥᒥᐦᐟ, ᐁᑯᑕ ᑭ ᐋᐧᐸᒣᐤ ᐯᔭᐠ ᐊᔨᓯᔨᓂᐊᐧ ᐁᑳ ᐁ ᑭᑲᓵᑫᔨᐟ ᑭᐦᒋ ᐃᐧᑭᑐᐊᐧᓵᑲᐩ;
[12] ᐅᒥᓯ ᒫᑲ ᑭ ᐃᑌᐤ, ᓂ ᑐᑌᑦ, ᑖᓀᑭ ᑳ ᐯ ᐅᐦᒋ ᐱᐦᑐᑫᔭᐣ ᐅᑕ, ᐁᑳ ᐁ ᑭᑲᓴᑫᔭᐣ ᑭᐦᒋ ᐃᐧᑭᑐᐊᐧᓵᑲᐩ? ᓇᒪᐃᐧᔭ ᒫᑲ ᑭ ᐱᑭᐢᑫᐧᔨᐊᐧ
[13] ᐁᑯᓯ ᒫᑲ ᑭ ᐃᑌᐤ ᑭᐦᒋ ᐅᑭᒫᐤ ᐊᑐᐢᑫᔮᑲᓇ, ᒪᒪᒋᑲᐧᐱᑎᕽ ᐅ ᒋᐦᒋᕽ ᒥᓇ ᐅᓯᑎᕽ, ᒥᓇ ᓯᐯᐧᑕᐃᕽ ᐃᓯ ᐁᐧᐱᓂᕽ ᒫᑲ ᐊᓂᑕ ᐊᐧᔭᐃᐧᑎᒥᑯᐃᐧ ᐊᐧᓂᑎᐱᐢᑲᕽ; ᐁᑯᑌ ᑫ ᑕᓯ ᒪᒫᑐᕽ ᒥᓇ ᑫ ᑕᓯ ᑲᑭᒋᐢᑳᐱᑌᕽ.
[14] ᒋᑫᒪ ᒥᐦᒉᐟ ᓇᑐᒪᐊᐧᐠ, ᒫᑲ ᒐᑲᐊᐧᓯᐢ ᐅᑎᓈᐊᐧᐠ.
[15] ᐁᑯᐢᐱ ᒫᑲ ᑭ ᐃᑐᐦᑌᐊᐧᐠ ᐹᕒᐊᓯᔭᐠ, ᐁ ᑭ ᐅᔭᓱᐁᐧᒋᐠ ᒫᑲ ᑖᓂᓯ ᑭᑕ ᐃᓯ ᑳᒋᑎᓈᒋᐠ ᐅᐟ ᐊᔭᒥᐃᐧᓂᔨᕽ.
[16] ᑭ ᐃᓯᑎᓴᐦᐊᒪᐁᐧᐊᐧᐠ ᒫᑲ ᐅ ᑭᐢᑭᓄᐦᐊᒪᐋᐧᑲᓂᐋᐧᐊᐧ ᐁ ᐯ ᐃᐧᒉᐋᐧᔨᐟ ᐁᕒᐅᑎᔮᓇ, ᐅᒥᓯ ᐁ ᐃᑌᐧᒋᐠ, ᑫᐢᑭᓄᐊᒪᑫᔭᐣ, ᓂ ᑭᐢᑫᔨᑌᓇᐣ ᐁ ᑖᐯᐧᔭᐣ, ᒥᓇ ᑖᐯᐧᐃᐧᓂᕽ ᐁ ᑭᐢᑭᓄᐦᐊᒫᑫᔭᐣ, ᑭᓭᒪᓂᑐ ᐅᐟ ᐃᓯᑖᐧᐃᐧᐣ, ᒥᓇ ᐁᑳ ᐁ ᐸᐱᓯᐢᑫᔨᒪᐟ ᐊᔨᓯᔨᓂᐤ; ᒋᑫᒪ ᓇᒪᐃᐧᔭ ᐊᔨᓯᔨᓂᐊᐧᐠ ᑭ ᑎᐸᐊᑲᑕᐊᐧᐠ.
