[1] ᒋᓴᐢ ᒫᑲ ᑭ ᐱᐦᑐᑫᐤ ᒥᓇ ᐁ ᑭ ᐱᒥ ᓵᐳᐢᑲᕽ ᒉᕒᐃᑯ.
[2] ᒫᑎᑲ ᒫᑲ, ᑭ ᐊᔮᐤ ᐁᑯᑕ ᓈᐯᐤ ᓴᑭᐊᐢ; ᐁ ᐃᓯᔨᐦᑳᓱᐟ, ᐁ ᓂᑲᓇᑭᒥᐦᐟ ᐊᓂᐦᐃ ᐸᑊᓬᐃᑲᓇ, ᒥᓇ ᐁ ᐁᐧᔪᑎᓯᐟ.
[3] ᐁᑯᓯ ᑭ ᑲᑫᐧ ᐋᐧᐸᒣᐤ ᒋᓴᓴ ᐊᐁᐧᓈᓂᐃ; ᒫᑲ ᓇᒪᐃᐧᔭ ᑭ ᑲᐢᑭᑕᐤ ᐁ ᓯᑎᐢᑳᑐᐃᐧᐟ ᐊᔨᐢ ᑭ ᑕᐸᒋᑳᐸᐃᐧᐤ.
[4] ᑭ ᓂᑲᓂᐸᑕᐤ ᒫᑲ, ᐁᑯᓯ ᐁ ᑭ ᑭᒐᑯᓯᐸᑖᐟ ᓯᑲᒧᕒ ᒥᐢᑎᑯᕽ ᑭᑕ ᐋᐧᐸᒫᐟ, ᐃᐧᔭ ᐁᑯᑕ ᑭᑕ ᐊᑎ ᐱᒧᐦᑌᔨᐟ.
[5] ᐃᐢᐱ ᒫᑲ ᒋᓴᐢ ᐱᔦᑕᑯᓯᕽ ᐁᑯᑕ, ᑭ ᑕᐢᑕᓵᐱᐤ, ᐁ ᑭ ᐋᐧᐸᒫᐟ ᒫᑲ, ᐁᑯᓯ ᑭ ᐃᑌᐤ, ᓵᑭᐊᐢ, ᑭᔨᐸ, ᐯ ᓂᑕᑯᓯ, ᒋᑫᒫ ᐊᓄᐦᐨ ᑳ ᑭᓯᑳᐠ ᓂ ᑲ ᑲᐯᓯᐣ ᑭᑭᕽ.
[6] ᑭ ᑭᔨᐱ ᓂᑕᑯᓯᐤ ᒫᑲ, ᒥᓇ ᒥᔭᐋᐧᑕᒧᐃᐧᓂᕽ ᐁ ᑭ ᐱᑐᑲᐋᐟ.
[7] ᐃᐢᐱ ᒫᑲ ᐃᐧᔮᐸᐦᑕᑭᐠ, ᑲᐦᑭᔭᐤ ᑭ ᓇᔦᑖᐁᐧᔨᑕᒪᐧᐠ, ᐁ ᐃᑌᐧᒋᐠ, ᐱᑐᑲᐁᐧᐤ ᑭᑕ ᑲᐯᓯᑐᑕᐋᐧᐟ ᐊᔨᓯᔨᓂᐊᐧ ᐁ ᒪᒑᑎᓯᔨᐟ.
[8] ᓵᑭᐊᐢ ᒫᑲ ᑭ ᓂᐸᐃᐧᐤ, ᐁ ᑭ ᐃᑖᐟ ᑳ ᑎᐯᔨᐦᒋᑫᔨᐟ, ᒋᐢᐟ, ᑌᐯᔨᐦᒋᑫᔭᐣ, ᐋᐱᑕᐤ ᓂ ᑎᐱᔭᐁᐧᐃᐧᓯᐃᐧᓇ ᓂ ᒥᔮᐊᐧᐠ ᐅᑭᑎᒫᑭᓴᐠ; ᑭᐢᐱᐣ ᒫᑲ ᓂ ᓇᔦᑖᐃᐧ ᑎᐸᐦᐃᑫᐋᐤ ᐊᐃᐧᔭᐠ ᐊᔨᓯᔨᓂᐤ, ᓀᐋᐧᐤ ᐊᐊᐧᓯᒣ ᑲᐃᐧ ᓂ ᒥᔮᐤ.
