[1] ᐁᑯᐢᐱ ᐋᑎᐦᐟ ᐁᑯᑕ ᑭ ᐊᔭᐊᐧᐠ, ᐁ ᑭ ᐋᒋᒧᐢᑖᑯᐟ ᐊᓂᐦᐃ ᑳᓬᐊᓬᐃᐊᓇ ᐅ ᒥᑯᔨᐤ ᐸᐃᓬᐊᐟ ᑳ ᑭ ᑭᑭᐸᔨᑖᐟ ᐅ ᒪᒍᐢᑌᐊᒫᑫᐃᐧᓂᔨᕽ.
[2] ᐁᑯᓯ ᒋᓴᐢ ᐁ ᓇᐢᑫᐧᐊᐧᓯᒫᐟ, ᑭ ᐃᑌᐤ, ᑭᐟ ᐃᑌᔨᑌᓈᐋᐧᐤ ᒋ ᐅᑭ ᑲᓬᐊᓬᐃᐊᓇᐠ ᐊᐊᐧᓯᒣ ᐁ ᑭ ᒪᒑᔨᐃᐧᒋᐠ ᐃᐢᐱᐨ ᑲᐦᑭᔭᐤ ᑳᓬᐊᓬᐃᐊᓇᐠ, ᑳ ᐅᐦᒋ ᐅᒪ ᑭ ᐃᓯ ᑲᑳᐧᑕᑭᐦᐃᐦᒋᐠ?
[3] ᑭ ᐃᐧᐦᑕᒫᑎᓈᐋᐧᐤ, ᓇᒪᐃᐧᔭ; ᒫᑲ ᑭᐢᐱᐣ ᐁᑳ ᑫᐧᐢᑳᑎᓯᔦᑯ, ᐁᑯᓯ ᒣᐧᐦᒋ ᑲᐦᑭᔭᐤ ᑫ ᐃᓯ ᓂᓯᐊᐧᓈᑎᓯᔦᐠ.
[4] ᐊᐦᐳ ᒥᓇ ᐊᓂᑭ ᐊᔨᓇᓀᐅᓵᑊ, ᑳ ᑭ ᑕᓱᐃᑯᒋᐠ ᐊᓴᐋᐧᐱᐃᐧᑲᒥᐠ ᓴᐃᓬᐅᐊᒥᕽ ᐁᑯᓯ ᑳ ᑭ ᓂᐸᐃᑯᒋᐠ, ᐊᐊᐧᓯᒣ ᒋ ᑭ ᒪᒑᑎᓯᐊᐧᐠ ᑭᐟ ᐃᑌᔨᑌᓈᐋᐧᐤ ᐃᐢᐱᐨ ᑲᐦᑭᔭᐤ ᐊᔨᓯᔨᓂᐊᐧᐠ ᒉᕒᐅᓴᓬᐊᒥᕽ ᑳ ᐊᔮᒋᐠ?
[5] ᑭ ᐃᐧᐦᑕᒫᑎᓈᐋᐧᐤ, ᓇᒪᐃᐧᔭ, ᒫᑲ ᑭᐢᐱᐣ ᐁᑳ ᑫᐧᐢᑳᑎᓯᔦᑯ, ᐁᑯᓯ ᑲᐦᑭᔭᐤ ᑭᐢᑕᐋᐧᐤ ᑫ ᐃᓯ ᓂᓯᐊᐧᓈᑎᓯᔦᐠ.
[6] ᑭ ᐃᐧᐦᑕᑦ ᒫᑲ ᒥᓇ ᐅᒪ ᐋᐁᐧᒋᑲᐣ, ᐯᔭᐠ ᐊᔨᓯᔨᓂᐤ ᑭ ᐊᔮᐁᐧᐤ ᒥᓂᓵᑎᑲᐧ ᐁ ᑭ ᑭᐢᑎᑳᑎᒥᐦᐟ ᐅ ᓱᒥᓂᑭᐢᑎᑲᓂᕽ, ᐁᑯᓯ ᑭ ᐯ ᓇᑕᐋᐧᐯᓂᑫᐤ ᑭᑕ ᒥᓂᓯᐃᐧᔨᐟ; ᒫᑲ ᓇᒪ ᑫᑲᐧᐩ ᑭ ᒥᐢᑲᑦ.
