[1] Akheer taakulu eech gargaach // be l-salaama min taakulu laham udur // be muchkila.
[2] Abid aagil yamluk fi wileed aayib hana siidah wa fi usut iyaal siidah, // yalga warasatah.
[3] Be l-naar, al-sayyaakhi yisaffi al-dahab wa l-fudda wa laakin al-fi guluub al-naas, Allah bas yakchifah.
[4] Al-naadum al-fasil yukhutt baalah le l-kalaam al-cheen wa l-kaddaab yasmaʼ al-kalaam al-yakhrib.
[5] Al-yichchammat le l-masaakiin yahgir Khaalighum wa l-yafrah be damaar al-aakhariin, ma yajʼalooh bari.
[6] Iyaal al-iyaal taaj le juduudhum wa l-abbahaat charaf le iyaalhum.
[7] Al-kalaam al-adiil ma biwaafig le l-matmuus wa l-kalaam al-kidib ma bichaabih le l-haakim.
[8] Al-rachwa misil sihir fi fikir al-naadum al-yantiiha. Fi ayyi bakaan yiwajjih, yanjah.
[9] Al-yisaamih al-khata, yifattich al-mahabba wa l-yihajji fi l-khata da, yifarrig al-rufgaan.
[10] Be l-luwaama, yafham al-naadum al-faahim wa be miya darbe kula, al-matmuus ma yafham.
[11] Al-naadum al-fasil yifattich illa amal al-aasi wa yijiib le nafsah azaab bala rahma.
[12] Akheer tigaabil mart al-duud // al-muwaddire iyaalha min tigaabil al-matmuus // wa nifaakhah.
[13] Al-yibaddil al-kheer be l-charr, al-charr ma yikiss min beetah.
[14] Bidaayit al-huraaj misil almi al-seel. Gubbaal ma yaakulak, amrug nafsak.
[15] Achya itneen Allah harramaahum, tibarri al-khaltaan wa tikhallit al-bari.
[16] Chunu nifiʼ al-gurus fi iid al-matmuus ? Hal yachri beyah hikma ? Mustahiil ! Hu ma indah raas !
[17] Al-rafiig yihibbak fi kulla wakit wa wald ammak wildooh // le yisaaʼidak fi l-diige.
[18] Illa galiil al-fihim yudugg sadrah wa yadman gariibah.
[19] Al-yihibb al-huraaj yihibb al-khata wa l-yiwassif nafsah yijiib leeha al-damaar.
[20] Al-galib al-azrag ma yalga kheer wa l-lisaan al-kaddaab yagaʼ // fi l-charr.
[21] Al-yalda al-matmuus yalga al-hizin wa abu al-mukhaffal kula ma yafrah.
[22] Al-galib al-farhaan yachfi al-jisim wa l-galib al-haznaan yiyabbis al-jilid.
[23] Al-aasi yichiil al-rachwa be sirr achaan yiʼawwij duruub al-chariiʼa.
[24] Al-faahim yukhutt eenah fi l-hikma wa laakin al-matmuus kaamil ma yiwajjihha.
[25] Al-wileed al-matmuus yijiib al-hizin le abuuh wa le ammah al-wildatah, yimarrir leeha al-haya.
[26] Ma adiil tiʼaakhib al-saalihiin wa ma indak hagg tudugg al-mukarramiin.
[27] Siid al-maʼrafa ma yikattir kalaamah, wa siid al-fihim haadi fi nafsah.
[28] Hatta al-munaafikh kan sakat, yajʼalooh hakiim. Wa kan sadda gadduumah, yajʼalooh faahim.