[9] ᐁᑯᓯ ᒋᓴᐢ ᑭ ᐃᑌᐤ, ᐊᓄᐦᐨ ᑳ ᑭᓯᑳᐠ ᐱᒫᒋᐦᐃᐁᐧᐃᐧᐣ ᐯ ᑕᑯᓯᓄᒪᑲᐣ ᐅᑕ ᐋᐧᐢᑳᐦᐃᑲᓂᕽ, ᒋᑫᒪ ᐃᐧᐢᑕ ᐁ ᐅᑯᓯᓯᒥᑯᐟ ᐁᑊᕒᐁᐊᒪ.
[10] ᒋᑫᒪ ᐃᔨᓂᐃᐧᑯᓯᓵᐣ ᑭ ᐯ ᐃᑐᐦᑌᐤ ᑭᑕ ᓇᓈᑐᓇᐋᐧᐟ ᒥᓇ ᑭᑕ ᐱᒫᒋᐋᐧᐟ ᐊᓂᐦᐃ ᑳ ᐊᐧᓂᐦᐅᔨᐟ.
[11] ᒣᑳᐧᐨ ᒫᑲ ᐁ ᐯᐦᑕᐦᑭᐠ ᐅᐦᐃ ᑭ ᐊᑎ ᑕᑯ ᐃᐧᐦᑕᒪᐁᐧᐤ ᐊᐁᐧᒋᑲᐣ, ᒋᑫᒪ ᑭᓯᐊᐧᐠ ᐁ ᐊᑎ ᐊᔮᐟ ᒉᕒᐅᓴᓬᐊᒥᕽ, ᒥᓇ ᒋᑫᒪ ᐁ ᑭ ᐃᑌᔨᑕᐦᑭᐠ ᐅᐟ ᐅᑌᓇᐃᐧᐃᐧᓂᔨᐤ ᑭᓭᒪᓂᑐᐊᐧ ᓭᒫᐠ ᑭᑕ ᓄᑲᐧᓂᔨᐠ.
[12] ᐁᐊᐧᑯ ᐅᐦᒋ ᑭ ᐃᑌᐤ, ᐯᔭᐠ ᐅᑭᒫᐤ ᐋᐧᔭᐤ ᐊᐢᑭᕽ ᑭ ᐃᑐᐦᑌᐤ, ᑭᑕ ᐅᑎᓇᒫᓱᐟ ᑭᐦᒋ ᐅᑭᒫᐃᐧᐃᐧᐣ, ᐁᑯᓯ ᒥᓇ ᑭᑕ ᐯ ᑭᐁᐧᐟ.
[13] ᑭ ᓇᑐᒣᐤ ᒫᑲ ᐅᐟ ᐊᑐᐢᑫᔮᑲᓇ ᒥᑖᑕᐟ ᐁ ᐃᐦᑕᓯᔨᐟ, ᐁ ᐸᑭᑎᓇᒪᐋᐧᐟ ᒥᑖᑕᐟ ᑭᐦᒋ ᓱᓂᔮᐊᐧ, ᐁᑯᓯ ᐁ ᑭ ᐃᑖᐟ, ᐊᑖᐋᐧᑫᐠ ᐃᔨᑯᕽ ᑭᑕ ᑕᑯᓯᓂᔮᐣ.
[14] ᒫᑲ ᐅᐟ ᐊᔨᓯᔨᓂᒪ ᑭ ᐸᑳᐧᑎᐠ, ᐁᑯᓯ ᐁ ᑭ ᐃᓯᑎᓴᐦᐊᒪᐊᐧᒋᐠ, ᐁ ᐃᑖᒋᐠ, ᓇᒪᐃᐧᔭ ᓂ ᓇᑕᐁᐧᔨᒫᓈᐣ ᐊᐊᐧ ᓈᐯᐤ ᑭᑕ ᑎᐯᔨᒥᑯᔮᕽ.
