[1] Manjari missā si Isa si meꞌ aꞌa mabanesin duk si meꞌ tindegnen, paꞌinne,
[2] “Meꞌ guru si saraꞌ āgamahin duk meꞌ Pariseohin taga kapatut magtoloꞌ meꞌ saraꞌ si Musahin.
[3] Hangkan kahagadun bi duk tuhutun bi kēmon panoloꞌden, saguwaꞌ daꞌa kaꞌam nuhut hinanganden, peggeꞌ gaꞌi du tuhutde meꞌ panoloꞌden.
[4] Pinabohatan weꞌ de meꞌ aꞌahin duk meꞌ saraꞌ gaꞌi takoleꞌde, bu gaꞌi siye nabang moꞌone bisan kuweꞌahat.
[5] Kēmon hininangden hinangde duk siye takite weꞌ aꞌa. Payamanun bi be meꞌ pangisihande sulat ilekkat amban dem kitabin pinekkes si lendoꞌde duk lengngende, hadje amban si meꞌ sinduwehin duk tahaꞌ isab meꞌ jambu semmekden.
[6] Bang siye si meꞌ pagjamu-jamuhan, kabayaꞌanden ningkoloꞌ si meꞌ paningkoloꞌan mabangsahanin. Bang dem langgal, mabayaꞌ siye ningkoloꞌ si meꞌ paningkoloꞌan para si meꞌ aꞌa pinagaddatanin.
[7] Sinna siye sinalam si meꞌ tabuꞌan duk bang siye inēnan ‘Guru.’
[8] Bang kaꞌam, daꞌa kaꞌam mabayaꞌ inēnan ‘Guru,’ peggeꞌ kuweꞌ du kaꞌam kēmon magpungtinaꞌi duk dambuwaꞌ du hadja gurubin, aku.
[9] Daꞌa ēnanun bi ‘Ammaꞌ’ sine-sine tuꞌu si dunya, peggeꞌ dambuwaꞌ du samabin, iye Tuhan si surgaꞌin.
[10] Duk gaꞌi kaꞌam makajari inēnan ‘Nakuraꞌ’ peggeꞌ dambuwaꞌ hadja nakuraꞌbin, Almasihin.
[11] Sine-sine kaꞌam mabayaꞌ pinalangkew teꞌedin subey iye daraꞌakanbi.
[12] Sine-sine mahadje dine pinadiyawaꞌ du, duk sine-sine madiyawaꞌ dine pinahadje du.”
[13] “Kaꞌaseꞌ-aseꞌ kaꞌam, meꞌ guru si saraꞌ āgamahin duk meꞌ Pariseohin peggeꞌ asal legga Tuhanin du kaꞌam. Magmā-mā hadja kaꞌam nuhut Tuhanin. Binembelan weꞌ bi meꞌ aꞌahin supaya siye gaꞌi tumuhut pī si pagbayaꞌan Tuhanin. Gaꞌi du tuhutbi lān miyaꞌan duk pagesbi pe sasuku mabayaꞌ nuhut lān miyaꞌan. (
[14] “Kaꞌaseꞌ-aseꞌ kaꞌam, meꞌ guru si saraꞌ āgamahin duk meꞌ Pariseohin peggeꞌ asal legga Tuhanin du kaꞌam. Magmā-mā hadja kaꞌam nuhut Tuhanin. Sinigpitan weꞌ bi meꞌ dende baluhin supaya taꞌeddoꞌbi meꞌ lumaꞌden duk magsambahayang kaꞌam patahaꞌ, magmā-mā weꞌ aꞌa hāp kaꞌam. Bugtuꞌ hukuman hadje tasangkabin si ahilat.)
