[1] ᐁᑯᓯ ᒋᓴᐢ ᐁ ᓴᑲᐢᑭᓀᐢᑲᑯᐟ ᑲᓈᒋ ᐊᐦᒑᐦᑲᐧ, ᑭ ᐯ ᑭᐁᐧᐤ ᒑᕒᑕᓂᕽ ᐅᐦᒋ, ᐱᑲᐧᑕᐢᑭᕽ ᒫᑲ ᐁ ᑭ ᐃᑐᑕᐦᐃᑯᐟ ᐊᐦᒑᐦᑲᐧ.
[2] ᓀᒥᑕᓇᐤ ᑭᓯᑳᐊᐧ ᐁ ᑭ ᑯᑌᔨᒥᑯᐟ ᒪᒋ ᐊᐦᒑᐦᑲᐧ. ᐁᑯᐢᐱ ᓇᒪ ᑫᑲᐧᐩ ᑭ ᒥᒋᐤ: ᐃᐢᐱ ᒫᑲ ᐁᐊᐧᑲᐧᓂ ᑭᓯᑳᐊᐧ ᑳ ᐳᓂᐸᔨᑭ ᑭ ᓄᑌᑲᑌᐤ.
[3] ᐁᑯᓯ ᒫᑲ ᒪᒋ ᐊᐦᒑᐦᑲᐧ ᑭ ᐃᑎᐠ, ᑭᐢᐱᐣ ᑭ ᑭᓭᒪᓂᑐᐃᐧ ᑯᓯᓭᓂᐃᐧᐣ, ᐃᑕᓱᐁᐧ ᐊᐊᐧ ᐊᓯᓂ ᑭᑕ ᐸᑫᐧᓯᑲᓂᐃᐧᐟ.
[4] ᐁᑯᓯ ᒋᓴᐢ ᑭ ᓇᐢᑫᐧᐊᐧᓯᒣᐤ ᐁ ᐃᑖᐟ, ᐃᑕᓯᓇᐦᐃᑳᑌᐤ, ᐊᔨᓯᔨᓂᐤ ᓇᒪᐃᐧᔭ ᐸᑫᐧᓯᑲᓇ ᐱᑯ ᑭᑕ ᐅᐦᒋ ᐱᒫᑎᓯᐤ.
[5] ᐁᑯᓯ ᒪᒋ ᐊᐦᒑᐦᑲᐧ ᐁ ᐋᒪᒋᐁᐧᑕᐦᐃᑯᐟ ᐊᐧᒋᕽ ᐁ ᐃᐢᐹᔨᐠ, ᑭ ᐋᐧᐸᐦᑕᐃᐠ ᑲᐦᑭᔭᐤ ᐅᑌᓇᐊᐧ ᐊᐢᑭᕽ, ᐯᔭᐠ ᐸᓴᑳᐱᐃᐧᐣ ᐃᔨᑯᕽ.
[6] ᐁᑯᓯ ᒪᒋ ᐊᐦᒑᐦᑲᐧ ᑭ ᐃᑎᐠ, ᑲᐦᑭᔭᐤ ᐅᒪ ᐅᑭᒫᐃᐧᐃᐧᐣ ᑭ ᑲ ᒥᔨᑎᐣ ᒥᓇ ᐁ ᐃᓯ ᑭᐢᑌᔨᑖᑲᐧᕽ; ᒋᑫᒪ ᓂ ᑭ ᐸᑭᑎᓇᒪᑲᐃᐧᐣ; ᒥᓇ ᐱᑯ ᐊᐃᐧᔭᐠ ᑫ ᐃᑌᔨᑕᒫᐣ ᓂ ᑲ ᒥᔭᐤ.
[7] ᑭᐢᐱᐣ ᒫᑲ ᐅᒋᐦᒋᐦᑲᐧᓇᐱᐢᑕᐃᐧᔭᓂ, ᑲᐦᑭᔭᐤ ᑭᔭ ᑭ ᑲ ᐊᔮᐣ.
