[1] Kēmon banyagaꞌ sandel pu si Isa Almasi subey kimmatande teꞌed weꞌ talep amuden pahadjede, supaya gaꞌi Tuhanin binissāhan laꞌat weꞌ meꞌ aꞌa duk gaꞌi diniyawaꞌan toloꞌ tinuhutten bi.
[2] Bang banyagaꞌin duk amunen saliꞌ-saliꞌ sandel pu si Isa Almasi, daꞌa banyagaꞌ miyaꞌan magpikil weꞌ gaꞌi ne iye subey tinalew si amunen peggeꞌ kuweꞌ ne du siye magpungtinaꞌi. Bisan miyaꞌan subey pe pahāpne teꞌed paghinangnen peggeꞌ aꞌa paghinanganne miyaꞌan kuweꞌ iyehin isab sandel pu si Isa Almasi, duk peggeꞌ malasa isab iye si amune miyaꞌan. Iye inin subey panoloꞌnu si siyehin duk daꞌakun teꞌed tinuhut si siye.
[3] Bang niyaꞌ luꞌu magtoloꞌ bu seddili panoloꞌnen amban meꞌ toloꞌ mabennal amban Panuhutanten bi Isa Almasi duk bang meꞌ toloꞌnen gaꞌi maguyun duk toloꞌ makaboꞌo kite tudju Tuhanin,
[4] na, aꞌa iyan abbuhan duk gaꞌ niyaꞌ kataꞌuhanne. Iye luwal kabayaꞌannen magsuꞌal duk magjawab sabab bissā. Kaꞌujudanne inin niyaꞌ maglindi-lindi, niyaꞌ magsasaꞌ-sinasaꞌ, niyaꞌ maglimut-ilimut duk gaꞌi ne siye magandel-inandel.
[5] Meꞌ aꞌa inin luwal ne magsaggaꞌ peggeꞌ gaꞌi ne tewwaꞌ pamikilden duk gaꞌi ne kataꞌuhande toloꞌ mabennalin. Kannalde weꞌ bang siye magāgama ngandayahan siye.
[6] Bennal isab, bang aꞌahin nuhut kinabayaꞌan Tuhanin kuweꞌ dayahan teꞌed iye bang magsukul iye ine-ine pangurung Tuhanin iye.
[7] Panganak kite si dunya inin, niyaꞌ ke taboꞌote? Gaꞌ niyaꞌ. Damikkiyan du isab gaꞌ niyaꞌ taboꞌote bang kite matey.
[8] Hangkan hep basta niyaꞌ du kakante duk semmekte subey ne kite magsukul.
[9] Saguwaꞌ meꞌ aꞌa mabayaꞌ magdayahin, mura siye taboꞌo sassat magduse. Kuweꞌ bantuk ileppas siye weꞌ napsude si bayuꞌ-bayuꞌan kadupanganin duk meꞌ makapagkaꞌat siyehin. Ujudnen magmula du siye dumaꞌin hadja si dunya inin saguwaꞌ sampay si ahilat.
[10] Peggeꞌ napsute si sīnin iye inin poꞌon kēmon bayuꞌ-bayuꞌan laꞌat hininang weꞌ manusiyaꞌ. Niyaꞌ meꞌ aꞌa hawal napsude si sīnin, ilebbahan weꞌ de sandelde pu si Isa Almasihin duk kaꞌujudannen ekka kasusehan tekka si siye.
[11] Saguwaꞌ kaꞌu, Timoteo, peggeꞌ tapeneꞌ kew weꞌ Tuhanin maghinang si iye, patala kew amban kēmon malaꞌat inin. Iye subey inapasnun kawul-piꞌil mabentelin, duk maghinangan sasuku kinabayaꞌan Tuhanin. Pabasagun sandelnu pu si Isa Almasihin, kalasahanun pagkasinun duk pahāpun addatnun si siye. Bisan kew dem kasigpitan sandalanun hadja.
[12] Maggeꞌes kew teꞌed nuhut Tuhanin duk tepe si kaꞌu du umul gaꞌ niyaꞌ tamanannen. Essebun weꞌ hangkan kew tapeneꞌ weꞌ Tuhanin supaya kew kaꞌurungan umul inin. Duk bakas magbennal kew si harapan meꞌ saksiꞌ ekka weꞌ sandel kew pu si Isa Almasi.
[13] Kuweꞌitu niyaꞌ panessaꞌku kaꞌu si pakalehan Tuhanin iye mangurung umul si kēmon bayuꞌ-bayuꞌan maꞌellumin duk si pakalehan Isa Almasi isab, iye bakas mabahani mamissā pu si Gubnul Pontiyus Pilatusin pasal mabennal sabab Tuhanin. Inin panessaꞌku si kaꞌuhin:
[14] tuhutun teꞌed kēmon pangandaꞌakan Tuhan kaꞌuhin supaya gaꞌi sagetan laꞌat duk supaya gaꞌi diniyawaꞌan toloꞌ Tuhanin. Tuhutun teꞌed samantaꞌan gaꞌi taꞌabut waktu pabalik Panuhutanten bi Isa Almasi pitu si dunya.
[15] Pagtaꞌabut waktuhin, pinapitu du iye balik si dunya weꞌ Tuhanin. Tuhanin hadja subey pinudjihin duk iye dendangan magbayaꞌin. Iye magbayaꞌ si meꞌ magbayaꞌin duk iye Panuhutan meꞌ panuhutanin.
[16] Iye hadja dendangan manggaꞌi mamateyin. Patennaꞌannen dem sahaya gaꞌi katumapitan. Gaꞌ niyaꞌ bakas ngite iye duk gaꞌ teꞌed niyaꞌ makakite iye. Pataꞌ teꞌed iye pinahadje duk iye asal mabalakatanin gaꞌ tamananne. Amin.
[17] Pasal meꞌ aꞌa madayahan maluꞌu masandel pu si Isahin, toloꞌanun siye weꞌ subey siye gaꞌi maglangkew atey sabab meꞌ alataꞌde si dunya inin. Subey siye gaꞌi ngandel si alataꞌden peggeꞌ gaꞌi du layun. Subey Tuhanin pangandelanden peggeꞌ sayuꞌ iye ngurungan kite bi kēmon bayuꞌ-bayuꞌan mahāpin supaya kite bi kēgan.
[18] Toloꞌanun isab siye weꞌ subey siye luwal maghinang hāp si saweꞌde, manjari, meꞌ hinangande mahāpin ne alataꞌden. Akahanun siye weꞌ subey siye gaꞌi liskutan saguwaꞌ subey siye sayuꞌ bang siye ngurung si meꞌ kasukalanin.
[19] Bang hinangde inin, kuweꞌ du siye ngennaꞌ alataꞌde si surgaꞌ duk gaꞌi teꞌed inin lepas. Duk inurungan isab siye umul matoꞌohin, hātinen umul salama-lama.
[20] O Timoteo, amey-amey banteyanun teꞌed kēmon meꞌ toloꞌ bakas pinangandel si kaꞌuhin. Halliꞌanun meꞌ pagbissā duk pagsuꞌal gaꞌ niyaꞌ gunane duk gaꞌi makasulut Tuhanin. Paꞌinde kataꞌu koꞌ miyaꞌan bu dumaꞌin.
[21] Peggeꞌ niyaꞌ magpaꞌin weꞌ taga kataꞌu miyaꞌan ne siye, bu kasuddahannen gaꞌi ne kahagadde toloꞌ mabennal kinahagadten bi. Karayaw kēmon kaꞌam ipat Tuhanin du. Wassalam