[1] ᐁᑯᓯ ᑭ ᐊᔨᑭᐣ ᐯᔭᐠ ᐁ ᐊᔭᒥᐦᐁᑭᓯᑲᐠ, ᐁ ᑭ ᐊᑎ ᓴᐳᐢᑲᕽ ᐸᑫᐧᓯᑲᓂᑲᓂ ᑭᐢᑎᑲᓇ; ᐁᑯᓯ ᐅ ᑭᐢᑭᓄᐦᐊᒪᐋᐧᑲᓇ ᑭ ᒪᒪᓂᐢᑎᑳᐧᓀᐱᑌᔨᐊᐧ ᐸᑫᐧᓯᑲᓂᑳᓇ, ᐁ ᑭ ᒧᐋᐧᒋᐠ, ᐁ ᒥᒥᑯᓈᒋᐠ ᐅ ᒋᒋᐊᐧᕽ.
[2] ᒫᑲ ᐋᑎᐦᐟ ᐹᕒᐋᓯᐊᐧᐠ ᑭ ᐃᑌᐧᐊᐧᐠ, ᑖᓀᑭ ᑳ ᑐᑕᐦᑭᐠ ᐊᓂᒪ ᐁᑳ ᐁ ᐃᑕᐢᑌᐠ ᑭᑕ ᑐᑕᒥᕽ ᐁ ᐊᔭᒥᐦᐁᑭᓯᑲᐠ?
[3] ᐁᑯᓯ ᒋᓴᐢ ᑭ ᓇᐢᑫᐧᐊᐧᓯᒣᐤ ᐁ ᑭ ᐃᑖᐟ, ᓇᒪᐃᐧᔭ ᒋ ᑭ ᑭ ᐊᔭᒥᑖᓈᐋᐧᐤ ᐊᐦᐳ ᐅᒪ, ᐊᓂᒪ ᑌᐱᐟ ᑳ ᑭ ᑐᑕᕽ, ᐃᐢᐱ ᐁ ᓄᑌᑲᑌᐟ, ᐃᐧᔭ, ᐊᓯᒋ ᐊᓂᐦᐃ ᑳ ᑭ ᐃᐧᒉᐃᐧᑯᐟ;
[4] ᑖᓂᓯ ᐁ ᑭ ᐃᓯ ᐱᐦᑐᑫᐟ ᑭᓭᒪᓂᑐ ᐅ ᐊᐧᐢᑲᐦᐃᑲᓂᔨᕽ, ᐁᑯᓯ ᐁ ᑭ ᐅᑎᓈᐟ ᒥᓇ ᐁ ᑭ ᒧᐋᐧᐟ ᑲᓇᒋ ᐸᑫᐧᓯᑲᓇ, ᐁᑯᓯ ᐁ ᑭ ᒥᔮᐟ ᐊᓂᐦᐃ ᑳ ᑭ ᐃᐧᒉᐃᐧᑯᐟ; ᐁᑳ ᑳ ᐃᑕᐢᑌᔨᐠ ᑭᑕ ᒧᐃᐧᐟ ᐱᑯ ᐊᔭᒥᐦᐁᐃᐧᔨᓂᐊᐧᐠ?
[5] ᐁᑯᓯ ᑭ ᐃᑌᐤ, ᐃᔨᓂᐃᐧᑯᓯᓵᐣ ᑎᐯᔨᑕᑦ ᐁ ᐊᔭᒥᐦᐁᑭᓯᑳᔨᐠ.
[6] ᑭ ᐊᔨᑭᐣ ᒫᑲ ᑯᑕᐠ ᐁ ᐊᔭᒥᐦᐁᑭᓯᑲᐠ, ᑭ ᐱᐦᑐᑫᐤ ᐊᔭᒥᐦᐁᐃᐧᑲᒥᑯᕽ. ᐁ ᑭ ᑭᐢᑭᓄᐦᐊᒫᑫᐟ ᒫᑲ: ᐁᑯᓯ ᐁᑯᑕ ᑭ ᐊᔮᐤ ᓈᐯᐤ, ᐅ ᑭᐦᒋᓂᐢᐠ ᐁ ᓂᐳᐃᐧᐊᔭᔨᐠ.