[7] ᐁᑯᓯ ᑭ ᐃᑌᐤ ᐊᓂᐦᐃ ᑳ ᑲᓇᐁᐧᔨᑕᒥᔨᐟ ᐅ ᓱᒥᓂᑭᐢᑎᑳᐣ, ᒋᐢᐟ, ᐁᑲᐧ ᓂᐢᑐ ᐊᐢᑭ ᐁ ᐯ ᓇᑕᐋᐧᐯᓂᑫᔮᐣ ᑭᑕ ᒥᓂᓯᐃᐧᐟ ᐊᐊᐧ ᒥᓂᓵᑎᐠ, ᐁᑯᓯ ᓇᒪ ᑫᑲᐧᐩ ᓂ ᒥᐢᑫᐣ: ᑭᐢᑲᑕᐦ; ᑖᓀᑭ ᐁᐧᒋ ᐅᑕᒥᐢᑲᕽ ᐊᐢᑭ?
[8] ᐁᑯᓯ ᐁ ᓇᐢᑫᐧᐊᐧᓯᒥᑯᐟ ᑭ ᐃᑎᐠ, ᑳ ᑎᐯᔨᐦᒋᑫᔭᐣ, ᑭᔮᑦ ᑫᔮᐱᐨ ᐯᔭᐠ ᐊᐢᑭ ᓴᓯᐯᔨᑕᒧᑲᑕᐤ, ᐱᑕ ᓂ ᑲ ᐋᐧᐢᑲ ᐋᐧᑎᑳᑕᐤ ᒥᓇ ᒧᐢᑐᓵᐧᔭ ᓂ ᑲ ᐊᐢᑖᐣ:
[9] ᑭᐢᐱᐣ ᒫᑲ ᒥᓂᓯᐃᐧᒋ, ᑭᑕ ᒥᔮᐧᓯᐣ; ᒫᑲ ᑭᐢᐱᐣ ᐁᑳ ᒥᓂᓯᐃᐧᒋ, ᑭᔮᑦ ᑭᐢᑲᑕᐋᐧᑲᐣ.
[10] ᑭ ᑭᐢᑭᓄᐦᐊᒫᑫᐤ ᒫᑲ ᐯᔭᐠ ᐊᔭᒥᐦᐁᐃᐧᑲᒥᑯᕽ ᐁ ᐊᔭᒥᐦᐁᑭᓯᑳᔨᐠ.
[11] ᐁᑯᓯ ᐳᑎ ᐯᔭᐠ ᐃᐢᑫᐧᐤ ᐁᑯᑕ ᑭ ᐊᔮᐤ, ᐁ ᑭ ᑭᑭᐢᑳᑯᐟ ᓀᓱᐃᐧ ᐊᐦᒑᐦᑲᐧ ᐊᔨᓈᓀᐅᓵᑊ ᑕᐦᑐ ᐊᐢᑭ; ᒥᑐᓂ ᐁ ᑭ ᐊᐧᑭᓯᐟ ᒥᓇ ᐁᑳ ᐁ ᑭ ᑲᐢᑭᑕᐟ ᑭᑕ ᑕᓱᑳᐸᐃᐧᐟ.
[12] ᐃᐢᐱ ᒫᑲ ᒋᓴᐢ ᐃᐧᔮᐸᒫᐟ, ᑭ ᓇᑐᒣᐤ, ᒥᓇ ᑭ ᐃᑌᐤ, ᐃᐢᑫᐧᐤ, ᑭᐟ ᐋᐸᐅᑲᐃᐧᐣ ᑭ ᓀᓱᐃᐧᓯᐃᐧᓂᕽ ᐅᐦᒋ.
[13] ᐁᑯᓯ ᑭ ᓵᒥᓀᐤ; ᓭᒫᐠ ᒫᑲ ᑭ ᑕᓱᐊᔮᐤ, ᑭ ᒪᒥᒋᒣᐤ ᒫᑲ ᑭᓭᒪᓂᑐᐊᐧ.
