[1] Na, laki mga belag sa agpaniwala, mga iidang Diyos agtaboy sa langit, remremen Isos. Siyo sogowan lakoy Diyos, piyangwat Mabwat pag Sasirdoti agpapoon sa kantam paniwala.
[2] Sa talnakiyan Diyos Mowisis yewed aglimbang agpanawen kansiyo tongkolin. Na kataw daan din ina Isos. Siyo yewed aglimbang, siyo agpaniwala sa agsogo sa kansiyo.
[3] Kataw in agpangwat in balay osai in balay piyangwat, in agpangwat agbangen in piyagpalakonaw, na kataw daan din ina Isos in piyagpalakonaw labi kay kay Mowisis.
[4] In balay idbatay mibaloy no idapo agpangwat. Kamay Diyos in agpangwat in boo wanote.
[5] -
[6] Kiristo osai Mowisis siro tikkataw, tanan yewed aglimbang sa panawen tiyaboy Diyos. Kamay siro yewed tikkataw. Mowisis sogowan waget agsabi in batay kay piyagpalowas Diyos. Kamay Kiristo agbangen Bodang, siyo agpapoon sa talnakiyan. Kitam in kansiyo talnakiyan no kitam agpakaeyat in paniwala, osai agkaanggay sa kantam piyagpanaya.
[7] Na kataw in siyabi in Maal wano pag Abyan keyen, Ngona, no kamo karengey in agiplaong Diyos,
[8] na ayaw marigen in kanyo remrem, kataw tangona in sa moyod in manonggar kanyo mga kakoyayan in siro agtepeng sa Diyos.
[9] Keyen in Diyos, Ista ako liyabanan, tiyepeng kanyo mga kakoyayan. Bago apatnapo ka dagon kansiro piyagngitan in kangay mga panawen.
[10] Panawen ina, ina pag mga betek, ako abaisan asin pag mga mangyan. Ako keyen, Baatte siro agibaribid in remrem. Siro dayo katawan in kangay mga ogali.
[11] Matang sa kalobaen ako abaisan kangay wa siyabi keyen, Kamayba wakayno siro idbatay wa daan piyakan in kangay agpainga apyaan.
[12] Na, laki mga belag, kitam agingat. Ayaw apo sa kantam kamayba osai waget ka aleleng, yewed agpaniwala, anggan pakalwat wa sa agkaboway pag Diyos.
[13] Dayem in maal, ngona pag apo kay kabetek kitam agpaeyat remrem sa osaiosai matang idapo batay mibaloy songgaran sa Diyos panawen siyo piyaakay daet.
[14] Angkataw kitam boo kabelagan Kiristo, no kitam palagi daan marigen in agiskapet sa kansiyo, no nangkataw sa parakayan na kataw daan ina anggan sa kalobosan.
[15] Keyen in mga Agisolat, Ngona, no kamo karengey in agiplaong Diyos, na ayaw marigen in kanyo remrem kataw tangona in kanyo mga kakoyayan manonggar sa kansiyo.
[16] In mga tangona agparengey in agiplaong Diyos, kalbas somonggar sa kansiyo, siro in boo mga piyalpas Mowisis sa Iipto.
[17] In tangona kiyabaisan Diyos apatnapo ka dagon, siro in mga agpamangwat daet kalbas mangatay wa sa moyod.
[18] In piyagsabiyan Diyos in siyo keyen, Kamayba wakayno kamo idbatay wa daan piyakan in kangay agpainga apyaan, siro in mga dayo maniwala.
[19] Na kantam atawanan kaya siro idwa piyakan in piyagsabi Diyos agpainga panawen siro yewed agpaniwala sa kansiyo.