[7] ᐁᑯᓯ ᒪᓯᓇᐦᐃᑫᐃᐧᔨᓂᐊᐧᐠ ᒥᓇ ᐹᕒᐊᓯᐊᐧᐠ ᑭ ᐊᓴᐋᐧᐸᒣᐊᐧᐠ, ᒪᐦᑎ ᑭᑕ ᐃᔨᓂᑲᐦᐋᔨᐟ ᐁ ᐊᔭᒥᐦᐁᑭᓯᑳᔨᐠ; ᑭᑕ ᒥᐢᑲᐦᑭᐠ ᑖᓂᓯ ᑫ ᐃᓯ ᒪᒥᓯᒫᒋᐠ.
[8] ᒫᑲ ᑭ ᑭᐢᑫᔨᑕᑦ ᐁ ᐃᓯ ᒫᒥᑐᓀᔨᑕᒥᔨᐟ; ᐁᑯᓯ ᑭ ᐃᑌᐤ ᐊᓂᐦᐃ ᓈᐯᐊᐧ ᑳ ᓂᐳᐃᐧᒋᐦᒉᔨᐟ, ᐸᓯᑯ, ᑖᐊᐧᔨᕽ ᒫᑲ ᓂᐸᐃᐧ ᐁᑯᓯ ᑭ ᐸᓯᑯᔨᐊᐧ ᒥᓇ ᑭ ᓂᐸᐃᐧᔨᐊᐧ.
[9] ᐁᑯᓯ ᒋᓴᐢ ᑭ ᐃᑌᐤ, ᑭ ᑲᑫᐧᒋᒥᑎᓈᐋᐧᐤ, ᐃᑕᐢᑌᐤ ᒋ ᑭᑕ ᒥᔪᑐᑕᒥᕽ ᐁ ᐊᔭᒥᐦᐁᑭᓯᑲᐠ, ᐊᐁᐧᑳ ᑭᑕ ᒪᔨᑐᑕᒥᕽ? ᑭᑕ ᐱᒫᒋᑕᕽ ᐱᒫᑎᓯᐃᐧᐣ, ᐊᐁᐧᑳ ᑭᑕ ᓂᓯᐊᐧᓈᒋᑖᕽ?
[10] ᐁᑯᓯ ᑭ ᐋᐧᐢᑳ ᑲᓇᐋᐧᐸᒣᐤ ᑲᐦᑭᔭᐤ, ᐁᑲᐧ ᑭ ᐃᑌᐤ, ᓱᐃᐧᓂᐢᑫᔨ. ᐁᑯᓯ ᒫᑲ ᑭ ᑐᑕᑦ: ᐅᒋᐦᒋ ᒫᑲ ᑭ ᒥᔪ ᐋᔭᐤ.
[11] ᑭ ᓵᑲᐢᑭᓀᐢᑳᑲᐧᐠ ᒫᑲ ᑭᓯᐋᐧᓯᐃᐧᐣ; ᒥᓇ ᐁ ᑭ ᐃᐧᒋ ᐱᑭᐢᑫᐧᑐᒋᐠ ᑖᓂᓯ ᑫ ᑐᑕᐋᐧᒋᐠ ᒋᓴᓴ.
[12] ᑭ ᐊᔨᑭᐣ ᒫᑲ ᒣᑳᐧᐨ ᐁᑯᐢᐱ, ᑭ ᐃᑐᐦᑌᐤ ᐊᐧᒋᕽ ᑭᑕ ᐊᔭᒥᐦᐋᐟ; ᐁᑯᓯ ᑲᐯᑎᐱᐢᐠ ᑭ ᒪᐃᐧᒧᐢᑕᐁᐧᐤ ᑭᓭᒪᓂᑐᐊᐧ.
