[1] ᐃᐧᔭᐋᐧᐤ ᒫᑲ ᒥᓇ ᐸᕒᐊᓯᔭᐠ ᐁ ᐯ ᐃᐧᒉᐋᐧᒋᐠ ᐊᓂᐦᐃ ᓴᐟᔪᓯᔭ, ᑭ ᐯ ᐃᑐᐦᑌᐊᐧᐠ, ᒥᓇ ᐁ ᐯ ᑲᑫᐧᒋᐊᒋᐠ, ᐁ ᐸᑯᓭᔨᒫᒋᐠ ᑭᑕ ᐋᐧᐸᐦᑕᐦᐃᑯᒋᐠ ᑭᐢᑭᓇᐊᐧᒋᒋᑲᐣ ᑭᐦᒋ ᑭᓯᑯᕽ ᐅᐦᒋ.
[2] ᑭ ᓇᐢᑫᐧᐊᐧᓯᒣᐤ ᒫᑲ ᐅᒥᓯ ᐁ ᑭ ᐃᑖᐟ, ᐃᐢᐱ ᐁᐧᑖᑯᓯᑭ, ᑭᔭᐋᐧᐤ ᑭᐟ ᐃᑖᐧᓈᐋᐧᐤ, ᑭᑕ ᒥᔪ ᑭᓯᑳᐤ; ᒋᑫᒪ ᒥᑲᐧᐊᐧᐢᑲᐧᐣ.
[3] ᑭᔦᑭᓭᐸᔭᑭ ᒫᑲ ᐃᐧᔭ, ᑭᑕ ᒪᒋ ᑭᓯᑳᐤ ᐊᓄᐦᐨ ᑫ ᑭᓯᑳᐠ; ᒋᑫᒪ ᑭᓯᐠ ᒥᑲᐧᐤ, ᒥᓇ ᐊᐧᐢᑯᐊᐧᐣ. ᑭ ᑭᐢᑫᔨᑌᓈᐋᐧᐤ ᐁᐢᐱᑎᑫᐧᒪᑲᕽ ᑭᓯᐠ; ᓇᒪᐃᐧᔭ ᒫᑲ ᑭ ᑭᐢᑫᔨᑌᓈᐋᐧᐤ ᐊᓂᐦᐃ ᑭᐢᑭᓇᐊᐧᒋᒋᑲᓇ ᒣᑳᐧᐨ ᑳ ᐱᒥ ᐊᔮᑭ.
[4] ᐅᒪᒐᑎᓯᐃᐧ ᒥᓇ ᐱᓯᑲᐧᑎᓯᐃᐧ ᐊᔨᓯᔨᓂᐊᐧᐠ ᑳ ᓇᓇᑐᓇᑭᐠ ᑭᐢᑭᓇᐊᐧᒋᒋᑲᐣ; ᓇᒪᐃᐧᔭ ᒫᑲ ᑭᐢᑭᓇᐊᐧᒋᒋᑲᐣ ᑭᑕ ᐸᑭᑎᓇᒪᐊᐧᐊᐧᐠ, ᐱᑯ ᐊᓂᒪ ᐅ ᑭᐢᑭᓇᐊᐧᒋᒋᑲᐣ ᐅᑭᐢᑭᐁᐧᐦᐃᑫᐤ ᒍᓇᐢ. ᐁᑯᓯ ᒫᑲ ᑭ ᓇᑲᑌᐤ, ᐁ ᐊᑎ ᓯᐯᐧᐦᑌᐟ.
[5] ᐃᐢᐱ ᒫᑲ ᐅ ᑭᐢᑭᓄᐦᐊᒪᐋᐧᑲᓇ ᑳ ᐯ ᑕᑯᓯᓂᔨᐟ ᑫᐧᐢᑭᑌ ᐃᑌᑫᑲᑦ, ᑭ ᐊᐧᓂᑭᐢᑭᓯᐊᐧᐠ ᑭᑕ ᑕᑯᓇᒋᐠ ᐸᑫᐧᓯᑲᓇ.