[8] ᐁᑯᓯ ᒋᓴᐢ ᑭ ᓇᐢᑫᐧᐊᐧᓯᒣᐧᐤ ᒥᓇ ᑭ ᐃᑌᐤ, ᐃᑕᓯᓇᐦᐃᑳᑌᐤ, ᑭ ᑲ ᐅᒋᐦᒋᐦᑲᐧᓇᐱᐢᑕᐋᐧᐤ ᑳ ᑎᐯᔨᐦᒋᑫᐟ ᑭ ᑭᓭᒪᓂᑐᑦ ᒥᓇ ᐃᐧᔭ ᐱᑯ ᑭ ᑲ ᐊᑐᐢᑲᐋᐧᐤ.
[9] ᐁᑯᓯ ᑭ ᐯᓯᐁᐧᐤ ᒉᕒᐅᓴᓬᐊᒥᕽ ᒥᓇ ᐁ ᑭ ᐊᔮᐟ ᑕᑯᐦᐨ ᑭᐦᒋ ᐊᔭᒥᐦᐁᐃᐧᑲᒥᑯᕽ ᐁ ᑭ ᐃᑖᐟ ᒫᑲ, ᑭᐢᐱᐣ ᑭᔭ ᑭᓭᒪᓂᑐ ᐅᑯᓯᓴ ᓂᒋᐸᔨᐦᐅ ᐁᑯᑕ ᐅᐦᒋ.
[10] ᒋᑫᒪ ᐃᑕᓯᓇᐦᐃᑳᑌᐤ, ᑭᑕ ᐊᔮᑳᐧᒥᒣᐤ ᐅᑭᓯᑯᒪ ᑭᔭ ᐅᐦᒋ, ᑭᑕ ᑲᓇᐁᐧᔨᒥᐢᑭᐠ,
[11] ᐁᑯᓯ ᒫᑲ ᐅᒋᒋᐊᐧᕽ ᑭ ᑲ ᒥᒋᒥᓂᑲᐧᐠ, ᐁᑳ ᓈᓂᑕᐤ ᑭᑕ ᐸᑲᒥᑎᑖᔭᐣ ᑭᓯᐟ ᐊᓯᓂᕽ.
[12] ᒋᓴᐢ ᒫᑲ ᐁ ᓇᐢᑫᐧᐊᐧᓯᒫᐟ ᑭ ᐃᑌᐤ, ᐃᑕᐧᓂᐊᐧᐣ, ᓇᒪᐃᐧᔭ ᑭ ᑲ ᑯᑌᔨᒪᐤ ᑳ ᑎᐯᔨᐦᒋᑫᐟ ᑭ ᑭᓭᒪᓂᑐᑦ.
[13] ᐁᑯᓯ ᐃᐢᐱ ᒪᒋ ᐊᐦᒑᐦᑲᐧ ᑳ ᑭᓯᑖᔨᐟ ᑲᐦᑭᔭᐤ ᑯᑌᔨᒥᐁᐧᐃᐧᓇ, ᑭ ᓇᑲᑎᐠ ᐊᒋᔭᐤ.
[14] ᒋᓴᐢ ᒫᑲ ᑭ ᑭᐁᐧᐤ ᐅᒪᐢᑲᐃᐧᓯᐃᐧᓂᔨᐠ ᐊᐦᒑᐦᑲᐧ ᑳᓬᐊᓬᐃᕽ ᐃᓯ: ᐅᐟ ᐋᒋᒥᑯᐃᐧᐣ ᒫᑲ ᑭ ᓯᐯᐧᐸᔨᔨᐤ ᒥᓯᐁᐧ ᐃᑕ ᐊᐢᑭᕽ ᐋᐧᓴᑳᑦ.
