[1] Manjari niyaꞌ meꞌ Pariseo duk meꞌ guru si saraꞌ āgama amban Awrusalam hap pī pu si Isa duk paꞌinde,
[2] “Weꞌey meꞌ tindegnun gaꞌi nuhut biꞌat-biꞌatan meꞌ kapapuꞌanten bi? Mangan siye bisan siye gaꞌ bakas ngosoꞌ tangan makasutsi.”
[3] Nambung si Isa, paꞌinne, “Na, kaꞌam, weꞌey gaꞌi tuhutbi pangandaꞌakan Tuhanin supaya iye tatuhutbin meꞌ biꞌat-biꞌatan kapapuꞌanbin?
[4] Peggeꞌ bakas ngandaꞌak Tuhanin, paꞌinne, ‘Pagaddatanun bi saꞌi-samabin,’ duk ‘Sine-sine missāhan saꞌinen atawa samanen laꞌatan, subey teꞌed iye pinapatey.’
[5] Saguwaꞌ kaꞌam,” paꞌin si Isa, “si saraꞌ hininang-hinangbin hadja, paꞌinbi weꞌ bang niyaꞌ aꞌa magpaꞌin si saꞌi-samanen, ‘Gaꞌ ne niyaꞌ panabangku kaꞌam, Ammaꞌ atawa Inaꞌ; tapangurungku ne alataꞌkun si Tuhan,’
[6] makajari ne bisan gaꞌi tabangne matettoꞌanen. Sa hinanganbi iyan gaꞌi pinagmasi weꞌ bi pangandaꞌakan Tuhanin peggeꞌ iye tinuhutbin meꞌ biꞌat-biꞌatan kapapuꞌanbin.
[7] Kaꞌam iyan magmā-mā nuhut Tuhan bu gaꞌi du. Asal bennal teꞌed sinulat Nabi Isaya sabab kaꞌamin, paꞌinne,
[8] ‘Meꞌ aꞌa inin, pahadjede ku duk behede saguwaꞌ ateyden gaꞌi nuhut aku.
[9] Gaꞌ gunane pagsambahayangde si akuhin peggeꞌ meꞌ pamanoloꞌden hinang-hinang aꞌa hadja bu paꞌinde amban aku,’ paꞌin Tuhanin.”
[10] Puwas miyaꞌan, ilinganan ne isab weꞌ si Isa meꞌ aꞌahin pī si iye duk paꞌinne si siye, “Pakale kaꞌam duk tahātibi bissāku inin:
[11] Dumaꞌin kinakan mapadiyalem dem behe aꞌahin makaharam iyehin, saguwaꞌ iye makaharam iyehin meꞌ bissā laꞌatan mapaguwaꞌ amban behenen.”
[12] Manjari hap pī meꞌ tindegnen si iye duk paꞌinde, “Kataꞌuhannu ke weꞌ laꞌat atey meꞌ Pariseohin sabab binissānu miyaꞌan?”
[13] Nambung iye, paꞌinne, “Kēmon jambangan gaꞌ tinanem weꞌ Samaku si surgaꞌin bineddutan du.
[14] Daꞌa kaꞌam suse sabab siye. Meꞌ nakuraꞌ siye saguwaꞌ kuweꞌ siye meꞌ aꞌa pessek. Bang aꞌa pessekin nundan aꞌa pessek du isab, na, laboꞌ siye kaduwangan dem lowang.”
[15] Manjari missā si Petros, paꞌinne, “Pahātihanun kami bang ine hāti binissānu miyaꞌan.”
[16] Paꞌin si Isa, “Sampay kaꞌam isab, gaꞌi pe tahātibi?
[17] Gaꞌi ke tahātibi weꞌ bisan kinakan ine padiyalem dem behe, pī dem betteng ubus bu pinaluwas du?
[18] Saguwaꞌ mapaluwas amban dem behe aꞌahin, paguwaꞌ amban dem ateyne, duk iye iyan makaharam aꞌahin.
[19] Peggeꞌ amban dem ateyin paguwaꞌ meꞌ pikilan malaꞌatanin kuweꞌ mapatey, magjina, duk maghinangan laꞌat seddili, magtangkew, magdustaꞌ, duk maglimut.
[20] Kēmon iyan makaharam aꞌahin, dumaꞌin bang mangan iye bu gaꞌ bakas ngosoꞌ tangan sa pangandaꞌakan meꞌ Pariseohin.”
[21] Manjari tahalaꞌ si Isa billaꞌi duk hap pī iye si antag puweblo Tiros duk Sidon.
