[1] ᐁᑯᓯ ᑭ ᐃᑌᐤ ᐅ ᑭᐢᑭᓄᐦᐊᒪᐋᐧᑲᓇ, ᓇᒪᐃᐧᔭ ᑭᑕ ᑭ ᐃᑭᕽ ᐁᑳ ᑭᑕ ᐊᔭᑭ ᐱᓱᑫᓯᓄᐃᐧᓇ: ᒫᑲ ᑲᑳᐧᑕᑭᓯᐤ ᐊᓇ, ᑳ ᐅᐦᒋ ᐊᔮᑭ.
[2] ᓇᐊᐧᐨ ᑭᑕ ᑭ ᒥᔮᐧᓯᓂᔨᐸᐣ ᐱᓂᐳᒋᑲᓇᓯᓂᔭ ᑭ ᓴᑲᐱᑎᒥᐦᐟ ᐅᑲᐧᔮᕽ, ᐁᑯᓯ ᑭᐦᒋᑲᒥᕽ ᑭ ᐃᓯ ᐸᑲᐢᑕᐁᐧᐁᐧᐱᓂᐦᐟ, ᐃᐢᐱᐨ ᑭᑕ ᐱᓱᑫᓯᓄᐋᐟ ᐯᔮᐠ ᐅᐦᐃ ᑳ ᐊᐱᐢᑌᔨᑖᑯᓯᔨᐟ.
[3] ᐊᔮᑳᐧᒥᓯᐠ ᒫᑲ; ᑭᐢᐱᐣ ᑭᒋᐋᐧᑦ ᓇᔦᑖᐃᐧᑐᑖᐢᑭ, ᑭᑕᐦᐊᒪᐤ: ᑭᐢᐱᐣ ᒥᐦᑖᑖᑭ, ᐳᓀᔨᑕᒪᐤ.
[4] ᒥᓇ ᑭᐢᐱᐣ ᓇᔦᑖᐃᐧᑐᑖᐢᑭ ᑌᐸᑯᑊ ᑕᐦᑖᐧᐤ ᐯᔭᑳᐧᐤ ᐁ ᑭᓯᑳᐠ, ᐁᑯᓯ ᑌᐸᑯᑊ ᑕᐦᑖᐧᐤ ᑫᐧᐢᑭᐢᑖᐢᑭ, ᐁ ᐃᑌᐧᐟ, ᓂ ᒥᐦᑖᑌᐣ; ᑭ ᑲ ᐳᓀᔨᑕᒪᐋᐧᐤ.
[5] ᐁᑯᓯ ᐊᐸᐢᑎᓬᐊᐠ ᑭ ᐃᑌᐊᐧᐠ ᑳ ᑎᐯᔨᐦᒋᑫᔨᐟ, ᔭᑭᑖ ᓂ ᑖᐯᐧᐊᐧᑫᔨᑕᒧᐃᐧᓂᓈᐣ,
[6] ᑳ ᑎᐯᔨᐦᒋᑫᐟ ᒫᑲ ᑭ ᐃᑌᐧᐤ, ᑭᐢᐱᐣ ᐊᔮᔦᐠ ᑖᐯᐧᐊᐧᑫᔨᑕᒧᐃᐧᐣ ᑖᐱᐢᑯᐨ ᐯᔭᑯᒥᐣ ᐊᐢᐸᒋᑲᓂ ᑭᐢᑎᑳᓂᐢ, ᑭ ᑲ ᐃᑖᐋᐧᐤ ᐊᐊᐧ ᓯᑲᒪᐩᓈᑎᐠ ᐸᑲᐧᒋᒉᐱᑭᐸᔨ, ᐁᑯᓯ ᓇᑕᐃᐧ ᐃᑕᐢᑭᓱ ᑭᐦᒋᑲᒥᕽ; ᑭ ᑲ ᓇᓇᐃᑖᑯᐋᐧᐤ.
