[1] Kamo in mga mayaman, mamarengey wa. Kamo manggaga wa, manangis wa panawen sa mga kaidapan agrateng sa kanyo.
[2] Mangarokas wa in kanyo mga sangkap. Piyamangan wa ipes lakoy in kanyo mga damit.
[3] Piyamangan wa ngani karawang in kanyo mga ginto, mga kowarta. Kalbas ina daan pag karawang in batay agpatotoo laban sa kanyo. Ina batay kagwali baya agkoman kanyo bilog. Kanyo piyagtipon in kanyo mga sangkap, bago agkalobos wa in kobat.
[4] Yewed kanyo tiyaboy in bayad sa mga agpanawen sa kanyo mga kobat. Mamarengey wa sa agdaing. In daing in mga agani sa kanyo kobat agrateng wa sa Diyos in Kapwan in apo kabaloyan sa boo.
[5] Kamo agkasadapan agtokkaw apyaan atai sa kobat. Kamo agpakataba kataw beyek, bago bangen wa in ibeng piyagbono.
[6] In mga maal pag mangyan kanyo piyadaet, kanyo biyono. Siro yewed din lomaban sa kanyo.
[7] Na laki mga belag, kitam agbanta agpanaya anggan sa rateng in Kapwan. Baina in agtogda, siyo agpanaya sa talapon osai sa dengdeng, siyo agbanta agpanaya sa maal pag manggalem kansiyo togda.
[8] Na kailangan din kitam agbanta osai agpakaeyat in remrem, angkataw bangen wa in agrateng in Kapwan.
[9] Laki mga belag, ayaw agpanremrem daet sa osai osai, na kamo idbatay piyarosa Diyos. Bangen wa in agosap.
[10] Laki mga belag, toladen in mga poropita, in mga sogowan in Kapwan in siro agbanta sa betek piyagpaidapan.
[11] Kantam atawanan agkaanggay in agbanta anggan sa kalobosan. Alimbawa Oob. Siyo agbanta, kalbas kantam atawanan in maal pag piyangwat in Kapwan sa kansiyo sa kalobosan. Asin kantam piyagngitan in kabaiten in Kapwan in siyo agpakayawte.
[12] Laki mga belag, labi kay sa boo, no kamo mangako na ayaw agdagdag. Ayaw keyen, Kamaybawa sa langit, kamaybawa sa kobat, kamaybawa nakay. No in pangako keyen batay, na sabiyen waget batay, no idbatay na sabiyen waget idbatay. Na kamo idbatay piyarosa Diyos.
[13] Sa kanyo apo lames mangyan agkaidapan? Na mandalangin wa. Apo lames agkaanggay? Na agbaren wa agmaal sa Diyos.
[14] Apo lames maskit sa kanyo? Na beryaen wa in mga koyay sa barkadaan mga bodang Diyos, matang agpandalangin, agyodyod langis agayay tolong sa Kapwan.
[15] Kalbas in maskit batay piyaoraw panawen agpasandig sa Diyos in mga agpandalangin. Siyo batay piyaoraw in Kapwan. Osai no siyo batang agpangwat daet, na in daet batay liibangaw.
[16] Sabiyen wa in kanyo mga daet sa baatte osai. Kamo maysipandalanginan matang kamo piyakapya. No siyo in maal pag mangyan, no maloba agpandalangin, na lakonaw in agibaloy sagot sa kansiyo pandalangin.
[17] Iliyas mangyan daan kataw kitam. Siyo maeyat agpandalangin keyen ayaw omodan. Kalbas tolo ka dagon enem ka bolan idapo ngani odan.
[18] Kalbas siyo mandalangin wakay, lomwas wa lakoy in odan, kalbas manggalem wakay in mga togda.
[19] -
[20] Laki mga belag, remremen anda. No sa kanyo apo mibaribid sa maal, kalbas apo wakay agpatoldo sa kansiyo matang siyo moli wakay sa betek, na in agpatoldo sa apo daet matang siyo idwakay agogali daet, siyo agpaboway wa asin pag mangyan osai in Diyos aglibangaw sa karowan daet.