[15] ᐁᑯᓯ ᑭ ᑭᐢᑭᓄᐦᐊᒫᑫᐤ ᐅᐟ ᐊᔭᒥᐦᐁᐃᐧᑲᒥᑯᔨᕽ, ᑲᐦᑭᔭᐤ ᐁ ᑭᐢᑕᑭᒥᑯᐟ.
[16] ᐁᑯᓯ ᑭ ᐯ ᐃᑐᐦᑌᐤ ᓇᓴᕒᐃᑎᐠ, ᐃᑕ ᑳ ᑭ ᐅᐦᐱᑭᐦᐃᐦᐟ, ᐁᑯᓯ ᑳ ᑭ ᑐᑕᕽ ᒫᓇ ᑭ ᐱᐦᑐᑫᐤ ᐊᔭᒥᐦᐁᐃᐧᑲᒥᑯᕽ ᐁ ᐊᔭᒥᐦᐁᑭᓯᑳᔨᐠ, ᐁᑯᓯ ᐁ ᑭ ᐸᓯᑯᐟ ᑭᑕ ᐊᔭᒥᒋᑫᐟ.
[17] ᑭ ᐸᑭᑎᓇᒪᐋᐧᐤ ᒫᑲ ᐅ ᒪᓯᓇᐦᐃᑲᓂᔨᐤ ᐅᑭᐢᑭᐁᐧᐦᐃᑫᐊᐧ ᐊᐩᓵᔭᐊᐧ. ᐁᑯᓯ ᑭ ᐸᐢᑫᑭᓇᑦ ᒪᓯᓇᐦᐃᑲᐣ, ᐁ ᑭ ᒥᐢᑲᕽ ᒫᑲ ᐃᑕ ᑳ ᐃᑕᓯᓇᐦᐃᑳᑌᔨᐠ.
[18] ᐅᐟ ᐊᐦᒑᐦᑲᐧ ᑳ ᑎᐯᔨᐦᒋᑫᐟ ᓂ ᑭᑭᐢᑲᑯᔨᐊᐧ, ᐃᐧᔭ ᐁ ᑭ ᑭᐢᑭᓇᐊᐧᒋᐃᐟ, ᑭᑕ ᑲᑫᐢᑭᒪᑭᐠ ᑳ ᑭᑎᒪᑭᓯᒋᐠ ᒥᔪ ᐋᒋᒧᐃᐧᐣ; ᓂ ᑭ ᐃᓯᑎᓴᐦᐅᐠ ᑭᑕ ᐊᒋᒧᐢᑕᐊᐧᑳᐧᐤ ᐸᑭᑎᓂᑯᐃᐧᐣ ᐊᓂᑭ ᑳ ᑭᐸᐅᐦᒋᐠ, ᒥᓇ ᑳᐃᐧ ᑭᑕ ᐊᔮᒋᐠ ᐋᐧᐱᐃᐧᐣ ᐁᑳ ᑳ ᐋᐧᐱᒋᐠ, ᑭᑕ ᐸᑭᑎᓇᑲᐧᐤ ᐊᓂᑭ ᑳ ᑭᑎᒪᐃᐦᒋᐠ.
[19] ᑭᑕ ᐊᑐᑕᒫᐣ ᐊᓂᒪ ᐃᑕ ᑫ ᒥᔪ ᑲᓇᐋᐧᐸᐦᑫᐟ ᑳ ᑎᐯᔨᐦᒋᑫᐟ.
[20] ᐁᑯᓯ ᑭ ᑭᐸᐊᑦ ᒪᓯᓇᐦᐃᑲᐣ, ᑳ ᑲᓇᐁᐧᔨᑕᒥᔨᐟ ᑲᐃᐧ ᐁ ᑭ ᒥᔮᐟ, ᐁᑯᓯ ᑭ ᓇᐦᐊᐱᐤ: ᑲᐦᑭᔭᐤ ᒫᑲ ᐊᔭᒥᐦᐁᐃᐧᑲᒥᑯᕽ ᑳ ᐊᔮᔨᐟ ᐁ ᑭ ᑲᓇᐊᐧᐸᒥᑯᐟ.