[6] ᐁᑯᐢᐱ ᒫᑲ ᒋᓴᐢ ᐅᒥᓯ ᑭ ᐃᑌᐤ, ᐊᔭᑲᐧᒥᓯᐠ ᒥᓇ ᑲᑯᐢᐸᓀᔨᑕᒧᐠ ᐊᓂᒪ ᐅᐟ ᐅᐦᐱᐦᒋᒋᑲᓂᐋᐧᐤ ᐊᓂᑭ ᐸᕒᐊᓯᔭᐠ ᒥᓇ ᐊᓂᑭ ᓴᐟᔪᓯᔭᐠ.
[7] ᐁᑯᓯ ᒫᑲ ᑭ ᑲᑫᐧᒋᑐᐊᐧᐠ, ᐅᒥᓯ ᐁ ᐃᑌᐧᒋᐠ, ᒋᑫᒪ ᐁᑳ ᐁ ᑭ ᐅᐦᒋ ᑕᐦᑯᓈᔭᕽ ᐸᑫᐧᓯᑲᐣ.
[8] ᐃᐢᐱ ᒋᓴᐢ ᑫᐢᑫᔨᑕᕽ, ᐅᒥᓯ ᑭ ᐃᑌᐤ, ᐅ ᑭᔭᐋᐧᐤ ᑳ ᐊᐱᓵᓯᐠ ᑭ ᑖᐯᐧᑕᒧᐃᐧᓂᐋᐧᐤ, ᑖᓀᑭ ᑳ ᑲᑫᐧᒋᑐᔦᐠ, ᒋᑫᒪ ᐁᑳ ᐁ ᐅᐦᒋ ᐯ ᑕᑯᓈᔦᐠ ᐸᑫᐧᓯᑲᐣ?
[9] ᓇᒣᐢᑲᐧ ᒋ ᑫᔮᐱᐨ ᑭ ᓂᓯᑐᐦᑌᓈᐋᐧᐤ, ᐊᐦᐳ ᓇᒪ ᒋ ᑫᔮᐱᐨ ᑭ ᑲᓄᑭᐢᑭᓯᓈᐋᐧᐤ ᐊᓂᑭ ᓂᔮᓇᐣ ᐸᑫᐧᓯᑲᓇᐠ ᐁᑯᓯ ᓂᔭᓇᓇᐧᐤ ᑭᐦᒋ ᒥᑖᑐᒥᑕᓇᐤ ᑳ ᐃᐦᑕᓯᒋᐠ, ᑕᓂ ᑕᐦᑐ ᒫᑲ ᐃᐧᑯᐱᐊᐧᑕ ᐁ ᓵᑲᐢᑭᓀᑭ ᑳ ᐅᑎᓇᒣᐠ?
[10] ᐊᐦᐳ ᒥᓇ ᐊᓂᑭ ᑌᐸᑯᑊ ᐸᑫᐧᓯᑲᓇᐠ ᐁ ᑭ ᒪᑎᓇᒪᒋᐠ ᐊᓂᑭ ᓀᐋᐧᐤ ᑭᐦᒋ ᒥᑖᑐᒥᑕᓇᐤ ᑳ ᐃᐦᑕᓯᒋᐠ, ᑕᓂ ᑕᐦᑐ ᒫᑲ ᐃᐧᑯᐱᐊᐧᑕ ᐁ ᓴᑲᐢᑭᓀᑭ ᑳ ᐅᑎᓇᒣᐠ?
[11] ᑖᓀᑭ ᐁᑳ ᑳ ᓂᓯᑐᐦᑕᒣᐠ, ᐁ ᐊᔭᒥᐃᑕᑯᐠ ᐁᑳ ᐸᑫᐧᓯᑲᐣ ᐁ ᐋᔨᒧᒪᐠ, ᒫᑲ ᐊᓂᒪ ᑭᑕ ᑲᑯᐢᐸᓀᔨᑕᒣᐠ ᐅᐱᐦᒋᒋᑲᓂᐋᐧᐤ ᐸᕒᐊᓯᔭᐠ ᒥᓇ ᓴᐟᔪᓯᔭᐠ?
