[1] -
[2] Laki mga belag, ayaw karowan sa kanyo in agkabeet sa tongkolin agpatoldo. Angkataw kitam boo mapret somala. Kamay no kami agbangen in mga agpatoldo somala na tiyak maloba in batay pangelel sa kanyam labi kay sa mga amat. In mangyan idapo somala sa kansiyo mga piyagsabi, na siyo betek wano pag mangyan, kabaloy din agpandaeg sa boo kansiyo galem.
[3] Alimbawa no kantam tiyagikaw in orong kalabaw na siyo agpaniwala kamayba saano kantam beet pataboyan.
[4] Kataw din ina in mga sakayan parkado apo tablate pampapeles. Kamaybawa lakonaw lakoy in parkado, osai piyagpapanaw kowaya lakoy, ina apapeles daan in tablate sa paoriyan kamayba saano agbangen in beet in kapwan.
[5] Na kataw daan din ina in bibi mangyan. Ina kalakoyte waget pag sangkap sa bilog, kamay siyo kabaloy maloba agyabang. Baina in kaslangen in kobat mararab batang waget sa lipato.
[6] Na in bibi kataw daan baya. Siyo lipato batang sa toyongan, agrarab sa boo boway in mangyan. Sa mga sangkap sa kantam bilog in bibi wa in paywaraan sa boo mga daet atai sa kobat. Siyo in agakay sa boo bilog sa daet.
[7] In boote ayop kamayba in mga bantog, mga agipanaw, mga aginakap, kamayba in mga agbalay sa sapa, ina boo agkapaapo mangyan, osai apo ngani batang maapo.
[8] Kamay idapo mangyan kapaapo sa bibi. Ina wa in daet wano, idbatay apasakop, maloba makapolongan.
[9] Ina pag bibi in kantam piyagalapet agmaal sa kantam Kapwan, osai sa kantam Amang. Ina daan din pag bibi in kantam piyagalapet sa agpamanes sa mga mangyan sa piyangwat Diyos kataw daan siyo.
[10] Batang sa osai waget ka bibi aglowas kadayo in agmaal kadayo in agpamanes. Laki mga belag, yewed maal in agkataw ina.
[11] Idbatay lomwas sa osai waget ka bokbokalan in sapa masadap osai mapait.
[12] Laki mga belag, in kapi idbatay manggalem limaw, in balagen idbatay manggalem kapi. Na idbatay din lomwas in sapa masadap sa bokbokalan sapa mapait.
[13] No sa kanyo apo mangyan katawanan osai katawan, na ina kansiyo papangkiten sa maalno pag mga ogali, agpanawen maal panawen agpakabwatte remrem batang sa kansiyo katawanan.
[14] Kamay no kanyo remrem mapait, tagiriyan osai sadiriyen, na ayaw agpakabwat, ayaw aglampas sa betek.
[15] In kataw ina batang sa dimonyo, sa bilog, sa remrem waget mangyan. Yewed ina in katawanan batang sa Diyos.
[16] Angkataw no saano in agpanagiri osai in solangan na asin din in agpalawayan osai in boo daeten pag panawen.
[17] Kamay in katawanan batang sa Diyos in tokaw piyagngitan idapo agiyagem daet, kadogay apyaan in remrem, mabait, katawan agpabelag, agpakayawte, agpangwat in boo maalno, yewed agpangidang sa mangyan, yewed waget agpakagwali.
[18] In mabait pag agpakapya na ina kagwali mangyan agtogda, kalbas in batay raweg in maal pag ogali.