[1] “Pagbayaꞌ Tuhanin kuweꞌ inin. Niyaꞌ aꞌa taga bulak luha tinaneman bāhan ubas. Subu pe dambuwaꞌ ellew hap pī iye miha meꞌ aꞌa magtarabahu si bulaknen.
[2] Pagsanggupanden weꞌ tangdananne siye asal tangdan para si hinang da ellewin, ubus dinaꞌak ne siye pī maghinang si bulaknen.
[3] Ellet lettu duk salung hap pī iye si tabuꞌan, duk ngite iye laꞌi meꞌ aꞌa nengge-nengge gaꞌ niyaꞌ hinangde.
[4] Paꞌinne si siye, ‘Pī kaꞌam isab magtarabahu si bulakku duk tangdanante du kaꞌam patut si kaꞌamin.’
[5] Ubus hap pī ne siye. Paglettu ne ellewin, pī ne isab iye miha meꞌ aꞌa maghinang si bulakne. Kuweꞌ miyaꞌan du isab hininangnen sakaliꞌ taꞌabut lisag tellu kohapin.
[6] Manjari pagkohap-kohap ne, pī iye balik hap tiyanggi duk ngite iye meꞌ aꞌa magtengge-tengge pe laꞌi. Paꞌinne si siye, ‘Weꞌey kaꞌam nengge-nengge hadja tuꞌu kekkohapan gaꞌ niyaꞌ hinangbi?’
[7] Paꞌinde, ‘Peggeꞌ gaꞌ niyaꞌ ngeddoꞌ kami magtarabahu.’ ‘Na, pī kaꞌam isab magtarabahu si bulakku,’ paꞌinne.
[8] “Pagsangem ne, paꞌin dapuꞌ bulakin si kapatasnen, ‘Tawagun meꞌ aꞌa magtarabahuhin duk tangdananun ne siye. Iye padambulihun meꞌ aꞌa taꞌeddoꞌku dehelluhin.’
[9] Ubus hap pī ne meꞌ aꞌa taꞌeddoꞌ kohapin duk tinangdanan siye bali kekkohapan.
[10] Pagpī ne meꞌ aꞌa taꞌeddoꞌ dehelluhin, kannalde weꞌ pasōng pangurung siyehin. Saguwaꞌ inurungan du isab siye tangdan bali kekkohapan.
[11] Pagsangkade tangdanden, puggutande dapuꞌ bulakin,
[12] paꞌinde, ‘Meꞌ aꞌa miyaꞌan maghinang hadja da ora bu kami inin maghinang kekkohapan magsandal panas ellew, ubus pagsaliꞌnu tangdan kamihin duk si siyehin.’
[13] Saguwaꞌ paꞌin dapuꞌ bulakin si dambuwaꞌin, ‘Bagay, gaꞌ kaꞌam akkalanku. Pagsanggupanten weꞌ tangdanante kaꞌam para si hinang da ellewin.
[14] Eddoꞌun bi tangdanbin bu bi ne hap lumaꞌ. Kabayaꞌankun tangdananku meꞌ madambulihin saliꞌ du duk tangdan si kaꞌamin.
[15] Weꞌ gaꞌi ku kapagbayaꞌ si sīnkun? Hatu ngimbū kaꞌam peggeꞌ sayuꞌ ku?’ ”
[16] Manjari paꞌin si Isa, “Hangkan hep meꞌ dumambuli kuweꞌituhin dumehellu du si pasōngan, duk dumehellu kuweꞌituhin dumambuli du si pasōngan.”
[17] Manjari inin, sasang disi Isa si lān pataked tudju Awrusalam, binoꞌo weꞌ si Isa patala-tala meꞌ tindegne sampuk-duwehin duk paꞌinne si siye,
[18] “Pakale kaꞌam, kite bi inin pataked hap Awrusalam. Paglaꞌi ne kite bi, aku, Anak Manusiyaꞌin, sinōngan du pī si antanan meꞌ nakuraꞌ imamin duk meꞌ guru si saraꞌ āgamahin. Manjari hukumande si akuhin weꞌ pinapatey ku.
