[1] ᑭ ᐊᔨᑭᐣ ᒫᑲ, ᐯᔭᐠ ᐁᐊᐧᑲᐧᓂ ᑭᓯᑳᐊᐧ, ᒣᑳᐧᐨ ᐁ ᑭᐢᑭᓄᐦᐊᒪᐋᐧᐟ ᐊᔨᓯᔨᓂᐊᐧ ᑭᐦᒋ ᐊᔭᒥᐦᐁᐃᐧᑲᒥᑯᕽ, ᒥᓇ ᐁ ᑲᑫᐢᑫᐧᐟ ᒥᔪ ᐊᒋᒧᐃᐧᐣ, ᑭᐦᒋ ᐊᔭᒥᐦᐁᐃᐧᔨᓂᐊᐧ ᐊᓯᒋ ᒪᓯᓇᐦᐃᑫᐃᐧᔨᓂᐊᐧ ᑭ ᐯ ᐅᑎᐦᑎᐠ ᐊᓯᒋ ᐊᓂᐦᐃ ᑳ ᓂᑳᓀᔨᑖᑯᓯᔨᐟ;
[2] ᐁᑯᓯ ᑭ ᐊᔭᒥᐃᐠ, ᐁ ᐃᑎᑯᐟ, ᐃᐧᐦᑕᒪᐃᐧᓈᐣ: ᑫᑯ ᑎᐯᔨᐦᒋᑫᐃᐧᐣ ᐁᐧᒋ ᑐᑕᒪᐣ ᐅᐦᐃ ᑫᑲᐧᔭ? ᐊᐦᐳ ᐊᐁᐧᓇ ᑳ ᒥᔨᐢᐠ ᐅᒪ ᑎᐯᔨᐦᒋᑫᐃᐧᐣ?
[3] ᑭ ᓇᐢᑫᐧᐊᐧᓯᒣᐤ ᒫᑲ ᐁ ᑭ ᐃᑖᐟ, ᓂᐢᑕ ᐯᔭᐠ ᑫᑲᐧᐩ ᑭ ᑲ ᑲᑫᐧᒋᒥᑎᓈᐋᐧᐤ; ᐁᑯᓯ ᒫᑲ ᓇᐢᑫᐧᐊᐧᓯᒥᐠ.
[4] ᐅᐹᑊᑕᐃᓯᐃᐧᐦᐃᐁᐧᐃᐧᐣ ᒑᐣ, ᑭᐦᒋ ᑭᓯᑯᕽ ᒋ ᑭ ᐅᐦᒋᒪᑲᓂᔨᐤ, ᐊᐦᐳ ᒋ ᐊᔨᓯᔨᓂᓇᕽ ᐅᐦᒋ?
[5] ᐁᑯᓯ ᑭ ᐊᔭᒥᐃᑐᐊᐧᐠ, ᐁ ᐃᑌᐧᒋᐠ, ᑭᐢᐱᐣ ᐃᑌᐧᔮᑭ, ᑭᐦᒋ ᑭᓯᑯᕽ ᐅᐦᒋ; ᑭᑕ ᐃᑌᐧᐤ, ᑖᓀᑭ ᒫᑲ ᐁᑳ ᑳ ᑭ ᑖᐯᐧᑕᐋᐧᔦᐠ?
[6] ᒫᑲ ᑭᐢᐱᐣ ᐃᑌᐧᔭᑭ, ᐊᔨᓯᔨᓂᓈᕽ ᐅᐦᒋ; ᑲᐦᑭᔭᐤ ᐊᔨᓯᔨᓂᐊᐧᐠ ᑭ ᑲ ᐱᒪᐧᐱᐢᑲᐅᑯᓇᐊᐧᐠ: ᒋᑫᒪ ᑫᒋᓈᐅᐊᐧᐠ ᒑᐣ ᐁ ᐅᑭᐢᑭᐁᐧᐦᐃᑫᐃᐧᔨᓂᐃᐧᔨᐟ.