[12] ᐁᑲᐧ ᒫᑲ ᑭ ᓂᓯᑐᐦᑕᐁᐧᐊᐧᐠ ᑖᓂᓯ ᐁ ᐃᓯ ᐃᐧᐦᑕᒪᑯᒋᐠ ᐁᑳ ᑭᑕ ᑲᑯᐢᐸᓀᔨᑕᐦᑭᐠ ᐊᓂᒪ ᐸᑫᐧᓯᑲᓂ ᐅᐦᐱᐦᒋᒋᑲᐣ, ᒫᑲ ᐊᓂᒪ ᐅ ᑭᐢᑭᓄᐦᐊᒫᑫᐃᐧᓂᐋᐧᐤ ᐸᕒᐊᓯᔭᐠ ᒥᓇ ᓴᐟᔪᓯᔭᐠ.
[13] ᐃᐢᐱ ᒫᑲ ᒋᓴᐢ ᑳ ᑕᑯᓯᕽ ᐊᓂᑌ ᓯᓭᕒᐃᐊ ᐱᓬᐃᐸᐩ, ᑭ ᑲᑫᐧᒋᒣᐤ ᐅ ᑭᐢᑭᓄᐦᐊᒪᐋᐧᑲᓇ, ᐅᒥᓯ ᐁ ᐃᑖᐟ, ᐊᐁᐧᓇ ᐊᔨᓯᔨᓂᐊᐧᐠ ᐁ ᐃᑌᐧᒋᐠ ᓂᔭ ᐃᔨᓂᐃᐧᑯᓯᓵᐣ ᐁ ᐋᐃᐧᔮᐣ?
[14] ᐅᒥᓯ ᒫᑲ ᑭ ᐃᑌᐧᐊᐧᐠ, ᐋᑎᐦᐟ ᒐᐣ ᐸᑊᑎᐢᐟ ᐃᑌᐧᐊᐧᐠ: ᐋᑎᐦᐟ, ᐃᓬᐊᔭᐢ; ᑯᑕᑲᐠ ᒫᑲ, ᒉᕒᐃᒪᔭᐢ, ᐊᐦᐳ ᓂᑯᑖᐧ ᐯᔭᐠ ᐅᑭᐢᑭᐁᐧᐦᐃᑫᐊᐧᐠ.
[15] ᐅᒥᓯ ᒫᑲ ᐃᑌᐤ, ᑖᓂᓯ ᒫᑲ ᑭᔭᐋᐧᐤ ᐁᑌᐧᔦᐠ ᐁ ᐋᐃᐧᔭᐣ?
[16] ᓴᐃᒪᐣ ᐱᑕᕒ ᒫᑲ ᑭ ᓇᐢᑫᐧᐊᐧᓯᒣᐤ ᐅᒥᓯ ᐁ ᑭ ᐃᑖᐟ, ᑭᔭ ᐅᒪ ᙭ ᐅᑯᓯᓴ ᑳ ᐱᒫᑎᓯᐟ ᑭᓭᒪᓂᑐ.
[17] ᒋᓴᐢ ᒫᑲ ᑭ ᓇᐢᑫᐧᐊᐧᓯᒣᐤ ᐅᒥᓯ ᐁ ᑭ ᐃᑖᐟ, ᑭ ᓴᐁᐧᔨᑖᑯᓯᐣ ᐃᓴ ᑭᔭ, ᓴᐃᒪᐣ ᐸᕒᒍᓇ; ᒋᑫᒪ ᐃᐧᔭᐢ ᒥᓇ ᒥᐦᑯ ᓇᒪᐃᐧᔭ ᑭ ᑭ ᑭᐢᑫᔨᑕᒧᐃᑯᐣ, ᒫᑲ ᐱᑯ ᓄᑖᐃᐧ ᑭᐦᒋ ᑭᓯᑯᕽ ᑳ ᐊᔮᐟ.
[18] ᒥᓇ ᒫᑲ ᐅᒥᓯ ᑭᐟ ᐃᑎᐣ, ᑭᔭ ᐱᑕᕒ; ᐅᑕ ᒫᑲ ᐊᐊᐧ ᑭᐢᑖᐱᐢᑯᕽ ᓂ ᑲ ᐸᓯᑯᓀᐣ ᓂᐟ ᐃᓯᑕᐧᐃᐧᐣ; ᐊᓂᐦᐃ ᒫᑲ ᐦᐁᑎᐢ ᐃᐢᑲᐧᑌᒪ ᓇᒪᐃᐧᔭ ᑭᑕ ᓵᑯᑖᐧᒪᑲᓇᐧ.