[15] ᑭ ᐅᑎᐦᒋᐸᔨᐤ ᒫᑲ, ᐃᐢᐱ ᑳ ᐯ ᑭᐁᐧᐟ, ᐁ ᑭ ᐅᑎᓇᕽ ᑭᐦᒋ ᐅᑭᒫᐃᐧᐃᐧᐣ, ᑭ ᐃᑕᓱᐁᐧᐤ ᐅᐦᐃ ᐊᑐᐢᑫᔮᑲᓇ ᑳ ᑭ ᒥᔭᐟ ᓱᓂᔮᐊᐧ ᑭᑕ ᓇᑐᒥᒥᐟ, ᑭᑕ ᑭᐢᑫᔨᑕᕽ ᑖᓂᔨᑯᕽ ᑳ ᑲᐢᑭᑖᔨᐟ ᐅᐟ ᐊᑖᐁᐧᐃᐧᓂᐋᐧᐤ ᐅᐦᒋ.
[16] ᐁᑯᓯ ᐊᓂᐦᐃ ᓂᐢᑕᑦ ᑭ ᐯ ᓈᑎᐠ, ᐁ ᐃᑌᐧᔨᐟ, ᑌᐯᔨᐦᒋᑫᔭᐣ, ᑭ ᑭᐦᒋ ᓱᓂᔮᑦ ᒥᑖᑕᐟ ᑭᐦᒋ ᓱᓂᔮᐊᐧ ᐊᐊᐧᓯᒣ ᑭ ᐱᑯᐁᐤ.
[17] ᐁᑯᓯ ᑭ ᐃᑌᐤ, ᑭ ᑭ ᒥᔪ ᑐᑌᐣ, ᑭᔭ ᒥᔪ ᐊᑐᐢᑫᔮᑲᐣ: ᒋᑫᒪ ᓇᐢᐱᐨ ᐊᐱᓯᐢ ᐁ ᐃᑌᔨᑕᑲᐧᕽ ᑭ ᑭ ᐊᔮᑳᐧᒥᓯᑲᑌᐣ, ᑎᐯᔨᑕ ᒥᑖᑕᐟ ᐅᑌᓇᐊᐧ.
[18] ᐁᑯᓯ ᐊᓇ ᐊᐢᑯᐨ ᑭ ᐯ ᐃᑐᐦᑌᐤ, ᐁ ᐃᑌᐧᐟ, ᑌᐯᔨᐦᒋᑫᔭᐣ, ᑭ ᑭᐦᒋ ᓱᓂᔮᑦ, ᓂᔭᓇᐣ ᑭᐦᒋ ᓱᓂᔮᐊᐧ ᑭ ᐱᑯᐁᐤ.
[19] ᑭ ᐃᑌᐤ ᒫᑲ ᐊᓂᐦᐃ ᒥᓇ, ᑎᐯᔨᑕ ᑭᐢᑕ ᓂᔮᓇᐣ ᐅᑌᓇᐊᐧ.
[20] ᑯᑕᐠ ᒫᑲ ᑭ ᐯ ᐃᑐᐦᑌᐤ, ᐁ ᐃᑌᐧᐟ, ᑌᐯᔨᐦᒋᑫᔭᐣ, ᒋᐢᐟ, ᐊᐊᐧ ᐃᑕ ᑭ ᑭᐦᒋ ᓱᓂᔮᑦ, ᑳ ᑭ ᑲᓇᐁᐧᔨᒪᐠ ᐋᐧᐱᐢᑫᑭᓄᕽ ᐁ ᑭ ᐁᐧᐁᐧᑭᓇᐠ;
[21] ᐊᔨᐢ ᑭ ᑭ ᑯᐢᑎᑎᐣ ᒋᑫᒪ ᐁ ᐋᔨᒥᓯᔭᐣ; ᑭ ᒧᓴᑭᓀᐣ ᐊᓂᒪ ᐁᑳ ᐁ ᑭ ᐸᑭᑎᓇᒪᐣ, ᒥᓇ ᑭ ᒫᐊᐧᒋᑖᐣ ᐊᓂᒪ ᐁᑳ ᑳ ᑭ ᑭᐢᑎᑳᑕᒪᐣ.