[13] ᐁᑯᓯ ᐃᐢᐱ ᐁ ᑭᓯᑳᔨᐠ, ᑭ ᓇᑐᒣᐤ ᐅ ᑭᐢᑭᓄᐦᐊᒪᐋᐧᑲᓇ; ᐁᑯᓯ ᐁᐊᐧᑲᐧᓂ ᐅᐦᒋ ᑭ ᑲᑫᑭᓀᐤ ᒥᑖᑕᐟ ᓂᓱᓴᑊ, ᐁᐊᐧᑲᐧᓂ ᒫᑲ ᐊᐸᐢᑎᓬᐊᐠ ᑭ ᐃᓯᔨᐦᑳᑌᐤ;
[14] ᓴᐃᒪᐣ, ᐱᑕᕒ ᒥᓇ ᑳ ᑭ ᐃᓯᔨᐦᑳᑖᐟ; ᒥᓇ ᐅᒋᐋᐧᒪ ᐊᐣᑕᕒᐅ, ᒉᒥᐢ ᒥᓇ ᒑᐣ, ᐱᓬᐃᐠ ᒥᓇ ᐹᕒᑐᓬᐃᒥᐤ, ᒫᑎᔪ ᒥᓇ ᑖᒪᐢ,
[15] ᒉᒥᐢ ᐋᓬᐱᐊᐢ ᐅᑯᓯᓴ, ᐊᓯᒋ ᓴᐃᒪᐣ ᐅᑕᑲᒣᔨᒧ ᑳ ᑭ ᐃᓯᔨᐦᑳᓱᐟ,
[16] ᒥᓇ ᒍᑕᐢ ᐅᑯᓯᓴ ᒉᒥᐢ, ᐊᓯᒋ ᒍᑕᐢ ᐃᐢᑳᕒᐃᐊᐟ, ᐁᐊᐧᑯ ᑳ ᑭ ᒥᓯᑫᒧᐟ;
[17] ᐁᑯᓯ ᑭ ᐯ ᓂᑕᒋᐁᐧᐤ ᐁ ᐃᐧᒉᐋᐧᐟ, ᐁ ᑭ ᓂᐸᐃᐧᐟ ᒫᑲ ᐃᑕ ᐁ ᑕᑕᑲᐧᒑᔨᐠ, ᒥᐦᒉᐟ ᒫᑲ ᐅ ᑭᐢᑭᓄᐦᐊᒪᐋᐧᑲᓇ ᐊᓯᒋ ᒥᐦᒉᐟ ᐊᔨᓯᔨᓂᐊᐧ ᒥᓯᐁᐧ ᒍᑎᔭᐃᕽ ᒥᓇ ᒉᕒᐅᓴᓬᐊᒥᕽ, ᒥᓇ ᓯᓱᓀ ᑭᒋᑲᒥᕽ ᑕᐃᕒᐃᕽ ᒥᓇ ᓴᐃᑕᓂᕽ ᐅᐦᒋ, ᑳ ᐯ ᐃᑐᐦᑌᔨᐟ ᑭᑕ ᓇᑐᐦᑖᑯᐟ, ᒥᓇ ᑭᑕ ᐃᔨᓂᑲᐦᐃᐦᒋᐠ ᐅᐟ ᐃᑖᐢᐱᓀᐃᐧᓂᐊᐧᐊᐧ ᐅᐦᒋ;
[18] ᒥᓇ ᐊᓂᑭ ᑳ ᑭ ᑲᑲᐧᑕᑭᐃᑯᒋᐠ ᐁᑳ ᐁ ᐯᑭᓯᔨᐟ ᐊᐦᒑᐦᑲᐧ ᑭ ᐃᔨᓂᑲᐋᐊᐧᐠ.
[19] ᐁᑯᓯ ᑲᐦᑭᔭᐤ ᑳ ᐅᓴᒣᔭᑎᔨᐟ ᐊᔨᓯᔨᓂᐊᐧ ᑭ ᑲᑫᐧ ᓵᒥᓂᐠ: ᒋᑫᒪ ᒪᐢᑲᐃᐧᓯᐃᐧᐣ ᑭ ᐅᐦᒋᐸᔨᔨᐤ, ᑲᐦᑭᔭᐤ ᒫᑲ ᑭ ᐃᔨᓂᑲᐃᑲᐧᐠ.
[20] ᐁᑯᓯ ᒫᑲ ᑭ ᑲᓇᐋᐧᐸᒣᐤ ᐅ ᑭᐢᑭᓄᐦᐊᒪᐋᐧᑲᓇ, ᐁ ᑭ ᐃᑌᐧᐟ, ᑭ ᒥᔪ ᐃᑕᑭᒥᑯᐃᐧᓯᓈᐋᐧᐤ ᑭᔭᐋᐧᐤ ᑳ ᑭᑎᒪᑭᓯᔦᐠ: ᒋᑫᒪ ᑭᐟ ᐊᔮᓈᐋᐧᐤ ᐅᐟ ᐅᑌᓇᐃᐧᐃᐧᐣ ᑭᓭᒪᓂᑐ.
