[1] Saano batang in kanyo agkagalit? Nakay batang kamo agpalawayan? Ina batang sa kanyo daet pag remrem in agkabeet sa kanyo waget sadiri. Ina agpalaway sa kanyo galem.
[2] Kamo nges apo piyagkabeet kamay idbatay rateng sa kanyo, kalbas kamo agkabono. Kamo agpanagiri, idbatay tiyaboy in kanyo beet, kalbas kamo agkagalit, agpalawayan. Kaya idapo in kanyo piyagkabeet, kamo yewed agayay sa Diyos.
[3] Kamo nges agayay, ai, in kanyo remrem daeten. Kaya kamo yewed piyakan, piyagalapet batay sa kanyo waget sadiri remrem.
[4] Kamo kataw in kagbaiyan agpanggaraw. Yewed mana kanyo atawanan in agkabeet sa mga atai sa kobat ina aglaban wa daan sa Diyos. No kansiyo piyagkabeet in kobat na siyo aglaban sa Diyos.
[5] Kanyo lames piyagremrem idapo kabolowan in siyabi in Agisolat keyen, In Diyos agalwasi sa remrem kansiyo piyabalay sa kantam?
[6] Kamay siyo labi kay agpakayawte sa kantam. Angkataw piyagsabi sa mga Agisolat keyen, In Diyos aglaban sa mga agpakabwat in remrem, kamay agpakayawte sa mga agpakabwatte in remrem.
[7] Na pasakop wa kamo sa Diyos. Kamo lomaban sa dimonyo, na siyo batay alimowan sa kanyo.
[8] Pasabangen wa sa Diyos, na siyo batay pataboy sa kanyo. Kamo mga agpamangwat daet, benglayen wa in kanyo mga daet. Kamo mga agpatolad waget, benglayen wa in baslag kanyo remrem.
[9] Kamo agrongkot wa, agpaereng wa, manangis wa. Palitanen wa rongkot in kanyo agkaanggay. Palitanen wa agpanangis in kanyo agpatawa.
[10] Agpakabwatte kamo sa adap in Kapwan, na kamo kansiyo batay piyakabwat.
[11] Laki mga belag, ayaw agpanlibak sa osai osai. No siyo aglibak osai agidapo kabolowan sa kansiyo belag, na siyo aglibak osai agidapo kabolowan sa mga Batas. Kalbas no siyo aglibak sa mga Batas, na siyo idwa agpaniwala sa mga Batas, no yewed aglibak.
[12] Diyos waget in agpangwat in mga Batas, osai in kasabi no maal in mangyan no daet. Siyo wa daan in apo kabaloyan agpaboway, apo kabaloyan agbono. Na nakay batang kao aglibak sa roma mangyan?
[13] Sa kanyo apo mga agsabi keyen, No yewed ngona na goribas kami batay pataboy ati no yewed ista pag bayan lakoy. Osai ka dagon kami ista agpamataw aganap boway batay kangitan lakonaw.
[14] Kamay remremen anda, Yewed kanyo atawanan goribas no nakay in batay rateng sa kanyo. Angkataw in kantam boway kagwali osok kadogayte ngiitan toloy wakay matonaw.
[15] In maal kay kanyo sabiyen keyen, No ina in remrem in Kapwan, no kami batay kay boway, na kanyam piyagpangwat anda no yewed ina.
[16] Kamay kamo agpakalakonaw, kamo agpakayabang. Ina daet.
[17] In katawan in maal, kamay yewed agpangwat, na ina daet.