[22] ᑭ ᐃᑌᐤ ᒫᑲ, ᑫᐦᒋᐋᐧᐠ ᑭᑐᓂᕽ ᐅᐦᒋ ᑭ ᑲ ᐅᔭᓱᐋᐧᑎᑎᐣ, ᑭᔭ ᒪᒋ ᐊᑐᐢᑫᔮᑲᐣ, ᑭ ᑭ ᑭᐢᑫᔨᑌᐣ ᐁ ᐋᔨᒥᓯᔮᐣ, ᐁ ᒧᓴᑭᓇᒫᐣ ᐊᓂᒪ ᐁᑳ ᑳ ᑭ ᐸᑭᑎᓇᒫᐣ, ᒥᓇ ᐁ ᒫᐊᐧᒋᑖᔮᐣ ᐊᓂᒪ ᐁᑳ ᑳ ᑭ ᑭᐢᑎᑳᑕᒫᐣ;
[23] ᑖᓀᑭ ᒫᑲ ᐁᑳ ᑳ ᑭ ᐸᑭᑎᓇᐟ ᓂ ᓱᓂᔮᑦ ᓱᓂᔮᐃᐧᑲᒥᑯᕽ, ᐁᑯᓯ ᐃᐢᐱ ᐁ ᑕᑯᓯᓂᔮᐣ ᓂ ᑲ ᑭ ᓇᑕᐁᐧᔨᒫᐤ ᐊᓯᒋ ᐊᓂᒪ ᐃᔨᑯᕽ ᐁᓯ ᐱᑯᒋᑫᐟ?
[24] ᑭ ᐃᑌᐤ ᒫᑲ ᐊᓂᐦᐃ ᐁᑯᑕ ᑳ ᓂᐸᐃᐧᔨᐟ, ᐅᑎᓂᒥᕽ ᐊᓂᐦᐃ ᑭᐦᒋ ᓱᓂᔮᐊᐧ, ᐁᑯᓯ ᒥᔨᕽ ᐊᓇ ᒥᑖᑕᐟ ᑭᐦᒋ ᓱᓂᔮᐊᐧ ᑳ ᐊᔮᐋᐧᐟ.
[25] ᐁᑯᓯ ᒫᑲ ᑭ ᐃᑎᐠ, ᑌᐯᔨᐦᒋᑫᔭᐣ, ᒥᑖᑕᐦᐟ ᑭᐦᒋ ᓱᓂᔮᐊᐧ ᐊᔮᐁᐧᐤ.
[26] ᑭᐟ ᐃᑎᓈᐋᐧᐤ, ᑲᐦᑭᔭᐤ ᐊᐃᐧᔭᐠ ᑳ ᐊᔮᐟ ᑭᑕ ᒥᔮᐤ; ᒫᑲ ᐊᓇ ᐁᑳ ᑳ ᐊᔮᐟ, ᑭᑕ ᒪᐢᑲᒫᐤ ᐊᐦᐳ ᐊᓂᒪ ᑳ ᐊᔮᐟ.
[27] ᒫᑲ ᐃᐧᔭ ᐅᑭ ᓂ ᓄᑎᓈᑲᓇᐠ, ᐁᑳ ᑳ ᑭ ᓇᑕᐁᐧᔨᑕᐦᑭᐠ ᑭᑕ ᑎᐯᔨᒪᑭᐠ, ᐅᑕ ᐯᓯᑯᐠ, ᒥᓇ ᓂᐸᐃᑯᐠ ᐁ ᑲᓇᐋᐧᐸᒪᑭᐠ.
[28] ᐃᐢᐱ ᒫᑲ ᐅᒪ ᑳ ᐃᓯ ᐱᑭᐢᑫᐧᐟ, ᑭ ᓂᑲᓄᑌᐤ, ᒉᕒᐅᓴᓬᐊᒥᕽ ᐁ ᐊᑎ ᐃᑐᐦᑌᐟ.