[21] ᑭ ᒥᔪ ᐃᑕᑭᒥᑯᐃᐧᓯᓈᐋᐧᐤ ᑭᔭᐋᐧᐤ ᐊᓄᐦᐨ ᒣᑳᐧᐨ ᑲ ᓄᑌᑲᑌᔦᐠ: ᒋᑫᒪ ᑭ ᑲ ᑭᐢᐳᐃᑲᐃᐧᓈᐋᐧᐤ. ᑭ ᒥᔪ ᐃᑕᑭᒥᑯᐃᐧᓯᓈᐋᐧᐤ ᒣᑳᐧᐨ ᐊᓄᐦᐨ ᑳ ᒫᑐᔦᐠ; ᒋᑫᒪ ᑭ ᑲ ᐹᐱᓈᐋᐧᐤ.
[22] ᑭ ᒥᔪ ᐃᑕᑭᒥᑯᐃᐧᓯᓈᐋᐧᐤ, ᐃᐢᐱ ᐊᔨᓯᔨᓂᐊᐧᐠ ᐸᑳᐧᑎᑯᔦᑲᐧᐃᐧ, ᒥᓇ ᐁᑳ ᐃᐧ ᐃᐧᒉᐃᐧᑯᔦᑳᐧᐃᐧ, ᒥᓇ ᑕᓯᒥᑯᔦᑲᐧᐃᐧ ᒥᓇ ᐊᐧᔭᐃᐧᐁᐧᐱᓇᑲᐧᐃᐧ ᑭ ᐃᐧᔪᐃᐧᓂᐋᐧᐤ ᑖᐱᐢᑯᐨ ᑫᑲᐧᐩ ᑳ ᒪᒑᔨᐊᐧᕽ, ᐃᔨᓂᐃᐧᑯᓯᓵᐣ ᐅᐦᒋ.
[23] ᒥᔭᐋᐧᑕᒧᐠ ᐁᑯᐢᐱ, ᒥᓇ ᑲᐧᐢᑫᐧᐸᔨᐅᐠ ᐁ ᒥᔭᐋᐧᑕᒣᐠ: ᐃᐧᔭ ᒫᑎᑲ, ᑭᒑᔨᐊᐧᐣ ᑭ ᑎᐸᐦᐊᒫᑯᐃᐧᓂᐋᐧᐤ ᑭᐦᒋ ᑭᓯᑯᕽ; ᐊᔨᐢ ᐁᑯᓯ ᒣᐧᐦᒋ ᑳ ᑐᑕᐋᐧᔨᐟ ᐅᑕᐃᐧᐋᐧᐊᐧ ᐅᑭᐢᑭᐁᐧᐦᐃᑫᐊᐧ.
[24] ᒫᑲ ᑭ ᑲᑲᐧᑕᑭᓯᓈᐋᐧᐤ ᑭᔭᐋᐧᐤ ᑳ ᐁᐧᔪᑎᓯᔦᐠ, ᒋᑫᒪ ᑭ ᑭ ᐅᑎᓀᓈᐋᐧᐤ ᑭ ᑲᑭᒋᐃᑯᐃᐧᓂᐋᐧᐤ.
[25] ᑭ ᑲᑳᐧᑕᑭᓯᓈᐋᐧᐤ, ᑭᔭᐋᐧᐤ ᒣᑳᐧᐨ ᐊᓄᐦᐨ ᑳ ᑭᐢᐳᔦᐠ: ᒋᑫᒪ ᑭ ᑲ ᓄᑌᑲᑖᓈᐋᐧᐤ. ᑭ ᑲᑳᐧᑕᑭᓯᓈᐋᐧᐤ ᑭᔭᐋᐧᐤ ᒣᑳᐧᐨ ᐊᓄᐦᐨ ᑳ ᐸᐱᔦᐠ: ᒋᑫᒪ ᑭ ᑳ ᑭᓯᓈᑌᔨᑌᓈᐋᐧᐤ ᒥᓇ ᑭ ᑲ ᒫᑐᓈᐋᐧᐤ.
[26] ᑭ ᑲᑲᐧᑕᑭᓯᓈᐋᐧᐤ, ᐃᐢᐱ ᑲᐦᑭᔭᐤ ᐊᔨᓯᔨᓂᐊᐧᐠ ᒪᒥᒋᒥᑯᔦᑲᐧᐃᐧ! ᒋᑫᒪ ᐁᑯᓯ ᒣᐧᐦᒋ ᐅᑕᐃᐧᐋᐧᐊᐧ ᑳ ᑐᑕᐋᐧᔨᐟ ᑭᔭᐢᑭᐃᐧ ᐅᑭᐢᑭᐁᐧᐦᐃᑫᐊᐧ.