[7] ᑭ ᓇᐢᑫᐧᐊᐧᓯᒣᐊᐧᐠ ᒫᑲ, ᐁᑳ ᐁ ᑭᐢᑫᔨᑕᐦᑭᐠ ᐃᑌ ᐁ ᐅᐦᒋᒪᑲᓂᔨᐠ.
[8] ᐁᑯᓯ ᒋᓴᐢ ᑭ ᐃᑌᐤ, ᓇᒪᐃᐧᔭ ᓂᐢᑕ ᑭ ᑲ ᐃᐧᐦᑕᒫᑎᓈᐋᐧᐤ ᑫᑯ ᑎᐯᔨᐦᒋᑫᐃᐧᐣ ᑳ ᐅᐦᒋ ᑐᑕᒫᐣ ᐅᐦᐃ ᑫᑲᐧᔭ.
[9] ᑭ ᐊᑎ ᑕᓯᑕᒪᐁᐧᐤ ᒫᑲ ᐊᔨᓯᔨᓂᐊᐧ ᐅᒪ ᐋᐁᐧᒋᑲᐣ; ᐯᔭᐠ ᓈᐯᐤ ᑭ ᑭᐢᑎᑲᑕᑦ ᓱᒥᓂᑭᐢᑎᑳᐣ, ᐁᑯᓯ ᐁ ᑭ ᐸᑭᑎᓇᒪᐋᐧᐟ ᑭᐢᑎᑫᐃᐧᔨᓂᐊᐧ, ᐁ ᑭ ᐃᑐᐦᑌᐟ ᑯᑕᐠ ᐊᐢᑭᕽ ᑭᓀᐧᐢ ᐁ ᐃᐧ ᐃᑕᐱᒋᐟ.
[10] ᐁᑯᓯ ᐃᐢᐱ ᐁᐧᑎᒋᐸᔨᔨᐠ, ᐊᑐᐢᑫᔮᑲᓇ ᑭ ᐃᓯᑎᓴᐦᐊᒪᐁᐧᐤ ᑭᐢᑎᑫᐃᐧᔨᓂᐊᐧ, ᑭᑕ ᒥᔨᑯᐟ ᐁ ᐃᓯ ᒥᓂᓯᐊᐧᓂᔨᐠ ᓱᒥᓂᑭᐢᑎᑳᐣ; ᒫᑲ ᑭᐢᑎᑫᐃᐧᔨᓂᐊᐧ ᑭ ᐸᑲᒪᐁᐧᔨᐊᐧ, ᒥᓇ ᐱᓯᓯᐠ ᑭ ᓯᐯᐧᑎᓴᐁᐧᔨᐊᐧ
[11] ᑯᑕᑲ ᒫᑲ ᐊᑐᐢᑫᔮᑲᓇ ᒥᓇ ᑭ ᐃᓯᑎᓴᐁᐧᐤ: ᐁᑯᓯ ᐁᐊᐧᑲᐧᓂ ᒥᓇ ᑭ ᐸᑲᒪᐁᐧᔨᐊᐧ ᒥᓇ ᓀᐯᐋᐧᑳᐨ ᑭ ᐃᑐᑕᐁᐧᔨᐊᐧ ᒥᓇ ᐱᓯᓯᐠ ᐁ ᑭ ᓯᐯᐧᑎᓴᐋᐧᔨᐠ.
[12] ᒥᓇ ᒫᑲ ᐁᑲᐧ ᓂᐢᑖᐧᐤ ᑭ ᐃᓯᑎᓴᐦᐊᒪᐁᐧᐤ: ᐁᐊᐧᑲᐧᓂ ᒥᓇ ᑭ ᒥᐢᐋᐧᑲᓂᑳᑌᐊᐧᐠ, ᐁ ᑭ ᐊᐧᔭᐃᐧᐁᐧᐱᓈᒋᐠ ᒫᑲ.
[13] ᐁᑯᓯ ᑌᐯᔨᑕᕽ ᓱᒥᓂᑭᐢᑎᑲᐣ ᑭ ᐃᑌᐧᐤ, ᑖᓂᓯ ᑫ ᑐᑕᒫᐣ? ᓂ ᑲ ᐃᓯᑎᓴᐋᐧᐤ ᑳ ᓵᑭᐦᐊᐠ ᓂᑯᓯᐢ: ᒫᐢᑯᐨ ᑭᑕ ᑯᓯᑫᐧᔨᒣᐊᐧᐠ.
