[1] Pagpuwas ne ellew Sabtuꞌ, ellew liꞌihin, subu-subu pe ellew Ahad, hap pī si Mariyam dende amban Magdalahin duk sangeynen mayaman kubulin.
[2] Bessuwang linug manamal peggeꞌ dambuwaꞌ malaꞌikat Tuhanin duwaꞌi amban surgaꞌ. Iligidan weꞌ ne batu hadje panampeng gawang lingabin, ubus bu ningkoloꞌ iye diyataꞌ batuhin.
[3] Bantuknen sahaya kuweꞌ lalat duk semmeknen poteꞌ manamal.
[4] Tinalew manamal meꞌ guwaldiyahin hangkan migpid teꞌed siye duk gaꞌi siye makasayu; kuweꞌ siye aꞌa matey.
[5] Missā malaꞌikatin si meꞌ dendehin, paꞌinne, “Daꞌa kaꞌam tinalew. Kataꞌuhanku pihabi si Isa bakas ilansang diyataꞌ olomin.
[6] Gaꞌ ne iye tuꞌu, peggeꞌ ellum ne iye balik kuweꞌ bakas pinaꞌinnen. Pitu kaꞌam, payamanun bi bakas pabākannen.
[7] Kuweꞌitu, palakkes kaꞌam pī, akahanun bi meꞌ tindegnen weꞌ ellum ne iye balik amban kamateynen. Duk padehellu iye amban kaꞌam hap lahat Jalil. Kitebi du iye iyan laꞌi. Essebun bi bakas inakaku si kaꞌamin.”
[8] Hangkan magdayiꞌ-dayiꞌ siye tahalaꞌ amban kubulin. Tinalew siye saguwaꞌ kēgan isab siye manamal. Magubas siye pī ngakahan meꞌ tindegnen.
[9] Bessuwang siye sinampang weꞌ si Isa laꞌi si lān duk paꞌinne, “Na, kaꞌam ne?” Patapit siye pu si Isa duk pasujud si iye bu inantan weꞌ de bettisnen.
[10] “Daꞌa kaꞌam tinalew,” paꞌin si Isa, “pī ne kaꞌam, akahanun bi meꞌ kapungtinaꞌihankun weꞌ subey siye pī hap Jalil. Laꞌi takitede du ku.”
[11] Sasang si lān pe meꞌ dendehin, hap pī meꞌ guwaldiya sinduwehin si puweblo duk inaka-aka weꞌ de si meꞌ nakuraꞌ imamin kēmon bakas maꞌumantagin.
[12] Manjari magtipun meꞌ kabahiꞌanin duk meꞌ nakuraꞌ imamin duk magisun siye. Ubus siye magisun, inurungan weꞌ de meꞌ sundaluhin sīn ekka
[13] duk paꞌinde, “Akahanun bi meꞌ aꞌahin, weꞌ sasangbi tuli sangemin, pī meꞌ tindeg si Isahin nangkew bangkeynen.
[14] Bang takale gubnulin weꞌ tuli kaꞌam bu dinaꞌak kaꞌam magguwaldiya, daꞌa kaꞌam suse. Kami ne taꞌu missā si iye duk kaꞌam gaꞌi amāhanne.”
[15] Ineddoꞌ weꞌ meꞌ sundaluhin sīnin duk tinuhut weꞌ de bakas pangandaꞌakan siyehin. Sampay ellew inin iye inin suwi-suwi pinalatag weꞌ meꞌ Yahudihin.
[16] Manjari, meꞌ tindeg si Isa sampuk-dambuwaꞌin pī hap Jalil. Pataked siye pī si dambuwaꞌ punu sa bakas pangandaꞌakan si Isa siyehin.
[17] Pagkitede iye, pasujud siye pu si Isa, saguwaꞌ niyaꞌ siye duwe-duwehan dem ateyden.
[18] Patapit si Isa si siye duk paꞌinne, “Bakas kaꞌurungan ne ku kapatut magbayaꞌ si dunya duk si surgaꞌ.
[19] Hangkan hep pī kaꞌam magaka-aka si kēmon kabangsa-bangsahan duk isab siye nuhut aku. Pandihun bi siye hinang tandaꞌ weꞌ nuhut ne siye Tuhanin duk aku, Anak Tuhanin, duk Niyawa Tuhanin.
[20] Toloꞌanun bi siye weꞌ subey tuhutde kēmon bakas pangandaꞌakanku kaꞌamin. Duk essebun bi inin, luwal du ku luꞌu si kaꞌam ngeregseꞌ kiyamat dunyahin.”