[29] ᑭ ᐊᔨᑭᐣ ᒫᑲ, ᒋᑭ ᐁ ᐊᑎ ᐅᑎᑕᕽ ᐯᐦᐟᐯᒋ ᒥᓇ ᐯᑕᓂ, ᐊᓂᑕ ᐊᐧᒋᕽ ᐊᓬᐃᑊᐢ ᑳ ᐃᓯᔨᐦᑳᑌᐠ, ᑭ ᓯᐯᐧᑎᓴᐁᐧᐤ ᓂᓱ ᐅ ᑭᐢᑭᓄᐦᐊᒪᐋᐧᑲᓇ,
[30] ᐁ ᐃᑖᐟ, ᐃᑐᐦᑌᐠ ᑭᐢᑕᐱᐃᐧᓂᕽ ᑎᐱᐢᑯᐨ ᑳ ᐊᔮᐠ; ᐁᑯᑕ ᐃᐢᐱ ᐊᑎ ᐱᐦᑐᑫᔦᑯ ᑭ ᑲ ᒥᐢᑲᐋᐧᐋᐧᐤ ᒥᐢᑕᑎᒧᓯᐢ ᐁ ᓴᑲᐱᓱᐟ, ᐁᑳ ᐃᐧᑲᐨ ᒉᐢᑲᐧ ᓈᐯᐤ ᐁ ᐅᐦᒋ ᑌᑕᐱᐟ: ᐊᐱᑯᓂᕽ, ᐁᑯᓯ ᐯᓯᕽ.
[31] ᑭᐢᐱᐣ ᒫᑲ ᐊᐃᐧᔭᐠ ᑲᑫᐧᒋᒥᑯᔦᑯ, ᑖᓀᑭ ᑳ ᐋᐱᑯᓈᔦᐠ? ᐅᒥᓯ ᑭ ᑲ ᐃᑕᐋᐧᐤ, ᑳ ᑎᐯᔨᐦᒋᑫᐟ ᓇᑕᐁᐧᔨᒣᐤ.
[32] ᐊᓂᑭ ᒫᑲ ᑳ ᑭ ᐃᓯᑎᓴᐦᐅᐦᒋᐠ ᑭ ᓯᐯᐧᑌᐊᐧᐠ, ᐁᑯᓯ ᐁ ᑭ ᒥᐢᑲᐦᑭᐠ ᒣᐧᐦᒋ ᐊᓂᒪ ᑳ ᑭ ᐃᓯ ᐃᐧᐦᑕᒫᑯᒋᐠ.
[33] ᒣᑳᐧᐨ ᒫᑲ ᐁ ᐋᐱᑯᓈᒋᐠ ᒥᐢᑕᑎᒧᓯᓴ, ᑌᐯᔨᒫᔨᐟ ᑭ ᐃᑎᑲᐧᐠ, ᑖᓀᑭ ᐁᐧᒋ ᐊᐱᑯᓈᔦᐠ ᒥᐢᑕᑎᒧᓯᐢ?
[34] ᑭ ᐃᑌᐊᐧᐠ ᒫᑲ, ᑳ ᑎᐯᔨᐦᒋᑫᐟ, ᓇᑕᐁᐧᔨᒣᐤ.
[35] ᐁᑯᓯ ᑭ ᐯ ᐃᑐᐦᑕᑕᒪᐁᐧᐊᐧᐠ ᒋᓴᓴ: ᑭ ᐊᐢᐱ ᐁᐧᐱᓇᒪᐧᐠ ᒫᑲ ᐅᐢᑯᑖᑳᐋᐧᐊᐧ, ᒥᓇ ᐁ ᑭ ᑌᑕᐱᐋᒋᐠ ᒋᓴᓴ:
[36] ᐁ ᐊᑎ ᐃᑐᐦᑌᔨᐟ ᒫᑲ, ᑭ ᑕᐢᐁᐧᑲᐢᑖᐊᐧᐠ ᐅᐢᑯᑖᑳᐋᐧᐊᐧ ᒣᐢᑲᓈᕽ.
