[1] In agpasandig sa Diyos, siyo katawan batay ngani mibaloy in kansiyo piyagpanaya kamayba wa ikkay piyagngitan.
[2] Angkataw kaya in Diyos agkaanggay sa mga mangyan tangona, panawen siro agpasandig sa kansiyo.
[3] Panawen kitam agpasandig sa Diyos, kitam katawan in kobat piyangwat Diyos sa kansiyo agiplaong, in ngona piyagngitan piyangwat batang sa yewed piyagngitan.
[4] Panawen Abil agpasandig sa Diyos tiyanggap in kansiyo andog. In kay Kain wakay yewed tiyanggap. Kaya kantam atawanan Abil betek, angkataw in Diyos agkaanggay sa kansiyo andog. Kamayba siyo matay wa, siyo agaway kay agiplaongan anggan ngona panawen siyo agpasandig sa Diyos.
[5] Panawen Inok agpasandig sa Diyos siyo yewed matay, siyo piyaaling sa ripay pag boway. Keyen in mga Agisolat, Siyo idwa piyagngitan angkataw siyo kiyowa wa Diyos. Siyabi din sa mga Agisolat keyen, In siyo ikkay kiyowa, in Diyos agkaanggay sa kansiyo.
[6] In mangyan idbatay makaanggay sa Diyos no yewed agpasandig sa kansiyo, angkataw in agpasabangen sa Diyos kailangan siyo maniwala apo ngani Diyos, maniwala in Diyos mabait sa mga agpamangkit sa kansiyo.
[7] Panawen Nowi agpasandig sa Diyos siyo piyatoldo Diyos in mga agrateng daet in ikkay batang ngiitan. Kalbas siyo maniwala sa Diyos agpangwat bangka matang piyaboway siro talnakiyan. Kaya atawanan in roma mangyan apo daet panawen Nowi agpaniwala sa Diyos. Na Nowi piyangwat Diyos idapo daet panawen siyo agpasandig sa kansiyo.
[8] Panawen Abraam agpasandig sa Diyos in siyo biyerya Diyos siyo maniwala, biyaliwan in kansiyo pagoliyan, pataboy sa kobat piyangako Diyos sa kansiyo, siyo panaw kamayba yewed atawanan in kansiyo pagtaboyan.
[9] Kamayba siyo panyawan sa kobat piyangako Diyos sa kansiyo, kaya siyo asin agbalay, panawen siyo agpasandig sa kansiyo. Siro isagteisagte malkoyogan, kadayo Isaak, osai Akob, siro din piyakan Diyos ina pag pangako.
[10] Kaya Abraam agkataw ina angkataw siyo agpanaya sa bayan lakoy marigen in tiyadyok Diyos, piyangwat batang sa kansiyo remrem.
[11] Kamayba Sara baog, osai koyayte wa, panawen siyo agpasandig sa Diyos siyo piyakan Diyos kabaloyan mamodang din angkataw siyo maniwala keyen in Diyos idbatay somala sa kansiyo pangako.
[12] Na kamayba Abraam agkabangen wa matay, siyo mamodang din mibaloy wa karowan in kasokponan, idwa abilang kataw in mga magirem sa langit, kataw in mga bowangin sa dagat.
[13] Siro boo agpasandig sa Diyos anggan sa katayan. Ikkay abel in piyangako sa kansiro, kamay kansiro ngiitan sa adayonaw, kansiro piyagkaanggayan. Kansiro yaamin siro mga panyawan waget agbalay atai sa kobat.
[14] Na panawen siro agsabi kataw ina in mga amat mangyan katawan siro agpamangkit in kansiro batay sadiri kobat.
[15] No kansiro piyagalwasi in kansiro batang pagoliyan na kalobante siro moli wakay.
[16] Kamay in kansiro piyagkabeet labi kay kamaal ina, in sa langit wa daan pagbalayan. Matang in Diyos yewed agkarikoy piyagawit kansiro Diyos, siro kansiyo piyagsandataan bayan.
[17] -
[18] In betek Abraam piyagtepeng Diyos, panawen siyo agpasandig sa Diyos siyo agtaboy in kansiyo bodang Isaak, batay nges piyagbono piyagtaboy sa Diyos in kansiyo osai waget ka bodang, kamayba in piyangako Diyos Isaak in batay amang sa karowan wano.
[19] Siyo katawan in Diyos kabaloy tagoli wakay agpaboway kay Isaak. Kataw ngani ina in mibaloy, Isaak kagwali wa batang matay, piyaoli wakay sa kansiyo.
[20] In Isaak agpandalangin kay Akob osai kay Isaw, panawen siyo agpasandig sa Diyos kansiyo asabi in mga maal pag agrateng dogayan.