[14] ᐁᑯᓯ ᑌᐯᔨᑕᕽ ᐊᔭᒥᐦᐁᐃᐧᑲᒥᐠ, ᐁ ᓇᔦᑖᐁᐧᔨᑕᕽ ᒋᓴᓴ ᐁ ᑭ ᐃᔨᓂᑲᐃᐁᐧᔨᐟ ᐁ ᐊᔭᒥᐦᐁᑭᓯᑳᔨᐠ, ᑭ ᐃᑌᐤ ᐊᔨᓯᔨᓂᐊᐧ, ᐊᔮᐊᐧ ᓂᑯᑕᐧᓯᐠ ᑭᓯᑳᐊᐧ ᐃᑕ ᐊᔨᓯᔨᓂᐊᐧᐠ ᑭᑕ ᐊᑐᐢᑫᒋᐠ, ᐁᑯᑕ ᐯ ᐃᑐᐦᑌᐠ ᑭᑕ ᐃᔨᓂᑲᐃᑲᐃᐧᔦᐠ, ᒫᑲ ᓇᒪᐃᐧᔭ ᐁ ᐊᔭᒥᐦᐁᑭᓯᑲᐠ.
[15] ᑳ ᑎᐯᔨᐦᒋᑫᐟ ᒫᑲ ᑭ ᓇᐢᑫᐧᐊᐧᓯᒣᐤ, ᒥᓇ ᑭ ᐃᑌᐤ, ᑭᔭ ᐅᑕᔭᒥᐦᐁᑳᓱ, ᓇᒪ ᒋ ᑲᐦᑭᔭᐤ ᐊᐃᐧᔭᐠ ᐁᑕᓯᔦᐠ ᐊᐸᐁᐧᐤ ᐅᐟ ᐊᔭᐯᒪ ᐊᐦᐳ ᐅᑌᒪ ᐃᑕ ᐊᓂᒪ ᐁ ᓴᑲᐱᓱᔨᐟ, ᒥᓇ ᐃᑖᐯᑭᓀᐤ ᑭᑕ ᒥᓂᑫᐧᔨᐟ?
[16] ᓇᒪ ᒋ ᒫᑲ ᐊᐊᐧ ᐃᐢᑫᐧᐤ ᐁ ᐅᑕᓂᓯᐟ ᐁᑊᕒᐁᐊᑦ. ᐁ ᑭ ᒪᒫᒋᑳᐧᐱᑎᑯᐟ ᓭᑕᓇ ᐊᔨᓈᓀᐅᓴᑊ ᐊᐢᑭ, ᐃᑕᐢᑌᐤ ᑭᑕ ᐋᐸᐅᐦᐟ ᐅ ᒪᒫᒋᑲᐧᐱᑎᑯᐃᐧᓂᕽ ᐅᐦᒋ, ᐋᑕ ᐁ ᐊᔭᒥᐦᐁᑭᓯᑳᔨᐠ?
[17] ᐁᑯᓯ ᐃᐢᐱ ᐅᒪ ᑳ ᐃᑌᐧᐟ, ᑲᐦᑭᔭᐤ ᐊᓂᐦᐃ ᑳ ᐊᓀᐧᔨᒥᑯᐟ ᑭ ᓀᐯᐃᐧᓯᔨᐊᐧ; ᒥᓇ ᑲᐦᑭᔭᐤ ᐊᔨᓯᔨᓂᐊᐧᐠ ᑭ ᒥᔭᐋᐧᑕᒪᐧᐠ ᐊᓂᐦᐃ ᐅᐦᒋ ᑲᐦᑭᔭᐤ ᑫᑲᐧᔭ ᐁ ᑭᐢᑌᔨᑖᑲᐧᓂᔨᑭ ᑳ ᑭ ᑐᑕᒥᔨᐟ.
[18] ᐁᑯᓯ ᒫᑲ ᑭ ᐃᑌᐧᐤ, ᑖᓂᓯ ᒫᑲ ᐁᑖᐸᒥᓇᑲᐧᕽ ᑭᓭᒪᓂᑐ ᐅᐟ ᐅᑌᓇᐃᐧᐃᐧᐣ? ᒥᓇ ᑖᓂᓯ ᑫ ᐃᓯ ᐋᐁᐧᑖᔮᐣ?
