[1] ᑭ ᐊᔨᑭᐣ ᒫᑲ, ᐃᑕ ᒣᑳᐧᐨ ᐁ ᐊᔭᒥᐦᐋᐟ, ᐃᐢᐱ ᐁ ᐳᓂᑖᐟ, ᐯᔭᐠ ᐅ ᑭᐢᑭᓄᐦᐊᒪᐋᐧᑲᓇ ᑭ ᐃᑎᐠ, ᑳ ᑎᐯᔨᐦᒋᑫᔭᐣ, ᑭᐢᑭᓄᐦᐊᒫᐃᐧᓈᐣ ᑭᑕ ᐃᓯ ᐊᔭᒥᐦᐋᔮᕽ, ᑖᐱᐢᑯᐨ ᒑᐣ ᑳ ᑭ ᐃᓯ ᑭᐢᑭᓄᐦᐊᒪᐋᐧᐟ ᐅ ᑭᐢᑭᓄᐦᐊᒪᐋᐧᑲᓇ.
[2] ᐁᑯᓯ ᑭ ᐃᑌᐤ, ᐁᔭᒥᐋᔦᑯ, ᐃᑌᐧᐠ ᓄᑖᐃᐧᓈᐣ, ᑭᐦᒋ ᑭᓯᑯᕽ ᐁᔮᔭᐣ. ᑭᑕ ᐃᐧ ᑭᑲᑌᔨᑖᑲᐧᐣ ᑭ ᐃᐧᔪᐃᐧᐣ, ᑭᐟ ᐅᑌᓇᐃᐧᐃᐧᐣ ᑭᑕ ᐃᐧ ᐅᑎᐦᒋᐸᔨᐤ, ᐁ ᐃᑌᔨᑕᒪᐣ ᑭᑕ ᐃᐧ ᑐᒋᑳᑌᐤ ᐊᐢᑭᕽ ᑳ ᐃᓯ ᐊᔮᐠ ᑭᐦᒋ ᑭᓯᑯᕽ.
[3] ᒥᔨᓈᐣ ᑕᐦᑐ ᑭᓯᑳᐤ ᑫ ᐅᐦᒋ ᐱᒫᑎᓯᔭᕽ.
[4] ᒥᓇ ᐳᓀᔨᑕᒪᐃᐧᓈᐣ ᓂ ᒪᒋᐃᑎᐃᐧᓂᓈᓇ ᑳ ᐃᓯ ᐳᓀᔨᑕᒪᐊᐧᑭᒋᐠ ᐊᓂᑭ ᑳ ᒪᓯᓇᐦᐊᒪᑯᔭᑯᐠ. ᒥᓇ ᐁᑳᐃᐧᔭ ᐃᑐᐦᑕᐦᐃᓈᐣ ᑯᑌᔨᑐᐃᐧᓂᕽ ᒫᑲ ᒥᑖᑫᐧᓇᒪᐃᐧᓈᐣ ᒪᒋ ᑫᑲᐧᐩ.
[5] ᐁᑯᓯ ᑭ ᐃᑌᐤ, ᑖᓈᓇ ᑭᔭᐋᐧᐤ ᑳ ᐃᑕᓯᔦᐠ ᑫ ᐅᑐᑌᒥᐟ, ᐁᑯᓯ ᑫ ᓈᑖᑫᐧ ᐁ ᐊᐱᑖ ᑎᐱᐢᑳᔨᐠ, ᒥᓇ ᑫ ᐃᑖᑫᐧ, ᓂᑐᑌᑦ, ᐊᐃᐧᐃᐣ ᓂᐢᑐ ᐱᐢᐁᐧ ᐊᔭᑯᓈᐊᐧᐠ;
[6] ᒋᑫᒪ ᐯᔭᐠ ᓂᑐᑌᑦ ᓄᑎᐦᑎᐠ ᐁ ᐱᒥᐱᒋᐟ, ᐁᑯᓯ ᓇᒪ ᑫᑲᐧᐩ ᓂᐟ ᐋᔮᐣ ᑭᑕ ᐊᓴᒪᐠ:
[7] ᐁᑯᓯ ᐃᐧᔮᓇ ᐱᑐᑲᒥᐠ ᐅᐦᒋ ᑭᑕ ᓇᐢᑫᐧᐊᐧᓯᑖᐤ ᒥᓇ ᑭᑕ ᐃᑌᐧᐤ, ᐁᑳᐃᐧᔭ ᒥᑯᐢᑳᒋᒥᐣ? ᐃᐢᑲᐧᑌᑦ ᓵᓴᐩ ᑭᐸᐦᐃᑳᑌᐤ, ᐁᑯᓯ ᓂᐟ ᐊᐋᐧᓯᒥᓴᐠ ᓵᓴᐩ ᑭ ᑲᐃᐧᓯᒧᐊᐧᐠ, ᓇᒪᐃᐧᔭ ᓂ ᑲ ᑭ ᐊᐧᓂᐢᑳᐣ ᑭᑕ ᒥᔨᑖᐣ:
[8] ᑭᐟ ᐃᑎᓈᐋᐧᐤ, ᐊᑕ ᐁᑳ ᐃᐧ ᐊᐧᓂᐢᑳᒋ ᑭᑕ ᒥᔭᐟ ᐅᑐᑌᒥᑐᐃᐧᐣ ᐅᐦᒋ, ᐁᔨᐁᐧᕽ ᐁᑳ ᐳᓀᐧᐁᐧᒥᑯᒋ, ᑭᑕ ᐊᐧᓂᐢᑳᐤ ᒥᓇ ᑭᑕ ᒥᔦᐤ ᑕᐦᑐ ᐁ ᓇᑕᐁᐧᔨᒫᔨᐟ.
