[1] Asmaʼo, al-hikma tinaadi wa l-fihim yarfaʼ hissah.
[2] Al-hikma waagfe fi machbak al-duruub wa fi l-bakaanaat al-aaliyiin // jamb al-turug.
[3] Wa hi tinaadi fi baab al-madiina wa tinaadi fi dakhuul al-hille // wa tuguul :
[4] «Ya naas, leeku intu ana ninaadi wa le Bani Adam niwajjih kalaami.
[5] Ya l-juhhaal, sawwu leeku agul. Wa ya l-mataamiis, afhamo adiil fi guluubku.
[6] Asmaʼo achaan nuguul kalaam muhimm wa khachmi yuguul kalaam adiil.
[7] Achaan al-hagg daayman gaaʼid // fi khachmi wa l-charr haraam le lisaani.
[8] Wa kulla kalaam khachmi sahiih wa la indah kidib wa la indah khachch.
[9] Wa kalaami sameh le l-naas al-induhum fihim wa adiil le l-naas // al-induhum maʼrafa.
[10] Chiil wasiiyti, hi akheer min al-fudda wa akrub al-ilim, hu akheer min al-dahab al-saafi.
[11] Achaan al-hikma hi ziyaada min al-marajaan wa ayyi cheyy al-tihibbah ma yigaadirha.»
[12] «Ana al-hikma naskun maʼa l-agul wa be da, nalga al-ilim wa l-raay.
[13] Al-yakhaaf min Allah, yakrah al-fasaala. Wa ana kula nakrah al-kuluufiiye // wa l-istikbaar wa derib al-fasaala // wa l-khachum al-kaddaab.
[14] Al-wasiiye wa l-agul hineeyi ana. Wa l-ilim wa l-fahaaliiye kula // leyi ana.
[15] Wa beyi ana, al-muluuk yamulku wa l-gudiya yaamuru be l-adaala.
[16] Wa beyi ana, al-chuyuukh yahkumu wa l-hukkaam wa kulla l-gudiya yichaaruʼu be l-adaala.
[17] Ana nihibb al-yihibbuuni wa l-yifattuchuuni, yalgooni.
[18] Wa nantiihum maal wa charaf wa khuna daayim wa mukaafa.
[19] Wa natiijti akheer min al-dahab al-saafi wa intaaji akheer min al-fudda al-maʼzuula.
[20] Ana nuruukh fi derib al-saalihiin wa namchi adiil fi tariig al-aadiliin.
[21] Wa nanti maal warasa le l-yihibbuuni wa namla makhaazinhum.»
[22] «Ana al-hikma, Allah khalagaani awwal, misil wald al-bikir fi kulla khaliigtah.
[23] Wa ana makhluuga min zamaan wa min al-bidaaya wa min gabul al-ard.
[24] Wa ana makhluuga gabul al-bahar al-muhiit wa gabul uyuun almi al-jaari.
[25] Wa ana makhluuga gabul al-hujaar wa gabul al-jibaal ma yukhuttuhum.
[26] Wa ana mawjuuda gabul ma yisawwi al-ard // wa l-kadaade wa gabul khaliigit turaab al-dunya.
[27] Wa ana mawjuuda wakit bana al-samaawaat wa khatta huduud beenhum // wa been al-bahar al-muhiit
[28] wa wakit khatta al-sahaab foog wa gawwa majaari al-almi tihit // fi lubb al-ard.
[29] Wa ana mawjuuda wakit khatta huduud le l-bahar achaan al-almi ma yikhaalif amrah. Wa wakit khatta asaas al-ard,
[30] ana al-hikma kunt maʼaayah bannaaya. Wa hu firih beyi fi kulla yoom wa ana mabsuuta giddaamah // fi kulla wakit.
[31] Wa ana mabsuuta be ardah al-aamre wa firiht be Bani Adam.»
[32] «Wa hassaʼ, asmaʼo ya iyaali. Mabruuk le l-yichiilu derbi.
[33] Asmaʼo wasiiyti wa abgo hakiimiin wa abadan ma tikhalluuha.
[34] Mabruuk le l-naadum al-yasmaʼni wa yagiif kulla yoom fi baabi wa yahfad madkhal beeti.
[35] Achaan al-yalgaani, yalga al-haya wa yalga rida min Allah.
[36] Wa laakin al-yaʼasaani, yajrah nafsah wa l-yakrahni, yihibb al-moot.»