[17] ᐃᐧᐦᑕᒪᐃᐧᓈᐣ ᒫᑲ, ᑫᑲᐧᐩ ᑭᔭ ᐁᑌᔨᑕᒪᐣ? ᑲᐧᔭᐢᐠ ᒋ ᑭᑕ ᒥᔨᐟ ᑎᐸᐦᐊᒫᑐᐃᐧᓱᓂᔮᐊᐧ ᓯᓴᕒ, ᐊᐦᐳ ᐁᑳ?
[18] ᒫᑲ ᒋᓴᐢ ᐁ ᑭᐢᑫᔨᑕᒫᐧᐟ ᐅ ᒪᒑᑎᓯᐃᐧᓂᔨᐊᐧ ᐅᒥᓯ ᐃᑌᐤ, ᑖᓀᑭ ᑳ ᑲᑫᐧᒋᐃᔦᐠ, ᑭᔭᐋᐧᐤ ᐅᑕᔭᒥᐦᐁᑳᓱᐢᑲᐠ?
[19] ᐋᐧᐸᐦᑕᐃᐠ ᐊᓇ ᑎᐸᐊᒪᑐᐃᐧᓱᓂᔮᐤ. ᐁᑯᓯ ᒫᑲ ᑭ ᐯᑕᒪᐁᐧᐊᐧᐠ ᐯᔭᐠ ᐅᓴᐋᐧᐱᐢᑯᓴ.
[20] ᐅᒥᓯ ᒫᑲ ᐃᑌᐤ, ᐊᐁᐧᓇ ᐅᒪ ᐅᐟ ᐃᓯᓈᑯᓯᐃᐧᐣ ᒥᓇ ᑳ ᒪᓯᓇᐃᑳᓱᐟ ᐅᑕ?
[21] ᐅᒥᓯ ᒫᑲ ᐃᑌᐊᐧᐠ, ᓯᓴᕒ. ᐁᑯᓯ ᒫᑲ ᐅᒥᓯ ᐃᑌᐤ, ᒥᔨᕽ ᓯᓴᕒ ᐅ ᑎᐱᔭᐁᐧᐃᐧᓯᐃᐧᐣ ᓯᓴᕒ: ᒥᓇ ᒫᑲ ᑭᓭᒪᓂᑐ ᐅ ᑎᐱᔭᐁᐧᐃᐧᓯᐃᐧᐣ ᑭᓭᒪᓂᑐ.
[22] ᐃᐢᐱ ᒫᑲ ᑳ ᐯᐦᑕᐦᑭᐠ ᐅᐦᐃ ᐃᑌᐧᐃᐧᓇ, ᑭ ᒫᒪᐢᑳᑕᒪᐧᐠ, ᒥᓇ ᐁ ᑭ ᓇᑲᑖᒋᐠ, ᐁ ᑭ ᐊᑎ ᓯᐯᐧᑌᒋᐠ.
[23] ᐁᐊᐧᑯ ᐁ ᑭᓯᑳᐠ ᑭ ᐯ ᓈᑌᐊᐧᐠ ᓴᐟᔪᓯᔭᐠ, ᐊᓂᑭ ᓇᒪᐃᐧᔭ ᐃᐦᑕᑲᐧᐣ ᐊᐱᓯᓯᓄᐃᐧᐣ ᑳ ᐃᑌᐧᒋᐠ, ᐁᑯᓯ ᐁ ᑲᑫᐧᒋᒪᒋᐠ,
[24] ᐅᒥᓯ ᐁ ᐃᑌᐧᒋᐠ, ᑫᐢᑭᓄᐦᐊᒫᑫᔭᐣ, ᒧᓯᐢ ᐅᒥᓯ ᑭ ᐃᑌᐧᐤ, ᑭᐢᐱᐣ ᐊᔨᓯᔨᓂᐤ ᓂᐱᐟ ᐁᑳ ᐅᐟ ᐊᐋᐧᓯᒥᓯᐟ, ᐅᒋᐋᐧᒪ ᑭᑕ ᐃᐧᑭᒣᔨᐊᐧ ᐃᐧᐊᐧ, ᐁᑯᓯ ᑭᑕ ᐅᐟ ᐊᐋᐧᓯᒥᓯᑲᐋᐧᐟ ᐅᒋᐋᐧᒪ.
