[1] Ayaw agempet agpaybelagan.
[2] Paeseken in mga mangyan sa kantam mga balay. Angkataw apo mga mangyan agpaesek mangyan, in bayote yewed katawan bago mana angil in kansiro piyaonaik sa balay.
[3] Kantam dalanginen in mga piyagbilanggo anggan tomag kitam piyagbilanggo din. Kantam dalanginen in mga piyagpaidapan anggan tomag kitam piyagpaidapan din.
[4] Ayaw agpalsowayen in mga taybalang. Kailangan in taybalang agmaal sa osai osai angkataw piyagparosa Diyos in mga agbaliwan agpanggaraw.
[5] Ayaw kitam sakop sa kowarta. Kitam agkaanggay wa kamayba nakay in sa kantam, angkataw in siyabi Diyos keyen, Kao idbatay kangay piyabayaan, idbatay din biyaliwan.
[6] Na kitam yewed piyagbaslag in remrem kasabi keyen, In Kapwan in agtolong sa kangay. Ako idbatay agkalimo kamayba nakay in piyagpangwat mangyan sa kangay.
[7] Ayaw agkalibangaw sa mga agpapoon sa kantam, agpatoldo in agiplaong Diyos. Kantam remremen in mga maalen in mibaloy batang sa kansiro boway. Kalbas kantam toladen in siro agpasandig sa Diyos.
[8] IsoKiristo siyo kataw daan in tangona, kamayba ngona, anggan idapo kalobosan.
[9] Kitam ayaw abel sa mga olok in kamayba nakay pag agpatoldo. In agpakaeyat sa kantam abyan in Diyos agpakayawte, yewed in mga batas panawen sa pamangnen. Baina, in mga agpaniwala asin idapo batang abel pakinabang.
[10] Kitam apo osai ka kagwali paltawan pagsonogan andog. Yewed maal agkoman in yaandog asin in mga sasirdoti agpanawen sa datiyan torda pag sambaan.
[11] In daya mga ayop piyagbaba in mabwat pag sasirdoti sa pagtagbowan gayed sa Diyos, ina pag daya piyagandog panawen sa mga daet, kamay in mga galem agbangen biyaba wa sa awak bayan, ista wa piyagtebed.
[12] Kataw din ina Isos matay sa awak bayan matang panawen sa kansiyo daya in mga mangyan liinis sa kansiro mga daet.
[13] Na kitam pataboy sa kansiyo sa awak bayan palagem sa kansiyo karikoyan.
[14] Angkataw atai sa kobat kitam idapo bayan palagi batay pagoliyan. Dayem in kantam piyagpanaya in dogayan pag bayan.
[15] Na kitam wa baatte agmaal sa Diyos, agawit in ngaran Isos. Ina kantam andog piyagparateng Isos sa Diyos.
[16] Kitam ayaw agkalibangaw agpangwat maal, osai agtaboy sa mga roma, angkataw in kataw ina pag mga andog makaanggay din sa Diyos.
[17] Kitam pasakop sa mga agpapoon sa kantam, pangwaten in kansiro piyagsabi. Panawen siro in agalapet sa kantam na siro batay piyagtanong Diyos. No kitam agpaniwala sa kansiro na siro agkaanggay agpanawen sa kansiro tongkolin. Kamay no yewed, na siro agkabyatan, na ina idbatay makamaal sa kantam.
[18] Kami dalanginen. Sa kanyam atawanan kami idapo daet agpagolo sa galem, osai kami baatte agpilit agogali in betek kamayba nangkadogay.
[19] In kangay ngani piyagayay sa kanyo ako dalanginen matang idwa dogay ako kaoli wakay sa kanyo.
[20] Kamo kangay piyagpandalangin sa Diyos in pagrakayan apyaan. Siyo in agpaboway wakay tagoli kay Isos kantam Kapwan. Isos kansiyo piyangwat Poon lakoy Agalapet sa kansiyo mga topa, angkataw in kansiyo katayan in agparigen sa idbatay lobos pag kasondowan.
[21] Na in Diyos in agpakan sa kanyo in boo kanyo piyagkailangan matang kamo kapangwat in kansiyo beet. Osai Iso Kiristo in paywaraan agpangwat sa kantam galem in makaanggay sa Diyos. Siyo pakalakonawen anggan idapo kalobosan. Ina wa ngani.
[22] Mga belag, kangay piyagayay kamo agbanta sa kangay piyatoldo, angkataw kaabate waget anda pag solat.
[23] Kangay beet biyarita sa kanyo kantam belag Timotiyo piyalpas wa. No nges siyo toloy wa atai rateng, na siyo kangay batay piyagpaanggat no ako batay wa asin sa kanyo.
[24] Kamo keyen sa mga agpakoyay sa kanyo siro kanyam piyagpandalangin kadayo in boo mga belag. In mga belag sa Italya keyen, Kamo lames idapo kamay nakay?
[25] Kamo boo pakayawteen in Diyos.