[21] ᐁᑯᓯ ᑭ ᒫᒋ ᐃᑌᐤ, ᐊᓄᐦᐨ ᑳ ᑭᓯᑳᐠ ᐅᒪ ᒪᓯᓇᐦᐃᑫᐃᐧᐣ ᑎᐱᐸᔨᐤ ᑭᑕᐊᐧᑳᐋᐧᕽ.
[22] ᑲᐦᑭᔭᐤ ᒫᑲ ᑭ ᐋᒋᒥᐠ, ᒥᓇ ᐁ ᑭ ᒪᒪᐢᑳᑕᒥᔨᐠ ᐊᓂᐦᐃ ᑭᓭᐋᐧᑎᓯᐃᐧ ᐱᑭᐢᑫᐧᐃᐧᓇ ᐅᑐᓂᕽ ᑳ ᐅᐦᒋᐸᔨᓂᔨᑭ, ᐁ ᑭ ᐃᑌᐧᒋᐠ ᒫᑲ, ᓇᒪ ᒋ ᐊᐊᐧ ᒍᓯᑊ ᐅᑯᓯᓴ?
[23] ᐁᑯᓯ ᐅᒥᓯ ᑭ ᐃᑌᐤ, ᑫᒋᓇᐨ ᐅᒪ ᑳ ᓂᑖ ᐃᑌᐧᕽ, ᑭ ᑲ ᐃᓯᓈᐋᐧᐤ, ᒪᐢᑭᑭᐃᐧᔨᓂᐤ ᐃᔨᓂᑲᐃᓱ: ᑕᐦᑐ ᑫᑲᐧᐩ ᑳ ᑭ ᐯᑕᒫᕽ ᐁ ᑭ ᐃᑐᑕᒥᕽ ᑫᐸᕒᓀᐊᒥᕽ, ᑐᑕ ᒥᓇ ᐅᑕ ᑭᔭ ᑭᐟ ᐊᐢᑭᕽ.
[24] ᐅᒥᓯ ᒫᑲ ᑭ ᐃᑌᐧᐤ, ᑖᐯᐧ ᑭᐟ ᐃᑎᓈᐋᐧᐤ, ᓇᒪᐃᐧᔭ ᐊᐃᐧᔭᐠ ᐅᑭᐢᑭᐁᐧᐦᐃᑫᐤ ᐅᑎᓈᐤ ᑎᐱᔭᐁᐧ ᐅᐟ ᐊᐢᑭᕽ.
[25] ᒫᑲ ᑖᐯᐧᐃᐧᓂᕽ ᑭᐟ ᐃᑎᓈᐋᐧᐤ, ᑭ ᒥᐦᒉᑎᐊᐧᐠ ᓯᑳᐃᐧᐢᑫᐧᐊᐧᐠ ᐃᐢᕒᐁᐃᓬᐃᕽ ᒣᑳᐧᐨ ᑳ ᐱᒫᑎᓯᐟ ᐃᓬᐋᐃᒐ, ᐃᐢᐱ ᑭᓯᐠ ᑳ ᑭ ᑭᐸᐦᐃᑳᑌᐠ ᓂᐢᑐ ᐊᐢᑭ ᒥᓇ ᓂᑯᑖᐧᓱ ᐱᓯᑦ, ᐃᐢᐱ ᑭᐦᒋ ᑲᐋᐧᑲᑐᓱᐃᐧᐣ ᐁ ᐊᔭᐠ ᒥᓯᐁᐧ ᐊᐢᑭᕽ.
[26] ᒫᑲ ᓇᒪᐃᐧᔭ ᑭ ᐃᓯᑎᓴᐋᐧᐤ ᐃᓬᐋᐃᒐ, ᐱᑯ ᓵᕒᐃᐹᐦᐟ ᐊᓂᑕ ᐊᐢᑭᕽ ᓴᐃᑕᐣ ᐃᐢᑫᐧᐊᐧ ᐁ ᓯᑳᐃᐧᔨᐟ.