[14] ᒫᑲ ᐃᐢᐱ ᑭᐢᑎᑫᐃᐧᔨᓂᐊᐧᐠ ᐃᐧᔮᐸᒫᒋᐠ: ᑭ ᐊᔨᑎᑐᐊᐧᐠ, ᐁᐊᐧᑲᐧᐊᐧ ᐅᑖᐱᐢᑲᒪᑫᐤ: ᑭᔮᑦ ᓂᐸᐦᐋᑖᐠ, ᑭᑕ ᐊᔮᔭᕽ ᑎᐯᔨᑕᒧᐃᐧᐣ.
[15] ᐁᑯᓯ ᑭ ᐊᐧᔭᐃᐧᐁᐧᐱᓀᐊᐧᐠ ᓱᒥᓂᑭᐢᑎᑳᓂᕽ ᐅᐦᒋ, ᒥᓇ ᐁ ᑭ ᓂᐸᐦᐋᒋᐠ. ᑖᓂᓯ ᒫᑲ ᑳ ᑎᐯᔨᑕᕽ ᓱᒥᓂᑭᐢᑎᑲᐣ ᑫ ᑐᑕᐋᐧᐟ ᐅᐦᐃ?
[16] ᑭᑕ ᐯ ᓇᑕᐃᐧ ᓂᓯᐊᐧᓈᒋᐁᐤ ᐅᐦᐃ ᑭᐢᑎᑫᐃᐧᔨᓂᐊᐧ, ᐁᑯᓯ ᑯᑕᑲ ᓱᒥᓂᑭᐢᑎᑳᓂᔨᐤ ᑭᑕ ᒥᔦᐤ. ᐃᐢᐱ ᒫᑲ ᐱᔦᐦᑕᐦᑭᐠ, ᑭ ᐃᑌᐧᐊᐧᐠ, ᐱᑕᓀ ᐁᑳ ᐃᑭᕽ.
[17] ᒫᑲ ᑭ ᑲᓇᐋᐧᐸᒣᐤ, ᐁ ᑭ ᐃᑖᐟ, ᑫᑲᐧᐩ ᒫᑲ ᐅᒪ ᑳ ᐃᑕᓯᓇᐦᐃᑳᑌᐠ, ᐊᓯᓂ ᑳ ᑭ ᐋᑕᐁᐧᔨᒫᒋᐠ ᐅᐊᐧᐢᑳᐃᑫᐊᐧᐠ, ᐁᐊᐧᑳᐧᓇ ᑳ ᓂᑳᓇᐃᐦᐟ ᑭᑫᑕᑳᕽ?
[18] ᑕᐦᑐ ᐊᐃᐧᔭᐠ ᑕᑯᐦᐨ ᑫ ᐸᐦᑭᓯᓄᑫᐧ ᐁᐊᐧᑲᐧᓂ ᐊᓯᓂᐊ ᑭᑕ ᐱᑯᓯᐣ; ᒫᑲ ᐊᐁᐧᓇ ᑫ ᐹᑕᑯᐢᑳᑯᑫᐧ, ᑭᑕ ᐱᑭᓇᑕᐅᐠ ᑖᐱᐢᑯᐨ ᐱᑯᑎᐤ.
[19] ᐁᑯᓯ ᑭᐦᒋ ᐊᔭᒥᐦᐁᐃᐧᔨᓂᐊᐧᐠ ᒥᓇ ᒪᓯᓇᐦᐃᑫᐃᐧᔨᓂᐊᐧᐠ ᐁᐊᐧᑲᐧᓂᒪ ᑎᐸᐃᑲᐣ ᑭ ᑲᑫᐧ ᐅᑎᓀᐊᐧᐠ; ᒫᑲ ᑭ ᑯᐢᑌᐊᐧᐠ ᐊᔨᓯᔨᓂᐊᐧ: ᒋᑫᒪ ᑭ ᓂᓯᑕᐃᐧᓇᒪᐧᐠ ᐃᐧᔭᐋᐧᐤ ᐁ ᑭ ᑕᓯᒥᑯᒋᐠ ᐋᐁᐧᒋᑲᐣ ᑳ ᑭ ᐃᐧᐦᑕᒥᔨᐟ.