[15] “Kaꞌaseꞌ-aseꞌ kaꞌam meꞌ guru si saraꞌ āgamahin duk meꞌ Pariseohin peggeꞌ asal legga Tuhanin kaꞌam. Magmā-mā hadja kaꞌam nuhut Tuhanin. Butasanbi tahikin pī si kalahatan seddili duk lumengngan kaꞌam tala magtoloꞌ supaya niyaꞌ bisan dambuwaꞌ aꞌa nuhut panoloꞌbin. Saguwaꞌ bang nuhut ne iye, pasōng pe iye pataꞌ pinadem narkaꞌ amban kaꞌam sabab meꞌ panoloꞌbi si iyehin.
[16] “Kaꞌaseꞌ-aseꞌ kaꞌam. Kuweꞌ kaꞌam meꞌ aꞌa pessek nundan pagkasibi pessek. Magtoloꞌ kaꞌam, paꞌinbi, ‘Bang napa aꞌahin bu hinangne saksiꞌ langgal hadjehin, makajari bisan gaꞌi tumananne. Saguwaꞌ bang iye hinangne saksiꞌ, meꞌ bulawan dem langgal hadjehin, gaꞌi makajari bang gaꞌi tumananne.’
[17] Dupang kaꞌam duk pessek. Inggehin malangkewin, bulawanin atawa langgalin? Sutsi hadja bulawanin peggeꞌ diyalem langgal.
[18] Magtoloꞌ isab kaꞌam, paꞌinbi, ‘Bang napa aꞌahin bu hinangne saksiꞌ pagkulubananin, makajari bisan gaꞌi tumananne. Saguwaꞌ bang iye hinangne saksiꞌ kuluban diyataꞌ pamettadan iyehin, gaꞌi makajari bang gaꞌi tumananne.’
[19] Pessek kaꞌam manamal. Inggehin malangkewin, kulubanin atawa pagbettadan kulubanin? Bang gaꞌi binettad hayepin diyataꞌ pagbettadan kulubanin, dumaꞌin hep kuluban.
[20] Hangkan hep bang niyaꞌ aꞌa napa bu hinangne saksiꞌ pagbettadan kulubanin, sinakup du kēmon binettad diyataꞌnen,
[21] duk sine-sine napa, bu hinangne saksiꞌ langgal hadjehin, sinakup du isab mapatennaꞌ dem langgalin, hātinen, Tuhanin.
[22] Duk sine-sine napa bu hinangne saksiꞌ surgaꞌin, iye saksiꞌnen paningkoloꞌan Tuhanin. Duk asal Tuhanin ne teꞌed panapahannen peggeꞌ Tuhanin maningkoloꞌ malaꞌihin.
[23] “Kaꞌaseꞌ-aseꞌ kaꞌam meꞌ guru si saraꞌ āgamahin duk meꞌ Pariseohin peggeꞌ asal legga Tuhanin du kaꞌam. Magmā-mā hadja kaꞌam nuhut Tuhanin. Magjakat kaꞌam bisan sampay jambanganbi pagpā-pā kinakanin. Saguwaꞌ gaꞌi kaꞌam nuhut meꞌ daꞌakan malangkewin. Gaꞌi kaꞌam bentel, gaꞌi kaꞌam maꞌaseꞌ si saweꞌbi, duk gaꞌi kaꞌam tapangandelan. Hāp bang kaꞌam magjakat, saguwaꞌ subey gaꞌi tayikutanbi meꞌ hinangan pinaꞌinku miyaꞌan.
[24] Pagtuyuꞌanbi nuhut daꞌakan manggaꞌi malangkewin saguwaꞌ bang daꞌakan malangkewin gaꞌi hinangbi. Kuweꞌ kaꞌam aꞌa pessek manduꞌan saweꞌbin. Kuweꞌ kaꞌam aꞌa magsāꞌ boheꞌ duk gaꞌi taꞌinumne sanamin saguwaꞌ taloroyne untaꞌin.
[25] “Kaꞌaseꞌ-aseꞌ kaꞌam meꞌ guru si saraꞌ āgamahin duk meꞌ Pariseohin peggeꞌ legga Tuhanin du kaꞌam. Magmā-mā hadja kaꞌam nuhut Tuhanin. Kinosoꞌan weꞌ bi tikungin duk laleyin saguwaꞌ diyalemnen haram, peggeꞌ taꞌeddoꞌbi meꞌ kinakan iyan sabab pangakkalbin duk pagnapsubin.