[9] ᐁᑯᓯ ᒫᑲ ᑭᐟ ᐃᑎᓈᐋᐧᐤ, ᓇᑐᑕᒫᐠ, ᐁᑯᓯ ᑭ ᑲ ᒥᔨᑲᐃᐧᓈᐋᐧᐤ; ᓇᓈᑐᓂᑫᐠ, ᐁᑯᓯ ᑭ ᑲ ᒥᐢᑫᓈᐋᐧᐤ; ᐸᑲᒪᐊᒧᐠ ᐃᐢᑲᐧᑌᑦ, ᐁᑯᓯ ᑭ ᑲ ᔪᑌᓇᒫᑲᐃᐧᓈᐋᐧᐤ.
[10] ᐃᐧᔭ ᑕᐦᑐ ᐊᐃᐧᔭᐠ ᑳ ᓇᑐᑕᒫᑫᐟ, ᑭᑕ ᒥᔮᐤ; ᒥᓇ ᐊᓇ ᑳ ᓇᑐᓇᕽ ᒥᐢᑲᑦ: ᒥᓇ ᐊᓇ ᑳ ᐸᑲᒪᐊᕽ ᐃᐢᑳᐧᑌᑦ ᑭᑕ ᔪᑌᓇᒪᐋᐧᐤ.
[11] ᒥᓇ ᑖᓈᓇ ᑭᔭᐋᐧᐤ ᑳ ᐅᑯᓯᓯᐟ ᓇᑐᑕᒪᑯᒋ ᐱᐢᐁᐧᑲᓯᑲᓈ, ᐊᓯᓂᐊ ᒋ ᑭᑕ ᒥᔦᐤ? ᐊᐁᐧᑳ ᑭᐢᐱᐣ ᑭᓄᓭᐊᐧ ᓂᑐᑕᒫᑯᒋ ᑭᓀᐱᑲᐧ ᒋ ᑭᑕ ᒥᔦᐤ?
[12] ᐊᐁᐧᑳ ᑭᐢᐱᐣ ᐋᐧᐃᐧ ᓇᑐᑕᒫᑯᒋ ᐅᒋᓱᐁᐧᐊᐧ ᒋ ᑭᑕ ᒥᔦᐤ?
[13] ᑭᐢᐱᐣ ᒫᑲ ᑭᔭᐋᐧᐤ, ᐁ ᓇᔦᑕᐋᐧᑎᓯᔦᐠ ᑭ ᑭᐢᑫᔨᑌᓈᐋᐧᐤ ᑭᑕ ᒥᔮᔦᑲᐧᐤ ᒥᔪ ᒣᑭᐃᐧᓇ ᑭᐟ ᐊᐋᐧᓯᒥᓯᐋᐧᐊᐧᐠ, ᑖᓂᔨᑯᕽ ᐊᐊᐧᓯᒣ ᑯᑕᐃᐧᐋᐧ ᑭᐦᒋ ᑭᓯᑯᕽ ᑳ ᐊᔮᐟ ᑫ ᒥᔮᐟ ᑳ ᑲᓈᑎᓯᔨᐟ ᐊᐦᒑᐦᑲᐧ ᐊᓂᐦᐃ ᑳ ᓇᑐᑕᒫᑯᐟ.
[14] ᐁᑯᓯ ᑭ ᐊᐧᔭᐃᐧᐁᐧᐱᓀᐤ ᒪᒋ ᐊᐦᒑᐦᑲᐧ, ᐁᑳ ᐁ ᑭ ᓂᑕᐁᐧᔨᐟ. ᐁᑯᓯ ᑭ ᐃᐢᐸᔨᐤ, ᐃᐢᐱ ᒪᒋ ᐊᐦᒑᕽ ᑳ ᐊᐧᔭᐃᐧᐟ: ᐁᑳ ᑳ ᓂᑕᐁᐧᐟ ᓈᐯᐤ ᑭ ᐱᑭᐢᑫᐧᐤ; ᐊᔨᓯᔨᓂᐊᐧᐠ ᒫᑲ ᑭ ᒫᒪᐢᑳᑕᒪᐧᐠ.
