[1] Sulat inin amban aku, si Paul. Kawakilan ku weꞌ Isa Almasi magmahalayak lapalnen. Kawakilan ku amban pangandaꞌakan Tuhanin, iye manimbul kitehin bi, duk amban pangandaꞌakan Isa Almasi isab, iye pangase-ngasehanten bi.
[2] Pasampayku sulat inin piyu si kaꞌu, Timoteo, peggeꞌ kuweꞌ ne kew anakku lasiyaꞌ peggeꞌ tinoloꞌan kew weꞌ ku sandel pu si Isa Almasi. Karayaw kew luwal ipat Samate bi Tuhanin duk Isa Almasi, Panuhutanten bi. Karayaw kew isab kaꞌaseꞌande duk pasanyangde dem ateynun.
[3] Manjari, Timoteo, balikku bakas panessaꞌku si kaꞌu sōng patahalaꞌku hap Makedoniyahin. Amey-amey daꞌa kew dahuꞌ usaꞌ billuꞌu amban Epesus supaya tapagesnu meꞌ aꞌa maluꞌu magtoloꞌ meꞌ toloꞌ manggaꞌi mabennalin.
[4] Daꞌakun siye padeheng magsuwi-suwi meꞌ kissa hinang-hinang aꞌa hadja. Duk subey isab siye padeheng luwal magsuwi-suwi sabab meꞌ ēn kapapuꞌande meꞌ pangkat-mamangkatin. Sabab meꞌ suwi-suwi miyaꞌan kaꞌujudannen magjawab hadja siye iyan. Gaꞌi du iyan makatabang siye supaya tatuhutde kinabayaꞌan Tuhanin. Saguwaꞌ iye makatabang siyehin sandelde pu si Isa Almasihin.
[5] Hangkan kew sessaꞌanku inin peggeꞌ kabayaꞌankun weꞌ kēmon masandel pu si Isa Almasihin malasa teꞌed. Malasa teꞌed siye bang sutsi ateyden duk tabugtuꞌde dem ateyde weꞌ gaꞌ niyaꞌ sallaꞌde si Tuhan duk bang asal sandel teꞌed siye pu si Isa Almasi.
[6] Niyaꞌ meꞌ aꞌa gaꞌi ne inin tuhutde duk iye bahanden luwal magjawab gaꞌ niyaꞌ kagunahanne.
[7] Paꞌinde weꞌ siye meꞌ guru si saraꞌ Tuhanin bu paꞌin gaꞌi du tahātide meꞌ binissāden duk meꞌ inusihatde mabasag si meꞌ aꞌahin.
[8] Kataꞌuhante weꞌ saraꞌ Tuhan tasulat si Musahin hāp bang patut panganggunahan iyehin.
[9] Peggeꞌ subey tasabutte weꞌ saraꞌin dumaꞌin hep pangurung si meꞌ aꞌa bentel saguwaꞌ si meꞌ aꞌa ngalanggalan saraꞌ duk meꞌ aꞌa gaꞌi nuhut toloꞌ, meꞌ aꞌa gaꞌi talew si Tuhan duk meꞌ aꞌa dusehan. Pangurung isab si meꞌ aꞌa gaꞌi magmātabat si Tuhan duk hinangde hadja dagey Tuhanin, si meꞌ aꞌa mapatey saꞌi-samade atawa pagkaside manusiyaꞌin. Siye inin pangurungan saraꞌ Tuhanin.
[10] Damikkiyan isab si meꞌ aꞌa magjina, meꞌ aꞌa pagbaꞌisande pagkaside lella atawa pagkaside dende, meꞌ aꞌa niggew pagkaside bu pagsīnde, meꞌ aꞌa dustaꞌan, meꞌ aꞌa naksiꞌ bisan gaꞌi toꞌo duk sasuku ne maghinangan kuntara si toloꞌ mabennalin.
[11] Meꞌ toloꞌ inin magsaliꞌ duk toloꞌ dem aka-aka mahāp sabab si Isa pinangandel Tuhan si akuhin dinaꞌak minahalayak si meꞌ aꞌa. Aka-aka mahāp inin pinakitaꞌu weꞌ Tuhan pinudjihin duk iye poꞌon kēgin.
[12] Magsukul ku pu si Isa Almasi, Panuhutanten bi, iye mangurungan aku basagin supaya tahinangku hinangkun. Magsukul ku si iye peggeꞌ kinimmatan ku weꞌ ne kapangandelan duk kawakilan ku weꞌ ne maghinang si iye.
[13] Wakilan Isa Almasi ku bisan ne matuꞌuhin binissāhan iye weꞌ ku laꞌat duk bininasa isab weꞌ ku meꞌ tindegnen duk pinaꞌiyaꞌ weꞌ ku. Saguwaꞌ kaꞌaseꞌan ku weꞌ ne bisan kuweꞌ miyaꞌan hininangkun peggeꞌ gaꞌ pe ku miyaꞌan sandel si iye hangkan gaꞌ kataꞌuhanku weꞌ laꞌat meꞌ hininangku miyaꞌan.
[14] Duk asal hadje lasane duk aseꞌne si akuhin duk tinabangan ku weꞌ ne sandel si iye. Tinabangan ku isab weꞌ ne malasa si meꞌ pagkasikun. Asal kuweꞌ inin du bang magdambuwaꞌ ne kite duk Isa Almasi.
[15] Asal toꞌo pinaꞌin inin duk subey teꞌed kinahagad, weꞌ Isa Almasi bakas pitu si dunya supaya tatimbulne meꞌ aꞌa dusehanin. Duk amban kēmon aꞌa miyaꞌan aku ne tamanan madusehanin.
[16] Saguwaꞌ bisan kuweꞌ miyaꞌan dusekun kaꞌaseꞌan ku teꞌed weꞌ Tuhanin duk inampun ku weꞌ ne supaya tapakite Isa Almasi si meꞌ aꞌa weꞌ iye asal matuyuꞌ si meꞌ madusehanin. Hinangne ku pamintangan si meꞌ aꞌa masandel si iye si pasōnganin duk inurungan umul siye gaꞌ tamananne.
[17] Pahadjete bi Tuhan dambuwaꞌ-buwaꞌin. Iye magbayaꞌin salama-lama. Gaꞌi iye matey. Gaꞌi iye takite manusiyaꞌ. Pataꞌ iye pinudji duk pinahadje salama-lama. Amin.
[18] Na, Timoteo, anakku, inin panessaꞌku si kaꞌuhin: essebun meꞌ pinaꞌal sabab kaꞌu weꞌ meꞌ aꞌa pinabissā bissā Tuhanin. Essebun meꞌ bissā miyaꞌan duk hinangun teꞌed pahāp-hāp hinang pinasukuꞌ Tuhan si kaꞌuhin duk bantahanun teꞌed sasuku malaꞌatin.
[19] Patetegun sandelnu pu si Isa Almasihin duk daꞌa kew maghinangan laꞌat duk gaꞌi sasew pikilannun. Peggeꞌ niyaꞌ meꞌ aꞌa pagtuꞌurande maghinangan bisan du kataꞌuhande dem pikilande weꞌ laꞌat hinangan miyaꞌan. Hangkan magkaꞌat ne sandelde si Tuhanin.
[20] Sa miyaꞌan du Himunus duk Iskandal duk meꞌ sinduwehin pe. Pinasagadan ne siye weꞌ ku boꞌo nakuraꞌ seyitanin supaya mintang siye weꞌ subey gaꞌi bissā-bissāhande Tuhanin.