[20] ᑭ ᓇᓇᑲᒋᐁᐊᐧᐠ ᒫᑲ, ᒥᓇ ᐁ ᑭ ᐃᓯᑎᓴᐋᐧᒋᐠ ᐅᓇᑕᐋᐧᑖᐊᐧ, ᑭᑕ ᑲᐧᔭᐢᑳᐧᑎᓯᑳᓱᔨᐟ, ᑭᑕ ᑳᒋᑎᓈᒋᐠ ᐅᐟ ᐊᔭᒥᐃᐧᓂᔨᐊᐧ ᐅᐦᒋ, ᐁᑯᓯ ᒫᑲ ᑭᑕ ᑭ ᐸᑭᑎᓈᒋᐠ ᐅ ᑎᐯᔨᐦᒋᑫᐃᐧᓂᔨᕽ ᒥᓇ ᐅ ᒪᐢᑲᐃᐧᓯᐃᐧᓂᔨᕽ ᐅᔭᓱᐁᐧᐃᐧᑭᒫᐊᐧ.
[21] ᐁᑯᓯ ᑭ ᑲᑫᐧᒋᒣᐊᐧᐠ, ᐁ ᐃᑌᐧᒋᐠ, ᐅᑭᐢᑭᓄᐦᐊᒫᑫᐤ, ᓂ ᑭᐢᑫᔨᑌᓈᐣ ᑲᐧᔭᐢᐠ ᐁ ᐃᑌᐧᔭᐣ ᒥᓇ ᑲᐧᔭᐢᐠ ᐁ ᐃᓯ ᑭᐢᑭᓄᐦᐊᒫᑫᔭᐣ, ᐁᑳ ᒫᑲ ᐁ ᐅᑎᓇᐟ ᐊᐃᐧᔭᐠ ᐅᐟ ᐃᑌᔨᑖᑯᓯᐃᐧᐣ ᐅᐦᒋ, ᒫᑲ ᑖᐯᐧ ᐁ ᑭᐢᑭᓄᐦᐊᒫᑫᔭᐣ ᐅᐟ ᐃᓯᑖᐧᐃᐧᐣ ᑭᓭᒪᓂᑐ:
[22] ᐃᑕᐢᑌᐤ ᒋ ᓂᔭᓈᐣ ᑭᑕ ᒥᔮᔮᕽ ᓯᓴᕒ ᑎᐸᐦᐃᑫᐃᐧᓱᓂᔮᐊᐧ, ᐊᐦᐳ ᒋ ᓇᒪᐃᐧᔭ?
[23] ᒫᑲ ᑭ ᓂᓯᑕᐃᐧᓇᒣᐧᐤ ᐅ ᑲᑲᔦᔨᓯᐃᐧᓂᔨᐤ, ᐁᑯᓯ ᑭ ᐃᑌᐤ?
[24] ᐋᐧᐸᐦᑕᐃᐠ ᓱᓂᔮᐊᐧᐱᐢᑯᐢ. ᐊᐁᐧᓇ ᐅᒪ ᐅᐟ ᐃᓯᓈᑯᓯᐃᐧᐣ ᒥᓇ ᐅ ᒪᓯᓇᐃᑳᓱᐃᐧᐣ? ᐁᑯᓯ ᑭ ᐃᑌᐧᐊᐧᐠ, ᓯᓴᕒ.
[25] ᐁᑯᓯ ᒫᑲ ᑭ ᐃᑌᐤ, ᒥᔨᕽ ᒫᑲ ᓯᓴᕒ, ᑳ ᐃᑕᐢᑌᔨᐠ ᑭᑕ ᒥᔨᐦᐟ ᓯᓴᕒ, ᒥᓇ ᑭᓭᒪᓂᑐ, ᑳ ᐃᑕᐢᑌᔨᐠ ᑭᑕ ᒥᔨᐦᐟ ᑭᓭᒪᓂᑐ.
