[1] Laki mga belag, kataw kamo agpaniwala sa kantam Kapwan IsoKiristo in lakonaw pag Kapwan lakoy, na ayaw kamo agpangidang mangyan.
[2] Alimbawa no apo dowai ka mangyan rateng sa kanyo samba, in osai mayaman, maalen wano in lambong, siyo apo singsing ginto. In osai agbangen maidap, rogniten in lambong.
[3] No kanyo yaapora in mangyan maalen in lambong keyen, Kao atai sa maalen pagtokkawan. Kalbas keyen wakay sa rogniten in lambong, Kao asin waget tomaydek, no yewed piyatoldo in matemek agbangen keyen, Kao asina wa tomokkaw.
[4] Na no kataw ina kamo agpangidang wa, daeten wa in kanyo pangkit sa mga mangyan.
[5] Laki mga belag piyagpakayawte, amba mamarengey. In iidang Diyos in mga maidap sa pangkit mga mangyan, matang kansiyo piyangwat mga mayaman sa paniwala, osai piyaanggat sa sakopan kansiyo piyangako sa mga agkabeet sa kansiyo.
[6] Kamay kanyo piyagidapo kabolowan in mga maidap. Yewed mana kitam piyagpaidapan in mga mayaman? Yewed mana siro in agpabintang sa kantam matang kitam yoosapan?
[7] Siro wa daan in aglibak sa maalen pag ngaran Kiristo in tiyaboy Diyos sa kantam.
[8] No kantam piyagpangwat in batas tiyaboy Diyos, in Agisolat keyen, No nangkataw kao agpakayawte sa kaimo sadiri na kataw daan din ina kao agpakayawte sa mga amat, no kitam agkataw ina na maal in kantam piyagpangwat.
[9] Kamay no kamo agpangidang mangyan na daet in kanyo piyagpangwat, na siyabi in mga Batas Diyos kailangan kamo piyarosa kataw kamo mga songgaran.
[10] Angkataw in mangyan agpaniwala sa boo mga Batas, kamay lomaban kamayba sa osai waget, na kansiyo piyaglabanan in boo.
[11] Angkataw in agsabi keyen, Ayaw agpanggaraw, siyo din in agsabi keyen, Ayaw agbono mangyan. Na no in mangyan yewed manggaraw kamay agbono mangyan, na siyo lomaban wa din sa boo Batas.
[12] Na kitam agingat sa kantam mga piyagsabi osai sa mga piyagpangwat, angkataw kitam batay piyagpaltikkatawan osai in mga batas in agpalpas sa kantam.
[13] In Diyos batay ngani agparosa, idbatay agpakayawte sa mangyan yewed katawan agpakayawte. Kamay in mangyan agpakayawte idbatay wa agkalimo sa kabetek agparosa.
[14] Mga belag, idapo batay kabolowan sa osai ka mangyan no siyo agsabi keyen, Ako agpaniwala, kamay siyo idapo piyagpangwat panawen sa kansiyo paniwala. Siyo lames batay piyaboway no kataw ina in kansiyo paniwala? Yewed.
[15] Alimbawa, no in osai ka belag idapo wa lambong, idapo wa pamangnen,
[16] no kitam agsabi sa kansiyo keyen, Kao sarigen in Diyos, kao aglambong wa, mamangan wa, kamay yewed piyakan in kansiyo kailangan, na nakay in kabolowan ina?
[17] Na kataw daan din ina in agpaniwala, no idapo piyagngitan panawen, na idapo ngani kabolowan.
[18] Karam apo keyen, In osai ka mangyan apo paniwala, in osai wakay apo panawen. Na ako keyen, In idapo panawen, nangkataw siyo batay kapapangkit kansiyo paniwala? Kamay in kangay mga piyagpangwat, ina in padalan piyagpapangkit in kangay paniwala.
[19] No kamo agpaniwala apo osai waget ka Diyos, na ina maal. Kadayo in mga mamaw agpaniwala kataw ina, kamay siro agpangirabot.
[20] No in mangyan agsabi siyo agpaniwala kamay yewed kay kansiyo atawanan idapo kabolowan in agpaniwala no idapo piyagpangwat, na siyo idapo bait.
[21] Remremen in kantam tangona kakoyayan Abraam. Siyo piyagkaanggayan Diyos panawen sa kansiyo piyangwat, in kansiyo tiyaboy sa Diyos in kansiyo bodang Isaak sa kagwali paltawan.
[22] Na asin piyagngitan agpaysarig in kansiyo paniwala osai in kansiyo panawen. Panawen sa kansiyo piyangwat mibaloy wa gayed maal in kansiyo paniwala.
[23] Mibaloy wa in piyagsabi sa Agisolat keyen, Abraam agpasandig sa Diyos. Panawen ina siyo piyangwat idapo daet sa pangkit Diyos, siyo piyagbelag Diyos.
[24] Asin piyagngitan kaya in mangyan piyangwat betek, panawen sa kansiyo mga piyangwat, yewed waget panawen sa paniwala.
[25] Kataw daan din ina Raab in agpanggaraw pag kagbaiyan. Kaya siyo piyangwat wa idapo daet panawen sa kansiyo piyangwat in siyo agtanggap sa mga talawtaw osai agpapanaw sa kansiro sa osai wakay ka dalan matang siro domalagan.
[26] No nangkataw in bilog no idapo wa payeng na matay wa, na kataw daan din in paniwala no idapo panawen na kagwali wa matay.