[25] ᐁᑯᓯ ᒫᑲ ᑌᐸᑯᑊ ᑭ ᐃᑕᓯᐊᐧᐠ ᐁ ᐅᒋᐋᐧᒥᑐᒋᐠ ᓂᔮᓇᐣ ᐅᐦᒋ; ᐊᓇ ᒫᑲ ᓂᐢᑕᑦ, ᐃᐢᐱ ᑳ ᐃᐧᐃᐧᐟ, ᑭ ᓂᐱᐤ, ᐁᑳ ᐁ ᐅᐟ ᐊᐋᐧᓯᒥᓯᐟ, ᑭ ᓇᑲᑕᒪᐁᐧᐤ ᐅᒋᐋᐧᒪ ᐊᓂᐦᐃ ᐃᐧᐊᐧ;
[26] ᐁᑯᓯ ᒫᑲ ᒥᓇ ᐊᓇ ᑯᑕᐠ, ᐊᐢᑯᐨ ᒥᓇ ᐊᓇ ᑯᑕᐠ, ᐱᔨᐢ ᑲᐦᑭᔭᐤ ᑌᐸᑯᑊ.
[27] ᐁᑯᓯ ᒫᑲ ᒫᐊᐧᐨ ᐃᐢᑲᐧᔮᐨ ᐃᐢᑫᐧᐤ ᐃᐧᐢᑕ ᑭ ᓂᐱᐤ.
[28] ᐁᐊᐧᑯ ᒫᑲ ᐅᐦᒋ, ᐃᐢᐱ ᐊᐱᓯᓯᓇᓂᐃᐧᑭᐤ, ᐊᐁᐧᓇ ᑫ ᐃᐧᐃᐧᐟ ᐊᓂᐦᐃ ᑌᐸᑯᑊ ᑳ ᐃᐦᑕᓯᔨᐟ? ᒋᑫᒪ ᑲᐦᑭᔭᐤ ᑭ ᐊᔭᐁᐧᐊᐧᐠ.
[29] ᒋᓴᐢ ᒫᑲ ᑭ ᓇᐢᑫᐧᐊᐧᓯᒣᐤ ᐅᒥᓯ ᐁ ᑭ ᐃᑖᐟ, ᑭ ᐊᐧᓂᑐᑌᓈᐋᐧᐤ ᐁᑳ ᐁ ᑭᐢᑫᔨᑕᒣᐠ ᒪᓯᓇᐦᐃᑫᐃᐧᓇ, ᐊᐦᐳ ᑭᓭᒪᓂᑐ ᐅ ᑲᐢᑭᐦᐁᐃᐧᓯᐃᐧᐣ.
[30] ᒋᑫᒪ ᐃᐢᐱ ᐊᐱᓯᓯᓇᓂᐃᐧᑭ, ᓇᒪᐃᐧᔭ ᐃᐧᑭᑐᐊᐧᐠ, ᒥᓇ ᓇᒪᐃᐧᔭ ᐊᐧᐃᐧᑭᑕᐃᑐᐊᐧᐠ, ᒫᑲ ᑖᐱᐢᑯᐨ ᐅ ᑭᓯᑯᒪ ᑭᓭᒪᓂᑐ ᑭᐦᒋ ᑭᓯᑯᕽ.