[22] Niyaꞌ dende bangsa Kanaꞌan patennaꞌ laꞌi si lahat miyaꞌan. Hap pī iye pu si Isa duk ngalingan iye, paꞌinne, “O Tuwan, tubuꞌ si Daꞌud, maꞌaseꞌ kew si aku, peggeꞌ anakku dende-dendehin pasayedan seyitan duk tiniksaꞌ teꞌed iye weꞌ seyitanin.”
[23] Saguwaꞌ gaꞌ nambung si Isa bisan da tegtang. Manjari meꞌ tindegnen pī pu si Isa duk paꞌinde, “Daꞌakun iye tahalaꞌ, peggeꞌ iyuꞌ iye paturul-turul ngalingan si kite bi.”
[24] Nambung si Isa, paꞌinne, “Pinapitu ku nabang meꞌ aꞌa bangsa Israꞌil hadja. Kuweꞌ siye dalil meꞌ bili-bili lepas.”
[25] Saguwaꞌ pagtakale inin weꞌ dendehin, patapit iye pu si Isa bu pasujud, paꞌinne, “Tuwan, tabanganun ku.”
[26] Sambungan si Isa iye si dalilan, paꞌinne, “Gaꞌi patut ineddoꞌ kinakan meꞌ anakin bu ilakasan pī si meꞌ asu.”
[27] “Bennal, Tuwan,” paꞌin dendehin, “saguwaꞌ bisan du meꞌ asuhin kakande du mapagpag amban lamisahanin.”
[28] Sambungan si Isa iye, paꞌinne, “O dende, basag teꞌed sandelnun. Pangurung kaꞌu ne pinākunun.” Na waktu miyaꞌan du magtawus kawuliꞌan anakne dendehin.
[29] Manjari palanjal si Isa billaꞌi bu nusul lamew Jalilin. Ubus manaꞌik iye diyataꞌ punu duk ningkoloꞌ iye laꞌi.
[30] Banes aꞌa hap pī si iye, duk binoꞌo weꞌ de meꞌ mapengkaꞌin, meꞌ makukuꞌin, meꞌ mapessekin, meꞌ maꞌumewin duk ekka aꞌa taga saki seddili. Pinapī weꞌ de meꞌ aꞌa masaki inin si antag bettis si Isa duk pinakawuliꞌ siye kēmon weꞌ ne.
[31] Ulaliꞌ teꞌed meꞌ aꞌahin pagkitede weꞌ maꞌumewin makabissā ne, makukuꞌin kawuliꞌan ne, mapengkaꞌin makalengngan ne pahāp-hāp, duk mapessekin ngite ne. Manjari pinudji weꞌ de Tuhan inisbat bangsa Israꞌilin.
[32] Manjari ilinganan weꞌ si Isa meꞌ tindegnen pī si iye duk paꞌinne, “Maꞌaseꞌ ku si meꞌ aꞌa mabanes inin, peggeꞌ tellum bahangi ne kuweꞌitu patuꞌude si akuhin bu gaꞌ ne niyaꞌ kakande. Gaꞌi ku mabayaꞌ mapoleꞌ siye bang gaꞌi bakas mangan, kaw siye kinawugtuꞌ si lān.”
[33] Paꞌin meꞌ tindegnen si iye, “Antag kite bi ngeddoꞌ kinakan sarang pamakan meꞌ aꞌa mabanes inin tuꞌu si lahat makagindew-gindew inin?”
[34] Paꞌin si Isa si siye, “Piyek kayuꞌ panbi lu?” Paꞌinde, “Pituꞌ pan duk kenna dikiꞌ bang piyek kayuꞌ.”
[35] Manjari dinaꞌak weꞌ si Isa meꞌ aꞌa mabanesin ningkoloꞌ diyataꞌ bulak.
[36] Ineddoꞌ weꞌ ne pan pituꞌin duk meꞌ kennahin, duk magpasalamat iye si Tuhan. Ubus bu binahagiꞌ-bahagiꞌ weꞌ ne duk pinangurung weꞌ ne si meꞌ tindegnen duk pangurungde isab si meꞌ aꞌahin.
[37] Mangan siye kēmon duk esso siye. Ubus bu tinipun weꞌ de lukasin, pituꞌ bakaꞌ pennoꞌ.
[38] Meꞌ aꞌa mamanganin niyaꞌ siye ampat ngibu lellahin bukut meꞌ dendehin duk meꞌ mākanakin.
[39] Manjari pinapoleꞌ ne meꞌ aꞌahin weꞌ si Isa duk pasakey iye dem bangkaꞌ bu hap pī si lahat Magadan.