[26] Pessek kaꞌam, meꞌ Pariseohin. Limpiyuhanun bi dahuꞌ meꞌ inisibin ubus limpiyu du isab laleybin duk tikungbin.
[27] “Kaꞌaseꞌ-aseꞌ kaꞌam meꞌ guru si saraꞌ āgamahin duk meꞌ Pariseohin peggeꞌ legga Tuhanin du kaꞌam. Magmā-mā hadja kaꞌam nuhut Tuhanin. Kuweꞌ kubul pininta kaꞌam. Hāp-hāp bantuknen amban luwasan saguwaꞌ diyalemnen pennoꞌ weꞌ tolang duk isi buhuk.
[28] Damikkiyan du isab kaꞌam, si meꞌ aꞌa kuweꞌ bantuk bentel kaꞌam, saguwaꞌ dem ateybin magdustaꞌ hadja kaꞌam duk ngalanggalan saraꞌ.”
[29] “Kaꞌaseꞌ-aseꞌ kaꞌam meꞌ guru si saraꞌ āgamahin duk meꞌ Pariseohin. Magmā-mā hadja kaꞌam nuhut Tuhanin. Mahāpan kaꞌam meꞌ kubul meꞌ nabihin duk meꞌ aꞌa mabentelin pangaddatbi siye.
[30] Duk paꞌinbi, ‘Bang ellum ne kami masa kapapuꞌan kamiley gaꞌi teꞌed kami matuk si hinanganden mapatey meꞌ nabihin.’
[31] Weꞌ bissābi iyan magbennal ne kaꞌam weꞌ tubuꞌ meꞌ mamapatey nabihin kaꞌam.
[32] Pīhun bi, ubusanun bi hininang meꞌ kapapuꞌanbi ley.
[33] Laꞌat teꞌed kaꞌam. Gaꞌi kaꞌam makajari patapuk amban hukuman pinadem narkaꞌ.
[34] Akahante kaꞌam, ngandaꞌak du ku iyan pī si kaꞌam meꞌ nabi duk meꞌ lella lalem kataꞌunen, duk meꞌ guru. Sinduwehin papateybi iyan duk sinduwehin lansangbi si olom. Sinduwehin lubakanbi laꞌi dem langgalbi duk turul-turulbi pī si meꞌ puweblo palahihanden.
[35] Hangkan tewwaꞌ hukuman kaꞌam sabab pamapatey meꞌ aꞌa manggaꞌ niyaꞌ dusenen, tinagnaꞌan amban si Habil anak Apuꞌ Adamin sampay Jakariya anak Barakihin bakas pinapateybi si ellet langgal hadjehin duk pagkuluban-kulubananin.
[36] Sabennal akahante kaꞌam, kēmon meꞌ hininangde miyaꞌan, moleꞌ si kaꞌam, meꞌ aꞌa maꞌellum kuweꞌitu inin.”
[37] “O, meꞌ aꞌa Awrusalam, suse ku sabab kaꞌam. Luwal papateybi meꞌ nabihin duk pagtibaganbi meꞌ dinaꞌak Tuhan mapiyu si kaꞌamin. Mimpiye ne kaꞌam batang pagtipunku duk ipatku kuweꞌ dalil bukaran magtipun meꞌ usuynen diyawaꞌ peppikne, saguwaꞌ gaꞌi kaꞌam mabayaꞌ.
[38] Payamanun bi, tinayikutan ne lahatbin weꞌ Tuhanin.
[39] Akahante kaꞌam weꞌ gaꞌi ne ku teꞌed kitebi balik samantaꞌan gaꞌi tekka ellew pagpaꞌinbi, ‘Pudjite bi pinapitu Tuhanin.’ ”