[1] بي ذاک الزَّمان، چِثیر مِن الْحُضّار، حِچُوا مَعَ عیسیٰ عَن جَلیلیین إلْلي پیلاتُس چان قاتِلهُم فِرِد شِکِل إلْلي إختَلَط دِمهُم مَعَ دَم ضَحایاهُم.
[2] عیسیٰ بي الْجَواب گال: «أمَّن هَلْ إتفَکرون ذاکول الْجَلیلیین إلْلي إبْتَلَوا بي هِیچ یُوم، چانُوا مُذنِبین أکثَر مِن باجي أهالي الْجَلیل؟
[3] أگِلکُم إلْلي مو هِیچ. بَل لُو ما تْتوبون، أنتُم هَم کِلکُم تِهِلکون.
[4] وَ هَلْ إتفَکرون ذاکول الْثِمِنتَعَش شَخُص إلْلي طاح عَلِیهُم بُرج سْیلوآم وَ ماتُوا، چانُوا مُخطِئین أکثَر مِن باجي ساکِنین أورشَلیم؟
[5] أگِلکُم إلْلي مو هِیچ. بَلْ لُو ما تْتوبون، أنتُم هَم کِلکُم تِهِلکون.»
[6] بَعدِین یاب هَذا الْمَثَل: «فِرِد زِلمه شِتَل شِجرَة تین بي بِستانه. وَکت إلْلي راد یِحوي فاکِهَتها، ما لِگه شي عَلِیها.
[7] چا گال لِفَلاحَه: ”ثِلِث إسنَین أیّي لِأحوي فاکِهَة هَيِ الشِّجرَه أمَّن ما ألْگه شي. گُصها، خاطِر لا تِتلِف التَّراب.“
[8] أمَّن هُوَّ جاوَب: ”یا سِیِّدي، خِلّي سَنه أخریٰ هَم إتضُل. أحفِر حَوالِیها وَ أنطیها سِماد.
[9] لُو سِنة الْیایه یابِت فاکِهَه خُو هیچ؛ لُو ما یَابِت، ذاک الْوَکِت گُصها.“»
[10] بي یُوم مِن أیَّام الْشَبّات، عیسیٰ چان یِعَلِّم بي فِرِد مَحَل عِبادَة الْیَهُود.
[11] أهناک چانَت مَراء إلْلي فِرِد روح چانَت إمعَیبِتْها ثِمِنتَعَش سِنه. گوفاها چان مِنحِني وَ بي أي صورَه ما چان عِندها حِیل تُوگُف جِد.
[12] وَکت إلْلي عیسیٰ شافها، رادها عِنده وَ گال:«یا مَراء، إتْخَلَّصتي مِن هَذا الْوَضِع إلْلي إمعَیبِچ!»
[13] بَعدِین حَط إیده عَلِیها وَ هیَّه بي وَکِتها وُگفَت جِد، وَ حِمدَت الْإلَه.
[14] أمَّن رَئیس مَحَل عِبادَة الْیَهُود مِن هَي إلْلي عیسیٰ چان إمشافيها بي یُوم الْشَبّات حُمَگ وَ گال لِلنَّاس: «عِندکُم سِت أیَّام لِلشُّغُل. بي ذِنیچ الْأیَّام تَعالوا وَ أشفوا، مو بي یُوم الْشَبّات.»
[15] الرَّب بي الْجَواب گال: «یا أهل الرّیَاء! هَلْ وَلا واحَد مِنکُم بي یُوم الْشَبّات ما یِحِل ثورَه لُو حِمارَه مِن الْحَضیره خاطِر یَأخذه لِشُرب الْماي؟
[16] چا مو کون هَي الْمَراء إلْلي بِنت إبْراهیم وَ الشِّیطان ثِمِنتَعَش سِنه چان إمأَسِّرها، بي یُوم الْشَبّات تِتحَرَّر مِن أسارَتها؟»
[17] وَکت إلْلي گال هَي، کِل مُخالِفینه إتخَجِلُوا، أمَّن الْجَمعیَّه کِلها چانَت فَرحانه مِن کِل ذَنیچ أعماله الْعَجیبه.