[27] ᒫᑲ ᓂᔭ ᑭᐟ ᐃᑎᓈᐋᐧᐤ ᑳ ᐯᐦᑕᒣᐠ, ᓴᑭᐃᑯᐠ ᑭ ᓄᑎᓈᑲᓂᐋᐧᐊᐧᐠ, ᒥᔪ ᑐᑖᑯᐠ ᑳ ᐸᑳᐧᑎᑯᔦᑲᐧᐤ,
[28] ᒥᔪ ᑭᐢᐋᐧᑎᑯᐠ ᐊᓂᑭ ᑳ ᒪᒋ ᑭᐢᐋᐧᑎᑯᔦᑲᐧᐤ, ᐊᔭᒥᐦᐁᐢᑕᒫᑯᐠ ᐊᓂᑭ ᑳ ᒪᒋ ᑐᑖᑯᔦᑲᐧᐤ.
[29] ᐊᓇ ᒥᓇ ᑳ ᐸᑲᒪᐦᐅᐢᐠ ᓇᐸᑌ ᑲᓄᐋᐧᕽ ᐃᔨᓇᒪᐤ ᑫᐧᐢᑭᑌ; ᒥᓇ ᐊᓇ ᑳ ᐅᑎᓇᕽ ᑭᐟ ᐊᑲᐧᓂᐃᐧᐣ ᐁᑳᐃᐧᔭ ᒥᒋᒥᓇᒪᐤ ᑭᐢᑯᑖᑲᐩ.
[30] ᒥᐩ ᑲᐦᑭᔭᐤ ᐊᐃᐧᔭᐠ ᑳ ᓇᑐᑕᒫᐢᐠ; ᒥᓇ ᑳ ᐅᑎᓇᕽ ᑭᐟ ᐊᔪᐃᐧᓂᓴ ᐁᑳᐃᐧᔭ ᒥᓇ ᓇᑐᑕᒪᐤ.
[31] ᒥᓇ ᑳ ᐃᓯ ᐸᑯᓭᔨᒫᔦᑯᐠ ᐊᔨᓯᔨᓂᐊᐧᐠ ᑭᑕ ᐃᑐᑖᑯᔦᑳᐧᐤ, ᐁᑯᓯ ᑭᐢᑕᐋᐧᐤ ᑐᑕᑯᐠ.
[32] ᑭᐢᐱᐣ ᒫᑲ ᑭ ᓴᑭᐊᐋᐧᐊᐧᐠ ᐊᓂᑭ ᑳ ᓴᑭᐃᑯᔦᑲᐧᐤ, ᑫᑲᐧᐩ ᓇᓈᐢᑯᒥᑯᐃᐧᐣ ᐁᔮᔦᐠ? ᐊᐦᐳ ᒪᒋᑎᐢᑲᐠ ᓴᑭᐁᐊᐧᐠ ᐊᓂᐦᐃ ᑳ ᓵᑭᐃᑯᒋᐠ.
[33] ᒥᓇ ᑭᐢᐱᐣ ᑭ ᒥᔪ ᑐᑕᐋᐧᐋᐧᐊᐧᐠ ᑳ ᒥᔪ ᑐᑕᑯᔦᑲᐧᐤ, ᑫᑲᐧᐩ ᓇᓈᐢᑯᒥᑯᐃᐧᐣ ᐁᔮᔦᐠ: ᒋᑫᒪ ᐊᐦᐳ ᐅᒪᒋᑎᐢᑲᐠ ᐃᐧᐢᑕᐋᐧᐤ ᐁᑯᓯ ᑐᑕᒪᐧᐠ.
[34] ᒥᓇ ᑭᐢᐱᐣ ᑭᐟ ᐊᐃᐧᐦᐋᐋᐧᐊᐧᐠ ᐊᓂᑭ ᑳ ᐸᑯᓭᔨᒫᔦᑳᐧᐤ ᑳᐃᐧ ᑭᑕ ᐅᐦᒋ ᐊᔮᔦᐠ, ᑫᑲᐧᐩ ᓇᓈᐢᑯᒥᑯᐃᐧᐣ ᐁᔮᔦᐠ? ᐊᐦᐳ ᐅᒪᒋᑎᐢᑲᐠ ᐊᐃᐧᐦᐁᐊᐧᐠ ᐅᒪᒋᑎᐢᑲ, ᑳᐃᐧ ᑭᑕ ᐊᔮᒋᐠ ᐁᑯᔨᑯᕽ ᒥᓇ.