[15] ᒫᑲ ᐊᑎᐦᐟ ᑭ ᐃᑌᐧᐊᐧᐠ, ᐊᐧᔭᐃᐧᐁᐧᐱᓀᐤ ᒪᒋ ᐊᐦᒑᐦᑲᐧ ᐱᐁᓬᓯᐸᑊ ᐅᐦᒋ ᑳ ᑎᐯᔨᒪᔨᐟ ᒪᒋ ᐊᐦᒑᐦᑲᐧ.
[16] ᑯᑕᑲᐠ ᒫᑲ, ᐁ ᑯᑌᔨᒫᒋᐠ, ᑭ ᓇᑕᐁᐧᔨᑕᒪᐧᐠ ᑭᐢᑭᓇᐊᐧᒋ ᐃᓯᐦᒋᑫᐃᐧᐣ ᑭᐦᒋ ᑭᓯᑯᕽ ᐅᐦᒋ.
[17] ᐃᐧᔭ ᒫᑲ, ᐁ ᑭᐢᑫᔨᑕᕽ ᐁ ᐃᓯ ᒪᒥᑐᓀᔨᑕᒥᔨᐟ, ᑭ ᐃᑌᐤ, ᑳ ᐃᑕᑎᕽ ᐅᑌᓇᐃᐧᐃᐧᐣ ᑳ ᓇᓈᓂᐢᒋᐃᑐᒪᑲᕽ ᓂᓯᐊᐧᓈᑕᐣ; ᒥᓇ ᐋᐧᐢᑲᐃᑲᐣ ᑳ ᓇᓈᓂᐢᒋᐃᑐᒪᑲᕽ ᐸᐦᑭᐦᑎᐣ.
[18] ᒥᓇ ᑭᐢᐱᐣ ᓭᑕᐣ ᐱᑯᓂᓱᒋ, ᑖᓂᓯ ᑫ ᐃᓯ ᓂᐸᐃᐧᒪᑲᓂᔨᐟ ᐅᐟ ᐅᑌᓇᐃᐧᐃᐧᐣ? ᒋᑫᒪ ᐁ ᐃᑌᐧᔦᐠ ᐊᐧᔭᐃᐧᐁᐧᐱᓀᐤ ᒪᒋ ᐊᐦᒑᐦᑲᐧ ᐱᐁᓬᓯᐸᑊ ᐅᐦᒋ.
[19] ᑭᐢᐱᐣ ᒫᑲ ᓂᔭ ᐱᐁᓬᓯᐸᑊ ᐅᐦᒋ ᓂ ᐊᐧᔭᐃᐧᐁᐧᐱᓈᐊᐧᐠ ᒪᒋ ᐊᐦᒑᐦᑲᐧᐠ, ᐊᐁᐧᓂᐃ ᐅᐦᒋ ᑭᑯᓯᓯᐊᐧᐊᐧᐠ ᑳ ᐊᐧᔭᐃᐧᐁᐧᐱᓈᒋᐠ? ᐁᐊᐧᑯ ᐅᐦᒋ ᑭ ᑲ ᐅᔭᓱᐋᐧᑎᑯᐋᐧᐊᐧᐠ.
[20] ᒫᑲ ᑭᐢᐱᐣ ᓂᔭ ᑭᓭᒪᓂᑐ ᐅᒋᐦᒋ ᐅᐦᒋ ᓂ ᐊᐧᔭᐃᐧᐁᐧᐱᓈᐊᐧᐠ ᒪᒋ ᐊᐦᒑᐦᑲᐧᐠ, ᐁᑯᓭᓵᓂ ᑭᓭᒪᓂᑐ ᐅᐟ ᐅᑌᓇᐃᐧᐃᐧᐣ ᐁᐧᑎᑎᑯᔦᐠ.
[21] ᒣᑳᐧᐨ ᐁ ᒪᐢᑲᐃᐧᓯᐟ ᓈᐯᐤ, ᒥᑐᓂ, ᐁ ᓂᒫᐢᑫᐧᐟ ᑲᓇᐁᐧᔨᐦᑕᐦᑭ ᐃᐧᑭ, ᐅᐟ ᐊᔮᐃᐧᓇ ᐯᔭᑕᐠ ᐊᔮᔨᐊᐧ:
[22] ᒫᑲ ᐃᐢᐱ ᓇᐊᐧᐨ ᐁ ᒪᐢᑲᐃᐧᓯᔨᐟ ᐃᐢᐱᐨ ᐃᐧᔭ ᐅᑎᐦᑎᑯᒋ, ᒥᓇ ᓵᑯᒋᐃᑯᒋ, ᒪᐢᑲᒥᐠ ᑲᐦᑭᔭᐤ ᐅ ᓂᒫᐢᑫᐧᐃᐧᐣ ᑳ ᑭ ᐊᐢᐯᔨᒧᑐᑕᕽ, ᐁᑯᓯ ᓇᓈᓂᐢᒋᑖᔨᐊᐧ ᐁ ᒪᓂᐊᐧᑖᑎᑯᐟ.