[31] ᒫᑲ ᐁ ᐊᐧᐃᐧᒋᑳᑌᐠ ᑭᑕ ᐊᐱᓯᓯᑭᐠ ᑳ ᓂᐱᒋᐠ, ᓇᒪ ᒋ ᑭ ᑭ ᐊᔭᒥᑖᓈᐋᐧᐤ ᐊᓂᒪ ᑳ ᑭ ᐃᑎᑯᔦᐠ ᑭᓭᒪᓂᑐ. ᐅᒥᓯ ᐁ ᐃᑌᐧᐟ.
[32] ᓂᔭ ᐅ ᑭᓭᒪᓂᑐᒪ ᐁᐸᕒᐋᑦ, ᒥᓇ ᐅ ᑭᓭᒪᓂᑐᒪ ᐊᐃᓴᐠ, ᒥᓇ ᐅ ᑭᓭᒪᓂᑐᒪ ᒉᑲᑊ? ᑭᓭᒪᓂᑐ ᓇᒪᐃᐧᔭ ᐅ ᑭᓭᒪᓂᑐᒥᒥᐠ ᑳ ᓂᐱᔨᐟ, ᒫᑲ ᑳ ᐱᒫᑎᓯᔨᐟ.
[33] ᐃᐢᐱ ᒫᑲ ᑳ ᒫᒪᐁᐧᔭᑎᒋᐠ ᐊᔨᓯᔨᓂᐊᐧᐠ ᐱᔦᐦᑕᐦᑭᐠ ᐅᒪ, ᑭ ᒫᒪᐢᑲᑕᒣᐧᐊᐧᐠ ᐅ ᑲᑭᐢᑭᒥᐁᐧᐃᐧᓂᔨᐤ.
[34] ᒫᑲ ᐃᐢᐱ ᐸᕒᐊᓯᔭᐠ ᑳ ᐯᐦᑕᐦᑭᐠ ᐊᓂᒪ ᐁ ᑭ ᑭᐳᑐᓀᐋᐧᔨᐟ ᓵᐟᔪᓯᔭ, ᑭ ᒫᒪᐃᐧ ᒫᐊᐧᒋᐃᑐᐊᐧᐠ.
[35] ᐁᑯᐢᐱ ᒫᑲ ᐯᔭᐠ, ᐊᓇ ᐅᔭᓱᐁᐧᐃᐧᔨᓂᐤ, ᑭ ᑲᑫᐧᒋᒣᐤ ᑲᑫᐧᒋᑫᒧᐃᐧᐣ, ᐁ ᑲᑫᐧᒋᐊᐟ, ᐅᒥᓯ ᐁ ᐃᑌᐧᐟ,
[36] ᑫᐢᑭᓄᐦᐊᒫᑫᔭᐣ, ᑖᓂᒪ ᒫᐊᐧᐨ ᑫᐦᒑᔨᐊᐧᕽ ᑲᑫᐢᑭᒥᐁᐧᐃᐧᐣ ᐅᔭᓱᐁᐧᐃᐧᓂᕽ?
[37] ᒋᓴᐢ ᒫᑲ ᐅᒥᓯ ᑭ ᐃᑌᐤ, ᑭ ᑲ ᓵᑭᐊᐤ ᑳ ᑎᐯᔨᐦᒋᑫᐟ ᑭ ᑭᓭᒪᓂᑐᑦ ᒥᓯᐁᐧ ᑭ ᑌᐃᕽ, ᒥᓇ ᒥᓯᐁᐧ ᑭᐟ ᐊᐦᒑᐦᑯᕽ, ᒥᓇ ᒥᓯᐁᐧ ᑭ ᒫᒥᑐᓀᔨᒋᑲᓂᕽ.
[38] ᐁᐊᐧᑯ ᐅᒪ ᓂᔨᑳᓀᔨᑕᑲᐧᕽ ᒥᓇ ᑫᐦᒑᔨᐊᐧᕽ ᑲᑫᐢᑭᒥᐁᐧᐃᐧᐣ.