[35] ᒫᑲ ᓵᑭᐦᐃᐦᑯᐠ ᑳ ᐸᑳᐧᑎᑯᔦᑯᐠ, ᒥᓇ ᒥᔪ ᑐᑕᑯᐠ, ᐁᑯᓯ ᐊᐃᐧᐃᐁᐧᐠ, ᐁᑳ ᐃᐧᑲᐨ ᐁ ᓄᑌᔦᔨᑕᒪᑫᔦᐠ; ᐁᑯᓯ ᑭ ᑎᐸᐦᐊᒫᑯᐃᐧᓂᐋᐧᐤ ᑭᑕ ᑭᐦᒐᔨᐊᐧᐣ, ᐁᑯᓯ ᑭ ᑲ ᐅᑕᐊᐧᓯᒥᓯᒥᑯᐋᐧᐤ ᒪᒪᐁᐧᔭᐢ ᑳ ᐃᐢᐸᑫᔨᑖᑯᓯᐟ; ᐃᐧᔭ ᐁ ᑭᓭᐊᐧᑐᑕᐊᐧᐟ ᑲ ᒥᑕᐁᐧᐢᑭᔨᐟ ᒥᓇ ᑳ ᓇᔦᑖᐋᐧᑎᓯᔨᐟ.
[36] ᑭᑎᒪᑫᔨᒋᑫᐠ, ᑖᐱᐢᑯᐨ ᑯᑖᐃᐧᐋᐧᐤ ᑳ ᐃᓯ ᑭᑎᒪᑫᔨᒋᑫᐟ.
[37] ᒥᓇ ᐁᑳᐃᐧᔭ ᐅᔭᓱᐋᐧᓯᐁᐧᐠ, ᐁᑯᓯ ᓇᒪᐃᐧᔭ ᑭ ᑲ ᐅᔭᓱᐋᐧᑎᑲᐃᐧᓈᐋᐧᐤ: ᒥᓇ ᐁᑳᐃᐧᔭ ᓇᓂᐳᒥᐁᐧᐠ, ᐁᑯᓯ ᓇᒪᐃᐧᔭ ᑭ ᑲ ᓇᓂᐳᒥᑲᐃᐧᓈᐋᐧᐤ: ᐳᓀᔨᑕᒪᑫᐠ, ᐁᑯᓯ ᑭ ᑲ ᐳᓀᔨᑕᒫᑲᐃᐧᓈᐋᐧᐤ
[38] ᒣᑭᐠ, ᐁᑯᓯ ᑭ ᑲ ᒥᔨᑲᐃᐧᓈᐋᐧᐤ; ᐁ ᒧᐢᑭᓀᐠ ᒥᑐᓂ ᑎᐸᐃᑲᐣ, ᐁ ᒪᒫᑯᓇᒥᕽ, ᐁ ᐊᓴᓂᐸᔨᑖᕽ, ᐁ ᐸᓯᒋᐸᔨᐠ, ᑭ ᑲ ᒥᔨᑯᐋᐧᐊᐧᐠ ᐊᔨᓯᔨᓂᐊᐧᐠ. ᒋᑫᒪ ᐊᓂᒪ ᑎᐸᐃᑲᐣ ᑫ ᐊᐸᒋᑕᔦᐠ ᐁᐊᐧᑲᐧᓂᒪ ᑫ ᐊᐸᒋᑕᕽ ᑭᔭᐋᐧᐤ ᐅᐦᒋ.
[39] ᐁᑯᓯ ᒥᓇ ᑭ ᐃᐧᐦᑕᒪᐁᐧᐤ ᐋᐁᐧᒋᑲᐣ, ᐁᑳ ᑳ ᐋᐧᐱᐟ ᒋ ᑭᑕ ᑭ ᑭᐢᑭᓄᑕᐁᐤ ᐁᑳ ᑳ ᐋᐧᐱᔨᐟ? ᓇᒪ ᒋ ᐁᓯ ᓂᓯᒋᐠ ᑭᑕ ᐱᒋᐸᔨᐊᐧᐠ ᐊᐧᑎᐠ?