[19] Ubus sōngande du ku isab pī si antanan meꞌ aꞌa dumaꞌin Yahudi. Duk meꞌ bangsa seddili inin hinangde du ku dagey, duk lubakande ku ubus bu lansangde ku diyataꞌ olom. Saguwaꞌ katellum bahanginen, ellum du ku balik.”
[20] Manjari anda Sebedehin pī pu si Isa magtuhut duk meꞌ anakne lellahin. Pasujud iye pu si Isa peggeꞌ niyaꞌ pākune.
[21] “Ine kabayaꞌannun?” paꞌin si Isa. Paꞌin dendehin, “Kabayaꞌankun bang ne kew ningkoloꞌ magbayaꞌ, patingkoloꞌnu meꞌ anakku inin si bihingnu, dambuwaꞌ si kanawanannu duk dambuwaꞌ si bibangannu.”
[22] Nambung si Isa, paꞌinne, “Gaꞌi kataꞌuhanbi bang ine pinākubi inin. Ngatu ke kaꞌam bininasa kuweꞌ sōng paminasa akuhin?” “Aweꞌ, ngatu kami,” paꞌinde.
[23] Paꞌin si Isa, “Asal bininasa du kaꞌam kuweꞌ sōng paminasa akuhin. Saguwaꞌ bang pagpatingkoloꞌ si kanawanankun atawa si bibangankun,” paꞌin si Isa, “dumaꞌin aku magbayaꞌin. Saguwaꞌ meꞌ paningkoloꞌan miyaꞌan sukuꞌ si meꞌ pinanyapan Samaku Tuhanin.”
[24] Pagkale meꞌ tindeg si Isa sampūꞌin sabab pināku duwangan magpungtinaꞌihin, astel siye.
[25] Saguwaꞌ ilinganan weꞌ si Isa meꞌ tindegnen kēmon duk paꞌinne, “Kataꞌuhanbi addat meꞌ aꞌa si dunyahin. Meꞌ nakuraꞌ meꞌ kabangsahan seddilihin magmanda teꞌed si meꞌ aꞌahin duk meꞌ aꞌa malangkewin magbayaꞌ teꞌed si meꞌ aꞌaden.
[26] Saguwaꞌ kaꞌam,” paꞌin si Isa, “subey gaꞌi magsa miyaꞌan. Sine-sine kaꞌam mabayaꞌ pinalangkew, subey iye daraꞌakanbi.
[27] Duk sine-sine kaꞌam mabayaꞌ manjari tamanan malangkewin, subey iye kuweꞌ banyagaꞌ nabangan saweꞌnen.
[28] Peggeꞌ bisan aku, Anak Manusiyaꞌin,” paꞌin si Isa, “dumaꞌin papituhankun makitabang si manusiyaꞌ, saguwaꞌ nabang manusiyaꞌ. Duk pitu ku paglillaꞌku umulkun pangalekkat meꞌ aꞌa maꞌekkahin, supaya siye gaꞌi ilegga sabab duseden.”
[29] Manjari, pagtahalaꞌ siye amban puweblo Ariha, banes teꞌed aꞌa nuhut iye.
[30] Niyaꞌ laꞌi duwe aꞌa pessek ningkoloꞌ si higad lān palabeyanden. Pagkalede weꞌ palabey ne si Isa, ngalingan siye papales, paꞌinde, “O tubuꞌ Sultan Daꞌud, maꞌaseꞌ ne kew si kami.”
[31] Inamāhan siye weꞌ meꞌ aꞌa maꞌekkahin, gaꞌi siye dinaꞌak magbukag. Saguwaꞌ namba ne papalesde paglinganden, paꞌinde, “O tubuꞌ Sultan Daꞌud, maꞌaseꞌ ne kew si kami.”
[32] Padeheng si Isa duk ilinganan weꞌ ne duwangan mapessekin duk paꞌinne si siye, “Ine kabayaꞌanbi hinangku si kaꞌam?”
[33] “Tuwan,” paꞌinde, “kabayaꞌan kamihin makakite ne kami.”
[34] Maꞌaseꞌ si Isa si siye duk inantan weꞌ ne mataden. Na, magtawus siye makakite duk nuhut ne siye si Isa.