[7] ᒫᑲ ᐊᐁᐧᓇ ᑭᔭᐋᐧᐤ, ᐁ ᐊᔮᐋᐧᐟ ᐊᑐᐢᑫᔮᑲᓇ ᐁ ᐱᑯᐱᒋᑫᔨᐟ, ᐊᐦᐳ ᐁ ᐊᓴᒫᔨᐟ ᒫᔭᑎᐦᑲᐧ, ᑫ ᐃᑖᐟ ᐯ ᑭᐁᐧᔨᒋ ᑭᐢᑎᑳᓂᕽ ᐅᐦᒋ, ᐊᐢᑕᑦ ᓭᒫᐠ ᐯ ᓇᐃᐱ ᑭᑕ ᒥᒋᓱᔭᐣ;
[8] ᒫᑲ ᐁᑳ ᔮᔭᐤ ᑭᑕ ᐃᑖᐟ, ᐊᐧᐁᐧᔨᑖ ᑫ ᒥᒋᔮᐣ, ᐁᑯᓯ ᒫᑲ ᐸᑲᐧᑌᐦᐅ, ᒥᓇ ᐸᒥᐦᐃᐣ, ᐃᔨᑯᕽ ᑭ ᒥᒋᓱᔮᓂ ᒥᓇ ᑭ ᒥᓂᑫᐧᔮᓂ; ᐁᑲᐧ ᐹᑐᐢ ᑭ ᑲ ᒥᒋᓱᐣ ᒥᓇ ᑭ ᑲ ᒥᓂᑳᐧᐣ?
[9] ᓇᓇᐢᑯᒣᐤ ᒋ ᐊᓂᐦᐃ ᐊᑐᐢᑫᔮᑲᓇ ᒋᑫᒪ ᐁ ᐃᑐᑕᒥᔨᐟ ᐊᓂᐦᐃ ᑳ ᑭ ᐃᓯ ᓯᑭᒪᐟ?
[10] ᐁᑯᓯ ᒣᐧᐦᒋ ᒥᓇ ᑭᐢᑕᐋᐧᐤ, ᐃᐢᐱ ᑭ ᐃᑐᑕᒣᑯ ᑲᐦᑭᔭᐤ ᐊᓂᐦᐃ ᑳ ᐃᓯ ᓯᑭᒥᑲᐃᐧᔦᐠ, ᐃᑌᐧᐠ, ᓂᔭᓈᐣ ᐊᑐᐢᑫᔮᑲᓇᐠ ᐁᑳ ᑳ ᐋᐸᑌᔨᑖᑯᓯᒋᐠ; ᓂ ᑭ ᑐᑌᓇᐣ ᐱᑯ ᐊᓂᒪ ᑳ ᐃᑕᐢᑌᐠ ᑭᑕ ᑐᑕᒫᕽ.
[11] ᑭ ᐊᔨᑭᐣ ᒫᑲ, ᒉᕒᐅᓴᓬᐊᒥᕽ ᐁ ᐊᑎ ᐃᑐᐦᑌᐟ, ᑭ ᐱᒥ ᓵᐳᑎᐤ ᓴᒣᕒᐃᐊᐃᕽ ᒥᓇ ᑳᓬᐊᓬᐃᕽ.
[12] ᐁᑯᓯ ᐯᔭᐠ ᑭᐢᑕᐱᐃᐧᓂᕽ ᐁ ᐊᑎ ᐱᐦᑐᑫᐟ, ᑭ ᓇᑭᐢᑳᐠ ᒥᑖᑕᐟ ᓈᐯᐊᐧ ᐁ ᒪᒑᐢᐱᓀᔨᐟ ᐊᐧᔭᐤ ᐁ ᓂᐸᐃᐧᔨᐟ,
[13] ᑭ ᑌᐯᐧᐊᐧᐠ ᒫᑲ, ᐁ ᐃᑌᐧᒋᐠ, ᒋᓴᐢ, ᐅᑭᐢᑭᓄᐦᐊᒫᑫᐤ, ᑭᑎᒫᑭᓇᐃᐧᓈᐣ,
[14] ᐃᐢᐱ ᒫᑲ ᐃᐧᔮᐸᒫᐟ, ᑭ ᐃᑌᐤ, ᓂᔭᐠ ᑭ ᑲ ᐊᐧᐸᒥᑯᐊᐧᐊᐧᐠ ᐊᔭᒥᐦᐁᐃᐧᔨᓂᐊᐧᐠ. ᐁᑯᓯ ᑭ ᐃᐢᐸᔨᐤ, ᐁ ᐊᑎ ᐃᑐᐦᑌᒋᐠ, ᑭ ᐯᑭᐋᐊᐧᐠ.