[23] ᐊᓇ ᐁᑳ ᑳ ᐃᐧᒉᐃᐧᐟ ᓂ ᓇᑳᐢᑲᐠ; ᐁᑯᓯ ᐊᓇ ᐁᑳ ᑳ ᐃᐧᒋ ᒫᐊᐧᒋᒋᑫᒥᐟ ᐅᓴᐢᐁᐧᐁᐧᐱᓂᑫᐤ.
[24] ᐃᐢᐱ ᐁᑳ ᑲ ᐯᑭᓯᐟ ᐊᐦᒑᕽ ᓀᑲᑖᒋ ᐊᔨᓯᔨᓂᐊᐧ, ᐸᐸᒧᑌᐤ ᐸᐢᑌᐊᐧᔨᕽ, ᐁᓇᓈᑐᓇᕽ ᐊᔦᐧᐱᐃᐧᐣ; ᐁᑯᓯ ᐁᑳ ᐁ ᒥᐢᑲᕽ, ᐃᑌᐧᐤ, ᓂᑭᕽ ᓂ ᑲ ᐃᓯ ᑭᐋᐧᐣ ᐃᑕ ᑳ ᑭ ᐯ ᐅᐦᒋ ᐊᐧᔭᐃᐧᔮᐣ.
[25] ᐁᑯᓯ ᐃᐢᐱ ᐁ ᑕᑯᓯᕽ, ᒥᐢᑲᑦ ᐁ ᑭ ᐁᐧᐸᐃᑫᐃᐧᐠ ᒥᓇ ᐁ ᐊᐧᐁᐧᓯᒋᑳᑌᔨᐠ.
[26] ᐁᑲᐧ ᓇᑕᐃᐧ ᐅᑎᓇᒫᓱ ᑌᐸᑯᑊ ᑯᑕᑲ ᐊᐦᒑᐦᑲᐧ, ᐊᐊᐧᓯᒣ ᐁ ᒪᒑᔨᐃᐧᔨᐟ ᐃᐢᐱᐨ ᐃᐧᔭ, ᐁᑯᓯ ᐱᐦᑐᑫᐊᐧᐠ, ᒥᓇ ᐊᔮᐊᐧᐠ ᐁᑯᑕ, ᐁᑯᓯ ᐃᐢᑳᐧᔮᓂᕽ ᑳ ᐃᓯ ᐊᔮᐟ ᐁᐊᐧᑳᐧᓇ ᓈᐯᐤ, ᐊᐊᐧᓯᒣ ᒪᔨ ᐊᔮᐤ ᐃᐢᐱ ᓂᐢᑕᑦ.
[27] ᑭ ᐊᔨᑭᐣ ᒫᑲ ᐃᐢᐱ ᐅᒪ ᑳ ᐊᔨᑌᐧᐟ, ᐯᔭᐠ ᐃᐢᑫᐧᐤ ᑳ ᒫᒪᐁᐧᔭᑎᔨᐟ ᐊᔨᓯᔨᓂᐊᐧ ᐅᐦᒋ ᑭ ᐱᑭᐢᑫᐧᐤ ᐁ ᐃᑎᑯᐟ, ᑭᐦᒋ ᓴᐁᐧᔨᑖᑯᓯᐤ ᐊᓇ ᑳ ᑭ ᓂᐦᑖᐃᐧᑭᐃᐢᐠ ᒥᓇ ᐊᓇ ᑳ ᑭ ᓄᔨᐢᐠ.
[28] ᒫᑲ ᑭ ᐃᑌᐧᐤ ᐁᐦᐊ, ᓇᐊᐧᐨ ᒫᑲ ᓴᐁᐧᔨᑖᑯᓯᐊᐧᐠ ᐊᓂᑭ ᑳ ᓇᑐᑕᑭᐠ ᑭᓭᒪᓂᑐ ᐅᐟ ᐊᔭᒥᐃᐧᐣ ᐁᑯᓯ ᑳ ᑲᓇᐁᐧᔨᐦᑕᐦᑭᐠ.
