[1] Anda wa in galem in kanyam piyagsabi. Kitam apo ngani Mabwat pag Sasirdoti kataw ina. Siyo in katokkaw sa langit sa pamalang agbangen in pagtokkawan in Mabwat lakoy sa boo.
[2] Ista siyo agpanawen sa galem gayed in balay torda tiyadyok in Kapwan yewed mangyan.
[3] In panawen in baatte mabwat pag sasirdoti in agandog osai agbono ayop piyagtaboy sa Diyos. Na kailangan din apo piyagandog in kantam Mabwat pag Sasirdoti.
[4] No karai siyo atai sa kobat na siyo yewed mayadi agsasirdoti angkataw apo wa daan mga sasirdoti agbaba mga andog kataw in siyabi sa mga Batas.
[5] Kaya atawanan in kansiro panawen rarawan waget in sa langit, angkataw rarawan waget in kay Mowisis tiyadyok balay torda. Baina, in siyo batay agtadyok in Diyos keyen, Kailangan ngani in kaimo pangwaten kataw daan in pagtoladan kangay piyapangkit sa kaimo ista sa boksor.
[6] Kamay in panawen tiyaboy kay Isos mabwat kay sa panawen in roma pag mga mabwat pag sasirdoti, in siro agpaywaraan sa datiyan kasondowan. Baina in kasondowan in piyagpaywaraan Isos labi kay lakonaw. Ina riigen in labi kay lakonaw pag mga pangako.
[7] No nges sibay in datiyan kasondowan, na idwa nges kailangan agpangwat osai ka bayo wakay pag kasondowan.
[8] Kamay ngiitan in Diyos in kansiyo mga mangyan yewed kabaloy. Matang siyo keyen, Agrateng in kabetek ako batay agpangwat osai ka bayo wakay pag kasondowan sa mga bodang Israil, sa kasokponan Oda.
[9] Ina yewed kataw in kangay tangona kasondowan sa kansiro mga kakoyayan in siro kangay yaakay piyapanaw sa Iipto. Angkataw siro somala asin pag kangay kasondowan matang siro kangay wa biyaliwan.
[10] Kataw wakay anda in kangay batay piyangwat kasondowan sa mga bodang Israil. Paka rateng wa in kabetek, in kangay mga batas kangay batay piyagpabolalang sa kansiro mga remrem, batay piyagpabalay sa kansiro mga bait. Ako batay kansiro Diyos, siro batay kangay mga bodang.
[11] In boo batay katawan sa kangay, kamayba in mga lakonaw, anggan in mga kalakoyte. Matang idapo wa batay agpalsipatoldowan in mga kabelagan keyen, Kao pasandig wa sa Kapwan.
[12] Angkataw ako batay agpakayawte sa kansiro, kangay wa batay piyaglibangaw in kansiro mga daet. Ina wa in siyabi in Kapwan.
[13] Na in siyabi Diyos keyen bayo wakay, na in beet siyabi in datiyan kasondowan kansiyo wa piyaidapo kabolowan. Kalbas kamayba nakay in piyagpaidapo wa kabolowan, in loma wa, na ina bangen wa ngani maidapo.