[15] ᐯᔭᐠ ᒫᑲ, ᐃᐢᐱ ᐃᐧᔮᐸᐦᑕᕽ ᐁ ᑭ ᐃᔨᓂᑲᐃᐦᐟ, ᑭ ᐯ ᑭᐁᐧᐤ, ᐁ ᑭᓯᐁᐧᐟ ᐁ ᒪᒥᒋᒫᐟ ᑭᓭᒪᓂᑐᐊᐧ;
[16] ᐅᓯᑎᔨᕽ ᒫᑲ ᐁ ᐸᐦᑭᓯᕽ, ᑭ ᓇᓈᐢᑯᒣᐤ: ᑭ ᓴᒫᕒᐃᑕᓂᐃᐧᐤ ᒫᑲ.
[17] ᐁᑯᓯ ᒋᓴᐢ ᐁ ᓇᐢᑫᐧᐊᐧᓯᒫᐟ ᑭ ᐃᑌᐤ, ᓇᒪ ᒋ ᒥᑖᑕᐟ ᑭ ᐯᑭᐋᐊᐧᐠ? ᑕᓂᐁᐧᑳ ᒫᑲ ᐊᓂᑭ ᑫᑳᐟ ᒥᑖᑕᐟ?
[18] ᓇᒪᐃᐧᔭ ᒋ ᑭ ᒥᐢᑲᐋᐧᐊᐧᐠ ᑭᑕ ᐯ ᑭᐁᐧᒋᐠ ᑭᑕ ᒪᒥᒋᒪᒋᐠ ᑭᓭᒪᓂᑐᐊᐧ, ᐱᑯ ᐊᐊᐧ ᒫᓂᑌᐤ?
[19] ᐁᑯᓯ ᒫᑲ ᑭ ᐃᑌᐤ, ᐸᓯᑯ, ᒥᓇ ᓯᐯᐧᐦᑌ, ᑭ ᑖᐯᐧᐊᐧᑫᔨᑕᒧᐃᐧᐣ ᑭ ᑭ ᐃᔨᓂᑲᐃᑯᐣ.
[20] ᐃᐢᐱ ᒫᑲ ᐁ ᑲᑫᐧᒋᒥᑯᐟ ᐸᕒᐊᓯᐊᐧ; ᑕᓂᐢᐱ ᑫ ᑕᑯᓯᓄᒪᑲᓂᔨᐠ ᐅᐟ ᐅᑌᓇᐃᐧᐃᐧᓂᔨᐤ ᑭᓭᒪᓂᑐᐊᐧ, ᑭ ᓇᐢᑫᐧᐊᐧᓯᒣᐤ ᒥᓇ ᐁ ᑭ ᐃᑖᐟ, ᐅᐟ ᐅᑌᓇᐃᐧᐃᐧᐣ ᑭᓭᒪᓂᑐ ᓇᒪᐃᐧᔭ ᑭᑕ ᑕᑯᓯᓄᒪᑲᓂᔨᐤ ᐁ ᑭᑳᔮᐸᑕᒥᕽ.
[21] ᒥᓇ ᒫᑲ ᓇᒪᐃᐧᔭ ᑭᑕ ᐃᑌᐧᐊᐧᐠ, ᐋᐧᐸᐦᑕᒧᐠ ᐅᑕ, ᐊᐁᐧᑲ, ᐋᐧᐸᐦᑕᒧᐠ ᓀᑌ? ᒋᑫᒪ ᒋᐢᐟ, ᐅᐟ ᐅᑐᑌᓇᐃᐧᐃᐧᐣ ᑭᓭᒪᓂᑐ ᑭ ᑭᑭᐢᑳᑯᓈᐋᐧᐤ.
[22] ᐁᑯᓯ ᑭ ᐃᑌᐤ ᐅ ᑭᐢᑭᓄᐦᐊᒪᐋᐧᑲᓇ, ᐊᓂᐦᐃ ᑭᓯᑳᐊᐧ ᑭᑕ ᐅᑎᐦᒋᐸᔨᐊᐧ, ᐃᐢᐱ ᑫ ᐊᑳᐋᐧᑕᒣᐠ ᑭᑕ ᐋᐧᐸᐦᑕᒣᐠ ᐯᔭᐠ ᐅ ᑭᓯᑳᒪ ᐃᔨᓂᐃᐧᑯᓯᓵᐣ, ᐁᑯᓯ ᐁᑳ ᑭᑕ ᐋᐧᐸᐦᑕᒣᐠ.