[19] ᐃᑌᔨᑖᑲᐧᐣ ᑖᐱᐢᑯᐨ ᐯᔭᑯᒥᐣ ᐊᐢᐸᒋᑲᓂ ᑭᐢᑎᑳᓂᐢ, ᓈᐯᐤ ᑳ ᑭ ᐅᑎᓇᕽ, ᐁᑯᓯ ᐁ ᑭ ᐃᓯ ᐁᐧᐱᓇᕽ ᐅ ᑭᐢᑎᑳᓂᕽ; ᐁ ᑭ ᐅᐱᑭᕽ ᒫᑲ, ᐁᑯᓯ ᐁ ᑭ ᑭᐦᒋ ᒥᐢᑎᑯᐊᐧᕽ; ᐱᔦᓯᓴᐠ ᒫᑲ ᐃᐢᐱᒥᕽ ᑳ ᐸᐹᒥᔮᒋᐠ ᐁ ᑭ ᑌᐧᐦᐅᒋᐠ ᐁ ᓯᓭᐧᐸᑭᐠ.
[20] ᐁᑲᐧ ᒥᓇ ᑭ ᐃᑌᐧᐤ, ᑖᓂᓯ ᑫ ᐃᓯ ᐋᐁᐧᑖᔮᐣ ᑭᓭᒪᓂᑐ ᐅᐟ ᐅᑌᓇᐃᐧᐃᐧᐣ?
[21] ᐃᑌᔨᑖᑲᐧᐣ ᑖᐱᐢᑯᐨ ᐅᐦᐱᐦᒋᒋᑲᐣ, ᐃᐢᑫᐧᐤ ᑳ ᑭ ᐅᑎᓇᕽ, ᐁᑯᓯ ᑳ ᑭ ᐊᐢᑖᐟ ᓂᐢᑐ ᑳᐧᐸᐃᑳᐣ ᐸᑫᐧᓯᑲᓂᕽ, ᐱᔨᐢ ᒥᓯᐁᐧ ᐁ ᐱᐢᐁᐧᐸᔨᔨᐟ.
[22] ᐁᑯᓯ ᑭ ᐊᑎ ᓵᐳᐱᒧᑌᐤ ᐅᑌᓈᕽ ᒥᓇ ᑭᐢᑕᐱᐃᐧᓂᕽ, ᐁ ᑭᐢᑭᓄᐦᐊᒫᑫᐟ ᒉᕒᐅᓴᓬᐊᒥᕽ ᐁ ᐊᑎ ᐃᑐᐦᑌᐟ.
[23] ᐯᔭᐠ ᒫᑲ ᑭ ᐃᑎᐠ, ᑌᐯᔨᐦᒋᑫᔭᐣ, ᒐᑲᐋᐧᓯᓯᐊᐧᐠ ᒋ ᑫ ᐱᒫᒋᐃᒋᐠ? ᐁᑯᓯ ᑭ ᐃᑌᐤ,
[24] ᐋᐦᑲᒣᔨᒧᐠ ᑭᑕ ᐱᐦᑐᑫᔦᐠ ᑳ ᐊᐱᐢᒋᑕᐋᐧᐠ ᐃᐢᑳᐧᑌᑦ: ᒋᑫᒪ ᒥᐦᒉᑎᐊᐧᐠ, ᑭᐟ ᐃᑎᓈᐃᐧᐤ ᑫ ᑲᑫᐧ ᐱᐦᑐᑫᒋᐠ, ᒫᑲ ᓇᒪᐃᐧᔭ ᑭᑕ ᑲᐢᑭᑖᐊᐧᐠ.