[26] ᓇᒪᐃᐧᔭ ᒫᑲ ᑭ ᑲᐢᑭᑖᐊᐧᐠ ᑭᑕ ᑳᒋᑎᓇᑭᐠ ᐊᓂᒪ ᐃᑌᐧᐃᐧᐣ ᐁ ᑭᑖᐸᒥᑯᒋᐠ ᐊᔨᓯᔨᓂᐊᐧ: ᑭ ᒫᒪᐢᑳᑕᒪᐧᐠ ᒫᑲ ᐁ ᐃᓯ ᓇᐢᑫᐧᐊᐧᓯᒥᑯᒋᐠ, ᐁᑯᓯ ᐁ ᑭ ᑭᐱᑐᐁᐧᒋᐠ.
[27] ᑭ ᐯ ᐅᑎᐦᑎᐠ ᒫᑲ ᐋᑎᐦᐟ ᓵᑐᓯᐊᐧ, ᐊᓂᑭ ᑳ ᐃᑌᐧᒋᐠ ᐁᑳ ᑫᑲᐧᐩ ᐊᐧᓂᐢᑳᐃᐧᐣ ᓂᐳᐃᐧᓂᕽ ᐅᐦᒋ ᐁ ᐃᐦᑕᑲᐧᕽ: ᐁᑯᓯ ᑭ ᑲᑫᐧᒋᒥᐠ,
[28] ᐁ ᐃᑌᐧᔨᐟ, ᐅᑭᐢᑭᓄᐦᐊᒫᑫᐤ, ᒧᓯᐢ ᓂ ᑭ ᐃᑕᓯᓇᐊᒫᑯᓈᐣ, ᑭᐢᐱᐣ ᐊᐃᐧᔭᐠ ᓈᐯᐤ ᐅᒋᐋᐧᒪ ᓂᐱᔨᒋ, ᐁ ᐃᐧᐃᐧᔨᐟ, ᐁᑯᓯ ᐁᑳ ᐅᐟ ᐊᐋᐧᓯᒥᓯᔨᒋ, ᑭᑕ ᐅᑎᓂᒫᐟ ᐃᐧᐃᐧᔨᐊᐧ, ᐁᑯᓯ ᑭᑕ ᐅᐟ ᐊᐋᐧᓯᒥᓯᑲᐋᐧᐟ ᐅᒋᐋᐧᒪ.
[29] ᑭ ᐃᐦᑖᐊᐧᐠ ᒫᑲ ᑌᐸᑯᑊ ᐁ ᐅᒋᐋᐧᒥᑐᒋᐠ; ᐁᑯᓯ ᐊᓇ ᓂᐢᑕᑦ ᑭ ᐃᐧᐃᐧᐤ, ᐁ ᑭ ᓂᐱᐟ ᒫᑲ ᐁᑳ ᐁ ᐅᐟ ᐊᐋᐧᓯᒥᓯᐟ;
[30] ᐁᑯᓯ ᐃᐧᐢᑕ ᐊᓇ ᐁ ᐊᐢᑳᐧᑫᐟ;
[31] ᒥᓇ ᐊᓇ ᑯᑕᐠ ᐁᑲᐧ ᓂᐢᑐ ᑭ ᐅᑎᓀᐤ; ᐁᑯᓯ ᐱᔨᐢ ᑲᐦᑭᔭᐤ ᐊᓂᑭ ᑌᐸᑯᑊ ᑭ ᐊᔭᐁᐧᐊᐧᐠ, ᐁᑳ ᒫᑲ ᐁ ᐅᐟ ᐊᐋᐧᓯᒥᓯᒋᐠ, ᐃᐧᐢᑕᐋᐧᐤ ᐁ ᑭ ᓂᐱᒋᐠ.
[32] ᐃᐢᑲᐧᔭᐨ ᒫᑲ ᐃᐧᐢᑕ ᐊᓇ ᐃᐢᑫᐧᐤ ᑭ ᓂᐱᐤ.