[23] ᑭ ᑲ ᐃᑎᑯᐋᐧᐊᐧᐠ ᒫᑲ, ᐋᐧᐸᐦᑕᒧᐠ, ᓀᑌ? ᐋᐧᐸᐦᑕᒧᐠ, ᐅᑕ? ᐁᑳᐃᐧᔭ ᓯᐯᐧᑌᐠ ᐊᐦᐳ ᐱᒥᑎᓴᐅᑯᐠ;
[24] ᒋᑫᒪ ᑖᐱᐢᑯᐨ ᑳ ᐊᐧᓴᐢᑯᑌᐸᔨᐠ, ᐯᔭᑯᔭᐠ ᐅᐦᒋ ᓯᐹ ᑭᓯᑯᕽ ᐁᑯᓯ ᑳ ᐅᑎᑖᐢᑌᐸᔨᐠ ᑫᐧᐢᑭ ᐃᑌᑫ, ᓯᐸ ᑭᓯᑯᕽ ᐁᑯᓯ ᒣᐧᐦᒋ ᑫ ᐃᓯ ᐊᔮᐠ ᐃᔨᓂᐃᐧᑯᓯᓵᐣ ᐅ ᑭᓯᑳᒥᕽ.
[25] ᒫᑲ ᓂᑳᐣ ᒥᒉᑕᐧᔭᐠ ᑭᑕ ᐃᓯ ᑲᑳᐧᑕᑭᑖᐤ ᒥᓇ ᑭᑕ ᐋᑕᐁᐧᔨᒥᐠ ᐅᐦᐃ ᐊᔨᓯᔨᓂᐊᐧ.
[26] ᒣᐧᐦᒋ ᒫᑲ ᑳ ᑭ ᐃᑭᕽ ᐁ ᐅ ᑭᓯᑳᒥᐟ ᓄᐊ, ᐁᑯᓯ ᒣᐧᐦᒋ ᑫ ᐃᑭᕽ ᐅ ᑭᓯᑲᒥᕽ ᐃᔨᓂᐃᐧᑯᓯᓵᐣ.
[27] ᑭ ᒥᒋᓱᐊᐧᐠ, ᒥᓇ ᑭ ᒥᓂᑫᐧᐊᐧᐠ, ᑭ ᐃᐧᐃᐧᐊᐧᐠ, ᑭ ᒣᑭᐢᑫᐧᐋᐧᓂᐊᐧᐣ, ᐃᔨᑯᕽ ᐊᓂᒪ ᑭᓯᑳᐤ ᓄᐊ ᑳ ᐳᓯᐟ ᑭᐦᒋ ᓈᐱᑳᐧᓂᕽ, ᐁᑯᓯ ᐁ ᔨᐢᑭᐯᐸᔨᐠ, ᑲᐦᑭᔭᐤ ᒫᑲ ᐁ ᑭ ᓂᓯᐊᐧᓈᒋᐃᑯᒋᐠ.
[28] ᒥᓇ ᒫᑲ ᒣᐧᐦᒋ ᑳ ᑭ ᐃᑭᕽ ᐁ ᒣᑲᐧ ᐅ ᑭᓯᑲᒥᐟ ᓬᐋᐟ; ᑭ ᒥᒋᓱᐊᐧᐠ, ᑭ ᒥᓂᑫᐧᐊᐧᐠ, ᑭ ᐊᑕᐁᐧᐊᐧᐠ, ᑭ ᐊᑕᐋᐧᑫᐊᐧᐠ, ᑭ ᑭᐢᑎᑫᐊᐧᐠ, ᑭ ᐋᐧᐢᑳᐦᐃᑲᓂᑫᐊᐧᐠ;
[29] ᒫᑲ ᐊᓂᒪ ᑭᓯᑳᐤ ᓬᐋᐟ ᑳ ᑭ ᐊᐧᔭᐃᐧᐟ ᓵᑕᒥᕽ ᐅᐦᒋ ᑭ ᐸᐦᑭᐦᑎᐣ ᐃᐢᑯᑌᐤ ᒥᓇ ᐃᐢᑯᑌᓯᑲᐣ ᑭᓯᑯᕽ ᐅᐦᒋ, ᑲᐦᑭᔭᐤ ᒫᑲ ᐁ ᑭ ᓂᓯᐊᐧᓈᒋᐃᑯᒋᐠ;
[30] ᐁᑯᓯ ᒫᑲ ᐅᒪ ᒣᐧᐦᒋ ᑫ ᐃᑭᓂᔨᐠ ᐊᓂᒪ ᑭᓯᑳᐤ ᐃᐢᐱ ᐃᔨᓂᐃᐧᑯᓯᓵᐣ, ᓄᑯᓯᒋ.