[40] ᑭᐢᑭᓄᐦᐊᒪᐋᐧᑲᐣ ᓇᒪᐃᐧᔭ ᐊᔨᐊᐧᐠ ᐃᑌᔨᑖᑯᓯᐤ ᐃᐢᐱᐨ ᐅᑭᐢᑭᓄᐦᐊᒫᑫᒪ: ᒫᑲ ᑲᐦᑭᔭᐤ ᐊᐃᐧᔭᐠ ᑭᓯᐃᑯᐃᐧᓯᒋ ᑭᑕ ᐃᓯ ᐊᔮᐤ ᑖᐱᐢᑯᐨ ᐅᑭᐢᑭᓄᐦᐊᒫᑫᒪ.
[41] ᒥᓇ ᑖᓀᑭ ᑳ ᐱᓯᐢᑳᐸᑕᒪᐧᐟ ᐱᓯᓂᐃᐧᐣ ᑳ ᐊᔮᔨᐠ ᑭᒋᐋᐧᑦ ᐅᐢᑭᓯᑯᕽ ᐁᑯᓯ ᐁᑳ ᐁ ᓇᓇᑲᑕᐁᐧᔨᑕᒪᐣ ᒥᓯ ᒥᐢᑎᐠ ᑳ ᐊᔮᐠ ᑎᐱᔭᐁᐧ ᑭᐢᑭᓯᑯᕽ?
[42] ᐊᐦᐳ ᑖᓂᓯ ᑫ ᐃᓯ ᑲᐢᑭᑖᔭᐣ ᑭᑕ ᐃᑕᐟ ᑭᒋᐋᐧᑦ, ᓂᒋᐋᐧ, ᒪᐦᑎ ᓂ ᑲ ᐊᐧᔭᐃᐧᐁᐧᐱᓀᐣ ᑲ ᐱᓯᓂᐃᑯᔭᐣ, ᐁᑳᐧ ᑭᔭ ᑎᐱᔭᐁᐧ ᐁᑳ ᐁ ᐋᐧᐸᐦᑕᒪᐣ ᒥᓯ ᒥᐢᑎᐠ ᑭᐢᑭᓯᑯᕽ ᑳ ᐊᔭᐠ? ᑭᔭ ᑳ ᐊᐧᔦᓯᐃᓱᔭᐣ, ᐱᑕ ᐊᐧᔭᐃᐧᐁᐧᐱᓇ ᒥᓯ ᒥᐢᑎᐠ ᑳ ᐊᔮᐠ ᑎᐱᔭᐁᐧ ᑭᐢᑭᓯᑯᕽ, ᐁᑯᓯ ᑭ ᑳ ᐸᑲᑭᓀᐣ ᑭᑕ ᐊᐧᔭᐃᐧᐁᐧᐱᓇᒪᐣ ᑳ ᐱᓯᓂᐃᑯᐟ ᑭᒋᐋᐧᑦ.
[43] ᒋᑫᒪ ᐁ ᒥᔪᓯᐟ ᒥᐢᑎᐠ ᓇᒪᐃᐧᔭ ᐅᐱᑭᑕᐤ ᒪᒋ ᒥᓂᓴ; ᒥᓇ ᓇᒪᐃᐧᔭ ᒪᒋ ᒥᐢᑎᐠ ᐅᐱᑭᑕᐤ ᒥᔪ ᒥᓂᓴ.
[44] ᒋᑫᒪ ᑳ ᐃᑕᓯᐟ ᒥᐢᑎᐠ ᑭᐢᑫᔨᑖᑯᓯᐤ ᐁ ᐃᓯ ᒥᓂᓯᐃᐧᐟ ᐅᐦᒋ. ᐃᐧᔭ ᒥᐢᑎᑯᒥᓈᓈᑎᑯᕽ ᐅᐦᒋ ᓇᒪᐃᐧᔭ ᐊᔨᓯᔨᓂᐊᐧᐠ ᒫᐊᐧᒋᐁᐊᐧᐠ ᑭᐦᒋ ᓱᒥᓇ, ᐊᐦᐳ ᐅᑭᓂᐋᐧᐦᑎᑲᐧᕽ ᓱᒥᓂᓴ.
