[1] Manjari magdalilan si Isa balik, paꞌinne, “Bang pitu ne ku balik, pagbayaꞌ Tuhanin kuweꞌ inin. Niyaꞌ sampūꞌ budjang moꞌo payitaꞌanden dangan-dangan hap pī nampang pangantin lellahin.
[2] Lime budjangin babbal duk limehin lalem pikilannen.
[3] Meꞌ mababbalin boꞌode payitaꞌanden saguwaꞌ gaꞌ siye moꞌo isellan pangiside balik bang ubus ne isellan dem payitaꞌanden.
[4] Saguwaꞌ meꞌ budjang malalem pikilannen boꞌode payitaꞌanden sampay isellan dem pangisihanden.
[5] Peggeꞌ tiggel tekka pangantin lellahin kinaruꞌ siye duk ujud tumuli siye kēmon.
[6] Pagnengaꞌ bahangihin niyaꞌ ngalingan, paꞌinne, ‘Tiyaꞌ ne pangantin lellahin, dayiꞌ kaꞌam sampangun bi iye.’
[7] Manjari dongaꞌ meꞌ budjangin duk memesde payitaꞌanden.
[8] Paꞌin meꞌ budjang mababbalin si meꞌ malalem pikilannen, ‘Urunganun bi kami isellan, peggeꞌ sōng pandem ne payitaꞌan kamihin.’
[9] Saguwaꞌ nambung meꞌ budjang malalem pikilannen, paꞌinde, ‘Kaw gaꞌi umabut si kite bi kēmon. Pī kaꞌam si tinda bu bi melli isellan.’
[10] Na, hap pī ne meꞌ mababbalin melli. Sasangde mapīhin tekka ne pangantin lellahin. Meꞌ lime budjang mamemesin nuhut padiyalem pī dem lumaꞌ pagkawinanin ubus bu dininding ne gawangin.
[11] Gaꞌ du tiggel tekka isab meꞌ budjang sinduwehin duk paꞌinde, ‘O Tuwan, lukahanun koꞌ kami.’
[12] Saguwaꞌ nambung pangantin lellahin, paꞌinne, ‘Gaꞌi lukaku. Gaꞌi kaꞌam takilaleku.’
[13] Hangkan hep,” paꞌin si Isa, “papateng-pateng kaꞌam, peggeꞌ gaꞌi kataꞌuhanbi bang ellew ine atawa waktu ine ku pitu balik.”
[14] “Bang pitu ne ku balik, pagbayaꞌ Tuhanin kuweꞌ inin. Niyaꞌ dambuwaꞌ aꞌa lumengngan hap lahat seddili. Sōng patahalaꞌnen, daꞌakne pī si iye meꞌ daraꞌakannen duk pinangandel weꞌ ne si siye sīnnen.
[15] Sīn pinangandelne si siyehin pinagtuhut duk kataꞌuden. Dambuwaꞌin inurungan weꞌ ne lime ngibu pilak, dambuwaꞌin duwe ngibu, duk dambuwaꞌin da ngibu pilak. Ubus tahalaꞌ ne iye.
[16] Daraꞌakan bakas inurungan lime ngibu pilakin magtawus hap pī maglitu, duk makaꞌuntung iye lime ngibu pilak.
[17] Damikkiyan du isab daraꞌakan taga duwe ngibuhin, makaꞌuntung isab iye duwe ngibu.
[18] Saguwaꞌ dambuwaꞌ bakas inurungan da ngibu pilakin, hap pī magkali bu tinapukan weꞌ ne sīn amunen dem bulak.
[19] “Pagtiggel ne teꞌed, tekka ne balik amu meꞌ daraꞌakan miyaꞌan. Manjari tilewne siye bang ine bakas hininangde duk sīnnen.
[20] Daraꞌakanne bakas inurungan lime ngibu pilakin pī moꞌo untungne lime ngibuhin duk paꞌinne, ‘Tuwan, bakas urungannu ku lime ngibu pilak, makaꞌuntung ku lime ngibu isab.’
[21] Paꞌin amunen si iye, ‘Hāp hininangnun. Daraꞌakan hāp kew duk tapangandelan kew. Tapangandelan kew si meꞌ kuweꞌahat hangkan pangandelku du si kaꞌu alataꞌkun pinaꞌekka. Dayiꞌ kew, patuhut kew si aku magkēg.’
[22] Ubus hap pī isab daraꞌakan bakas inurungan duwe ngibu pilakin. Paꞌinne, ‘Tuwan, bakas urungannu ku duwe ngibu pilak. Makaꞌuntung ku duwe ngibu isab.’
[23] Paꞌin amunen si iye, ‘Hāp hininangnun. Daraꞌakan hāp kew duk tapangandelan kew. Tapangandelan kew si meꞌ kuweꞌahat, hangkan pangandelku du si kaꞌu alataꞌkun pinaꞌekka. Dayiꞌ kew, patuhut kew si aku magkēg.’
[24] Ubus hap pī isab daraꞌakan bakas inurungan da ngibu pilakin duk paꞌinne, ‘Tuwan, kataꞌuhanku weꞌ gaꞌi kew maꞌaseꞌ si aꞌa. Eddoꞌnu dumaꞌin si kaꞌuhin duk paganinu manggaꞌ bakas pagluꞌugannun.
[25] Tinalew ku si kaꞌu, hangkan hap pī ku napukan sīnnun dem bulak. Tiyaꞌ ne sīnnun.’