[27] ᒥᓇ ᑭ ᐊᔮᐊᐧᐠ ᒥᐦᒉᐟ ᑳ ᒪᒑᐢᐱᓀᒋᐠ ᐃᐢᕒᐁᐃᓬᐃᕽ ᒣᑳᐧᐨ ᐁ ᐊᔭᐟ ᐃᓬᐋᐃᓴ ᐅᑭᐢᑭᐁᐧᐦᐃᑫᐤ, ᒫᑲ ᓇᒫ ᐊᐃᐧᔭᐠ ᐃᐧᔭᐋᐧᐤ ᑭ ᑭᑫᐊᐁᐧᐠ ᐱᑯ ᓀᐊᒪᐣ ᓯᕒᐃᐊᐃᐧᔨᓂᐤ.
[28] ᐁᑯᓯ ᑲᐦᑭᔭᐤ ᑭ ᓴᑲᐢᑭᓀᐢᑳᑲᐧᐠ ᑭᓯᐋᐧᓯᐃᐧᐣ ᐊᔭᒥᐦᐁᐃᐧᑲᒥᑯᕽ ᐃᐢᐱ ᐁ ᐯᐦᑕᐦᑭᐠ ᐅᐦᐃ ᐊᔭᒥᐃᐧᓇ;
[29] ᐁᑯᓯ ᑭ ᐸᓯᑯᐊᐧᐠ, ᒥᓇ ᐁ ᑭ ᐊᐧᔭᐃᐧᐁᐧᐱᓈᒋᐠ ᐅᑌᓈᕽ ᐅᐦᒋ, ᒥᓇ ᐁ ᑭ ᐃᑐᐦᑕᐋᒋᐠ ᐁᐢᑲᐧᑎᓈᔨᐠ ᐊᐧᒋ ᐃᑕ ᐅᐟ ᐅᑌᓇᐃᐧᐋᐧᐤ ᑳ ᑭ ᐊᔮᔨᐠ, ᐁ ᐃᐧ ᐊᒋᒋᐁᐧᐱᓈᒋᐠ ᐁᑯᑕ ᐅᐦᒋ.
[30] ᒫᑲ ᐃᐧᔭ ᒣᑳᐧᐨ ᐃᑕ ᐁ ᐊᔮᔨᐠ ᐁ ᐊᑎ ᐃᑐᐦᑌᐟ ᑭ ᓯᐯᐧᑌᐤ.
[31] ᐁᑯᓯ ᐁ ᑭ ᐯ ᐃᑐᐦᑌᐟ ᑫᐸᕒᓀᐊᒥᕽ, ᐅᑌᓇᐤ ᑳᓬᐊᓬᐃᕽ, ᒥᓇ ᐁ ᑭ ᑭᐢᑭᓄᐦᐊᒫᑫᐟ ᐁ ᐊᔭᒥᐦᐁᑭᓯᑳᔨᐠ;
[32] ᐁᑯᓯ ᑭ ᒫᒪᐢᑲᑕᒥᔨᐊᐧ ᐅ ᑭᐢᑭᓄᐦᐊᒫᑫᐃᐧᐣ, ᐃᐧᔭ ᐅ ᐱᑭᐢᑫᐧᐃᐧᐣ ᐁ ᑭ ᑲᐢᑭᐁᐊᐧᓂᔨᐠ.