[25] ᐃᐢᐱ ᑳ ᑎᐯᔨᑕᕽ ᐋᐧᐢᑲᐃᑲᐣ ᐹᑲᒋ ᐸᓯᑯᒋ, ᐁᑯᓯ ᑭᐸᐊᑭ ᐃᐢᑳᐧᑌᑦ, ᑭᔭᐃᐧᐤ ᒫᑲ ᒫᒋ ᓂᐸᐃᐧᔦᑯ ᐊᐧᔭᐃᐧᑎᒥᕽ, ᐸᑲᒪᐊᒣᑯ ᒫᑲ ᐃᐢᑳᐧᑌᑦ, ᐁ ᐃᑌᐧᔦᐠ, ᑌᐯᔨᐦᒋᑫᔭᐣ, ᑌᐯᔨᐦᒋᑫᔭᐣ, ᔪᑌᓇᒪᐃᐧᓈᐣ; ᐁᑯᓯ ᑭ ᑲ ᓇᐢᑫᐧᐊᐧᓯᒥᑯᐋᐧᐤ ᒥᓇ ᑭ ᑲ ᐃᑎᑯᐋᐧᐤ, ᓇᒪᐃᐧᔭ ᑭ ᑭᐢᑫᔨᒥᑎᓈᐋᐧᐤ ᑕᓂᑌ ᐁᐧᒋᔦᐠ;
[26] ᐁᑯᓯ ᑭ ᑲ ᒫᒋ ᐃᑖᐧᓈᐋᐧᐤ, ᓂ ᑭ ᒥᒋᓱᓈᐣ ᒥᓇ ᓂ ᑭ ᒥᓂᑳᐧᓈᐣ ᐁ ᐋᐧᐸᒥᔮᕽ, ᒥᓇ ᑭ ᑭ ᑭᐢᑭᓄᐦᐊᒫᑳᐣ ᓂ ᐱᒧᐦᑌᐢᑲᓈᓇᕽ;
[27] ᒫᑲ ᑭᑕ ᐃᑌᐧᐤ, ᑭᐟ ᐃᑎᓈᐋᐧᐤ, ᓇᒪᐃᐧᔭ ᓂ ᑭᐢᑫᔨᑌᐣ ᑖᓂᑌ ᐁᐧᒋᔦᐠ; ᓇᑲᓯᐠ, ᑲᐦᑭᔭᐤ ᑭᔭᐋᐧᐤ ᑳ ᐊᑐᐢᑳᑕᒣᐠ ᒪᒋᐃᑎᐃᐧᐣ.
[28] ᑭᑕ ᐃᐦᑕᑲᐧᐣ ᒫᑐᐃᐧᐣ ᒥᓇ ᑭᒋᐢᑳᐱᑌᐃᐧᐣ, ᐃᐢᐱ ᐋᐧᐸᒫᔦᑳᐧᐃᐧ ᐁᑊᕒᐁᐋᑦ; ᒥᓇ ᐋᐃᓴᐠ, ᒥᓇ ᒉᑲᑊ, ᐋᓯᒋ ᑲᐦᑭᔭᐤ ᐅᑭᐢᑭᐁᐧᐦᐃᑫᐊᐧᐠ, ᐅᐟ ᐅᑌᓇᐃᐧᐃᐧᓂᕽ ᑭᓭᒪᓂᑐ, ᐁᑯᓯ ᑭᔭᐋᐧᐤ ᐁ ᐊᐧᔭᐃᐧ ᐁᐧᐱᓂᑲᐃᐧᔭᐠ.
[29] ᑭᑕ ᐯ ᐃᑐᐦᑌᐊᐧᐠ ᒫᑲ ᐊᐧᐸᓄᑕᕽ ᐅᐦᒋ ᒥᓇ ᓀᑲᐯᐊᓄᕽ ᐅᐦᒋ, ᒥᓇ ᑭᐁᐧᑎᓄᕽ ᒥᓇ ᓵᐊᐧᓄᑖᕽ ᐅᐦᒋ, ᐁᑯᓯ ᑭᑕ ᓇᐦᐊᐱᐊᐧᐠ ᐅᐟ ᐅᑌᓇᐃᐧᐃᐧᓂᕽ ᑭᓭᒪᓂᑐ.
[30] ᐁᑯᓯ ᒫᑲ ᒋᐢᐟ, ᐊᔭᐊᐧᐠ ᐅᑖᓇᕽ ᑫ ᓂᑳᓂᒋᐠ, ᒥᓇ ᐊᔭᐊᐧᐠ ᓂᑳᐣ ᐊᓂᑭ ᐅᑖᓇᕽ ᑫ ᐊᔮᒋᐠ.
[31] ᐁᐊᐧᑲᐧᓂᒪ ᒣᐧᐦᒋ ᑎᐸᐃᑲᐣ, ᑭ ᐯ ᐃᑐᐦᑌᔨᐊᐧ ᐋᑎᐦᐟ ᐹᕒᐊᓯᐊᐧ, ᐁ ᐃᑎᑯᐟ, ᐊᐧᔭᐃᐧ ᒥᓇ ᐅᐱᒣ ᐃᑐᐦᑌ; ᒋᑫᒪ ᐁᕒᐊᐟ ᑭ ᓄᐦᑌ ᓂᐸᐦᐃᐠ.