[37] ᐃᐢᐱ ᒫᑲ ᐁᑲᐧ ᒋᑭ ᐁ ᐊᑎ ᐊᔮᔨᐟ, ᐊᓂᑕ ᐁ ᓂᑕᒋᐁᐧᔮᐠ ᐊᓬᐃᑊᐢ ᐊᐧᒋ, ᑲᐦᑭᔭᐤ ᐁ ᐅᓵᒣᔭᑎᒋᐠ ᑭᐢᑭᓄᐦᐊᒪᐋᐧᑲᓇᐠ ᐁ ᒪᒪᐦᑖᑯᓯᒋᐠ ᑭ ᒫᒋ ᒪᒥᒋᒣᐊᐧᐠ ᑭᓭᒪᓂᑐᐊᐧ ᐁ ᑭᓯᐁᐧᒋᐠ ᑲᐦᑭᔭᐤ ᐊᓂᐦᐃ ᑭᐦᒋ ᐊᑐᐢᑫᐃᐧᓇ ᐅᐦᒋ ᑳ ᑭ ᐋᐧᐸᐦᑕᐦᑭᐠ;
[38] ᐁ ᐃᑌᐧᒋᐠ, ᑭᑕ ᒥᔪᑭᐢᐋᐧᑕᐤ ᑭᐦᒋ ᐅᑭᒫᐤ ᑳ ᐯ ᐃᑐᐦᑌᐟ ᐅ ᐃᐧᔪᐃᐧᓂᔨᕽ ᑳ ᑎᐯᔨᐦᒋᑫᔨᐟ; ᐯᔭᑕᑫᔨᒧᐃᐧᐣ ᑭᐦᒋ ᑭᓯᑯᕽ, ᒥᓇ ᒪᒪᐦᑖᑯᓯᐃᐧᐣ ᒫᒪᐁᐧᔭᐢ ᐃᐢᐱᒥᕽ.
[39] ᐁᑯᓯ ᐋᑎᐦᐟ ᐹᕒᐊᓯᐊᐧ ᒣᑲᐧ ᐊᔨᓯᔨᓂᓈᕽ ᐅᐦᒋ ᑭ ᐃᑎᐠ, ᐅᑭᐢᑭᓄᐦᐊᒫᑫᐤ, ᑭᑕᐦᐊᒪᐃᐧᐠ ᑭ ᑭᐢᑭᓄᐦᐊᒪᐋᐧᑲᓇᐠ.
[40] ᐁ ᓇᐢᑫᐧᐊᐧᓯᒫᐟ ᒫᑲ ᑭ ᐃᑌᐤ, ᑭ ᐃᐧᐦᑕᒫᑎᓈᐋᐧᐤ, ᑭᐢᐱᐣ ᐅᑭ ᑭᐱᑐᐁᐧᒋᐠ, ᐊᓯᓂᔭᐠ ᐅ ᑲ ᐯᐦᑖᑯᓯᑖᐋᐧᐤ.
[41] ᐁᑯᓯ ᐃᐢᐱ ᒋᑭ ᐁ ᐯ ᐊᔮᐟ, ᑭ ᐋᐧᐸᐦᑕᑦ ᐅᑌᓇᐤ, ᐁ ᑭ ᐅᒋᑳᐋᐧᐱᐟ ᒫᑲ, ᐁ ᐃᑌᐧᐟ,
[42] ᑭᐢᐱᐣ ᑭ ᑭᐢᑫᔨᑕᒧᐊᐧᓀ ᐊᓄᐦᐨ ᑳ ᑭᓯᑳᐠ, ᑭᔭ ᐅᑎ, ᐊᓂᐦᐃ ᐯᔭᑕᑫᔨᒧᐃᐧᓂᕽ ᐁ ᐃᓯ ᐊᑐᐢᑫᒪᑲᑭ? ᒫᑲ ᐁᑲᐧ ᑳᒋᑲᑌᐊᐧ ᑭᐢᑭᓯᑯᕽ ᐅᐦᒋ.
