[1] Asmaʼo, ya iyaali, wasiiyat abuuku wa le tafhamo, khuttu baalku
[2] achaan al-maʼrafa al-nantiiha leeku adiile. Abadan ma tikhallu taʼliimi.
[3] Wakit ana sakhayyar maʼa abuuyi wa ammi tihibbini ana wileedha al-wahiid,
[4] abuuyi allamaani wa gaal : «Khalli galbak yakrub kalaami wa ahfad wasiiyti wa be da, tiʼiich fi raaha.
[5] Fattich al-hikma wa l-fihim wa ma tansa wa la tikhalli kalaami.
[6] Hibb al-hikma wa ma tikhalliiha achaan hi tahfadak wa tahmiik.
[7] Awwalan, fattich al-hikma le tabga hakiim wa anti kulla l-indak le talga al-fihim.
[8] Al-hikma tiʼalliik wakit takrubha wa hi ticharrifak wakit tahdinha.
[9] Al-hikma tukhutt fi raasak taaj al-niʼma wa tijammilak be kadmuul al-charaf.»
[10] Asmaʼ, ya wileedi, wa chiil kalaami wa da yikattir siniin hayaatak.
[11] Ana allamtak tariig al-hikma wa wassaftak duruub al-adaala.
[12] Kan tamchi, tamchi be suhuula wa kan tajri, abadan ma tittartaʼ.
[13] Akrub al-wasiiye wa ahfadha. Ma tikhalliiha achaan hi asaas hayaatak.
[14] Ma tamchi fi tariig al-aasiyiin wa la tichiil derib al-fasliin.
[15] Khalliih, beyah ma tamchi. Baari be tariig aakhar wa amchi.
[16] Al-naas dool ma yunuumu kan ma sawwo al-fasil wa ma yanʼaso kan ma ramo naadum.
[17] Akilhum jaayi min al-charr wa charaabhum jaayi min al-unuf.
[18] Tariig al-saalihiin misil deyy al-sabaah wa nuurah yiziid lahaddi al-harraay tatlaʼ.
[19] Laakin derib al-aasiyiin misil al-leel al-adlam. Fi l-dalaam, ma yichiifu al-cheyy al-yarmiihum.
[20] Ya wileedi, khutt baalak le wasiiyti wa aftah adaanak wa asmaʼ kalaami.
[21] Kalaami, ma tibaʼʼidah min aglak wa wasiiyti, ahfadha fi daakhil galbak.
[22] Al-yalgaahum, yalga al-haya wa yalga al-aafe le kulla jismah.
[23] Ahfad galbak ziyaada min kulla cheyy aakhar achaan minnah hu tisiil al-haya.
[24] Ma tamrug min khachmak al-kalaam al-kidib wa baʼʼid min lisaanak al-kalaam al-khabiis.
[25] Chiif adiil giddaamak wa sabbit uyuunak fi derbak.
[26] Addil al-derib le rijileenak wa be da, kulla duruubak yabgo saabtiin.
[27] Ma tiliff wa la isra wa la zeene wa baʼʼid nafsak min al-charr.