[1] Ya wileedi, ma tansa taʼliimi wa fi galbak ahfad wasiiyti
[2] achaan humman yitawwulu umrak // wa siniin hayaatak wa beehum talga al-salaam.
[3] Al-kheer wa l-amaan, ma tikhalliihum. Arbuthum fi ragabatak wa aktibhum fi galbak.
[4] Wa be da, talga rida wa najaah sameh giddaam al-Rabb wa giddaam al-naas.
[5] Atwakkal ale Allah be kulla galbak wa ma titwakkal ale nafsak.
[6] Gaddim Allah fi kulla khidimtak wa hu yisahhil leek derbak.
[7] Ma tichiif nafsak hakiim. Akhaaf Allah wa gabbil min al-charr.
[8] Wa da yachfi jismak wa yigawwi udaamak.
[9] Karrim Allah be gaddimiin maalak wa min awwal intaaj ziraaʼtak.
[10] Wa be da, dabangaatak yinmalu maʼaach wa girabbak yinmalu asiir inab.
[11] Ya wileedi, ma taaba adab Allah wa ma takrah ikhaabah
[12] achaan Allah yiʼaakhib al-yihibbah misil al-abu yiʼaakhib wileedah al-yiriidah.
[13] Mabruuk le l-naadum al-ligi al-hikma wa l-naadum al-karab al-fihim
[14] achaan da akheer min ribih al-fudda wa akheer min kaseeb al-dahab.
[15] Al-hikma khaaliye min al-dahab al-saafi wa kulla cheyy al-biriidu ma yigaadirha.
[16] Wa hi chaayle fi iidha al-waahide tuul al-umur wa fi iidha al-aakhara, khuna wa charaf.
[17] Duruubha yiwaddu fi l-halu wa kulla turugha salaam.
[18] Al-hikma hi chadarat al-haya // le l-yakrubha wa l-yamsukha yabga mubaarak.
[19] Be l-hikma, Allah assas al-ard wa be ilmah, sabbat al-samaawaat.
[20] Be maʼrafatah, almi marag min al-ard wa l-sahaab kula nazzal matarah.
[21] Ya wileedi, ahfad al-hikma wa l-raay al-adiil, wa ma tibaʼʼidhum min eenak
[22] achaan humman ruuh jismak wa ziinat ragabatak.
[23] Wa be da khalaas, tamchi be amaan // fi derbak wa ma fi cheyy al-yutugg rijlak.
[24] Kan ragadt, targud bala khoof wa kan numt, noomak yabga halu.
[25] Ma tarjif min al-khoof al-mufaaji wa la min kharaab al-aasiyiin kan yaji.
[26] Achaan Allah yasturak wa yahfad rijlak min al-charak.
[27] Kan indak gudra le tisawwi al-zeen ma tamnaʼah le l-naas // al-hawjaaniin leyah.
[28] Kan indak, ma tuguul le akhuuk : «Amchi, ambaakir taʼaal nantiik.»
[29] Ma tichiil niiye fasle didd jaarak al-aayich be amaan jambak.
[30] Ma tihaarij maʼa naadum bala sabab kan hu ma sawwa leek cheyy fasil.
[31] Ma tahsid siid al-unuf wa abadan ma tichiil derbah.
[32] Achaan al-fasaad, Allah harramah wa laakin al-naadum al-adiil, Allah yantiih sirrah.
[33] Beet al-aasiyiin yalga khadab Allah wa beet al-saalihiin yalga barakatah.
[34] Yichchammat le l-chammaatiin wa laakin yarda le l-masaakiin.
[35] Al-hakiim yawris al-charaf wa l-matmuus yalga illa l-eeb.