[1] Manjari ennem bahangi puwas miyaꞌan, binoꞌo weꞌ si Isa si Petros, si Yakub, duk si Yahiya pī diyataꞌ punu langkew, siye-siye hadja.
[2] Sābude malaꞌihin, pinda teꞌed bantuk si Isahin si pagmatahande. Luwenen sahaya kuweꞌ mata ellewin duk semmeknen makasilew hawal poteꞌnen.
[3] Manjari bessuwang paguwaꞌ si siye laꞌi si Musa duk si Nabi Eliyas duk magbissā siye duk si Isa.
[4] Sābude magbissāhin, paꞌin si Petros pu si Isa, “Tuwan, hāp teꞌed peggeꞌ tiyaꞌ kami tuꞌu. Bang kew mabayaꞌ, ngahinang ku tuꞌu tellu payad. Dambuwaꞌ si kaꞌu, dambuwaꞌ pu si Musa, duk dambuwaꞌ pu Nabi Eliyas.”
[5] Manjari sasang missā pe si Petros, niyaꞌ inalak dantaꞌ paguwaꞌ si atagde duk kalandungan siye duk niyaꞌ suwala amban inalakin magpaꞌin, “Inin Anakku kalasahanku teꞌed. Kasulutan ku teꞌed si iye. Pakalehun bi iye.”
[6] Pagkale meꞌ tindegnen suwala miyaꞌan, kadahitan siye manamal duk magtawus siye pakusu diyataꞌ bulak.
[7] Saguwaꞌ pī si Isa si meꞌ tindegnen duk inantan siye weꞌ ne, paꞌinne, “Nengge kaꞌam duk daꞌa kaꞌam tinalew.”
[8] Pagtongasde, gaꞌ niyaꞌ seddili kitede luwal saꞌ si Isa.
[9] Manjari sasangde padurul amban diyataꞌ punu, sinessaꞌan siye weꞌ si Isa, paꞌinne, “Daꞌa kaꞌam magaka-aka sabab bakas takitebi diyataꞌ punu inin, samantaꞌan aku, Anak Manusiyaꞌin, gaꞌi pe ku ellum balik amban kamateykun.”
[10] Tinilew iye weꞌ meꞌ tindegnen, paꞌinde, “Weꞌey teꞌ paꞌin meꞌ guru magtoloꞌ saraꞌ āgamahin weꞌ subey koꞌ pitu dehellu Eliyas meke Almasihin?”
[11] Nambung si Isa, paꞌinne, “Bennal iyan. Eliyas pitu dehellu amban Almasihin manyap kēmonin.
[12] Saguwaꞌ akahante kaꞌam,” paꞌin si Isa, “bakas pitu ne Eliyas bu gaꞌ iye takilale meꞌ aꞌahin. Duk tahinangde ne sasuku kabayaꞌanden si iye. Damikkiyan aku, Anak Manusiyaꞌin, binasade du ku isab.”
[13] Na, bahu kataꞌuhan meꞌ tindegnen weꞌ bissānen hatiꞌ sabab Yahiya magpandi-pandi meꞌ aꞌahin.
[14] Pagbalik disi Isa pī si meꞌ aꞌa mabanesin, niyaꞌ aꞌa pī pasujud pu si Isa makitabang, paꞌinne,
[15] “O Tuwan, maꞌaseꞌ kew si anakkun. Binabuy-babuy iye duk makalanduꞌ sakinen peggeꞌ daran iye hebbaꞌ dem ebbut duk dem boheꞌ.
[16] Bakas boꞌoku iye pī si meꞌ tindegnun, saguwaꞌ gaꞌi iye tapakawuliꞌde.”
[17] Nambung si Isa, paꞌinne, “Kaꞌam meꞌ aꞌa kuweꞌitu inin, salaꞌ teꞌed pamikilbin. Gaꞌ teꞌed niyaꞌ sandelbi si Tuhan. Taman sumiyan pe ku tuꞌu si kaꞌam? Taman sumiyan pe ku nandalan addatbin meke kaꞌam kahagad?” Manjari paꞌinne si sama nakanakin, “Boꞌohun anaknun pitu.”
[18] Pagtekka nakanakin laꞌi, inamāhan weꞌ si Isa seyitanin, manjari paluwas seyitanin amban nakanakin duk magtawus nakanakin kawuliꞌan.
[19] Ubus binoꞌo si Isa magbissā weꞌ meꞌ tindegnen, siye-siye hadja, paꞌinde, “Weꞌey teꞌ gaꞌ tapaluwas kami seyitanin?”
[20] Paꞌin si Isa, “Puꞌunne gaꞌi tapaluwasbi peggeꞌ kulang pe teꞌed sandelbi si Tuhanin. Akahante kaꞌam sabennal-bennal, bang sandel kaꞌam si Tuhan bisan hadja kuweꞌahat, dalilnen kuweꞌ hadja hadjehan bigi mustasa, duk daꞌakbi punuhin palinda, asal palinda du. Gaꞌ niyaꞌ hunit si kaꞌam bang kaꞌam sandel. (
[21] Saguwaꞌ seyitan da bayuꞌ miyaꞌan, gaꞌi tapaluwas luwal hadja bang kaꞌam ngampun duk muwase.)”
[22] Dambuwaꞌ ellew paglaꞌi siye si Jalil, paꞌin si Isa si meꞌ tindegnen, “Aku, Anak Manusiyaꞌin, sinōngan du ku iyan si antanan meꞌ aꞌa.
[23] Papateyde du ku. Tellum bahangi puwas kamateykun, ellum du ku balik.” Pagtakalede inin, suse manamal meꞌ tindegnen.
[24] Pagtekka siye laꞌi si Kapernaum, hap pī pu si Petros meꞌ aꞌa magpāku-pāku sukey si langgalin, paꞌinde, “Magbayed sukey ke gurubin?”
[25] Nambung si Petros, paꞌinne, “Aweꞌ.” Pagdiyalem si Petros dem lumaꞌ, magtawus si Isa missā si iye, paꞌinne, “Ine paꞌinnu, Simon. Sine magbayed sukey si meꞌ sultan si dunyahin, meꞌ anak-usbaden atawa meꞌ aꞌa seddilihin?”
[26] Paꞌin si Petros, “Meꞌ aꞌa seddilihin.” Paꞌin si Isa, “Iye hep, hātinen gaꞌi magbayed meꞌ usbanen. Manjari, kite bi inin meꞌ usba Tuhanin, hangkan makajari bisan kite bi gaꞌi magbayed.
[27] Saguwaꞌ gaꞌi hāp bang laꞌat ateyden si kite. Pī kew hap lamew messi. Lukahun behe kenna tagnaꞌ taꞌeddoꞌnun duk ngasuwaꞌ kew iyan laꞌi sīn sarang pamayed sukeyte si langgalin. Eddoꞌun sīn iyan bu nu pī si langgal mayedan sukeyten.”