[1] Ako Santiyago in agsolat, sogowan Diyos, osai in Kapwan IsoKiristo. Ako agsolat sa boo mga iidang Diyos sa boo mga kobat. Kataw nakay wa kamo?
[2] Laki Mga belag, no kitam piyagtepeng aronaw kaidapan, na kitam wa agkaanggay,
[3] angkataw kantam atawanan no kitam piyagtepeng kaidapan na ina pamparigen sa kantam paniwala.
[4] Kamay kailangan kitam agpakarigen anggan sa kalobosan matang kitam sibay, maal wano, idapo wa korang.
[5] Kamayba nakay sa kanyo no korang in katawanan, na mangayay sa Diyos, na siyo piyagpakan, angkataw in Diyos agtaboy lakonaw, siyo idbatay agpangelel.
[6] Kamay no agayay na kailangan tiyaken batay piyakan, ayaw piyagbaslag in remrem. Angkataw in piyagbaslag in remrem kataw alon sa dagat piyagbaba kowaya kamayba saano agbangen pataboy.
[7] In mangyan kataw ina ayaw manremrem keyen siyo batay piyakan in Kapwan,
[8] angkataw in kansiyo remrem piyagbaslag, piyagalisalis.
[9] In maidap pag belag, no siyo piyakayaman Diyos na siyo agkaanggay wa sa Diyos.
[10] Kamayba in mayaman pag belag no siyo piyakaidap Diyos, na agkaanggay wa din sa Diyos, angkataw in mga mayaman batay maidapo kataw mga betakan lalosen.
[11] In lalosen agkaloto no piyagpangibeng, agkaragrag in kansiyo betakan, agkaidapo in kansiyo kaalenen. Na kataw din ina in mayaman agkatay sa betek siyo agasesenen kay sa kansiyo mga nakayte.
[12] Agkaanggay in mangyan agaway agpakarigen kamayba piyagtepeng mga kaidapan. Angkataw no siyo kapandaeg wa na siyo batay wa piyagpakan bayad, ina in boway piyangako in Diyos sa mga agkabeet sa kansiyo.
[13] No in mangyan piyagpaidapan ayaw agsabiyen keyen, Ako piyagpatoldo wa Diyos sa daet. Angkataw in Diyos idbatay apatoldo sa daet. Osai yewed din agpamatoldo sa daet kamayba wa kay nakay.
[14] In agtepeng sa mangyan in kansiyo daan daeten pag remrem. Ina in agpatoldo sa kansiyo sa daet, in agbaba sa kansiyo.
[15] Paka siyo mababa wa, na siyo agpangwat wa daet. Kalbas no mistobo wa in daet, na ina wa in agbono sa kansiyo.
[16] Laki mga belag piyagmaal, kitam ayaw agpabaribid in remrem.
[17] In boo maalen piyagtaboy Diyos. Ina pag boo maalno batang sa langit batang sa Amang in agpangwat in mga tinglaw sa langit. Siyo yewed agiyalisalis, idbatay kataw in ibeng agkalabo, kitam idbatay biyaliwan sa lened.
[18] Kitam piyangwat kansiyo mga bodang panawen kitam kansiyo piyatoldo sa betek. Ina kansiyo beet matang kitam mibaloy osai wakay, lakonaw kay sa roma kansiyo mga piyangwat.
[19] Laki mga belag piyagpakayawte, pagremremen anda. Agpakaeyat sa agparengey, agingat no agiplaong, ayaw toloy agkabais.
[20] Angkataw in mangyan agkabais yewed kabaloy agpangwat in maal sa pangkit Diyos.
[21] Na baliwanen wa in kanyo mga marames pag ogali, in kanyo mga daeten pag piyagpangwat. Pasakop wa sa Diyos, paniwalaen in agiplaong kansiyo piyabalay sa kanyo mga remrem, angkataw ina kabaloy agpaboway sa kanyo.
[22] Ogaliyen in siyabi Diyos, ayaw waget agparengeyen. No kantam waget piyagparengey kamay yewed piyagpangwat, na kitam agpadaya sa kantam sadiri.
[23] Angkataw in agparengey waget sa siyabi Diyos kamay yewed agpangwat, siyo kataw osai ka mangyan mangkit sa aninowan.
[24] Paka ngiitan kansiyo mata, siyo panaw, toloy wa agkalibangaw no kataw nakay in kansiyo panrosayan.
[25] Kamay in agpangkit, agremrem, osai palagi agpangwat in maalen pag batas in agpalpas sa kantam, aro yewed agparengey waget kalbas toloy wa agkalibangaw, na ina pag mangyan batay agkaanggay sa boo kansiyo panawen.
[26] No in osai ka mangyan baatte agsamba kamay no yewed kansiyo piyagingatan in kansiyo mga piyagsabi, na idapo kabolowan in siyo agsamba. Siyo agpadaya waget sa kansiyo sadiri.
[27] No in mangyan agalapet sa mga olila, osai agtolong sa mga kagbaiyan balo sa kansiro mga kaidapan, osai yewed malabo sa daet pag panawen atai pag kobat, na ina in maal pag agsamba sa pangkit Diyos, in makaanggay sa Diyos Amang.