[32] ᐁᑯᓯ ᑭ ᐃᑌᐤ, ᓂᔭᐠ ᒥᓇ ᐃᑎᕽ ᐊᓇ ᒪᑫᓯᐢ, ᒋᐢᐟ, ᓂ ᐊᐧᔭᐃᐧᐁᐧᐱᓈᐊᐧᐠ ᒪᒋ ᐊᐦᒑᐦᑲᐧᐠ ᒥᓇ ᓂᐟ ᐃᑐᑌᐣ ᐃᔨᓂᑲᐃᐁᐧᐃᐧᓇ ᐊᓄᐦᐨ ᑳ ᑭᓯᑳᐠ ᒥᓇ ᐋᐧᐸᐦᑭ, ᐊᑎ ᓂᐢᑐ ᑭᓯᑳᑭ ᒫᑲ ᓂ ᑲ ᑭᓯᐃᑯᐃᐧᓯᐣ,
[33] ᐁᔨᐁᐧᕽ ᒫᑲ, ᐃᑕᐢᑌᐤ ᑭᑕ ᐱᒧᐦᑌᔮᐣ ᐊᓄᐦᐨ ᑳ ᑭᓯᑳᐠ ᒥᓇ ᐋᐧᐸᐦᑭ, ᒥᓇ ᐊᐊᐧᓯᐋᐧᐸᑭ; ᐊᔨᐢ ᓇᒪᐃᐧᔭ ᑭᑕ ᑭ ᐃᑭᕽ ᐅᑭᐢᑭᐁᐧᐦᐃᑫᐤ ᑭᑕ ᓂᐱᐟ ᐊᐧᔭᐃᐧᑎᒫᔨᕽ ᒉᕒᐅᓴᓬᐊᒥᕽ.
[34] ᐋ ᒉᕒᐅᓴᓬᐊᑦ. ᒉᕒᐅᓴᓬᐊᑦ ᑳ ᓂᐸᐊᒋᐠ ᐅᑭᐢᑭᐁᐧᐦᐃᑫᐊᐧᐠ, ᒥᓇ ᑳ ᑭ ᐸᐱᒪᐧᓯᓈᑕᒋᐠ ᐊᓂᑭ ᑳ ᐃᓯᑎᓴᐊᒫᑲᐃᐧᔭᐣ; ᑖᓂᔨᑯᕽ ᒥᐦᒉᑖᐧᐤ ᓂ ᑲ ᑭ ᒫᐊᐧᓴᑯᓈᑕᔭᐠ ᑭᐟ ᐊᐋᐧᓯᒥᓴᐠ, ᑖᐱᐢᑯᐨ ᒥᓯᔦᐤ ᑳ ᐃᓯ ᒫᐊᐧᓴᑯᓈᐟ ᐅᐟ ᐊᔨᓯᓯᒪ ᓯᐹ ᐅᑕᑕᑲᐧᓂᕽ, ᒫᑲ ᓇᒪᐃᐧᔭ ᑭ ᑭ ᐃᑌᔨᑌᐣ?
[35] ᒫᑎᑲ, ᑭᑭ ᑭ ᓇᑲᑕᒫᑲᐃᐧᐣ ᐁ ᓂᓯᐊᐧᓈᑕᕽ, ᒥᓇ ᒫᑲ ᑖᐯᐧ ᑭᐟ ᐃᑎᓈᐋᐧᐤ, ᓇᒪᐃᐧᔭ ᑭ ᑲ ᐋᐧᐸᒥᓈᐋᐧᐤ, ᐹᑎᒪ ᐅᑎᐦᒋᐸᔨᑭ ᐊᓂᒪ ᐃᑕ ᑫ ᐃᑌᐧᔦᐠ, ᓴᐁᐧᔨᑖᑯᓯᐤ ᐊᓇ ᑳ ᐯ ᐃᑐᐦᑌᐟ ᐅ ᐃᐧᔪᐃᐧᓂᔨᕽ ᑳ ᑎᐯᔨᐦᒋᑫᔨᐟ.