[39] ᐊᓂᒪ ᒫᑲ ᐊᐢᑯᐨ ᐁᑌᔨᑕᑲᐧᕽ ᐁᑯᓯ ᑕᐱᐢᑰᐨ ᑯᑕᐠ, ᑭ ᑲ ᓴᑭᐋᐤ ᑭᒋ ᐊᔨᓯᔨᓂᐤ ᑖᐱᐢᑯᐨ ᑲ ᐃᓯ ᓴᑭᐃᓱᔭᐣ.
[40] ᐁᑯᓯ ᐅᐦᐃ ᓂᓱ ᑲᑫᐢᑭᒥᐁᐧᐁᐧᓂᕽ ᐊᐢᑌᐤ ᑲᐦᑭᔭᐤ ᐅᔭᓱᐁᐧᐃᐧᐣ ᒥᓇ ᑭᐢᑭᐁᐧᐦᐃᑫᐃᐧᓇ.
[41] ᒣᑳᐧᐨ ᒫᑲ ᐸᕒᐊᓯᔭᐠ ᐁ ᒫᒪᐃᐧ ᒫᐊᐧᒋᐃᑐᒋᐠ, ᒋᓴᐢ ᑭ ᑲᑫᐧᒋᒣᐤ,
[42] ᐅᒥᓯ ᐁ ᐃᑌᐧᐟ, ᑖᓂᓯ ᑭᔭᐋᐧᐤ ᐁᑌᔨᒫᔦᐠ ᙭? ᐊᐁᐧᓇ ᐅ ᑯᓯᓴ? ᐅᓯ ᒫᑲ ᐃᑌᐊᐧᐠ, ᐅᑯᓯᓴ ᑌᐱᐟ.
[43] ᐅᒥᓯ ᒫᑲ ᐃᑌᐤ, ᑖᓀᑭ ᒫᑲ ᑌᐱᐟ ᐊᐦᒑᐦᑯᕽ ᑌᐯᔨᐦᒋᑫᐟ ᑳ ᐅᐦᒋ ᐃᓯᔨᐦᑳᑖᐟ, ᐅᒥᓯ ᐁ ᐃᑌᐧᐟ,
[44] ᑳ ᑎᐯᔨᐦᒋᑫᐟ ᐅᒥᓯ ᑭ ᐃᑌᐤ ᓂ ᑎᐯᔨᐦᒋᑫᒪ, ᐊᐱ ᓂ ᑭᐦᒋᓂᐢᑭᕽ, ᐸᑎᒫ ᐃᔨᑯᕽ ᑭ ᐅᐟ ᐊᐢᐱᓯᑌᓯᒧᓂᑲᑕᓂ ᐊᓂᑭ ᑭ ᓄᑎᓈᑲᓇᐠ?
[45] ᑭᐢᐱᐣ ᒫᑲ ᑌᐱᐟ ᑌᐯᔨᐦᒋᑫᔭᐣ ᐁᓯᔨᐦᑳᑖᐟ, ᑖᓂᓯ ᐁᓯ ᐅᑯᓯᓯᐟ?
[46] ᓇᒪ ᒫᑲ ᐊᐃᐧᔭᐠ ᐊᔨᓯᔨᓂᐤ ᑲᓇᑫ ᐯᔭᐠ ᐊᔭᒥᐃᐧᐣ ᑭ ᓇᐢᑫᐧᐊᐧᓯᒣᐤ; ᐊᐦᐳ ᓇᒪᐃᐧᔭ ᐊᐃᐧᔭᐠ ᐊᔨᓯᔨᓂᐤ, ᐁᑲᐧ ᐁᐊᐧᑯ ᐁ ᑭᓯᑳᐠ ᐅᐦᒋ, ᑭ ᑲᑫᐧᒋᒣᐤ ᓈᐣᑕᐤ ᑫᑲᐧᐩ.