[43] ᒋᑫᒪ ᐊᓂᐦᐃ ᑭᓯᑳᐊᐧ ᑭ ᑲ ᐅᑎᐦᑎᑯᐣ, ᐃᐢᐱ ᑳ ᐸᑳᐧᑎᐢᑭᐠ ᑫ ᐋᐧᐢᑳ ᒣᓂᑫᑲᑖᐢᑭᐠ, ᒥᓇ ᑫ ᐋᐧᐢᑳᐢᑳᐢᑭᐠ, ᑭᑕ ᑭᐳᑌᐁᐧᐢᑳᐢᑭᐠ, ᒥᓯᐁᐧ ᐃᑌ ᐅᐦᒋ,
[44] ᐁᑯᓯ ᑭ ᑲ ᓂᒋᐁᐧᐱᓂᑲᐧᐠ ᐊᐢᑭᕽ ᐃᓯ; ᑭᐟ ᐊᐋᐧᓯᒥᓴ ᒥᓇ ᐱᒑᔨᕽ: ᓇᒪᐃᐧᔭ ᒫᑲ ᐯᔭᐠ ᐊᓯᓂᔭ ᑭ ᑲ ᓇᑲᑕᒫᑲᐧᐠ ᑭᑕ ᑌᑖᐱᐢᑭᓯᓂᔨᐟ ᑯᑕᑲ; ᒋᑫᒫ ᐁᑳ ᐁ ᑭᐢᑫᔨᑕᒪᐣ ᐃᑕ ᐊᓂᒪ ᐁ ᐯ ᓇᑕᐋᐧᐯᓈᑲᐃᐧᔭᐣ.
[45] ᐁᑯᓯ ᑭ ᐱᐦᑐᑫᐤ ᑭᐦᒋ ᐊᔭᒥᐦᐁᐃᐧᑲᒥᑯᕽ, ᐁ ᑭ ᒫᒋ ᐊᐧᔭᐃᐧᐁᐧᐱᓈᐟ ᐊᓂᐦᐃ ᑳ ᐊᑖᑐᔨᐟ,
[46] ᐁ ᐃᑖᐟ, ᐃᑕᓯᓇᐦᐃᑳᑌᐤ, ᓂ ᐋᐧᐢᑳᐦᐃᑲᐣ ᒫᑲ, ᑭᑕ ᐊᔭᒥᐦᐁᐃᐧ ᐋᐧᐢᑳᐦᐃᑲᓂᐊᐧᐣ: ᐁᑯᓯ ᑭᒧᑎᐢᑲᐠ ᑭᑕ ᐅ ᐊᐧᑎᒋᐠ ᑭ ᑭ ᐃᓯᑖᓈᐋᐧᐤ.
[47] ᑕᐦᑐ ᑭᓯᑳᐤ ᒫᑲ ᑭ ᑭᐢᑭᓄᐦᐊᒫᑫᐤ ᑭᐦᒋ ᐊᔭᒥᐦᐁᐃᐧᑲᒥᑯᕽ. ᑭᐦᒋ ᐊᔭᒥᐦᐁᐃᐧᔨᓂᐊᐧᐠ ᒫᑲ ᐊᓯᒋ ᒪᓯᓇᐦᐃᑫᐃᐧᔨᓂᐊᐧᐠ ᒥᓇ ᑳ ᓂᑳᓀᔨᑖᑯᓯᒋᐠ ᐊᔨᓯᔨᓂᐊᐧᐠ ᑭ ᑲᑫᐧ ᓂᓯᐃᐧᓈᒋᐁᐊᐧᐠ:
[48] ᓇᒪᐃᐧᔭ ᒫᑲ ᑭ ᒥᐢᑲᒪᐧᐠ ᐊᓂᒪ ᑫ ᐃᑐᑕᐦᑭᐠ; ᒋᑫᒪ ᑲᐦᑭᔭᐤ ᐊᔨᓯᔨᓂᐊᐧ ᑭ ᐊᑲᒣᔨᒧᔨᐊᐧ, ᐁ ᐃᐧ ᓇᑐᑖᑯᐟ.