[45] ᐁ ᒥᔮᐧᑎᓯᐟ ᐊᔨᓯᔨᓂᐤ ᑳ ᐃᓯ ᒥᔪ ᐁᐧᔪᑕᓂᔨᐠ ᐅᑌᐦ ᓄᑯᑕᐤ ᐊᓂᒪ ᑳ ᒥᔮᐧᓯᓂᔨᐠ; ᐁᑯᓯ ᒥᓇ ᐁ ᒪᒑᔨᐃᐧᐟ ᐊᔨᓯᔨᓂᐤ ᑳ ᐃᓯ ᒪᒋ ᐁᐧᔪᑕᓂᔨᐠ ᐅᑌᐦ ᓄᑯᑐᐤ ᐊᓂᒪ ᑳ ᒪᒐᔨᐊᐧᓂᔨᐠ: ᐃᐧᔭ ᑳ ᐃᓯ ᐁᐧᔪᒋ ᐊᔮᔨᐠ ᐅᑌᐦᐃᕽ ᐃᓯ ᐱᑭᐢᑫᐧᒪᑲᓂᔨᐤ ᐅᑐᐣ.
[46] ᒥᓇ ᒫᑲ ᑖᓀᑭ ᑳ ᑎᐯᔨᐦᒋᑫᔭᐣ, ᑳ ᑎᐯᔨᐦᒋᑫᔭᐣ, ᑳ ᐃᓯᔦᐠ, ᐁᑯᓯ ᐁᑳ ᐁ ᑐᑕᒣᐠ ᐊᓂᐦᐃ ᑫᑲᐧᔭ ᑳ ᐃᑌᐧᔮᐣ?
[47] ᑲᐦᑭᔭᐤ ᑳ ᐯ ᓇᓯᐟ, ᒥᓇ ᑳ ᐯᐦᑕᕽ ᓂ ᐱᑭᐢᑫᐧᐃᐧᓇ, ᒥᓇ ᑳ ᑐᑕᕽ, ᑭ ᑲ ᐋᐧᐸᐦᑕᐃᑎᓈᐋᐧᐤ ᐊᐁᐧᓂᐃ ᓀᓇᐢᐱᑕᐋᐧᐟ:
[48] ᓇᓈᐢᐱᑕᐁᐧᐤ ᐊᔨᓯᔨᓂᐊᐧ ᑳ ᐅᓯᑖᔨᐟ ᐊᐧᐢᑲᐦᐃᑲᐣ, ᐁ ᑭ ᒧᓇᐃᑫᐟ ᒥᓇ ᐊᑖᒥᕽ ᐁ ᑭ ᐃᑖᑎᑫᐟ, ᐁ ᑭ ᐊᐢᑖᐟ ᐊᓂᒪ ᐅᔭᐢᒋᑫᐃᐧᐣ ᑭᐢᑕᐱᐢᑳᕽ; ᐁᑯᓯ ᐃᐢᐱ ᑳ ᐃᐢᑭᐯᔨᐠ, ᐊᓂᒪ ᑳ ᐱᒥᒋᐊᐧᐠ ᑭ ᐸᑲᒥᐸᔨᐤ ᐁᑯᑕ ᐋᐧᐢᑳᐦᐃᑲᐧᓂᕽ, ᓇᒪᐃᐧᔭ ᒫᑲ ᑭ ᐊᐧᐢᑲᐃᐧᐸᔨᐤ: ᒋᑫᒪ ᑭᐢᑖᐱᐢᑳᕽ ᐁ ᑭ ᒋᒪᑖᓂᐊᐧᕽ.
[49] ᒫᑲ ᐊᓇ ᑳ ᐯᐦᑕᕽ, ᐁᑯᓯ ᐁᑳ ᑳ ᑐᑕᕽ, ᓇᓈᐢᐱᑕᐁᐧᐤ ᐊᔨᓯᔨᓂᐊᐧ ᐊᓯᐢᑭᕽ ᑳ ᐅᓯᑕᐟ ᐊᐧᐢᑲᐦᐃᑲᐣ ᐁᑳ ᐁ ᐅᔭᐢᒋᑲᑕᕽ; ᐁᑯᓯ ᐁᑯᑕ ᐁ ᐸᑲᒥᐸᔨᐠ ᑳ ᐱᒥᒋᐊᐧᕽ, ᓭᒫᐠ ᑭ ᐸᐦᑭᐦᑎᐣ; ᒥᑐᓂ ᒫᑲ ᐁ ᑭ ᓂᓯᐊᐧᓈᑕᕽ.