[1] Na kailangan ngani remremen gayed maal in mga piyatoldo sa kantam, matang kitam idbatay mipabaribid.
[2] Kantam atawanan betek in Batas biyarita mga angil. Kamayba nakay in aglaban, in yewed maniwala asin, na siyo piyarosa kalakoy daan in kansiyo piyangwat daet.
[3] Na labi kay kitam batay piyagparosa no kantam piyagidapo kabolowan in boway lakoy piyagtaboy sa kantam. Angkataw in Kapwan daan in tokaw agpatoldo ina. Kadogay in mga agparengey sa kansiyo, ina wakay in agpatonay agbarita sa kantam.
[4] Ina piyatonay din Diyos sa kansiyo mga tanda, mga makasoyo lakoy pag panawen, kansiyo kabaloyan, kadayo din sa mga piyagtaboy in Betek pag Abyan, tiyaboy kataw wa daan in kansiyo beet.
[5] In bayo wakay dogayan pag kobat in kanyam piyagsabi, ina yewed piyasakop Diyos sa mga angil.
[6] Kamay sa osai ka betek sa mga Agisolat apo siyabi sa Diyos keyen, Nakay in kabolowan kami in mga mangyan? Nakay batang in mangyan kaimo piyagpanremrem? Nakay batang in mangyan kaimo piyagalapet?
[7] Kadogayte waget kami in mga mangyan kaimo piyakabwatte sa mga angil. Kamay kami kaimo piyakalakonaw, kaimo piyakabwat.
[8] In boo wanote kaimo piyasakop sa kabaloyan mangyan. Na in keyen in boo piyasakop sa mangyan, na in beet siyabi idapo yewed piyasakop. Kamay anggan ngona kantam piyagngitan yewed kay boo mipasakop sa kantam.
[9] Kamay in mangyan Isos kantam atawanan. Kadogayte waget siyo piyakabwatte sa mga angil. Kaya siyo piyakabwatte matang siyo matay panawen sa boo mangyan angkataw in Diyos agpakayawte sa kantam. Kalbas ngona siyo piyakalakonaw piyakabwat, panawen siyo domalan sa katayan.
[10] Panawen sa mga kaidapan diyalan Isos siyo piyasibay Diyos agpaanggat in karowan sa agrawa pag langit. Ina piyangwat Diyos in agpangwat in boote, osai agalapet in boote. Maal in kansiyo piyangwat kataw ina, angkataw batang ngani kay Isos in boway piyagtaboy sa kansiyo mga piyagpaanggat.
[11] Kadayo in mga liinis, kadayo Isos in aglinis sa kansiro mga daet, na siro boo osai waget in Amang. Matang Isos idwa agkarikoy agpabelag sa kantam.
[12] Siyo keyen, Diyos, kaimo ngaran kangay batay piyagbarogi sa kangay mga kabelagan. Ako batay agbaren agmaal sa kaimo sa tiponan kaimo mga bodang.
[13] Keyen kay, Ako batay agpasandig sa Diyos. Siyabi kay keyen, Baanda wa ako osai in mga bodang tiyaboy Diyos sa kangay.
[14] Kataw in piyagbarogi mga mangyan apo bilog apo daya, na Isos mibaloy din mangyan kataw siro apo bilog, apo daya. Kaya Isos agpangwat kataw ina matang panawen sa kansiyo katayan diyaeg wa gayed in dimonyo in datiyan apo kabaloyan sa katayan.
[15] Matang piyamalpas wa Isos in mga mangyan boo boway batang sogowan dimonyo panawen siro agkalimo sa katayan.
[16] Yewed ngani mga angil in kansiyo piyagtolong, dayem in mga kasokponan Abraam.
[17] Ina in dailan kaya kailangan siyo mibaloy kataw wa daan gayed in kansiyo mga kabelagan. Matang siyo mibaloy Mabwat pag Sasirdoti agpakayawte osai yewed aglimbang pag sogowan Diyos, aglinis in mga daet sa mga mangyan.
[18] Panawen siyo batang tiyokso domalan sa mga kaidapan siyo ngona kabaloy agtolong sa mga piyagtokso.