[29] ᐁᑯᓯ ᐃᐢᐱ ᐊᔨᓯᔨᓂᐊᐧ ᑳ ᒫᐊᐦᒋᐃᑐᔨᐟ, ᑭ ᒫᒋ ᐃᑌᐤ, ᐅᑭ ᑳ ᐋᓂᐢᑫ ᐱᒫᑎᓯᒋᐠ ᓇᔦᑕᐊᐧᑎᓯᐊᐧᐠ: ᓇᑐᐢᑲᒪᐧᐠ ᑭᐢᑭᓇᐊᐧᒋ ᐃᓯᐦᒋᑫᐃᐧᐣ, ᒫᑲ ᓇᒪᐃᐧᔭ ᑭᐢᑭᓇᐊᐧᒋ ᐃᓯᐦᒋᑫᐃᐧᐣ ᑭᑕ ᒥᔮᐊᐧᐠ, ᐱᑯ ᐊᓂᒪ ᐅ ᑭᐢᑭᓇᐊᐧᒋ ᐃᓯᐦᒋᑫᐃᐧᐣ ᒑᓇ.
[30] ᒋᑫᒪ ᒣᐧᐦᒋ ᒑᓇ ᑳ ᑭ ᐃᓯ ᑭᐢᑭᓇᐋᐧᑌᔨᒥᑯᐟ ᓂᓂᐸ ᐊᔨᓯᔨᓂᐊᐧ, ᐁᑯᓯ ᐃᐧᐢᑕ ᐃᔨᓂᐃᐧᑯᓯᓵᐣ ᑫ ᑐᑕᐋᐧᐟ ᐅᐦᐃ ᐊᓄᐦᐨ ᑳ ᐱᒫᑎᓯᔨᐟ.
[31] ᑭᐦᒋ ᐅᑭᒫᐢᑫᐧᐤ ᓵᐊᐧᓄᑖᕽ ᐅᐦᒋ ᑭᑕ ᐊᐧᓂᐢᑳᐤ ᐅᔭᓱᐁᐧᐃᐧ ᑭᓯᑳᑭ ᐊᓯᒋ ᐅᑭ ᐊᔨᓯᔨᓂᐊᐧᐠ, ᑭᑕ ᓇᓂᐳᒫᐟ: ᐃᐧᔭ ᐋᐧᔭᐁᐧᐢᑲᒥᐠ ᐁ ᑭ ᐅᐦᑐᑌᐟ ᑭᑕ ᐯᐦᑕᕽ ᐅᐟ ᐃᔨᓂᓯᐃᐧᓂᔨᐤ ᓵᓬᐅᒪᓇ; ᒋᐢᐟ ᒫᑲ, ᐊᐊᐧᓯᒣ ᐁ ᑭᐦᒑᔨᐃᐧᐟ ᐃᐢᐱᐦᐨ ᓵᓬᐅᒪᐣ ᐅᑕ ᐊᔮᐤ.
[32] ᐊᔨᓯᔨᓂᐊᐧᐠ ᓂᓂᐱ ᐅᐦᒋ ᑭᑕ ᐃᐧᒋ ᐊᐧᓂᐢᑳᒣᐊᐧᐠ ᐅᐦᐃ ᐊᔨᓯᔨᓂᐊᐧ ᐅᔭᓱᐁᐧᐃᐧ ᑭᓯᑳᑭ, ᒥᓇ ᑭᑕ ᓇᓂᐳᒣᐊᐧᐠ: ᐃᐧᔭ ᐁ ᑭ ᑫᐧᐢᑳᑎᓯᒋᐠ ᐅ ᑲᑫᐢᑫᐧᐃᐧᓂᔨᐤ ᐅᐦᒋ ᒑᓇ; ᒋᐢᐟ ᒫᑲ, ᐊᐊᐧᓯᒣ ᐁ ᑭᐦᒑᔨᐃᐧᐟ ᐃᐢᐱᐦᐨ ᒑᓇ ᐅᑕ ᐊᔮᐤ.
[33] ᓇᒪᐃᐧᔭ ᐊᐃᐧᔭᐠ ᐊᔨᓯᔨᓂᐤ, ᐃᐢᐱ ᑳ ᓴᐢᑲᐊᑭ ᐋᐧᓴᐢᑯᑌᓂᑲᐣ, ᐋᐧᑎᑲᓂᕽ, ᐊᐦᐳ ᓯᐸ ᒪᑲᑯᕽ ᐊᐢᑖᐤ, ᒫᑲ ᐋᐧᓴᐢᑯᑌᓂᑲᓈᑎᑯᕽ, ᐊᓂᑭ ᑳ ᐱᐦᑐᑫᒋᐠ ᑭᑕ ᐋᐧᐸᐦᑕᐦᑭᐠ ᐋᐧᐢᑌᐤ.
