[1] In totoo maalen, yewed in mga Batas. Ina rarawan waget sa mga maalno in batay kay rateng. In mga Batas yewed kapabetek sa mga mangyan baatte dagon agandog matang nges agpasabangen sa Diyos.
[2] No in mga agpasabangen sa Diyos liinis wa panawen asin pag mga piyagandog, na idwa nges magolo in kansiro remrem panawen sa kansiro mga daet, osai idwa nges kailangan wakay agandog.
[3] Kamay ina daan pag mga andog in baatte dagon agpagolo wakay sa kansiro remrem panawen sa kansiro mga daet.
[4] Angkataw in daya mga toro, mga daya kambing idbatay ngani kabaloy aglibangaw sa mga daet.
[5] Ina in dailan kaya Kiristo, in siyo atai pataboy sa kobat, kansiyo siyabi sa Diyos keyen, Yewed mga andog, yewed mga ayop piyagbono in kaimo piyagkabeet. Dayem bilog in kaimo siyandata sa kangay, matang kangay piyagandog.
[6] In mga andog piyagsonog osai mga andog panawen sa mga daet, yewed ina in kaimo piyagkaanggayan.
[7] Matang ako keyen, Diyos, anda daan ako sandata wa agpangwat in kaimo beet, kataw in siyabi sa mga Agisolat panawen sa kangay.
[8] In tokaw kansiyo siyabi keyen, Yewed kaimo piyagkabeet, yewed kaimo piyagkaanggayan in mga piyagtaboy, in mga andog, in mga ayop piyagsonog, osai in mga andog panawen sa mga daet, kamayba in mga ina in piyagayay in mga Batas.
[9] Kalbas kansiyo wakay siyabi keyen, Diyos, anda daan ako sandata wa agpangwat in kaimo beet. Na kataw ina kansiyo kiyowa wa in datiyan, piyabalay wakay in bayo.
[10] Kansiyo piyangwat in beet Diyos, yaandog in kansiyo bilog. Ina makaosai waget, sibay wa. Panawen ina kitam liinis wa sa kantam mga daet.
[11] In baatte sasirdoti Odyo ibengibeng agtaydek agpanawen agandog. Baatte ibeng ina daan in kansiyo panawen in agandog wakay ayop. Kamay ina idbatay kalinis sa mga daet.
[12] Kamay Kiristo agbangen makaosai waget omandog panawen sa mga daet. Ina sibay wa kamayba wa nangkadogay. Kalbas siyo tomokkaw wa sa pamalang agbangen Diyos.
[13] Sigod ina siyo agpanaya anggan in kansiyo mga kaaway piyasakop wa gayed Diyos sa kansiyo.
[14] Angkataw panawen sa kansiyo andog kamayba osai waget, na in kansiyo mga liinis, in kansiyo mga piyakapya sa pangkit Diyos, kansiyo piyangwat sibay anggan idapo kalobosan.
[15] Kadayo din in Betek pag Abyan agpatonay sa kantam. In tokaw kansiyo siyabi keyen,
[16] Keyen in Kapwan, No rateng wa ina pag kabetek, na anda wa in kasondowan kangay batay piyangwat sa kansiro. In kangay mga batas kangay batay piyagpabalay sa kansiro mga galem, piyagsoroy sa kansiro mga remrem.
[17] Kalbas kansiyo kay din siyabi keyen, Kangay wa piyaglibangaw in kansiro mga daet, kadayo in siro agaleleng.
[18] Paka liibangaw wa in mga daet, na idwa piyagkailangan agandog panawen sa mga daet.
[19] Na, laki mga belag, panawen Isos matay kitam idwa piyagayaw misoroy sa pagtagbowan gayed sa Diyos.
[20] Angkataw in kansiyo bilog matay, ina in agrognit sa damit pamengbeng, matang kitam piyakan in bayo osai agkaboway pag padalan agpasabangen sa Diyos, ina in kay Isos boway.
[21] Kitam apo sasirdoti lakoy agpapoon sa talnakiyan Diyos.
[22] Na kitam pasabangen gayed sa Diyos agpasandig gayed asin pag sasirdoti, ayaw piyagbaslag in remrem, in kantam galem liinis wa in daet, in kantam bilog yoogas wa in malinis pag sapa.
[23] Kitam agpakarigen, ayaw aglimbang agsabi in kantam piyagpanaya, angkataw Diyos in mangako siyo idbatay ngani somala.
[24] Kitam wa agpilit agpalsipatoldowan sa agpakayawte, osai sa agpangwat maal.
[25] Ayaw dayo lomwas sa kantam mga agtipon kataw in ogali in amat, dayem pakaeyaten in remrem in baatte osai, labi kay ngona in kantam wa piyagngitan agkabangen wa in Ibeng agrateng in Kapwan.
[26] No kitam piyatoldo wa, katawan wa in betek, kalbas no kitam agaway kay agpamangwat daet, na idapo wa batay andog kabaloy agkowa in kantam daet.
[27] Dayem piyagpanaya wa in makapangirabot wano pag galit Diyos batay piyalowas, in baya lakoy batay aggalpong sa mga aglaban sa kansiyo.
[28] Kamayba nakay pag Odyo no agidapo kabolowan sa mga Batas Mowisis, no apo agpatonay dowai no yewed tolo, na siyo piyagbono wa, idapo batay agpakayawte sa kansiyo.
[29] Na no in mangyan agidapo kabolowan sa katayan in Bodang Diyos in agpakarigen sa kasondowan osai in aglinis nges sa kansiyo daet, no kataw ina siyo aglibak sa Bodang Diyos, aglibak din sa Abyan in agpakayawte, na in kataw ina pag mangyan labi wa mabyat in parosa, aon?
[30] Angkataw kitam katawan Diyos in agsabi keyen, Ako in agpamarosa, ako wa daan in agparosa. Osai din keyen, In Kapwan in batay agosap sa kansiyo mga mangyan.
[31] Makapangirabot wano in parosa in agkaboway pag Diyos.
[32] Amba, remremen wakay in tangona pag mga ibeng in kamo katanggap wa in rawa in Maal pag Barita. Kamayba aronaw in aglaban sa kanyo paniwala kamo marigen daan yewed ngani padaeg.
[33] Apo betek kamo piyaglibak piyagpamangwatan daet sa pangkit in karowan. Apo betek kamo sandata wa din paagem sa mga mangyan piyagpangwatan kataw ina.
[34] Kanyo din biyelag in mga piyagbilanggo. Osai kamayba piyangkowa in kanyo mga nakayte kamo agkaanggay daan, angkataw kanyo atawanan in yaman kanyo abel labi kay maal idbatay maidapo.
[35] Na ayaw kantam agbenglayen in agpasandig sa Diyos, angkataw ina apo lakoy bayad.
[36] Kailangan kitam agtiis matang kitam kapangwat in beet Diyos, na kitam batay piyakan in kansiyo piyangako.
[37] Angkataw keyen in mga Agisolat, Idwa dogay agrateng wa in atai agtaboy. Siyo yewed agpabeya.
[38] In kangay mga mangyan piyangwat idapo daet siro batay agkaboway panawen sa agpasandig sa kangay. Kamay no siyo mipaoli wakay na siyo idwa kangay piyagkaanggayan.
[39] Kamay kitam agbangen yewed mipaoli sa agtaboy sa toyongan. Dayem kitam mga agpasandig sa Diyos kalbas piyagpaboway.