[31] ᐁᐊᐧᑲᐧᓂᒪ ᑭᓯᑳᑭ, ᐊᓇ ᑳ ᐊᔮᐟ ᑕᑯᐦᐨ ᐋᐧᐢᑳᐦᐃᑲᓂᕽ, ᐁᑯᓯ ᐅᐟ ᐊᔮᐃᐧᓇ ᐱᐦᒋ ᐃᐧᑭᕽ ᐁ ᐊᔭᔨᑭ, ᐁᑳᐃᐧᔭ ᐱᑕ ᑭᑕ ᓂᓵᑕᐃᐧᐤ ᑭᑕ ᓯᐯᐧᑕᑖᐟ, ᒥᓇ ᒫᑲ ᐊᓇ ᑭᐢᑎᑳᓂᕽ ᑳ ᐊᔮᐟ ᐃᐧᐢᑕ ᐁᑳᐃᐧᔭ ᑭᑕ ᐯ ᑭᐁᐧᐤ.
[32] ᑲᓄᑭᐢᑭᓯᐠ ᓬᐋᐟ ᐃᐧᐊᐧ.
[33] ᐊᐃᐧᔭᐠ ᑫ ᐃᐧ ᑲᑫᐧ ᐱᒫᒋᑖᑫᐧ ᐅ ᐱᒫᑎᓯᐃᐧᐣ ᑭᑕ ᐊᐧᓂᑖᐤ; ᒫᑲ ᐊᓇ ᑫ ᐊᐧᓂᑕᑫᐧ ᐅ ᐱᒫᑎᓯᐃᐧᐣ ᑭᑕ ᐱᒫᒋᑕᐤ.
[34] ᑭ ᐃᐧᐦᑕᒫᑎᓈᐋᐧᐤ, ᐁᐊᐧᑲᐧᓂᒪ ᐁ ᑎᐱᐢᑳᐠ ᑭᑕ ᓂᓯᐊᐧᐠ ᓈᐯᐊᐧᐠ ᐯᔭᐠ ᓂᐯᐃᐧᓂᕽ; ᐯᔭᐠ ᑭᑕ ᐅᑎᓈᐤ, ᐁᑯᓯ ᑯᑕᐠ ᑭᑕ ᓇᑲᑖᐤ.
[35] ᓂᓱ ᐃᐢᑫᐧᐊᐧᐠ ᑭᑕ ᓂᓱ ᐱᓂᐳᒋᑫᐊᐧᐠ; ᐯᔭᐠ ᑭᑕ ᐅᑎᓈᐤ, ᐁᑯᓯ ᑯᑕᐠ ᑭᑕ ᓇᑲᑖᐤ.
[36] ᓂᓱ ᓈᐯᐊᐧᐠ ᑭᐢᑎᑳᓂᕽ ᑭᑕ ᐊᔮᐊᐧᐠ, ᐯᔭᐠ ᑭᑕ ᐅᑎᓇᐤ ᑯᑕᐠ ᒫᑲ ᑭᑕ ᓇᑲᑖᐤ.
[37] ᑭ ᓇᐢᑫᐧᐊᐧᓯᒣᐊᐧᐠ ᒫᑲ ᐁ ᑭ ᐃᑖᒋᐠ, ᑕᓂᑌ, ᑌᐯᔨᐦᒋᑫᔭᐣ? ᐁᑯᓯ ᑭ ᐃᑌᐤ, ᐃᑕ ᐁ ᐊᐢᑌᔨᐠ ᒥᔭᐤ, ᐁᑯᑕ ᒥᑭᓯᐊᐧᐠ ᑫ ᒫᐊᐧᒋᐃᑐᒋᐠ.