[1] Manjari pagubus miyaꞌan bissā si Isa, tahalaꞌ iye amban Jalil duk hap pī iye si meꞌ kalahat-lahatan laꞌi si Yahudiya si lipag boheꞌ Jordan.
[2] Banes teꞌed aꞌa nuhut iye duk pinakoleꞌ weꞌ ne meꞌ aꞌa masakihin laꞌi.
[3] Niyaꞌ meꞌ Pariseo patapit pī si iye duk panguhi-nguhide iye, tilewde iye, paꞌinde, “Dem saraꞌ, makajari ke bang aꞌahin timananne andanen bisan ine jānnen?”
[4] Nambung si Isa, paꞌinne, “Gaꞌ ke bakas tabatsabi dem kitab weꞌ tagnaꞌ pamapanjari Tuhan manusiyaꞌin, pinapanjari siye weꞌ ne lella duk dende
[5] duk paꞌin Tuhanin, ‘Hangkan hep tahalaꞌ lellahin amban saꞌi-samanen bu padambuwaꞌ iye si andanen duk bakas duwehin magdambuwaꞌ baran ne.’
[6] Manjari dumaꞌin ne siye duwe baran,” paꞌin si Isa, “saguwaꞌ dambuwaꞌ baran ne. Hangkan subey teꞌed gaꞌi magbutas aꞌa bakas pinagdambuwaꞌ weꞌ Tuhanin.”
[7] Manjari paꞌin meꞌ Pariseohin si iye, “Na, weꞌey dem saraꞌ pangandūsan si Musa lellahin milmahan sulat pagbutasan ubus makajari ne timananne andanen?”
[8] Paꞌin si Isa, “Peggeꞌ gaꞌi kaꞌam ngatu nuhut toloꞌ, hangkan dinūsan kaꞌam weꞌ si Musa nimanan andabin. Saguwaꞌ amban tagnaꞌ dumaꞌin sa iyan.
[9] Akahante kaꞌam, sine-sine nimanan andanen bu gaꞌ du bakas magkadupangan andanen bu maganda iye seddili, magjina iye.”
[10] Manjari paꞌin meꞌ tindegnen si iye, “Bang sa iyan magella-andahin, hāp pe gaꞌi maganda.”
[11] Saguwaꞌ paꞌin si Isa, “Gaꞌi kēmon makatuhut iyan, luwal hadja meꞌ kaꞌurungan basag weꞌ Tuhanin.
[12] Magseddili-seddili jānnen hangkan gaꞌi maganda meꞌ aꞌahin. Niyaꞌ meꞌ aꞌa gaꞌi makajari maganda peggeꞌ niyaꞌ sallaꞌde amban dem betteng. Niyaꞌ isab meꞌ aꞌa bakas kinapun weꞌ aꞌa. Niyaꞌ isab meꞌ aꞌa gaꞌi maganda sabab pinikilden hadja paghinangde si Tuhanin. Sine-sine makatuhutne, subey ne tuhutne usihatku inin.”
[13] Manjari niyaꞌ meꞌ aꞌa moꞌo meꞌ anakde pī pu si Isa supaya tabettadne tangannen si siye bu pākuhanne kahāpan amban Tuhan. Saguwaꞌ inamāhan meꞌ aꞌahin weꞌ meꞌ tindeg si Isahin.
[14] Saguwaꞌ paꞌin si Isa, “Ambat pitu si aku meꞌ mākanakin, duk daꞌa siye saggaꞌun bi. Peggeꞌ aꞌa kuweꞌ mākanakin ngatu du pinagbayaꞌan weꞌ Tuhanin.”
[15] Manjari binettad weꞌ ne meꞌ tangannen si siye. Ubus bu tahalaꞌ ne iye.
[16] Manjari niyaꞌ dambuwaꞌ aꞌa pī pu si Isa duk paꞌinne, “Tuwan, ine hinangan hāp subey hinangku supaya niyaꞌ umulku salama-lama?”
[17] Paꞌin si Isa si iye, “Weꞌey tilewnu bang ine mahāpin? Tunggal du Tuhanin mahāpin. Bang kew mabayaꞌ taga umul salama-lama, tuhutun meꞌ pangandaꞌakan Tuhanin.”
[18] Paꞌin lellahin, “Pangandaꞌakan inggehin?” Paꞌin si Isa, “Daꞌa kew monoꞌ; daꞌa kew magjina; daꞌa kew nangkew; daꞌa kew naksiꞌ gaꞌi bennal;
[19] pagaddatanun saꞌi-samanun; duk subey kalasahannu saweꞌnun kuweꞌ pangalasanu dinun.”
[20] Paꞌin lellahin, “Tatuhutku ne iyan kēmon. Ine pe subey hininangkun?”
[21] Paꞌin si Isa, “Bang kew mabayaꞌ weꞌ hāp kew teꞌed, pī kew pabellihanun kēmon alataꞌnun bu pangurungun ulinen si meꞌ mamiskinin. Manjari niyaꞌ du iyan alataꞌnu laꞌi si surgaꞌ. Pagubus, balik kew pitu, nuhut kew aku.”
[22] Pagkale lellahin inin, tahalaꞌ iye dukka, peggeꞌ ekka teꞌed alataꞌne.
[23] Ubus paꞌin si Isa si meꞌ tindegnen, “Sabennal akahante kaꞌam, asal hunit teꞌed meꞌ madayahanin pinagbayaꞌan weꞌ Tuhan.
[24] Aweꞌ, akahante kaꞌam, mura pe untaꞌin palabey si lowang dalum amban aꞌa dayahanin ngatu pinagbayaꞌan weꞌ Tuhan.”
[25] Pagkale meꞌ tindegnen inin, ulaliꞌ siye manamal duk paꞌinde, “Bang sa iyan, sine ne tapī si surgaꞌin?”
[26] Manjari mayam si Isa si meꞌ tindegnen duk paꞌinne, “Bang manusiyaꞌ gaꞌi teꞌed makajari, saguwaꞌ bang Tuhan, gaꞌ niyaꞌ hunit si iye. Tahinangne kēmon.”
[27] Manjari missā si Petros, “Payamanun kami inin,” paꞌinne, “ubus ne ambanan kami kēmon-kēmonin duk nuhut ne kami kaꞌu. Ine panumbas kamihin?”
[28] Paꞌin si Isa, “Sabennal akahante kaꞌam, bang aku, Anak Manusiyaꞌin, ningkoloꞌ ne magbayaꞌ si dunya baꞌahuhin, kaꞌam meꞌ tindegku sampuk-duwehin ningkoloꞌ du isab magbayaꞌ si sampuk-duwe bangsa tubuꞌ Israꞌilin.
[29] Bang niyaꞌ aꞌa ngambanan lumaꞌnen atawa meꞌ pungtinaꞌinen lella-dende atawa saꞌi-samanen atawa meꞌ anaknen atawa bulaknen, bang ambananne meꞌ inin sabab lasane si akuhin, asal tumbasan Tuhanin iye paꞌekka, duk inurungan du iye umul gaꞌ niyaꞌ tamananne.
[30] Saguwaꞌ ekka meꞌ dumehellu kuweꞌituhin dumambuli du si pasōngan, duk ekka dumambuli kuweꞌituhin dumehellu du si pasōngan.”