[34] ᑭᐢᑭᓯᐠ ᑳ ᐅᐦᒋ ᐋᐧᐢᑌᐃᐧᓂᐊᐧᕽ ᑭᔭᐤ, ᑭᐢᐱᐣ ᒫᑲ ᑭᐢᑭᓯᐠ ᐯᔭᑫᐧᔨᒧᒪᑲᑭ, ᒥᓯᐁᐧ ᑭᔭᐃᐧᕽ ᓴᑲᐢᑭᓀᐤ ᐋᐧᐢᑌᐤ; ᒫᑲ ᐃᐢᐱ ᑭᐢᑭᓯᐠ ᓀᔦᑖᐊᐧᑭ, ᑭᔭᐤ ᓵᑲᐢᑭᓀᐤ ᐊᐧᓂᑎᐱᐢᑭᓯᐃᐧᐣ.
[35] ᐊᔮᑲᐧᒥᓯ ᒫᑲ ᐊᓂᒪ ᐋᐧᐢᑌᐤ ᑳ ᑭᑭᐢᑳᑯᔭᐣ ᐁᑳ ᑭᑕ ᐊᐧᓂᑎᐱᐢᑳᐠ.
[36] ᐁᐊᐧᑯᒋ ᒫᑲ ᑭᐢᐱᐣ ᒥᓯᐁᐧ ᑭᔭᐤ ᓵᑲᐢᑭᓀᑭ ᐋᐧᐢᑌᐤ, ᐁᑳ ᓈᓂᑕᐤ ᐁ ᐊᐧᓂᑎᐱᐢᑭᓈᑲᐧᕽ, ᑲᐦᑭᔭᐤ ᒥᑐᓂ ᑭᑕ ᐋᐧᐢᑌᐤ, ᑖᐱᐢᑯᐨ ᐋᐧᓴᐢᑯᑌᓂᑲᐣ ᑭᑭᕽ ᑳ ᐃᓯ ᐋᐧᓴᐢᑯᑌᓇᒫᑯᔭᐣ.
[37] ᒣᑳᐧᐨ ᒫᑲ ᐅᒪ ᐁ ᐱᑭᐢᑫᐧᐟ, ᐯᔭᐠ ᐸᕒᐊᓯᐊᐧ ᑭ ᑲᑫᐧᒋᒥᐠ ᑭᑕ ᐃᐧᒋᒥᒋᓱᒫᐟ: ᐁᑯᓯ ᑭ ᐱᐦᑐᑫᐤ, ᒥᓇ ᐁ ᑭ ᓇᐦᐊᐱᐟ ᑭᑕ ᒥᒋᓱᐟ.
[38] ᐃᐢᐱ ᒫᑲ ᐊᓇ ᐸᕒᐊᓯ ᐃᔮᐸᑕᕽ, ᑭ ᒫᒪᐢᑳᑕᑦ ᐁᑳ ᐁ ᑭ ᑳᓯᒋᐦᒉᔨᐟ ᐁ ᒪᐧᔦ ᒥᒋᓱᔨᐟ:
[39] ᐁᑯᓯ ᑳ ᑎᐯᔨᐦᒋᑫᐟ ᑭ ᐃᑌᐤ, ᑭᔭᐋᐧᐤ ᐸᕒᐊᓯᐊᐧ ᑭ ᑲᓯᔮᐱᐢᑲᐁᐧᓈᐋᐧᐤ ᒥᓂᑲᐧᑲᓂᐢ ᒥᓇ ᐅᔮᑲᐣ ᐊᐧᔭᐃᐧᑎᒫᔨᕽ; ᒫᑲ ᐃᐧᔭ ᐱᒑᔨᕽ ᑭ ᓵᑲᐢᑭᓈᓈᐋᐧᐤ ᒪᐢᑲᑌᐧᐃᐧᐣ ᒥᓇ ᒪᒑᑎᓯᐃᐧᐣ.
[40] ᑲᑫᐹᑎᓴᐠ, ᓇᒪ ᒋ ᐊᓇ ᑳ ᑭ ᐅᓯᑖᐟ ᐊᐧᔭᐃᐧᑎᒫᔨᕽ, ᑭ ᐅᓯᑖᐤ ᐊᓯᒋ ᐱᒑᔨᕽ ᐊᓂᒪ ᑳ ᐊᔭᐠ.
[41] ᒫᑲ ᔮᔭᐤ ᒣᑭᐠ ᒣᑭᐃᐧᓇ ᐊᓂᐦᐃ ᐅᐦᒋ ᐱᒑᔨᕽ ᑳ ᐊᔮᑭ; ᐁᑯᓯ ᒫᑎᑲ ᑲᐦᑭᔭᐤ ᑫᑲᐧᔭ ᐯᑲᓇᐧ ᑭᔭᐋᐧᐤ ᐅᐦᒋ.