[21] In Akob koyayte wa batay wa matay, in siyo agatang sa kansiyo sowan agsamba, panawen siyo agpasandig sa Diyos kansiyo piyandalangin in kansiyo dowai ka popo bodang Osi.
[22] In Osi bangen wa matay, panawen siyo agpasandig sa Diyos siyo keyen, In mga kasokponan Israil batay panaw sa Iipto, matang siyo agbilin keyen, Babaen in kangay mga bitol.
[23] Panawen kay Mowisis mga koyay agpasandig sa Diyos siro yewed agkalimo sa otos Paraon in poon lakoy sa Iipto. Tolo ka bolan kansiro biyetang in bodangte panawen kansiro ngiitan maalen wano pag bodang.
[24] Mowisis yaalapet kay Paraon bodang, kamay paka siyo lakonaw wa, panawen siyo agpasandig sa Diyos, siyo dayo wa piyagawit popo Paraon.
[25] Kansiyo remrem in siyo piyagpaidapan sarig in mga mangyan iidang Diyos, ina maal kay sa kadogayte waget pag kaanggayan in agyanggat sa mga agpamangwat daet.
[26] Kansiyo remrem in agtiis siyo piyagpakarikoy panawen siyo agpanaya kay Kiristo in batay rateng, ina lakonaw kay sa aronaw sangkap sa Iipto, angkataw siyo agpanaya sa batay bayad in piyagtaboy Diyos.
[27] Panawen Mowisis agpasandig sa Diyos siyo panaw sa Iipto, siyo yewed agkalimo sa galit in poon lakoy, maeyat kansiyo remrem angkataw siyo kagwali kangitan sa Diyos in yewed piyagngitan.
[28] Panawen ngani siyo agpasandig, kansiyo piyangwat in pista piyagawit Paskowa, kansiyo piyayodyodan daya in mga arigi sakbawan, matang in Sogowan Diyos Agpamono sa mga panganay idbatay agbono sa kansiro agbangen mga panganay, sa mga kasokponan Israil.
[29] Panawen agpasandig sa Diyos in mga kasokponan Israil siro kapotol sa Dagat Madayaan. In siro domalan kagwali mamara wa in diya, kamay paka mangagak in mga taga Iipto siro agbangen boo mangaleggeb.
[30] Panawen siro agpasandig sa Diyos in mga kasokponan Israil aglibedek pito ka ibeng sa bayan Iriko, kalbas mangaregnas in alabat bato.
[31] In agpanggaraw pag kagbaiyan Raab idwa biyono sarig in mga yewed agpaniwala asin pag bayan, angkataw siyo agpasandig sa Diyos, kansiyo tiyanggap in mga talawtaw piyaonaik sa kansiyo balay.
[32] Nakay, sibay wa yangon in kangay siyabi? Angkataw idwa katokor agkowinto kay Gidyon, kay Barak, kay Samson, kay Ipti, kay Dabid, kay Samwil, osai din sa mga poropita.
[33] Na panawen siro agpasandig sa Diyos, siro mandaeg sa mga sakopan, siro betek in agpapoon, kansiro abel in mga piyangako Diyos, kansiro kiyopot in bibi mga liyon.
[34] Siro kakaplek in timbon lakoy baya, siro mipalpas sa mga agpamogot. Kamayba siro mainaen siro piyakaeyat, matang siro mandaeg sa gira anggan piyatagoli in mga arigbowan sondalo panyawan.
[35] Apo mga kagbaiyan panawen siro agpasandig sa Diyos siro piyaoliyan kansiro mga matay, ina piyaboway wakay tagoli. In amat wakay biyono. Siro piyagpalpas nges, kamay siro yewed maniwala sa agolok, matang siro kabel in maalen sa ripay pag boway.
[36] In amat wakay piyaglibak, piyamogbog, apo din biyakos karakara, mga piyangaw.
[37] In amat piyamenglayan bato anggan matay, apo din in bilog diyodo lagadi, apo piyogot. In roma idapo damit, no yewed balat waget topa, osai kambing. Siro idapo kamayba nakay. Siro piyagrengreng, piyagpamangwatan daet.
[38] In kansiro kaalenen lampas sa atanggap in mga daeten pag mga mangyan. Siro aglibangawan waget sa mga moyod, sa mga boksor, agpatago sa mga leyang, sa mga langa.
[39] Ina pag boo, siro piyagmaal Diyos panawen siro agpasandig sa kansiyo. Kamay siro ikkay kabel in kansiyo mga piyangako,
[40] angkataw kitam din piyagremrem Diyos. In kansiyo remrem kitam boo kadayo siro piyalkaktekan piyangwat maal wano.