[19] ᐁᑯᓯ ᑭ ᑲ ᒥᔨᑎᐣ ᐊᐱᑕᑲᐃᑲᓇ ᐊᓂᑕ ᑭᐦᒋ ᑭᓯᑯᐃᐧ ᐅᑌᓇᐃᐧᐃᐧᓂᕽ; ᐱᑯ ᒫᑲ ᑫᑲᐧᐩ ᑫ ᑕᑯᐱᑕᒪᐣ ᐅᑕ ᐊᐢᑭᕽ, ᑭᑕ ᑕᑯᐱᒋᑲᑌᐤ ᑭᐦᒋ ᑭᓯᑯᕽ; ᒥᓇ ᑫᑲᐧᐩ ᑫ ᐋᐸᐦᐊᒪᐣ ᐅᑕ ᐊᐢᑭᕽ, ᑭᑕ ᐋᐸᐃᑲᑌᐤ ᑭᐦᒋ ᑭᓯᑯᕽ.
[20] ᐁᑯᓯ ᒫᑲ ᑭ ᐊᔭᑳᐧᒥᒣᐤ ᐅ ᑭᐢᑭᓄᐦᐊᒪᐋᐧᑲᓇ, ᐁᑳ ᐊᐃᐧᔭ ᑭᑕ ᐃᐧᐦᑕᒪᐋᐧᔨᐟ ᐃᐧᔭ ᐁ ᐋᐃᐧᐟ ᒋᓴᐢ ᐊᓇ ᙭.
[21] ᐁᑯᐢᐱ ᒫᑲ ᐅᐦᒋ ᒋᓴᐢ ᑭ ᓯᐯᐧ ᐋᐧᐸᐦᑕᐁᐤ ᐅ ᑭᐢᑭᓄᐦᐊᒪᐋᐧᑲᓇ, ᑖᓂᓯ ᑭᑕ ᐃᓯ ᐃᑐᐦᑌᐟ ᒉᕒᐅᓴᓬᐊᒥᕽ, ᒥᓇ ᒥᓯᐁᐧ ᑭᑕ ᐃᓯ ᑲᑲᐧᑕᑭᐦᐃᑯᐟ ᑳ ᓂᑳᓀᔨᑖᑯᓯᔨᐟ ᒥᓇ ᐊᔭᒥᐦᐁᐃᐧᔨᓂᐊᐧ, ᒥᓇ ᒪᓯᓇᐦᐃᑫᐃᐧᔨᓂᐊᐧ, ᒥᓇ ᑭᑕ ᓂᐸᐃᑯᐟ, ᒥᓇ ᒫᑲ ᑭᑕ ᐊᐧᓂᐢᑳᓂᐟ ᑭ ᓂᐢᑐ ᑭᓯᑳᑭ.
[22] ᐁᑯᓯ ᒫᑲ ᐱᑕᕒ ᑭ ᐅᑎᓀᐤ, ᐁ ᐃᐧ ᑭᑕᐦᐊᒪᐋᐧᐟ, ᐅᒥᓯ ᐁ ᐃᑌᐧᐟ, ᐅᒪ ᐊᐧᔭᐤ ᑭᑕ ᐃᐧ ᐃᐦᑕᑲᐧᐣ, ᑌᐯᔨᐦᒋᑫᔭᐣ; ᓇᒪᐃᐧᔭ ᐁᑯᓯ ᑭ ᑲ ᐃᑎᐣ.
[23] ᒫᑲ ᑭ ᑫᐧᐢᑭᑲᐸᐃᐧᐤ, ᐅᒥᓯ ᐁ ᑭ ᐃᑖᐟ ᐱᑕᕒᐊ, ᐅᑕᑫᐢᑲᐃᐧᐣ ᑭᔭ ᓭᑕᐣ; ᑭ ᓇᔦᑕᐃᐧᐢᑲᐃᐧᐣ; ᒋᑫᒪ ᓇᒪᐃᐧᔭ ᑭ ᑭ ᐱᓯᐢᑫᔨᑌᐣ ᐊᓂᐦᐃ ᑭᓭᒪᓂᑐ ᑳ ᐅᐟ ᐊᔮᓂᐟ, ᒫᑲ ᐱᑯ ᐊᓂᐦᐃ ᐊᔨᓯᔨᓂᐊᐧᐠ ᑳ ᐅᐟ ᐊᔮᓂᒋᐠ.