[42] ᒫᑲ ᑭ ᑲᑲᐧᑕᑭᓯᓈᐋᐧᐤ ᑭᔭᐋᐧᐤ ᐸᕒᐊᓯᐊᐧᐠ ᒋᑫᒪ ᑭ ᐸᑭᑎᓈᓱᓈᐋᐧᐤ, ᐯᔭᐠ ᐁ ᑭ ᒥᑖᑕᑐᑖᕽ ᒥᐣᐟ ᒥᓇ ᕒᐅ ᒥᓇ ᑲᐦᑭᔭᐤ ᑭᐢᑎᑳᓂᓴ, ᐁᑯᓯ ᐃᐧᔭ ᐁᑳ ᐁ ᓈᑲᑐᑫᔦᐠ ᐅᔭᓱᐁᐧᐃᐧᐣ ᒥᓇ ᐅ ᓵᑭᐦᐃᐁᐧᐃᐧᐣ ᑭᓭᒪᓂᑐ: ᒫᑲ ᐅᐦᐃ ᑭᑕ ᑭ ᑐᑕᒣᐠ ᒥᓇ ᐊᓂᒪ ᑯᑕᐠ ᓇᒪᐃᐧᔭ ᑭᑕ ᐁᑳ ᐃᑐᑕᒣᐠ.
[43] ᑭ ᑲᑳᐧᑕᑭᓯᓈᐋᐧᐤ ᒫᑲ ᑭᔭᐋᐧᐤ ᐹᕒᐊᓯᐊᐧᐠ! ᒋᑫᒫ ᑭ ᓴᑭᑖᓈᐋᐧᐤ ᐁ ᓂᑳᓇᐢᑌᑭ ᐊᐱᐃᐧᓇ ᐊᔭᒥᐦᐁᐃᐧᑲᒥᑯᕽ, ᒥᓇ ᐊᑕᒥᐢᑳᑐᐃᐧᓇ ᐊᑖᑐᐃᐧᓂᕽ.
[44] ᑭ ᑲᑳᐧᑕᑭᓯᓈᐋᐧᐤ, ᒋᑫᒪ ᑖᐱᐢᑯᐨ ᔨᑲᐧᐦᐊᐢᑳᓇ ᐁᑳ ᑳ ᓄᑲᐧᑭ ᑭᐟ ᐃᑌᔨᑖᑯᓯᓈᐋᐧᐤ, ᐁᑯᓯ ᐊᔨᓯᔨᓂᐊᐧᐠ ᐋᑕ ᑕᑯᐦᐨ ᐯᒧᑌᑖᐧᐃᐧ ᓇᒪᐃᐧᔭ ᑭᐢᑫᔨᑕᒪᐧᐠ.
[45] ᐯᔭᐠ ᒫᑲ ᐅᔭᓱᐁᐧᐃᐧᔨᓂᐊᐧ ᑭ ᓇᐢᑫᐧᐊᐧᓯᒥᐠ ᐅᒥᓯ ᐁ ᐃᑎᑯᐟ, ᐅᑭᐢᑭᓄᐦᐊᒫᑫᐤ ᐅᒪ ᑳ ᐃᑌᐧᔭᐣ, ᓂᐢᑕᓈᐣ ᑭᐟ ᐋᓀᐧᔨᒥᓈᐣ.
[46] ᐁᑯᓯ ᒫᑲ ᑭ ᐃᑌᐧᐤ, ᑭ ᑲᑲᐧᑕᑭᓯᓈᐋᐧᐤ ᑭᐢᑕᐋᐧᐤ ᐅᔭᓱᐁᐧᐃᐧᔨᓂᑎᐠ; ᒋᑫᒪ ᑭ ᓇᔭᑕᐋᐋᐧᐊᐧᐠ ᐊᔨᓯᔨᓂᐊᐧᐠ ᓇᔭᒋᑳᓇ ᐁ ᐋᔨᒪᑭ ᑭᑕ ᓇᔭᑕᒥᕽ, ᒫᑲ ᑭᔭᐋᐧᐤ ᓇᒪᐊᐧᐊᐧᐨ ᑲᓇᑫ ᐯᔭᐠ ᑭᒋᐦᒋᐋᐧᐤ ᑯᐦᒋ ᓵᒥᓀᓈᐋᐧᐤ ᐊᓂᐦᐃ ᓇᔭᒋᑲᓇ.
[47] ᑭ ᑲᑳᐧᑕᑭᓯᓈᐋᐧᐤ! ᒋᑫᒫ ᑯᓯᑖᐋᐧᓈᐋᐧᐤ ᐅ ᓇᐃᓂᑯᐃᐧᑲᒥᑯᐋᐧᐊᐧ ᐅᑭᐢᑭᐁᐧᐦᐃᑫᐊᐧᐠ ᑯᑕᐃᐧᐋᐧᐊᐧᐠ ᒫᑲ ᐁ ᑭ ᓂᐸᐦᐋᒋᐠ.
