[1] Tangona in Diyos mapret agiplaong sa kantam mga kakoyayan. Aronaw in kansiyo mga padalan agiplaong. In mga poropita, ina in kansiyo sogowan agiplaong tangona.
[2] In Bodang in sogowan agpangwat in boo wano gayed, siyo din in iidang agapo sa boote. Na ngona wa in sa kalobosan pag mga ibeng siyo wa in siyogo Diyos agiplaong sa kantam.
[3] In Bodang in agbalawas sa rawa Diyos. No nangkataw in Diyos na kataw daan ina in Bodang. Kaya baywi in boo wanote panawen sa kabaloyan in sa Bodang agiplaong. Paka kansiyo wa yoogas in kantam mga daet siyo tomokkaw wa sa pamalang agbangen Diyos in apo kabaloyan sa boo.
[4] Kataw in ngaran tiyaboy Diyos sa Bodang lakonaw kay sa ngaran mga angil, na kataw daan ina siyo labi kay kabwat sa mga angil.
[5] Angkataw in Diyos idbatang miplaong sa angil keyen, Kao kangay Bodang, ako kaimo Amang. Idapo din siyabi panawen sa angil keyen, Ako batay kansiyo Amang, siyo batay kangay Bodang.
[6] Dayem paka batay wa siyogo Diyos in kansiyo Bodang lakoy sa kobat, siyo keyen, Kailangan siyo pagmaalen in boo kangay mga angil.
[7] Panawen wakay sa mga angil in Diyos keyen, In kangay mga angil kangay piyagpangwat kataw kowaya. In kangay mga sogowan piyagpangwat kataw igang baya.
[8] Kamay in siyabi Diyos sa Bodang agbangen keyen, Diyos, kao batay agpapoon anggan idapo kalobosan. In kao agpapoon in boo kaimo remrem maalno.
[9] In boo betek pag ogali kaimo piyagkabeet, in boo daet pag ogali kaimo piyagkairisan. Ina in dailan kaya kao in iidang Diyos, in kaimo Diyos. Osai kao kansiyo piyakan in makaanggay pag tongkolin agpapoon, labi kay sa tiyaboy sa kaimo mga kabelagan.
[10] Keyen kay in siyabi, Kapwan, sa parakayan kay kao in agpangwat in boo kobat, kadayo in langit kao in agpangwat.
[11] In mga ina batay maidapo, kamay kao baywi daan. In mga ina agkasida kataw lambong loma wa.
[12] Ina kaimo batay piyagbaroron kataw islen, kalbas kataw lambong piyagpalitan. Kamay kao idbatay miyalis, kao kataw daan, idbatay matay kamayba nangkadogay.
[13] In Diyos idbatang agsabi kamayba kay nakay pag angil kataw in kansiyo siyabi sa Bodang keyen, Kao lakonaw, matang kao kangay piyagpatokkaw sa kangay pamalang agbangen anggan in kaimo mga kaaway boo wa gayed kangay piyasakop sa kaimo.
[14] Na asin atawanan in mga angil mga waget sogowan Diyos, kansiyo siyogo agtolong sa mga batay piyaboway.