[33] ᐃᐢᐱ ᒫᑲ ᐊᐧᓂᐢᑳᓂᐊᐧᑭ ᓂᐳᐃᐧᓂᕽ ᐅᐦᒋ ᐊᐁᐧᓇ ᑫ ᐃᐧᐃᐧᐟ ᐅᐦᐃ? ᒋᑫᒪ ᐁ ᐃᐦᑕᓯᒋᐠ ᑌᐸᑯᑊ ᑭ ᐊᔮᐁᐧᐊᐧᐠ ᐁ ᐃᐧᐃᐧᒋᐠ.
[34] ᐁᑯᓯ ᒋᓴᐢ ᑭ ᐃᑌᐤ, ᑳ ᐅᐟ ᐊᐋᐧᓯᒥᓯᒥᑯᒋᐠ ᐅᒪ ᐊᐢᑭ ᐃᐧᐃᐧᐊᐧᐠ, ᒥᓇ ᒣᑭᓈᓂᐊᐧᐣ ᐃᐧᑭᑐᐃᐧᓂᕽ:
[35] ᒫᑲ ᐊᓂᑭ ᑳ ᐃᐢᐱᑌᔨᒥᒋᐠ ᑭᑕ ᐊᔮᒋᐠ ᓀᒪ ᑯᑕᐠ ᐊᐢᑭ, ᒥᓇ ᐊᐧᓂᐢᑳᐃᐧᐣ ᓂᐳᐃᐧᓂᕽ ᐅᐦᒋ, ᓇᒪᐃᐧᔭ ᐃᐧᑭᑐᐊᐧᐠ, ᐊᐦᐳ ᐃᐧᑭᑕᐃᐁᐧᐊᐧᐠ:
[36] ᒥᓇ ᓇᒪᐃᐧᔭ ᑭᑖᐧᑦ ᑭᑕ ᑭ ᓂᐱᐊᐧᐠ: ᐊᔨᐢ ᐃᐧᒋ ᐃᐢᐱᑌᔨᑖᑯᓯᒣᐊᐧᐠ ᐅᑭᓯᑯᐊᐧ; ᒥᓇ ᐅᑯᓯᓯᒥᑲᐧᐠ ᑭᓭᒪᓂᑐᐊᐧ, ᐁ ᐅᑯᓯᓯᒥᑯᒋᐠ ᐋᐱᓯᓯᓄᐃᐧᐣ.
[37] ᒫᑲ ᐅᓂᐱᐊᐧᐠ ᑭᑕ ᐊᐧᓂᐢᑳᓂᐦᒋᐠ, ᐊᐦᐳ ᒧᓯᐢ ᑭ ᐋᐧᐸᐦᑕᐦᐃᐁᐧᐤ, ᐊᓂᑕ ᐁ ᐋᑐᑕᒥᕽ ᐁ ᐱᐢᑯᑯᐹᕽ, ᐃᑕ ᐁ ᐃᓯᔨᐦᑳᑖᐟ ᑳ ᑎᐯᔨᐦᒋᑫᔨᐟ, ᐅ ᑭᓭᒪᓂᑐᒪ ᐁᑊᕒᐁᐋᑦ, ᒥᓇ ᐅ ᑭᓭᒪᓂᑐᒪ ᐊᐃᓴᐠ, ᒥᓇ ᐅ ᑭᓭᒪᓂᑐᒪ ᒉᑲᑊ.
[38] ᒋᑫᒪ ᓇᒪᐃᐧᔭ ᐅ ᑭᓭᒪᓂᑐᒥᒥᐠ ᐅᓂᐱᐊᐧ, ᒫᑲ ᐅᐱᒫᑎᓯᐊᐧ; ᐃᐧᔭ ᑲᐦᑭᔭᐤ ᐁ ᐱᒫᑎᓯᐢᑖᑯᐠ.
[39] ᐁᑯᓯ ᐋᑎᐦᐟ ᒪᓯᓇᐦᐃᑫᐃᐧᔨᓂᐊᐧ ᐁ ᓇᐢᑫᐧᐊᐧᓯᒥᑯᐟ ᑭ ᐃᑎᐠ, ᐅᑭᐢᑭᓄᐦᐊᒫᑫᐤ ᑲᐧᔭᐢᐠ ᑭ ᑭ ᐃᑖᐧᐣ.