[48] ᑖᐯᐧ ᐊᓂ ᑭᐟ ᐋᒋᒥᓱᓈᐋᐧᐤ ᐁ ᓇᐢᑯᑕᒣᐧᐠ ᐅᐟ ᐃᑐᑕᒧᐃᐧᓂᐋᐧᐊᐧ ᑯᑖᐃᐧᐋᐧᐊᐧᐠ: ᐃᐧᔭ ᑖᐯᐧ ᐁ ᑭ ᓂᐸᐦᐋᒋᐠ, ᐁᑯᓯ ᒫᑲ ᑭᔭᐋᐧᐤ ᐁ ᐅᓯᑖᐋᐧᔦᐠ ᐅ ᓇᐃᓂᑯᐃᐧᑲᒥᑯᐊᐧᐊᐧ.
[49] ᐁᐊᐧᑯ ᒫᑲ ᒥᓇ ᐅᐦᒋ ᑳ ᐃᑌᐧᒪᑲᓂᔨᐠ ᐅᐟ ᐃᔨᓂᓯᐃᐧᐣ ᑭᓭᒪᓂᑐ, ᓂ ᑳ ᐃᓯᑎᓴᐦᐊᒪᐋᐧᐊᐧᐠ ᐅᑭᐢᑭᐁᐧᐦᐃᑫᐊᐧ ᒥᓇ ᐃᓯᑎᓴᐋᐧᑲᓇ: ᐁᑯᓯ ᐊᑎᐦᐟ ᑭᑕ ᓂᐸᐁᐊᐧᐠ ᒥᓇ ᑭᑕ ᑲᑲᐧᑕᑭᐁᐊᐧᐠ:
[50] ᐅ ᒥᐦᑯᐋᐧᐤ ᑲᐦᑭᔭᐤ ᐅᑭᐢᑭᐁᐧᐦᐃᑫᐊᐧᐠ, ᐊᓂᒪ ᑳ ᑭ ᓯᑭᓂᑳᑌᐠ ᐊᐢᐱᐣ ᑳ ᑭᐢᑕᐢᑌᐠ ᐊᐢᑭ, ᑭᑕ ᓇᑕᐁᐧᔨᑕᒫᒋᐠ ᐅᑭ ᐊᓄᐦᐨ ᑳ ᐱᒫᑎᓯᒋᐠ;
[51] ᐅᒥᕽ ᐅᐦᒋ ᐁᐱᓬ ᐱᔨᐢ ᐅᒥᕽ ᓵᑲᕒᐋᔭᐢ, ᐊᓇ ᑳ ᑭ ᓂᐱᐟ ᑕᐢᑕᐊᐧᔨᕽ ᐸᑭᑎᓇᓱᐃᐧᓈᐱᐢᑯᕽ ᒥᓇ ᐊᔭᒥᐦᐁᐃᐧᑲᒥᑯᕽ; ᑖᐯᐧ ᑭᐟ ᐃᑎᓈᐋᐧᐤ, ᑭᑕ ᓇᑕᐁᐧᔨᑕᒪᐋᐧᐊᐧᐠ ᐅᑭ ᐊᔨᓯᔨᓂᐊᐧᐠ,
[52] ᑭ ᑲᑲᐧᑕᑭᓯᓈᐋᐧᐤ ᑭᔭᐋᐧᐤ ᐅᔭᓱᐁᐧᐃᐧᔨᓂᑎᐠ: ᒋᑫᒫ ᑭ ᑭ ᐅᑎᓀᓈᐋᐧᐤ ᑭᐢᑫᔨᑕᒧᐃᐧ ᐊᐱᑕᑲᐃᑲᐣ: ᓇᒪᐃᐧᔭ ᑭᔭᐋᐧᐤ ᑭ ᐱᑐᑳᓈᐋᐧᐤ, ᐁᑯᓯ ᐊᓂᑭ ᑳ ᐃᐧ ᐱᐦᑐᑫᒋᐠ ᑭ ᑭᐱᐢᑲᐋᐧᐋᐧᐊᐧᐠ.
[53] ᐃᐢᐱ ᒫᑲ ᐁᑯᑕ ᑳ ᐯ ᐅᐦᒋ ᐊᐧᔭᐃᐧᐟ ᒪᓯᓇᐦᐃᑫᐃᐧᔨᓂᐊᐧ ᐊᓯᒋ ᐹᕒᐊᓯᐊᐧ ᓇᐢᐱᐨ ᒥᐢᑕᐦᐃ ᑭ ᓯᑭᐢᑲᐠ, ᐁ ᐋᔮᓯᑌᒥᑯᐟ, ᒥᐦᒉᐟ ᑫᑲᐧᔭ ᑭᑕ ᑕᓯᑕᒪᐋᐧᐟ.
[54] ᐁ ᐊᐢᐊᐧᐅᑯᐟ, ᐁ ᐃᐧ ᑲᑫᐧ ᑳᒋᑎᓇᒥᔨᐟ ᑫᑲᐧᐩ ᐅᑐᓂᕽ ᐅᐦᒋ.