[18] بَعدِین عیسیٰ گال: «مَلَکوت الْإلَه إش یِشبَه؟ بي شِنهو أشَبهه؟
[19] مِثِل حَبَّة الْخَردَل إلْلي کَضها زِلمه وَ شِتَلها بي بِستانه. ذیچ الْحَبَّه خَضِّرَت وَ صارِت شِجرَه، بي شِکل إلْلي طُیور السَّماء إیِّن وَ بِنَن عیش عَلَیٰ فُروعها.»
[20] هِنّوب گال: «بي شِنهو أشَبه مَلَکوت الْإلَه؟
[21] مِثلِ الْخُمرَه إلْلي فِرِد مَراء کَضَّتها وَ مَعَ ثِلِث إچیوسة إطحین خُلطَتْهِن لِحَد إلْلي کِل الْعَیّین إختَمَر.»
[22] عیسیٰ بي طَریق أورشَلیم، چان ایروح لِلْمُدُن وَ الْقُرَیٰ وَ یِعَلِّم.
[23] بي هِل بِین، واحَد سِأل مِنَّه: «سِیِّدي، هَلْ بِس عَدَد قِلیل مِن النَّاس یِنِجحون؟» عیسیٰ گِلهُم:
[24] «حِیل أسعوا خاطِر تِدِخلون مِن باب ضَیِّج، لِأن أگِلکُم، چِثیرین یِسعون خاطِر یِدِخلون، أمَّن ما یِگِدرون.
[25] وَکت إلْلي صاحبِ الْبِیت یِگوم وَ یِسِّد الْباب، أنتُم مُوگفین بَرّا وَ إتْطِگون الْباب وَ إتگولون: ”سِیِّدنا، حِل ألنا الْباب!“ أمَّن هُوَّ یِجاوُب: ”ما أعرُفکُم؛ ما أدري أنتُم إمنِین.“
[26] بَعدِین إتگولون: ”إحنَا کِلَینا وَ شَرَبنا وَیَّاک وَ أنتَ چِنِت إتعَلِّم بي شَوارِعنا.“
[27] أمَّن تِسِمعون جَواب: ”ما أعرُفکُم؛ ما أدري أنتُم إمنِین. أبِعدوا مِنّي، یا الْأشرار!“
[28] بَعدِین أهناک مِن شِدَّة الضّیج تِبچون وَ إتعَصرون إضروسکُم عَلَیٰ بَعَضهِن، لِأن إتشوفون إبراهیم وَ إسحاق وَ یَعقوب وَ کِل الْأنبیَاء بي مَلَکوت الْإلَه، أمَّن تِلگون نِفِسکُم مَحرومین.
[29] النَّاس إیّون مِن الشَّرق وَ الْغَرب وَ الشِّمال وَ الْجُنوب وَ یِگِعدون عَلَیٰ سُفرَة مَلَکوت الْإلَه.
[30] نَعَم، اکو آخَرین إلْلي ایصیرون أوَّل، وَ أوَّلین إلْلي آخِر.»
[31] بي ذاکِ الْوَکِت، چِم شَخُص مِن عُلَماء فِرقَة الْفَریسیین إیَّوا عِند عیسیٰ وَ گالُوا: «أترِک أهنا وَ روح لِمَکان آخَر، لِأن هیرودیس یِرید یِقِتلَک.»
[32] عیسیٰ بي الْجَواب گال: «روحوا وَ گولوا لِذاک الْواوي: ”الیُوم وَ باچِر أطَلِّع أرواح الْشَیطانیّه وَ أشفي النَّاس، وَ بي یُوم الثّالِث أکَمِّل عَمَلي.
[33] أمَّن الْیُوم وَ باچِر وَ بَعَد باچِر کون أستَمِر بي طَریقي، لِأن مو مُمکِن نَبي یِنقِتِل بَرّات أورشَلیم.“
[34] یا أورشَلیم، یا أورشَلیم، یا قاتِل الْأنبیَاء وَ راجِم الرُّسُل إلْلي یُرسَلون عِندَک! چِم مَرَّه رِدِت أَجمَع أولادَک، مِثِل دیایه إلْلي إتجَمِع فَرّوجاتها حَدِر أجناحها، أمَّن أنتَ ما رِدِت!
[35] هَسّه بِیتکُم یِنْتِرِک ألکُم خَرابَه. وَ أگِلکُم إلْلي بَعَد ما تْشوفونّي لِحَد یُوم إلْلي إتگولون: ”إمبارَک ذاک إلْلي ایّي بي أسم الرَّب.“»