[33] ᐁᑯᓯ ᐊᔭᒥᐦᐁᐃᐧᑲᒥᑯᕽ ᑭ ᐊᔮᐤ ᓈᐯᐤ, ᐁ ᑭ ᐊᔮᐊᐧᐟ ᐅᑕᐦᒑᐦᑯᔨᐊᐧ ᐁᑳ ᐁ ᐯᑭᓯᔨᐟ ᒪᒑᔨᓴ; ᐁᑯᓯ ᑭ ᑌᐯᐧᐤ ᓱᑭ ᐁ ᐯᐦᑖᑯᓯᐟ,
[34] ᐋ! ᑖᓂᓯ ᑫ ᐃᑕᐸᒋᐃᑖᕽ, ᑭᔭ ᒋᓴᐢ ᓈᓴᕒᐃᑎᕽ ᐁᐧᒋᔭᐣ? ᑭ ᐯ ᐃᑐᑕᐣ ᒋ ᑭᑕ ᓂᓱᐊᐧᓈᒋᐃᔮᕽ? ᑭ ᑭᐢᑫᔨᒥᑎᐣ ᐊᐁᐧᓇ ᑭᔭ, ᐅ ᑲᓈᑎᓯᒪ ᑭᓭᒪᓂᑐ.
[35] ᒋᓴᐢ ᒫᑲ ᑭ ᑭᑐᑌᐤ, ᐁ ᐃᑕᐟ, ᑭᐱᑐᐁᐧ, ᒥᓇ ᐯ ᐊᐧᔭᐃᐧ. ᐁᑯᓯ ᐃᐢᐱ ᒪᒋ ᐊᐦᒑᕽ ᑳ ᑲᐃᐧᐁᐧᐱᓈᐟ ᑖᐋᐧᔨᕽ, ᑭ ᐯ ᐊᐧᔭᐃᐧᐤ, ᐁᑳ ᒫᑲ ᐁ ᐃᐧᓴᑭᐢᑲᐋᐧᐟ.
[36] ᐁᑯᓯ ᒪᒪᐢᑲᑌᔨᑕᒧᐃᐧᐣ ᑲᐦᑭᔭᐤ ᑭ ᐅᑎᐦᑎᑲᐧᐠ, ᒥᓇ ᐁ ᑭ ᐃᐧᒋ ᐱᑭᐢᑫᐧᑐᒋᐠ, ᐁ ᐃᑌᐧᒋᐠ, ᑫᑯ ᐊᔭᒥᐃᐧᐣ ᐅᒪ? ᒋᑫᒪ ᑭᑭ ᑎᐯᔨᐦᒋᑫᐃᐧᐣ ᒥᓇ ᒪᐢᑲᐃᐧᓯᐃᐧᐣ ᐅᔭᓱᐊᑌᐤ ᐁᑳ ᑳ ᐯᑭᓯᔨᐟ ᐊᐦᒑᐦᑲᐧ, ᐁᑯᓯ ᐁ ᐯ ᐊᐧᔭᐃᐧᔨᐟ.
[37] ᐅᐟ ᐋᒋᒥᑯᐃᐧᐣ ᒫᑲ ᒥᓯᐁᐧ ᐃᑌ ᐋᐧᐢᑲ ᐊᐢᑭᕽ ᑭ ᐃᓯ ᓯᐯᐧᐸᔨᔨᐤ.
[38] ᐁᑯᓯ ᑭ ᐸᓯᑯ ᐊᔭᒥᐦᐁᐃᐧᑲᒥᑯᕽ ᐅᐦᒋ, ᐁ ᑭ ᐱᐦᑐᑫᐟ ᒫᑲ ᓴᐃᒪᐣ ᐃᐧᑭᔨᕽ. ᐁᑯᓯ ᓴᐃᒪᐣ ᐃᐧᐊᐧ ᐅᑳᐃᐧᔨᐊᐧ, ᑭ ᒥᒋᒥᓂᐠ ᑭᐦᒋ ᑭᓯᓱᐋᐧᐢᐱᓀᐃᐧᐣ; ᐁᑯᓯ ᑭ ᐱᑭᐢᑫᐧᐢᑕᒪᐁᐧᐊᐧᐠ.