[26] Nambung amunen, paꞌinne, ‘Kaꞌu iyan daraꞌakan laꞌat duk bulasan. Kataꞌuhannu hatiꞌ weꞌ eddoꞌku dumaꞌin si akuhin duk paganiku manggaꞌ bakas pagluꞌugankun.
[27] Na, weꞌey gaꞌ papīnu sīnkun si bangku duk nganak? Manjari pagbalikku pitu taꞌeddoꞌku siꞌ sīnkun sampay anaknen.’
[28] Manjari paꞌinne si daraꞌakanne seddilihin, ‘Eddoꞌun sīnin amban iye duk pangurungun pī si dambuwaꞌ taga sampūꞌ ngibu pilakin.
[29] Aꞌa tapangandelanin, inurungan pe namba duk ekka manamal si iyehin. Saguwaꞌ manggaꞌi tapangandelanin, bisan kuweꞌahat bakas pinangandel si iyehin, ineddoꞌ du amban iye.
[30] Na, daraꞌakan manggaꞌ niyaꞌ kagunahanne inin, pabukutun bi pinadem lindem. Magmatey meꞌ aꞌahin laꞌi duk magtageꞌot meꞌ impenden.’ ”
[31] Manjari paꞌin si Isa, “Bang aku, Anak Manusiyaꞌin, pitu balik magtuhut duk meꞌ malaꞌikatin kēmon, aku ne magbayaꞌin. Manjari ningkoloꞌ ku si paghukuman.
[32] Kēmon aꞌa amban kabangsa-bangsahan si dunyahin pinagtipun du si harapanku duk pagsapeꞌku siye, kuweꞌ aꞌa magipat hayepin pagsapeꞌne meꞌ bili-bilihin duk meꞌ kambingin.
[33] Meꞌ aꞌa mabentelin papīku si kanawananku duk meꞌ sinduwehin si bibanganku.
[34] Manjari aku, magbayaꞌin, paꞌinku iyan si meꞌ aꞌa si kanawanankun, ‘Kaꞌam, meꞌ kaꞌurungan kahāpan weꞌ Samaku Tuhanin, pitu kaꞌam, patennaꞌ tuꞌu si pagbayaꞌanku peggeꞌ inin andang pinanyap para si kaꞌam kemuwe tagnaꞌ dunyahin.
[35] Peggeꞌ bakas inusan ku bu pinakan ku weꞌ bi, duk lekkakan ku bu inurungan ku ininum weꞌ bi, aꞌa liyu-liyu ku bu inaddatan ku weꞌ bi.
[36] Gaꞌ niyaꞌ semmekku bu pinasemmekan ku weꞌ bi, bakas ku saki bu inipat ku weꞌ bi, bakas ku kinalabusu bu binisita ku weꞌ bi.’
[37] Ubus magpaꞌin iyan meꞌ aꞌa bentel laꞌi si kanawanankun, ‘Tuwan, sumiyan kew bakas takite kami inusan duk urungan kami kew kinakan, atawa lekkakan duk urungan kami kew ininum?
[38] Sumiyan kew takite kami kuweꞌ aꞌa liyu-liyu duk inaddatan kew weꞌ kami? Sumiyan kew kanggaꞌan semmek duk inurungan kew weꞌ kami?
[39] Duk sumiyan kasakinun duk pangalabusu si kaꞌuhin duk pī kami misita kaꞌu?’
[40] Manjari aku, magbayaꞌin, nambung du ku, paꞌinku, ‘Sabennal akahante kaꞌam, sumiyan-sumiyan hinangbi inin si meꞌ tindegku madiyawaꞌ pagaꞌanen, hinangbi du teꞌed si aku.’
[41] “Ubus paꞌinku du iyan si meꞌ aꞌa si bibangankun, ‘Kaꞌam, meꞌ pagmulkaꞌan Tuhanin, tahalaꞌ kaꞌam amban aku duk pī kaꞌam dem ebbut narkaꞌ pinanyap andang para si nakuraꞌ seyitanin duk si meꞌ daraꞌakannen.
[42] Peggeꞌ bakas inusan ku bu gaꞌ ku urunganbi kinakan, lekkakan ku bu gaꞌ ku urunganbi ininum.
[43] Aꞌa liyu-liyu ku bu gaꞌ ku addatanbi, gaꞌ niyaꞌ semmekku bu gaꞌ ku urunganbi, bakas ku saki duk dem kalabusu bu gaꞌ ku bisitabi.’
[44] Ubus tilewde du ku iyan, paꞌinde, ‘Tuwan, sumiyan kew takite kami inusan atawa lekkakan? Sumiyan kew takite kami kuweꞌ aꞌa liyu-liyu, atawa gaꞌ niyaꞌ semmeknu atawa saki atawa dem kalabusu bu gaꞌ kew tabangan kami?’
[45] Ubus nambung ku iyan, paꞌinku, ‘Sabennal akahante kaꞌam, bang gaꞌ tabangbi meꞌ tindegku madiyawaꞌ pagaꞌanen, aku du gaꞌ tinabangbin.’
[46] Manjari meꞌ aꞌa inin pinadem narkaꞌ du duk magtiksaꞌ siye salama-lama, saguwaꞌ meꞌ aꞌa mabentelin pinapī du si surgaꞌ duk niyaꞌ umulde salama-lama.”