[24] ᐁᑯᓯ ᒋᓴᐢ ᑭ ᐃᑌᐤ ᐅ ᑭᐢᑭᓄᐦᐊᒪᐋᐧᑲᓇ, ᑭᐢᐱᐣ ᐊᐃᐧᔭᐠ ᐊᔨᓯᔨᓂᐤ ᐊᐧ ᐱᒥᑎᓴᐅᑫᐧ, ᑭᔮᑦ ᑭᑕ ᐊᓀᐧᑖᓱ, ᒥᓇ ᑭᑕ ᐅᑎᓇᑦ ᐅ ᐱᒥᑕᐢᑲᐧᐃᐦᑲᐣ, ᐁᑯᓯ ᒫᑲ ᓂ ᑲ ᐱᒥᑎᓴᐦᐅᐠ.
[25] ᒋᑫᒪ ᑭᐢᐱᐣ ᐊᐃᐧᔭᐠ ᐊᐧ ᐱᒪᒋᑕᑫᐧ ᐅ ᐱᒫᑎᓯᐃᐧᐣ ᑭᑕ ᐊᐧᓂᑕᐤ; ᐊᐃᐧᔭᐠ ᒫᑲ ᑫ ᐊᐧᓂᑕᑫᐧ ᐅ ᐱᒫᑎᓯᐃᐧᐣ ᓂᔭ ᐅᐦᒋ ᑭᑕ ᒥᐢᑲᑦ.
[26] ᒋᑫᒪ ᑖᓂᓯ ᐊᔨᓯᔨᓂᐤ ᑫ ᐃᑕᐸᒋᐦᐃᑯᐟ, ᑭᐢᐱᐣ ᑲᐢᑭᑕᐟ ᒥᓯᐁᐧ ᐊᐢᑭ, ᐁᑯᓯ ᐊᐧᓂᐊᒋ ᐅᐟ ᐊᐦᒑᑲᐧ? ᐊᐦᐳ ᑫᑲᐧᐩ ᑫ ᒥᐢᑯᑐᓂᑲᑫᐟ ᐊᔨᓯᔨᓂᐤ ᐅᐟ ᐊᐦᒑᑲᐧ ᐅᐦᒋ?
[27] ᒋᑫᒪ ᐃᔨᓂᐃᐧᑯᓯᓵᐣ ᑭᑕ ᐯ ᑕᑯᓯᐣ ᐅ ᒪᒪᐦᑖᑯᓯᐃᐧᓂᔨᕽ ᐅᑖᐃᐧᔭ, ᐁ ᐯ ᐃᐧᒉᐊᐧᐟ ᐅᑭᓯᑯᒪ; ᐁᑯᓯ ᒫᑲ ᑭᑕ ᑎᐸᐊᒪᐁᐧᐤ ᑲᐦᑭᔭᐤ ᐊᔨᓯᔨᓂᐊᐧ ᒣᐧᐦᒋ ᑳ ᑭ ᐃᓯ ᐊᔨᑕᑐᐢᑫᔨᐟ.
[28] ᑖᐯᐧ ᑭᐟ ᐃᑎᓈᐋᐧᐤ, ᐋᑎᐦᐟ ᐅᑕ ᓂᐸᐃᐧᐊᐧᐠ, ᐊᓂᑭ ᐁᑳ ᑫ ᑯᒋᐢᑕᐦᑭᐠ ᓂᐳᐃᐧᐣ, ᐁᔨᑯᕽ ᑭᑕ ᐋᐧᐸᒫᒋᐠ ᐃᔨᓂᐃᐧᑯᓯᓵᓇ ᐁ ᐯ ᐃᑐᐦᑌᔨᐟ ᐅᐟ ᐅᑌᓇᐃᐧᐃᐧᓂᔨᕽ.