[40] ᐁᑯᐢᐱ ᐅᐦᒋ ᒫᑲ ᑭ ᓵᑫᐧᔨᒧᐊᐧᐠ ᐊᐊᐧᓯᒣ ᑫᑲᐧᐩ ᑭᑕ ᑲᑫᐧᒋᒫᒋᐠ.
[41] ᑭ ᐃᑌᐤ ᒫᑲ, ᑖᓀᑭ ᐁᐧᒋ ᐃᑌᐧᒋᐠ ᙭ ᐁᐊᐧᑯ ᑌᐱᐟ ᐅᑯᓯᓴ?
[42] ᒋᑫᒪ ᑌᐱᐟ ᐃᐧᔭ ᑫᐦᒋᐋᐧᐠ ᐃᑌᐧᐤ ᓂᑲᒧᐃᐧ ᒪᓯᓇᐦᐃᑲᓂᕽ, ᑳ ᑎᐯᔨᐦᒋᑫᐟ ᑭ ᐃᑌᐤ ᓂ ᑎᐯᔨᐦᒋᑫᒪ, ᐊᐱ ᓂ ᑭᐦᒋᓂᐢᑭᕽ,
[43] ᐃᔨᑯᕽ ᑭ ᐃᓯᐊᑲᐧᐃᐧ ᑳ ᐸᑳᐧᑎᐢᑭᐠ ᑭᑕ ᐅᐟ ᐊᐢᐱᓯᑌᓯᒧᓂᔭᐣ.
[44] ᑌᐱᐟ ᒫᑲ ᓂ ᑎᐯᔨᐦᒋᑫᑦ ᐃᓯᔨᐦᑳᑌᐤ, ᑖᓂᓯ ᒫᑲ ᐁᓯ ᐅᑯᓯᓯᐟ?
[45] ᐁᑯᓯ ᐁ ᐯᑖᑯᐟ ᑲᐦᑭᔭᐤ ᐊᔨᓯᔨᓂᐊᐧ, ᑭ ᐃᑌᐤ ᐅᑭᐢᑭᓄᐊᒪᐋᐧᑲᓇ,
[46] ᐊᐢᐁᐧᔨᒥᑯᐠ ᒪᓯᓇᐦᐃᑫᐃᐧᔨᓂᐊᐧᐠ, ᐊᓂᑭ ᑳ ᐃᐧ ᐱᒧᐦᑌᒋᐠ ᐁ ᑭᓈᐧᐯᑲᓵᑫᒋᐠ, ᒥᓇ ᑳ ᓵᑭᑖᒋᐠ ᐊᑕᒥᐢᑯᑖᑐᐃᐧᓇ ᐊᑖᑐᐃᐧᓂᕽ, ᒥᓇ ᓂᔨᑳᓀᔨᑖᑲᐧᓂᔨᑭ ᐊᐱᐃᐧᓇ ᐊᔭᒥᐦᐁᐃᐧᑲᒥᑯᕽ, ᒥᓇ ᐁ ᓂᑳᓀᔨᑖᑲᐧᓂᔨᑭ ᐊᐱᐃᐧᓇ ᐃᐧᐦᑯᐦᑐᐃᐧᓂᕽ;
[47] ᐊᓂᑭ ᑳ ᓂᓯᐊᐧᓈᒋᑖᒋᐠ ᐃᐧᑭᔨᐊᐧ ᓯᑲᐃᐧᐢᑫᐧᐊᐧ, ᑭᑕ ᐋᐧᐸᒥᐦᒋ ᒫᑲ ᑳᑭᓀᐧᐢ ᑳ ᐊᔭᒥᐦᐋᒋᐠ; ᐁᐊᐧᑲᐧᓂᐠ ᐅᑭ ᐊᐊᐧᓯᒣ ᒪᒋ ᐃᑕᑭᒥᑯᐃᐧᐣ ᑫ ᐊᔮᒋᐠ.