[39] ᑭ ᓂᐸᐃᐧᐢᑕᐁᐧᐤ ᒫᑲ, ᐁ ᑭ ᑭᑐᑕᕽ ᑭᓯᓱᐊᐧᐢᐱᓀᐃᐧᐣ, ᐁᑯᓯ ᑭ ᓇᑲᑎᑯᔨᐊᐧ; ᓭᒫᐠ ᒫᑲ ᑭ ᐊᐧᓂᐢᑳᔨᐊᐧ, ᐁ ᑭ ᐸᒥᐃᑯᒋᐠ.
[40] ᐁᑯᓯ ᐃᐢᐱ ᐁ ᐊᑎ ᐸᐦᑭᓯᒧᐠ, ᑲᐦᑭᔭᐤ ᐊᓂᑭ ᑳ ᑭ ᐊᔭᐋᐧᒋᐠ ᐁ ᐋᑯᓯᔨᐟ ᓇᓇᑐᕽ ᐁ ᐃᑖᐢᐱᓀᔨᐟ ᑭ ᐯ ᐃᑐᐦᑕᑕᒪᐁᐧᐊᐧᐠ; ᐁᑯᓯ ᑲᐦᑭᔭᐤ ᑳ ᐃᐦᑕᓯᔨᐟ ᑭ ᓵᒥᓀᐤ, ᒥᓇ ᑭ ᐃᔨᓂᑲᐦᐁᐤ.
[41] ᒥᓇ ᒪᒋ ᐊᐦᒑᐦᑲᐧ ᒥᐦᒉᐟ ᑭ ᓇᑲᑎᑲᐧᐠ, ᐁ ᒪᐃᐧᒧᔨᐟ ᒥᓇ ᐁ ᐃᑌᐧᔨᐟ, ᑭᔭ ᑭᓭᒪᓂᑐ ᐅᑯᓯᓴ. ᐁᑯᓯ ᐁ ᑭᑐᑖᐟ, ᓇᒪᐃᐧᔭ ᑭ ᐸᑭᑎᓇᒪᐁᐧᐤ ᑭᑕ ᐱᑭᐢᑫᐧᔨᐟ, ᒋᑫᒪ ᐁ ᑭᐢᑫᔨᑕᒥᔨᐟ ᐃᐧᔭ ᐁᐊᐧᑯ ᙭.
[42] ᐁᑯᓯ ᐃᐢᐱ ᐁ ᑭᓯᑳᐠ, ᑭ ᓯᐯᐧᑌᐤ ᒥᓇ ᐁ ᑭ ᐃᑐᐦᑌᐟ ᐸᑲᐧᒑᔨᕽ; ᐁᑯᓯ ᑳ ᐅᓴᒣᔭᑎᔨᐟ ᑭ ᓇᑐᓈᐠ, ᒥᓇ ᑭ ᐯ ᐅᑎᐦᑎᐠ, ᐁ ᐃᐧ ᑭᐱᒋᒥᑯᐟ, ᐁᑳ ᑭᑕ ᓇᑲᑖᐟ.
[43] ᒫᑲ ᑭ ᐃᑌᐤ, ᐱᑯ ᑭᑕ ᑲᑫᐢᑫᐧᔮᐣ ᐁ ᐃᓯ ᒥᔮᐧᑐᑖᑲᐧᕽ ᑭᓭᒪᓂᑐ ᐅᐟ ᐅᑌᓇᐃᐧᐃᐧᐣ ᑯᑕᑲ ᐅᑌᓈᕽ: ᒋᑫᒪ ᐁᐊᐧᑯ ᐅᐦᒋ ᑳ ᐯ ᐃᓯᑎᓴᐦᐅᑲᐃᐧᔮᐣ.
[44] ᐁᑯᓯ ᑭ ᑲᑫᐢᑫᐧᐤ ᐊᔭᒥᐦᐁᐃᐧᑲᒥᑯᕽ ᑳᓬᐊᓬᐃᕽ.